Luke 7

Zezu asaka undzandzi we kunwu we bewolo

1Ndili ye Zezu emana wowe mesi ne batu bedze ne yuka wangu, yedzi etse Kapenayum. 2Awawu yedze ne kunwu we bewolo we ilongo dze Lomi. Wangu edze ne undzandzi wedzi edze ne tondo uyitsi. Undzandzi mene edze ne ubedzu vineni, edze akitse waa. 3Ye kunwu we bewolo eyuka bewowe ne kunvu ye Zezu, yedzi eluma va bibutu bye bezwifi, ne ubondo Zezu ne uya saka undzandzi nwedzi. 4Ye bibutu bekalwe kone Zezu, ye bangu bebondo Zezu ati: «Uve waya yamene mutu yu. 5Wangu atondo besu batu be Zuda, wangu ni we tunga ndaku ye besu ye umbondu.» 6Ye Zezu etse bane bangu. Ye bangu bekalwe kone ndaku, ye kunwu we bewolo eluma bembatsi bedzi ne utanda wangu ati: «Kunwu, sele wayu, wende tuka nyindzile se ndaku ye mutu nda me. 7Yene utsina vami eke ye yene we. Ni tanda si dzanvu dzotu, undzandzi wami alunga. 8Memene, medzi ne bekunwu bami ikuna, nami ni kunwu we bewolo, ne bangu bekuna me. Ti matanda ne motu tseke wangu atse, ne moko yaka wangu aya, ti matanda ne undzandzi nwami pika tuu, wangu apika.» 9Ye Zezu eyuka manvu me kunwu we bewolo edze ne wowe, Zezu ayene uve. Wangu ayikwene, awaya unkuka nwedze ne binga wangu ati: «Metanda beyi, ne se Izayeli, mesande yene mutu widzi ne ivukidze nda dze kunwu we bewolo.» 10Batu bedzi eluma, bavutse ndaku ye kunwu we bewolo, bakobise undzandzi nwan lunga.

Zezu anyusile nwana we ibaka we nwatu unkwili

11Zezu atse ngundu ye Nayine, bebingi bedzi, ne unkuka uneni basukidze wangu. 12Ye bangu bekalwe ikuvu dze ngundu, bakwanye ne batu betse ne tsindzi mesongo. Yedze ni nwana we ibaka we itsika dze nwatu unkwili, batu beyitsi bedze ne sukidze wangu. 13Zezu awaya nwatu wayu, ayene wangu tsesi, ati: «Dzika lila.» 14Yedzi etsindene ne ubetime ne lipoyi, bebapi basita. Zezu ati: «Nwana we ibaka yu, metanda we, telime.» 15Tsindzi yanyuse, ya sunda untsitsi ya wowe. Zezu avutise nwana ne mama. 16Bangu besi bayene bongo, bakumise Nzambi ati: «Mutu we Nzambi aya tima ye besu, Nzambi aya yamene batu bedzi.» 17Besi bedze Zude ne membuka me konedzi bayuka likuma le manvu me Zezu epika.

Bebingi be Zanbatisi

18Bebingi be Zanbatisi batse tanda manvu mamu mesi ne kunwu we bangu Zan, ye Zan ebanga bebingi bedzi bole. 19Wangu aluma bangu kwele ye Kunwu, ne usunwunle wangu ati: «Weni we Nzambi etobo witse ya? Na besu bebuka ni moko?» 20Ye bangu bekalwe kone Zezu, bangu nedzi ati: «Zanbatisi meluma besu kwele yowe ne usunwunle we.» Ati: «Weni we Nzambi metobo witse ya? Na besu bebuka ni moko?» 21Ndili mene yayu Zezu edze ne saka batu bedze ne mebedzu mesi, apanza ne mimbiti myedze se menyulu me batu, alungise ne batu bedze misa pii. 22Ye Zezu ekalule ne bebingi be Zan ati: «Tsekayi tanda ne Zan, me beyi beme yene ne me beyi beme yuka. Be misa pii bakiyene, be bileme bakilanda, be bifima balunga, be meluyi pii bakiyuka, bitsindzi bya kinyusenge, be minvuvu bamekidze unsisili unve. 23Itsisa ne widzi ne ivukidze nami.»

24Ye bebingi be Zan bevutse, Zezu awowe ne batu se kunvu ye Zan ati: «Ye beyi bemetse yene se ikanye niyi? Lisetse le unkolo nwen unsulu le ipepe dzi nyingise? Nyen.» 25Ni ye beyi bemetse yene niyi? Mutu widzi ne mengoyi meve? Biswa mengoyi meve ni bidzi ne untanvu ne bidzi se mendaku me bekani. 26Ye beyi bemetse yene niyi? Mutu we Nzambi? Metanda beyi unbu amene, wangu atakwe ne Mutu we Nzambi. 27Ni Zan ni we Sangunvu ye umpene ye tanda ati: «Metse luma tuma wami busu vowe ne uyebise we peyi.»

28Zezu avele tanda ati: «Metanda beyi nde mutu witakwe Zan, ni mutu we unte se Ukani ve Nzambi awayu, atakwe Zan uneni.» 29Batu besi ne betolingi be bedolo beyuka Zan, ye bangu beyiba ati, Nzambi adzi tele, Zan akaba bangu meteme. 30Ni befalizi ne belakisi bebitsila belewe me Nzambi efumba pika bangu, ye bangu belewe ne meteme me Zan.

31Zezu avele tanda ne bangu ati: «Wami ituka mikise batu belolo nedzi niza? We bangu bitala niza?» 32Bangu bedzi nda bana bete bidzi untsitsi se buma ye batu besi, boko beyukidze boko ati: «Besu babete beyi longo ati, beyi bebina, beyi beke bina, besu bayakwe linvu le kondo ni beyi beke lila!» 33Ni Zanbatisi aya, wangu nde dza pembe, nde noto melaku, ni beyi ati: «Wangu adzi ne umbiti.» 34We yikwene Mutu meya, wangu adza anoto, beyi ati: «Wayayi mutu yu, wangu ayiba si idza ne inoto dze melaku, bedzi bembatsi ni betolingi be bedolo, ne batu bidzi ne manvu mebi.» 35Ni bemekidze ukani ve Nzambi beyiba ati, ukani vavu ni ve tele.

Zezu se ndaku ye Simon

36Mutu we falizi abanga Zezu ne utse dza bila ndaku yedzi, Zezu atse ndaku ye mutu mene, asunda untsitsi ne udza. 37Yedze ne nwatu we fwati se ngundu yayu. Wangu ayuka ati, Zezu adza bila se ndaku ye Simon, wangu aya ne mbasi ye umyombo, 38wangu adze sina mekulu me Zezu, alila, yedzi ebolise mekulu me Zezu ne mesanga medzi, atsilile mesanga ne suyi yedzi, apoto mekulu me Zezu, yedzi esuwaka umyombo kule mangu. 39Mutu we falizi we banga Zezu se ndaku yedzi, ayene vavu awowe se unlima nwedzi ati: «Mutu yu tadzi si Mutu we Nzambi, tadzi wangu ayiba ati, nwatu wibetime nedzi yu adzi ni fwati.» 40Zezu ne befalizi ati: «Simon, mefumba tanda we dzanvu dzotu.» Simon nedzi ati: «Kunwu wowe.» 41Zezu ati: «Mutu motu abikise batu bolo bedolo. Binvu ye we wika yedze uyutsi, ni ye moko, ya takwese uyitsi. 42Nda besi bole bewata wuta binvu, wangu ayene bangu tsesi.» Atanda ne bangu ati: «Beyi besi bole bandu wuta binvu yayu.» Tima ye bangu bole witse tondo wangu uyitsi niza? 43Simon akalule ne Zezu ati: «Metsimene miti witakwe moko bedolo beyitsi.» Zezu nedzi ati: «Wedzi ne mbingu.»

44Yedzi yikwene kwele ye nwatu, ne Simon ati: «Weyene nwatu yu! Me menyidzile se ndaku yowe, wake swaka me mekulu, ni wangu aswaka me mekulu ne mesanga medzi, atsilile me mekulu ne suyi yedzi. 45Wake sanzile me, ni wangu ulayi vedzi meya, apoto me mekulu. 46Wake suwaka me umyombo kule mulu, ni wangu asuwaka me umyombo se mekulu. 47Metanda we dzanvu dzotu, maboloko manvu medzi mebi mesi, yene utsina vedzi melaka itondo dziyitsi. Ni we biboloko manvu mebi ite, nedzi atondo si ite.» 48Zezu ne nwatu ati: «Maboloko manvu mowe mesi mebi.» 49Bedze nedza bila nedzi, batsimene se milima mye bangu ati: «Ayu mutu niza? Wituka boloko manvu mebi.» 50Ni Zezu ne nwatu ati: «Ivukidze dzowe dzalungise we, tseke ne itavu.»