Luke 10

Zezu aluma bebingi bedzi meku untsami ne bebingi bole

1Yumana, Kunwu atobo bebingi bedzi meku untsami ne bebingi bole, yedzi eluma bebingi bole ne ubandaka se bingundu ne bibuma byesi byedzi mene itsetse. 2Zezu ne bangu ati: «Buka ya yele, ipoko dzanawen ni bedzandzi ute, sunwunlayi ne kunwu we buka aluma bedzandzi beyitsi ne uya dzandza. 3Tsekayi, meluma beyi nda bana be bindonvene tima ye benyama bekanve. 4Ni beyi ti batse, beyi nde bapa bedolo, beyi nde bapa myanza ne bekotoko, beyi nde sita ne peyi ne unyusele batu. 5Ndili ye beyi binyindzile se ndaku mbotu, uve beyi babanda tanda ati: “Itavu dzedze se ndaku yi.” 6Ti yadze ne mutu widzi ne itavu se ndaku yayu, itavu dzavuka nedzi, tinde vavu itavu dzavutse ne beyi. 7Ti batu bidzi se ndaku yayu bayamba beyi, dzayi wawu, dzaayi bila, notayi bye bikaba beyi, undzandzi uve abomo mewuta, beyi nde veletse ne nyidzile se mendaku moko, 8ndili ye beyi bikalwe se ngundu yotu, ti bangu bayamba beyi, dzaayi bila bye bikaba beyi. 9Sakayi mibedzu mye ngundu yayu, tandayi ne bangu ati, Ukani ve Nzambi vatsindene kone bangu. 10Ndili ye beyi bidzanga se ngundu yotu, ti batu be ngundu nde yamba beyi, tsekayi se bibuma bye mikuka beyi betanda bangu ati. 11Besu betemise iwulu dze ngundu ye beyi, dze menata se metambi me besu, besu bevutise beyi ndzangu. Ni uve beyi bayiba ati, Ukani ve Nzambi vedzi kone beyi.» 12«Metanda beyi vusa ve Nzambi itse pama batu, umpami nwen ngundu yi nwetse takwe umpami nwen sodome kanve.»

13«Ndoko ne beyi batu be ngundu ye Kolazi, ndoko ne beyi batu be ngundu ye Betsayida. Nzambi apika manvu meneni kwele ye beyi, ni kaka kwele ye batu be ngundu ye Tili ne Sidon. ni Nzambi abiki pika manvu meneni mamu Tili ne Sidon, batu babu bebiki nyuwen ne dzika manvu mebi, ne uyikwene kwele ye Nzambi. Tadzi bangu beswa mikanda mye pusu, ne usuwaka mesuyiki kule nyulu.» 14Unpami nwen batu be Kolazi ne be Betsayida nwetse takwe nwen batu be Tili ne Sidon. 15Ni beyi batu be ngundu ye kapenayum, beyi betsimene nati, beyi betse takwe boko ndzii ikulu? Ndika, wetse sundaka ndzii se ibila dze nde sele. 16Zezu avele tanda ne bebingi bedzi ati: «Ndili ye mutu iyuka beyi, ame yuka wawu ni me. Ni mutu take yamba beyi, ame lewe wawu ni yambe me. Wende yamba me, ame lewe wawu ni we meluma me.»

Bebingi be Zezu baye vutse

17Yumana, bebingi be Zezu meku untsami ne bebingi bole, baye vutse kwele ye Zezu ne itsisa ati: «Kunwu, ne mimbiti mye kuna besu, ndili ye besu biwowe ne myangu ne kunvu yowe.» 18Zezu akalule ne bangu ati: «Meyene Satan ayinga ikulu ananwen nda ngandzi tawelime. 19Yukayi, makaba beyi singa ye ulanda kule betadzi ne bedzinga ne undzangite singa ye mimbiti. Nde yi tuka yukuvuse beyi mbonzi. 20Ni beyi nde tsisa ne vavu, ne mimbiti mikuna beyi, ni tsisayi utsina ne Nzambi atende mekunvu me beyi ikulu.»

Zezu akumise Nzambi

21Ndili mene mbotu, Fudzu ye Umpene ya kaba Zezu itsisa. Zezu ati: «Tata wami, Kunwu we ikulu ne sendze, mekaba we live ne manvu mowe mesodze bekani ne batu be utsengu, yayu walaka mangu ne bana bete. Ee Tata, we mene ni we metondo vavu. 22Tata wami akaba me byesi, nde mutu wiyiba me Nwana wibaka. Wiyiba me si Tata, nde mutu wiyiba Tata, si me Nwana we ibaka wiyiba Tata. Ni me Nwana we ibaka mefumba laka Tata ne boko, yayu ne bangu beyiba wangu.» 23Yumana, ye Zezu eyikwene kwele ye bebingi bedzi, awowe ne bebingi bedzi ati: «Beyi bedzi se itsisa ne uyene me beyi biyene.» 24Metanda beyi: «Batu be Nzambi beyitsi ne bekani befumba yene me beyi biyene, ni bangu beke yene, bangu befumba yuka me beyi biyuka ni bangu beke yuka.»

Kunvu ye mutu we manvu meve we Samali

25Unlakisi we bitsila motu awasa dendise Zezu unlanvu. Wangu atelime atanda ne Zezu ati: «Kunwu, mepika nivi ne ubomo libiku le nde siya?» 26Zezu nedzi ati: «Me Moyisi etende se sangunvu ye bitsila bye Nzambi ni meza? Ndili yowe itangala sangunvu ye bitsila, mowe iyuka ni meza?» 27Mutu mene akalule nedzi ati: «Batende se bitsila bye Moyisi.» Ati: «Uve watondo Kunwu wowe Nzambi ne unlima nwowe nwesi, ne nyulu yowe, ne singa yowe, ne utsengu vowe vesi, uve watondo boko nda witondo nyulu wowe mene.» 28Zezu nedzi ati: «We meyiba kalule. Pika vavu yayu we bomo libiku le unbu ne unbu.» 29Ni unlakisi we bitsila efumba ni bomo mbingu. Yedzi isunwule ne Zezu ati: «Moko nami niza?» 30Zezu akalule nedzi ati: «Mutu motu ayinga Zeluzaleme ne utse Zeliko. Ye mipita mye lwanise wangu. Bangu baboko wangu byesi, babuma wangu luba, bangu batse ye bangu bedzika wangu tima ye libiku ne liku. 31Kunwu we ndaku ye Nzambi, edze ne suta se peyi mene. Yedzi eyene mutu mene, wangu abanvule asuta kwele. 32Ne mutu motu we ikaka dze Levi awunze buma mene, ayene mutu we beyukuvuse mbonzi, nedzi abanvule asuta kwele. 33Ne mutu we yinga ilongo dze Samali, adzanga kone we beme yukuvuse mbozi. Wangu ayene mutu mene, ayene wangu tsesi. 34Wangu atsindene konedzi, asuwaka madzi ne melaku se mepindzi medzi akutaka ne usaka wangu, amana vavu, atumbidze wangu atedze kule bodzi yedze ne bapa wangu, yedzi etse nedzi se ndaku ye benzenze ne ubata, ne usaka wangu.» 35Vusa ve senwen, mutu we ilongo dze samali akaba bepitisi bole be bedolo ne kunwu we ndaku ye benzenze, wangu nedzi ati: «Bata me mutu yu. Ti wayisa bedolo boko kule bami mekaba we, ti maya, mavutise.» 36Zezu asunwunle ne unlakisi we bitsila ati: «Se metsimini mowe, tima ye bedzungi besatu ba, mutu we mipita mye buma luba, widzi moko nedzi niza?» 37Unlakisi we bitsila bye Nzambi akalule ne Zezu ati: «Ka mutu we meyene wangu tsesi.» Ye Zezu etanda nedzi ati: «Nowe tseke we pika nda wangu.»

Malta bane Maliya bayamba Zezu

38Zezu bane bebingi bedzi bedze netse Zeluzalame, bakalwe se mbuka mbotu. Nwatu we kunvu Malta ayamba bangu se ndaku yedzi. 39Wangu edze ne nwandzi we kunvu Maliya. Maliya asunda untsitsi se sendze, sina mekulu me Zezu ne uyuka medzi edze ne tanda. 40Malta edze ne dzandza uyitsi mekwele mesi, ne ilamba dze bila. Wangu aya kone Zezu nedzi ati: «Kunwu, nwandzi wami adzika me ne dzandza memene. Wende yene ubi, tanda wangu aya yamene me.» 41Zezu akalule nedzi ati: «Malta, Malta, wedzi ne bayi ne manvu meyitsi, 42ni yila yineni ni yotu. Maliya atobo ikavu dzive dze mutu tine motu ndetse tuka pinule wangu dzangu.»