Luke 12
Betse yene medzi isolo
1Ndili yayu, batu beyitsi baya kukene kone Zezu. Bangu badzangite boko metambi ne limutu ledze uyitsi. Zezu atanda ne bebingi bedzi ati: «Pikayi kebe ne unpyeli nwen nda nwen befalizi, unpyeli nwen bangu nwendzi ni nda yila yi ndzilise lipembe. 2Mesi midzi isolo betse yene, mesi me batu nde yiba betse yiba. 3Ni mesi me beyi biwowe ne pindzi, batu betse yuka mangu ne musa, ne me beyi biwowe mewawayi se meluyi me boko se liyi ye ndaku ye pii, batu besi betse wowe yangayanga kule myanza mye mendaku.»We beyi bituka lepe
4«Metanda ne beyi, beyi bembatsi bami, beyi nde yene bongo ve batu bibuma nyulu, ni mbisa ye wawu, nde yila yoko ye bangu bituka vele pika. 5Melaka beyi we beyi bituka lepe. Lepe ayi Nzambi we mbisa liku adzi ne singa ye uyisa beyi, se ibila dze nde sele. Ee, metanda beyi, we beyi bituka lepe si Nzambi!» 6«Nde tuka sumbise bilele bye bendetse bitanyi ne bedolo bole? Ni Nzambi nde dzimbise nyodzi tine motu. 7Nzambi ayiba untalu nwen suyi yidzi se myulu mye beyi. Beyi nde yene bongo. Beyi batakwe benyodzi beyitsi nvunu!»Beyi nde yene sonyi ye Zezu
8Mevele tanda beyi miti: «Ti mutu atanda busu ve batu besi.» Ati: «Medzi ni umbingi we Zezu, ne we yikwene Mutu atse tanda busu ve betuma be Nzambi.» Ati: «Mutu yu ni wami.» 9Ni mutu tatanda busu ve batu besi ati: «Wangu nde yiba me, nami metse tanda busu ve betuma be Nzambi miti, nami we yikwene Mutu mende yiba wangu.» 10Mutu tapanda, we yikwene Mutu, Nzambi atse boloko wangu. Ni mutu tatuka Fudzu ye Umpene, Nzambi ndetse boloko wangu. 11«Ndili ye bitse bapa beyi se mendaku me umbondu, ne busu ve bekani, ne bepami be manvu, beyi nde yene bayi ne ukasa midzitsi, nde yene bayi ne me beyi biwowe. 12Ndili mene yayu, Fudzu ye Umpene yetse lakise beyi me beyi bitse tanda.»Untanvu nwen ilongo dzi
13Mutu motu se tima ye unkuka nwen batu ne Zezu ati: «Kunwu, tanda ne unkulu wami akabene unkobo nwen tata we besu edzika.» 14Zezu akalule nedzi ati: «Medzi wa, kaka ne upama manvu me beyi, ne ukabaka untanvu nwen beyi.» 15Yumana vavu, Zezu atanda ne batu besi ati: «Pikayi kebe, beyi nde tondo untanvu nwen ilongo. Ni libiku le mutu nde se untanvu nwedzi, dzakene wangu tadze ne untanvu nwiyitsi.» 16Zezu ate bangu ngana: «Mekuba me mutu motu wedzi ne untanvu makwa ipoko dze bila.» 17Wangu atsimene se unlima nwedzi ati: «Makipika nivi? Mende buma ye ibula yami ibata bila bibyesi.» 18Yayu wangu ati: «Yene nda mitse pika. Metse tsala metala mekala ne utunga meneni. Yayu mesomo ipoko dzami ne mitanvu myami myesi se kati. 19Ti mamana, metse wowe nami mene miti: A umbatsi wami, wedzi ne untanvu wiyitsi nwitse dze bisiwu ne bisiwu. Dzunda, dza, noto, tamba yowe.» 20Ni Nzambi nedzi ati: «Weni suwa! Pindzi yi, wawele. Ni mutu unsusu ni wakitse tamba ne untanvu nwowe ebata.» 21Zezu avele tanda ati: «Yene mitse ya kule mutu wikukise untanvu nwedzi mene, ni Nzambi nde yiba untanvu nwedzi nwanwu.»Udze ne ivukidze ne Nzambi
22Zezu atanda ne bebingi bedzi ati: «Yami itanda ne beyi miti, beyi nde yene bayi ne bila bye beyi binyinga, ne bye beyi bilunga ne byangu, ne mikanda mye beyi bifumba swa. 23Ni libiku latakwe bila, ne nyulu ya takwe mikanda. 24Wayayi benyodzi! Bangu nde kuna, nde tolo. Bangu nde mebula, nde metala, ni Nzambi abungile bangu. Ni beyi batakwe benyodzi. 25Dzakene ti wayene bayi, wende tuka velise vusa tine votu se libiku lowe. 26Ti beyi nde tuka pika manvu mete ma, niye beyi bivele yene bayi ne manvu moko niyi? 27Wayayi nda nzombo yimendze! Yangu nde dzandza nde dzuma mikanda. Ni metanda beyi, ne Salomon eke bomo mikanda mive se ukani vedzi nda nzombo. 28Binvu bidzi lolo se mekuba, yana betsumba se nwunya. Ni Nzambi aswise ne binvu mikanda mive. Beyi batu bende ivukidze dziyitsi, uve beyi bayiba ati, Nzambi atse swise ne beyi si vavu. 29Beyi nde buma nyulu ne ufumba bye beyi bidzele, ne bye beyi binotele. 30Batu bende yiba Nzambi, ni bifumba bya byesi mendili mesi. Ni Nzambi Tata we beyi ayiba ati, beyi bedzi ne unyingu ve bila byabu byesi. 31Bandayi fumba Ukani ve Nzambi, yayu wangu atse kaba beyi byesi bye beyi binyinga.»Untanvu nwen ikulu
32«Beyi bidzi ni dzinvu dzite, dzikayi yene bongo. Tata we beyi ayene uve, ne ukaba beyi Ukani ve ikulu. 33Sumbisayi byesi bye beyi bidzi ne byangu, kabayi be mivunvu bedolo. Tungayi myanza mite mye nde biwe. Dzikayi untanvu nwen beyi kwele ye Nzambi, kwele ye nwangu ndetse biwe. Awawu, beyiibi nde tuka kobise, ne meselele nde tuka dza. 34Buma yedzi ne mitanvu mye beyi, ne milima mye beyi midzi si wawu.»Bedzandzi bimoko
35«Dzayi mitele ne dzandza dze Nzambi, takisayi mebanvu me beyi. 36Dzayi nda bedzandzi bibuka kunwu we bangu wiyinga ibala. Ndili yedzi itse ya, yedzitse dzumidze kutse ye ndaku, bedzandzi betse dzuvile. 37Bedzandzi bedzi bedzi se itsisa, ndili ye kunwu we bangu ikobise bangu bemoko. Ee metanda beyi ni unbu, wangu atse swa ingoyi dzedzi dze dzandza, atse sundise bedzandzi bedzi mitsitsi ne ukabaka bangu bila. 38Kunwu taya time ye pindzi, dzakene ne suka kwen, takobise bedzandzi bedzi bemoko, wangu atse yene uve.» 39«Yukayi dzi, kunwu we ndaku abiki yiba ndili ye unyiibi nwiya, tadzi wangu nde tuka dzika unyiibi nwayidzile se ndaku yedzi. 40Ne beyi dzayi mitele, ne beyi nde yiba ndili ye we yikwene Mutu itse ya.»Undzandzi we tele ne we utsengu
41Pyeli ne Zezu ati: «Kunwu, dzanvu dzowe metanda besu dzi, dzedzi ni dze besu mene, na dze batu besi?» 42Zezu akalule nedzi ati: «Undzandzi unve, ne nwen utsengu ni nwowi? Nwangu ni nwen kunwu we ndaku itanda ne ubata ndaku, na nwen kunwu iluma ne ukaba bedzandzi boko bila ndili tiya kalwe. 43Undzandzi widzi se itsisa, sudzi ye kunwu iye vutse, aya kobise wangu adzandza. 44Metanda beyi ni unbu, kunwu atse kaba wangu untanvu nwedzi nwesi ne ubata.» 45Ni ti undzandzi nwatanda ati: «Kunwu wami ndetse ya tsanwen.» Yedzi ibumaka bedzandzi be mebaka, ne be batu meluba, wangu adza, anoto melaku akwative, 46ni kunwu atse ya palikise vusa ve undzandzi nde yiba. Undzandzi nde yiba ndili ye kunwu itse panza wangu, atse nyokile wangu nda bipika batu bende kuna Nzambi. 47Undzandzi nwiyiba me kunwu wedzi itondo, ni wangu tinde pika nda kunwu itondo, kunwu atse damaka wangu mimbisa miyitsi. 48Ni undzandzi nwen nde yiba me kunwu wedzi itondo, ndili yedzi ipika manvu mebi, betse damaka wangu va ite. We beme kaba uyitsi, betse sunwunle wangu uyitsi. We bikaba biyitsi amene, betse sunwunle wangu bitakwe uyitsi amene.Zezu atse dze ni utsina ve unbayi
49«Meme ya ni ne uya takise nwunya se sendze, ni me mefumba ni miti nwangu nwen takene. 50Uve maboko meteme, unlima nwami nde uve ndzii nami iboko meteme mamu. 51Beyi nde tsimene ati, memeya ni ye kaba beyi itavu se sendze. Nyen, utsina nami, batu ndetse dze ne ibila. 52Velolo vu, ndili ye batu betanyi bidzi se ndaku mbotu, bangu ndetse dze ne ibila. Bole nde ibila ne besatu, ne besatu nde ibila ne bole. 53Tata ndetse dze ne ibila ne nwana we ibaka, ne nwana we ibaka ndetse dze ne ibila ne tata. Mama ndetse dze ne ibila ne nwana we nwatu, ne nwana we nwatu ndetse dze ne ibila ne mama. Mbambidzi ndetse dze ne ibila ne umbombi, ne umbombi ndetse dze ne ibila ne mbambidzi.»Uyuka metsina me manvu me Zezu ipika lolo
54Zezu atanda ne mikuka mye batu ati: «Ndili ye beyi biyene lingutsu liya kwele ye itadzi dzinawen.» Ye beyi bitanda ati: «Nvula anole.» Ye nvula ino. 55Ndili yipepe dze unbidze dzikukidze ▼▼A Izayel yidzi ne ikanye dzineni ndili ye ipepe ti dzayinga kwele ye ikanye dzadzu ye betanda ati ye dzele ne umbidze.
ye beyi bitanda ati: «Yedzele ne unbidze.» Ye unbidze nwiya. 56Batu be unpyeli, ye beyi biwaya sendze ne ikulu, beyi beyuka misuta, yayu ye beyi nde tuka yiba manvu misuta ma niyi? Dzayi ne ibila ne biluna beyi
57«Ye beyi mene nde yene me beyi bituka pika niyi? 58Ndili ye mutu ibapa we busu ve bepami be manvu, mikise yebise manvu me beyi nedzi ne peyi. Toko wangu abapa we busu ve umpami we manvu, ye umpami we manvu ikaba we ne bewolo, ye bewolo bisomo we ungenenge. 59Metanda we dzanvu dzotu, we ndetse pula wawu ti wende wuta bedolo besi bowe ibika wangu.»
Copyright information for
WumSC