Joh 14 | WNU | STEP | Yisas ende qamb ne wonou imbigau yurau eng gugum wurinob qamar: “An misir qebebi igub me abar, an Qenut oabig gab eng yet gor oabigar.

‏ John 14

14:1-14 Taint iroau werei eng Yisas

1 Yisas ende qamb ne wonou imbigau yurau eng gugum wurinob qamar: “An misir qebebi igub me abar, an Qenut oabig gab eng yet gor oabigar. 2 Tain munai mor eng munai tumbigi irou igo. Ue ende qi eng qo aninob qamamei qi. End ye gigit irab munai tumbigi qei musitarib qamb iribam. 3 End ne ye gigit irab munai tumbigi musitar wogub bo igeser darab anamar irine ne an ye igoum eng imbig ne yonob igoruboumon. 4 Ye munai ginam iribam eng an gor maigas at irunon eng see an imbigine igoumon eng.”

5 Ende qamara wonou imbigau yurau end ger unum Tomas, eng der Yisas nob qamar: “Barai, ne eret iriner qi eng in sir ue. In bo maigas at ne irinen werei eng imbig dioruboun?” 6 Ende qamara Yisas taui qamar: “An diorunon werei eng ye gari. Ne qob apand eng ne igomot igamau qanam eng gor ye gari. End ne munon ger Tain qani irib qamb eng werei eng ye gari. 7 See ye mom yiimbig gab eng Tain gor mom imbigoumon, ye mom yiimbigoumon end Tain gor ende imbig gab eng mom geau gas ende oboumon.”

8 Ende qamara wonou yurau end ger unum Pilip der nob qamar: “Barai, Tain, quran eng in musub inimbiga in mom musub qoyametoruboun.” 9 Ende qamara Yisas qamar: “Pilip, ye qenen aninob igoum end qo yiimbigonei quraum eng bo sabar me yiimbig quran ne? Munon ger ye yegab igo eng Tain geau gas ende gari. Eng ne bo sabar meimet qamb “Tain inimbiga gun” quran? 10 Pilip, ne yet me oabigan qiyo? Ye Taint igimine Tain wo yet igo.” Ende qamb gugum wuri nob qamar: “Ye qob aninob qamb igoum eng yonou misirt ue, Tain yiimbiga wonou sarau eng ye ebet igoum. 11 Tain yet igama ye Taint igoum end yet oabigar. Ue gab eng Tain ye yenogursia sarau qeretutnob oboum eng qas gab oabigar.

12 Apand aninob quraum, ye Tain qani irinei igama munon ger yet oabig sarau ebeiner eng ye sarau ebine aba gas ende ebeiner eng ye bais yetanami ebeiba. 13 Ende ebet ne an mi geret quguraget gab eng ye yegab-yegab qebi qamarari annonogursieribam. Ende ebine Tain wo yet unum qiribiten eng diban igoriba. 14 End ne quraum eng, ye yegab mi geret qomorunon eng anit ebeibam.”

14:15-31 Yisas Igomurur qau imurimb qamb qamarei

15 Ende qamb qamar: “An ye yeqenunget gab eng yonou qomon eng toat igoarar. 16 Ende ebet igorunon eng ye anit igub Tain nob qemerine Munon annonogursieriner eng Qenu wonou Igomurur qau qob apand animbiginer eng anit imurima darab annonogursi qenen anamar igoriba. 17 Munon ai qent e wuri imbig gab me baunorei. An gari imbigumon end anopuri ten igoriba.”

18 Ende qamb qamar: “Ye mom me an wogub quinei, ye bo anit deribam. 19 Bais umi-umi ende at munon ar gugum bo me yegunorei. Ego an yet oabig igoumon end yegouboumon. Ye igomot der bugumine an yegab yet oabig yetoat igoumon end an gor igomot igoruboumon. 20 Qen eng gab ye Tain nob igorin eng an yiimbiguboumon. Yiimbig ne an yenob igorunon eng imbig ne ye aninob igorin eng imbig ende obouboumon,” ende qamarei. 21 Ne bo qamar: “Munon ger ye qomon quraum eng toa gab eng, ‘qo, munon eng ye mom yeqenunga’ ende qemeribam. Munon ger ye yeqenungeiner eng Tain wo gor munon eng qenungeiba. Ende aba yonou gor munon eng qenunget ne yonomi dibesierine yiimbigiba.” ende qamarei.

22 Ne Yudas ger, Yudas Iskariot ue, eng der Yisas nob qamar: “Barai, nonomi maigas at init dibesi ne munon ar gugum wuriwegiban?” 23 Ende qamara Yisas taui qamar: “Munon ger sig-sig mom yeqenunget eng yonou qob eng mom toat igoriba. End Tain munon eng qenungeiba. Ende aba in Tain nob ombur qenen der munon eng nob igoruboun. 24 A munon ger ye me yeqenunget eng ye qob eng me tooinerei. Ye qob qemerine igub igoumon eng yonou misirt me qamb igoum, yonou Tain yiimbiga qamb igoum end.”

25 Ende qamb qamar: “Ye aninob igoum end qob eng gagar aninob qamb igoum. 26 Ye me yegab eng munon ger annonogursi igoriner eng Igomurur qau. Tain ye yegab-yegab Igomurur qau anit imurima deriner eng wo mi gugum animbigiba. Ye mi see aninob qemerine nasi wogunon eng bo anseara bo misirt igub qamb igoruboumon.”

27 Ende qamb qamar: “Yonou oau mein eng anit igoriba. Yonou oau mein eng munon ai qent wurinou oau mein eng gas ende ue, yonou anit isiner eng qenen igoriba. An ende igo ne misir tumbet ne yari ende me abar. 28 End ne qo aninob quraum eng, anwogub irin eng qitet me igorinei, bo an qani deribam. Qoan ye yeqenunget igoumon end irine an yet mismisiruboumon. Tain wo sig aib ye yetanamima. 29 Mi eng gagar aninob quraum eng qen geret ende yariba, end ye gigit aninob quraum. Qen geret mi quraum eng irimanima gab an io qomoruboumon.

30 Ye qob degen bo me aninob qemerinei. Munon ai qent wurinou baraitari eng di igo. Wo diab ye me yebumaiminerei. 31 End ne munon ag e gugum ye Tain sig mom qenungoum eng imbigar qamb End ne Tain wo mi gugum eb qamb yonob qamb igo eng ye mom toat ebet irimanimbam.” Ende qamb qamar: “Der naget mi bayar isun,” ende qamarei.