Luke 14

Zezu asaka unbedzu

1Vusa ve idzundu, Zezu atse pesi ye kunwu motu we befalizi ne utse dza bila. Yedzi ekalwe, batu bedze wawu bedze ne waya wangu, misa mesi kule yedzi. 2Yedze ne mutu motu wawu wedze ne unbedzu ve nyulu yilanda, edze untele busu vedzi. 3Zezu asunwunle ne belakisi bebitsila ne befalizi ati: «Se tsila ye bebe, betuka saka unbedzu vusa ve idzundu?» 4Ni bangu beke kalule wangu. Zezu abetime nedzi, asaka wangu, wangu nedzi ati: «tseke.» 5Yedzi etanda bangu ati: «Ti mutu motu tima ye beyi adzi ne nwana, tiya wata vavu ngombo ananwen se iteke, mutu wawu nde tuka pusa wangu se iteke vusa ve idzundu?» 6Bangu bawata kalule Zezu.

Zezu alongo batu ne uboko buma ye limbisa

7Zezu ayene ati, benzenze besi be bebanga befumba boko si bibuma bye busu. Yedzi ete ngana ati: 8«Yebi banga we se itsinda dze ibala, ti waya wende banda boko buma ye busu, toko beme banga mutu moko witakwe we uyunvu.» 9We me banga beyi besi bole, taya atanda we ati: «Telime busu, ya suta mbisa.» Ye bitelimise we vavu, waya ni se sonyi ne utse sunda mbisa. 10Yebi banga we se itsinda dze ibala, ti wakalwe, wadze buma ye mbisa. Yayu we me banga we, taya, wangu nowe ati: «Umbatsi wami ya kobisse me wuya se buma ye busu.» Ye batu besi bidzi nongo nowe bikuuna we. 11Mutu we kalala betse vutise wangu mbisa, mutu we uyinvu, betse tumbidze wangu.

12Zezu avele tanda ne we banga wangu ati: «Ndili yowe ibanga batu ne udza bila ne musa dzakene ne ikolo, wende banga bembatsi, bana bowe, ne yali, ne batu bidzi ne untanvu kono we. Ne bangu betuka banga we, bavutise byowe mekaba bangu.» 13Ni ndili yowe ikumaka itsinda dze ibala, banga be mivuvu, be bileme, be bitsobi ne be misi pii. 14Yayu wetse dze ne itsisa utsina ne bangu nde tuka vutise we byowe mekaba bangu. Nzambi atse vutise we byangu vusa vedzi itse nyusile betele.

Ngana ye itsinda dzineni

15Bangu bemana yuka medzi edze ne utanda, mutu motu tima ye bangu wedze ne dza bila bane Zezu ati: «Itsisa ne mutu witse dza bila se Ukani ve Nzambi.» 16Zezu ate wangu ngana ati: «Mutu motu apika itsinda dzineni, abanga batu beyitsi.» 17Ndili ye udza bila ye kalwe, yedzi iluma undzandzi wedzi ne utanda ne bedzi ebanga ati: «Yakayi, ndili ye udza ya kalwe.» 18Ni bangu besi mutu ne mutu abita mengami. We wika ne undzandzi ati: «Masumba kuba uve matse yene yangu, boloko me.» 19Moko nedzi ati: «Masumba bengombo iku, uve matse yene nda bangu bidzandza, boloko me.» 20Ne moko nedzi ati: «Me mebalive ni tsanwen, ni mende tuka ya itsinda.» 21Undzandzi nwa vutse kwele ye kunwu wedzi, ne utanda me batu bedzi me banga, beme tanda wangu. Ye kunwu we ndaku ikanve, yedzi etanda ne undzandzi nwedzi ati: «Tseke se bibuma bye mikuka, se mepeyi me ngundu, yaka me ne be mivuvu, be bileme, ne be misi pii, ne be bitsobi.» 22Yumana vavu, undzandzi nedzi ati: «Kunwu, mapika nda we metanda, ni yasaka ne bibuma.» 23Kunwu atanda ne undzandzi ati: «Tseke se mepeyi me mekuba, ne mikolo me mekuba, we kwataka batu beya lundise me ndaku.» 24Metanda beyi: «Nde mutu tine motu se be wika bami ebanga witse dza bila byami.»

Dzika byesi we binga Zezu

25Batu beyitsi bedze ne binga Zezu. Wangu ayikwene, ne bangu ati: 26«Wibinga me, uve itondo dzedzi itondo me dzatakwe dzedzi itondo tata wedzi, mama, nwadzi, bana, bekulu, bandzi, bekadzi bedzi ne nyulu yedzi mene. Tinde vavu wangu nde tuka yikwe umbingi wami. 27Wende bapa koko ye beliningise ne ubinga me, nde tuka yikwe umbingi wami. 28Ni tima ye beyi ti yedzi ne mutu wifumba tunga ndaku yineni, wangu nde banda sunda untsitsi ne uyiba nvunu ye ndaku, ne uyene libu lebedolo lidzi nedzi, ti wangu atuka tunga ndaku yesi! 29Ni tinde vavu wangu ti abanda tunga ndaku, nde mana, batu besi betse sewe wangu.» 30Ye bangu bitse tanda ati: «Yenayi mutu yu, wangu abanda ndaku ni ake tuka mana.» 31Ndili ye kani ifumba tse lwana ibadzi ne kani moko, wangu abanda ni sunda untsitsi ati, medzi si ne meku me bewolo iku. Ni me tuka tse lwanise kani moko widzi ne meku me bewolo meku molo? 32Wangu tinde tuka lwana ibadzi, wangu aluma betuma kwele ye kani moko ndili yedzi asaka ulayi nedzi, yayu bangu bedzika lwana ibadzi, bedze ne itavu. 33Ye Zezu evele tanda ati: «Nde mutu tima ye beyi wituka dze umbingi wami ti wangu nde dzika untanvu nwedzi nwesi.»

Metsimba ti masanve

34«Metsimba ni yila yive. Ni metsimba ti masanve, mangu mevele boto nivi? 35Metsimba maya nde uve, nde ne tuka yikule mangu nda mbolise se sendze. Widzi ne meluyi me uyuka, ayuka.»