Luk 11 | WumSC | STEP | Vusa votu, Zezu edze ne ubondo. Ndili yedzi emana bondo, umbingi wedzi nedzi ati: «Kunwu, lakise besu nda bibondo, nda Zan elakise bebingi bedzi.» Zezu ne bangu ati:

Luke 11

Zezu alakise bebingi bedzi nda bibondo

1 Vusa votu, Zezu edze ne ubondo. Ndili yedzi emana bondo, umbingi wedzi nedzi ati: «Kunwu, lakise besu nda bibondo, nda Zan elakise bebingi bedzi.» Zezu ne bangu ati: 2 «Ndili ye beyi bibondo.» Tandayi tuu:
«Tata we besu,
kunvu yowe yedzi umpene.
Pika witi batu besi beyiba we!
Luma Ukani vowe ve sunda se sendze.
3 Kaba besu bila masi mesi.
4 Boloko besu manvu mebi,
nda besu biboloko besi bipika besu manvu mebi.
Wende dzika Satan amaama besu.»

We medzuka abomo

5 Zezu avele tanda ne bebingi bedzi ati: «Memikise ne utanda beyi dzanvu dzi, wedzi ne umbantsi wetse kwele yedzi tima ye pindzi.» We nedzi witi: «Umbatsi wami, bikise me pembe isatu. 6 Umbatsi wami aya sombo yami, ayinga undzunga ni mende yila yami ikaba wangu.» 7 Ni toko umbatsi wowe atuka kalule we se ndaku ati: «Dzika meto! Mamana dziba ndaku, besu ne bana bami baya bembula. Mende tuka nyuse ne ukaba we pembe.» 8 Metanda beyi unbu amene, dzakene wangu tinde nyuse ne ukaba wangu pembe ne umbatsi ve bangu bole, wangu atse nyuse ne ukaba wangu byesi byedzi idzuka, nedzi idzuka unkomo. 9 Yami itanda beyi miti: «Dzukayi, betse kaba beyi. Fumbayi, beyi betse kobise. Dzumidzayi, betse dzuvule. 10 Yayu, widzuka abomo, wifumba akobise, bedzuvele ni widzumidze.» 11 Wangu tata wikaba nwana tadzi, ti nwana adzuka wangu swi niza? 12 Ndili ye nwana idzuka tata ibi, wangu atuka kaba nwana dzinga? 13 Beyi batu bidzi ne manvu mebi, beyi beyiba kaba bana be beyi bila bive. Ni yanga ne Tata we beyi we ikulu nde tuka kaba Fudzu ye Umpene ne bisunwunle wangu!

Zezu asaka tsina

14 Vusa votu Zezu apanza umbiti nwen dzika mutu tsina. Ndili ye umbiti nwen pula, ye mutu mene ewowe. Batu bedze wawu bakima. 15 Ni boko ati: «Belezebule kunwu we mimbiti ni wikaba Zezu singa ye upanza mimbiti.» 16 Boko bafumba dendise Zezu unlanvu. Bangu nedzi ati: «Pika dzanvu dze likimiyinda, yayu beyiba ati, Nzambi ni we meluma we.» 17 Ni Zezu ayiba metsimini me bangu, wangu ne bangu ati: «Ndili ye batu be ilongo dzotu bilwana ibadzi tima ye bangu, ye ilongo dzadzu dzitsaluve, ye ne mendaku minawenge kule moko. 18 Beyi betanda ati, Satan ni wikaba me singa ye upanza mimbiti. Niti yadze vavu, singi Satan akilwana ni nedzi mene, nika ilongo dzedzi dzetse tsalive. 19 Ni Satan takaba me singa ye upanza mimbiti, yayu wikaba bembatsi be beyi singa ye upanza mimbiti niza? Yangu niye bembatsi be beyi mene bikwise beyi mikwaka. 20 Ni me, wikaba me singa ye upanza mimbiti ni Nzambi. Yayu Ukani ve Nzambi va kalwe tima ye beyi.»

21 Ndili ye mutu idzi ne singa, abata ndaku yedzi ne saka ye ibadzi, nde mutu wibetime ne untanvu nwedzi. 22 Ni mutu witakwe wangu singa taya anyindzile se ndaku yedzi, tatakwe wangu singa, aboko wangu saka ye ibadzi yesi, yedzi edze ne ivukidze, akabaka ne untanvu nwedzi nwesi nwedzi eboko.

23 «Mutu wende ibila nami, adzi ne mbele yami. Mutu wende kobise me ne ukukise batu, wangu ni witsala bangu.»

Umbiti nwaya vutse

24 Ndili ye umbiti nwipula se nyulu ye mutu, ye nwangu nwitse se ikanye ne ufumba buma ye nwangu wisolime. Umbiti ti nwakekobise buma, ye nwangu nwitanda ati: «Mevutse se ndaku yami edze ne kala.» 25 Yedzi ivutse, akobise ndaku bayebise, ndaku yaya tselele. 26 Yedzi itse boko mimbiti myoko untsami mitakwe wangu kanve. Ye myangu minyindzile se ndaku, ye mimbiti midze wawu. Yumana vavu, ye ubedzu ve mutu wayu vitakuse ve wika uneni.

Witakwe itsisa niza?

27 Ye Zezu ewowe vavu, nwatu motu apulene tima ye unkuka nwen batu, awowe ne singa ati: «Itsisa ne nwatu we dziya we, we nywise we ibele.» 28 Ni Zezu akalule ati: «Tanda witi, itsisa ne batu biyuka iwowe dze Nzambi, ne bikuuna wangu.»

Zezu alewe pika dzanvu dze likimiyinda

29 Mikuka mineni mya ya kwele ye Zezu, Zezu ne bangu ati: «Batu belolo ba, baya ni batu bebi, bangu befumba yene manvu meneni. Ni dzanvu dze likimiyinda dze bangu bitse yene si dze Zonase Mutu we Nzambi. 30 Nda Zonase edze ndinvu ye batu be ngundu ye Ninive, yayu we yikwene Mutu atse dze ni ndinvu ye beyi batu belolo. 31 Yayu vusa ve umpami, kani we nwatu we ilongo dze doko atse telime busu ve batu belolo ne upita bangu. Wangu aya kwele ye ilongo dze sele ne uyuka manvu me ukani ve Salomon iwowe. Awa yedzi ne mutu witakwe Salomon. 32 Batu be Ninive bedzika manvu mebi ni ne bangu beyuka Zonase. Ni awa yedzi ne mutu witakwe Zonase. Yayu ndili ye Nzambi itse pama batu, batu be ngundu ye Ninive betse telime busu ve batu belolo ne upita bangu. 33 Ndili ye mutu itakise ibanvu kaka ne usodze, ne ne usomo sina ye lunga. Ni wangu atakise dzangu ni ne udzika ikulu, yayu ti batu banyidzile se ndaku bayene kwalala. 34 Misa ni ibanvu dze nyulu ye mutu. Ndili ye misa mowe medzi uve, ne nyulu yowe yedzi si uve. Ni misa mowe ti madze ubi, ne nyulu yowe yedzi si ubi. 35 Yayu, pika kebe toko ibanvu dzowe dzadze yututu nda se pindzi. 36 Ni nyulu yowe ti yadze kwalala nde yila ye yututu, yangu yesi yedzi ni kwalala nda ndili yowe idzi se ibanvu kwalala amene.»

37 Ye Zezu emana lakise mutu we falizi abanga Zezu ne utse dza bila se ndaku yedzi. Zezu anyindzile se ndaku yedzi, ye Zezu esunda untsitsi ne udza bila. 38 mutu we falizi akima ne Zezu edza bila nde swaka meboko. 39 Ye Zezu etanda nedzi ati: «Beyi befalizi, beyi beswaka bikopi ne bipele si ituna ni se milima mye beyi, beyi beyiba si pika manvu mebi.» 40 Beyi nde yuka tine dzotu, Nzambi awanga nyulu awanga ne unlima. 41 Kabakayi be minvuvu bidzi se bikopi ne bipele bye beyi, yayu bye beyi byesi byetse dze tselele. 42 Ni ayi ndoko ne beyi befalizi! Beyi bekabene mebuku iku me minyimbi ne bendzumba ne metsangi ye beyi bikaba Nzambi ikavu dzotu. Ni beyi bedzimbise umpami ne itondo dze Nzambi. Tadzi beyi bebanda pika ni vavu, ni beyi nde dzimbise byoko.

43 Ndoko ne beyi befalizi! Se mendaku me umbondu beyi betondo dze si se bibuma bye busu, ne beyi bitondo ati, benyusile beyi se bibuma bye mikuka. 44 Ndoko ne beyi, ne beyi bidzi nda mesongo mende yene, ne batu belanda kule mangu nde yiba.

45 Unlakisi we bitsila motu ne Zezu ati: «Kunwu yowe metanda vavu, we me tukene wayu kani besu.» 46 Zezu nedzi ati: Ndoko ne beyi belakisi bebitsila, beyi besunwunle batu ne utumbidze udzulu, ni beyi nde ne tuka betime ne udzulu vavu tine ne unlenvu nwotu. 47 Ndoko ne beyi, bitunga mesongo meve me Batu be Nzambi, ni bekoko be beyi ni bebuma bangu. 48 Yayu beyi belaka ati, beyi bayakwe manvu me bekoko be beyi bepika. Bangu babuma Batu be Nzambi, ni beyi betunga ni mesongo me Bangu. 49 Yene utsina ve Nzambi ewowe ne ukani vedzi ati: «Metse luma bangu Batu be Nzambi ne betuma, bangu betse buma boko, betse nyokile ne boko.» 50 Ulayi ve bewanga ilongo, babuma Batu be Nzambi uyitsi, ni Nzambi atse sunwunle beyi kunvu beyi batu belolo. 51 Bangu bebanda buma wika ni Abel, ye bangu bebuma ne Zakali se libuku le ndaku ye Nzambi, tima ye tsiya ye ndaku ye Nzambi ne liyi ye umpene. Ee metanda beyi, Nzambi atse sunwunle beyi kunvu, beyi batu belolo ne manvu mesi. 52 Ndoko ne beyi, belakisi bebitsila beyi badzuba peyi yi bapa beyi kwele ye Nzambi. Beyi mene beke binga peyi yayu, ni bifumba binga peyi yayu, beyi besimba bangu ne usuta. 53 Ndili ye Zezu epula se ndaku, ye belakisi bebitsila ne befalizi bekanve nedzi. Ye bangu bebanda ne ukaba wangu midzitsi miyitsi. 54 Ni bangu befumba ni ndendise wangu unlanvu, ne upita wangu ne manvu medzi ewowe.