Luk 19 | WumSC | STEP | Zezu akalwe Zeliko, alinenga ngundu.

Luke 19

Zezu ne Zase

1 Zezu akalwe Zeliko, alinenga ngundu. 2 Awayu, yedze ne mutu we kunvu Zase, wangu edze ni kunwu we betolingi be bedolo. Wangu edze ne untanvu. 3 Wangu afumba yene Zezu, ni nda wangu idzi unkudzu, wangu nde tuka yene Zezu utsina ne batu uyitsi. 4 Wangu atse ne mbangu busu ve bangu, yedzi ebita kule nwili nwen kunvu sikomole, ne uyene Zezu wisutele wayu. 5 Ndili ye Zezu ekalwe sina ye nwili mene, Zezu asikule misa. Wangu ne Zase ati: «Sunda mesadzi Zase, velolo uve mananga se ndaku yowe.» 6 Ye Zase esunda mesadzi, mesadzi, ayamba Zezu ne itsisa dzesi. 7 Ye batu beyene vavu, bangu besi bampanda Zezu ati: «Mutu yu, atse nanga se ndaku ye mutu we manvu mebi!» 8 Zase, untele busu ve Kunwu, nedzi ati: «Kunwu, mepasele untanvu nwami tima. Yayu meboko pesi yoko, mekaba be mivuvu. Ne wami ekuta se untalu nwen bedolo, mevutise wangu bidzuku binayi bye libu lebedolo bedzi.» 9 Zezu nedzi ati: «Velolo Nzambi alungise batu be ndaku yi. Nowe se Zase, wedzi ni we imbisa dze Ablaame. 10 Yayu we yikwene Mutu eya ni fumba ne ulungise batu bedze banyongo.»

Ngana ye bepitisi

11 Nda batu bedze ne yuka me Zezu iwowe, wangu avele te ngana utsina nedzi edze kone Zeluzaleme, ye batu betsimene ati, Ukani ve Nzambi va kitse ya. 12 Wangu ati: «Yedze ne mutu motu we nwunya nwen kani, atse se ilongo dze ulayi yayu bekaba wangu ukani. Ti wangu amana, aye vutse.» 13 Wangu ne utse, abanga bedzandzi bedzi iku, akabaka bangu mutu dolo motu. Ne bangu ati: «Pikayi umbungu ne bedolo babu beyi bebomo mesasene, ndzii nami iya vutse.» 14 Ni batu be ilongo dzedzi bedze ne wunda wangu. Bangu baluma batu mbisa yedzi ne utanda ati: «Besu nde tondo ati, mutu yu ayikwe kani we besu.» 15 Ni wangu ayikwe kani, yedzi evutse ilongo dzedzi. Yedzi ebanga bedzandzi bedzi ekaba bedolo, ne uyiba bye bangu bebomo. 16 We wika aya ati: «A kunwu wami, mabomo bedolo iku kule ye dolo motu wowe ekaba me.» 17 Kani nedzi ati: «Yemini, weni undzandzi we unve, nda wedzi tele se manvu mete, waya ni lipatima le bingundu iku.» 18 We unwole aya ati: «A kunwu wami, mabomo bedolo betanyi kule ye dolo motu wowe ekaba me.» 19 Kani ne we unyolo ati: «Nowe, waya ni lipatima le bingundu bitanyi.» 20 Moko undzandzi aya ati: «Kunwu, yene bedolo bowe, bami esodze se fuku. 21 Medze ne bongo vowe, nowe idzi ne umbivilu. We boko byowe nde dzika, we tolo byowe nde nwasa.» 22 Kani nedzi ati: «Undzandzi we manvu mebi, me pamele we se mowe mene me wowe. We yiba witi meni mutu we umbivilu, meboko byami nde dzika, metolo byami nde nwasa. 23 Ni yowe eke dzika bedolo bami se ndaku ye bibata bedolo niyi? Yami me ye vutse, tadzi me mekobise bedolo bami ne mesasene.» 24 Yedzi etanda ne batu bedze wawu ati: «Bokayi dolo motu widzi nedzi, kabayi ne widzi ne bedolo iku.» 25 Bangu nedzi ati: «Kunwu, wangu kadzi ne bedolo iku!» 26 Kani akalule ne bangu ati: «Mesikidze beyi, mutu widzi ne yila, bevele kaba wangu byoko, ni mutu wende yila, betse nanguse wangu ne yite yidzi nedzi. 27 Ni batu biwunda me, bende tondo ati, me yikwe kani we bangu, yakayi ne bangu wuya, bumayi bangu busu vami.»

Bikaluli bye Zezu ikuvu dze Zeluzalame

28 Zezu amana wowe vavu, yedzi ebandaka busu ne utse Zeluzaleme.

29 Ye Zezu ekalwe kone membuka mole Betafazi ne Betani, kone Kudzi ye kunvu ye wili nwen olive, wangu aluma bebingi bedzi bole. 30 Wangu ne bangu ati: «Tsekayi se mbuka yidzi busu ve beyi. Ndili ye beyi bikalwe, beyi bekobisele bodzi ye kunvu ane bakuta. Bodzi yayu basande bita kule yangu. Nyangulayi, yakayi ne yangu wa.» 31 Mutu tasunwunle beyi ati: «Ye beyi binyangule yangu niyi?» Tandayi wangu ati: «Kunwu adzi ne unyingu.» 32 Bebingi be Zezu bole batse, bayene manvu mesi nda Zezu etanda bangu. 33 Ye bangu bedze ne nyangule ane, bekunwu basunwunle ne bangu ati: «Ye beyi binyangule yangu neyi?» 34 Bangu bakalule ati: «Kunwu adzi ne unyingu.» 35 Ye bangu bebapa bodzi kwele ye Zezu, basatse mikanda kule bodzi, ye bangu betedze Zezu kule yangu. 36 Ye Zezu edze ne tsindene, batu bedze ne yalaka mikanda se peyi busu vedzi. 37 Zezu adzanga se peyi yi sundaka se Kudzi ye kunvu wili nwen olive. Unkuka nwen bebingi bedzi nwesi nwedze se itsisa dzineni. Ne ukumise Nzambi ne singa yesi utsina ne manvu meneni me bangu beyene. 38 Bangu bedze ne tanda ati:
«Yayu Nzambi akaba meve ne Kani wiya ne kunvu ye Kunwu!
Itavu se ikulu ne likuma ne Nzambi widzi ikulu amene.»

39 Ndili mene yayu va befalizi bedze se unkuka, ne Zezu ati: «Kunwu tanda ne bebingi bowe belonwen.» 40 Zezu akalule ne bangu ati: «Metanda beyi, bangu ti balonwen, memanyan mewulele misima.»

Zezu alila utsina ne Zeluzalame

41 Ndili ye Zezu etsindene kone ngundu, wangu ayene ngundu, yedzi elila utsina ne yangu. 42 Zezu ati: «Zeluzalame, loloyi batu bowe bebiki yiba nda bikobise itavu. Ni dzangu dzedzi ni isole bangu nde tuka yene. 43 Ni ndili yetse ya, ye batu biwunda we, bitse tunga baka ne ulwanise we. Bangu betse dzendze we mekwele mesi. 44 Bangu betse nyunga we, nowe ne batu bowe. Bangu ndetse dzika we imanya tine dzotu kule dzoko, nowe eke yiba ndili ye Nzambi eya, ne uyamene we.»

Zezu apanza besumbisi se ndaku ye Nzambi

45 Zezu anyindzile se ndaku ye Nzambi, apanza besumbisi. 46 Wangu ne bangu ati: «Se Iwowe dze Nzambi.» Nzambi ati:
«Ndaku yami yedzi ni ndaku ye umbondu.»
Ni beyi, bayikule yangu ndaku ye beyiibi!

47 Zezu edze ne lakise masi mesi se ndaku ye Nzambi. Yedze ne bekunwu be ndaku ye Nzambi, ne belakisi be bitsila bye Nzambi, ne bekunwu be bezwif. Bangu besi befumba nda bangu bibuma Zezu. 48 Ni bangu nde yiba nda bangu bipika wangu, utsina ne batu besi bedze ne yuka wangu ne uyinvu vesi.