Luk 22 | WumSC | STEP | Itsinda dze lipembe lende udzulu dze kunvu paki dzaya bakaka.

Luke 22

Yinvu ye bekuta Zezu

1 Itsinda dze lipembe lende udzulu dze kunvu paki dzaya bakaka. 2 Bekunwu be ndaku ye Nzambi ne belakisi be bitsila bedze ne fumba nda bangu bibuma Zezu, ni bangu bedze ne bongo ve batu.

3 Ye Satan enyidzile se unlima nwen Zuda we kunvu mboko Isikaliyoti, wedze se yinvu ye betuma bedzi iku ne bole. 4 Zuda atse kuta yinvu ne bekunwu be ndaku ye Nzambi, ne bibutu bye bewolo be ndaku ye Nzambi, ne ufumba nda wangu itse sumbise bangu Zezu. 5 Bangu batsisa, ye bangu bekuta ndaka ye ukaba Zuda bedolo. 6 Zuda amekidze, afumba nda wangu isumbise bangu Zezu isolo ulayi ne unkuka.

Zezu aluma bebingi bedzi ne uyebise itsinda dze paki

7 Vusa ve itsinda dze lipembe lende udzulu dze kunvu paki va dzadzanga, dze bibuma bana be bindonvene ne udza se itsinda dzadzu. 8 Zezu aluma Pyeli ne Zan, wangu ne bangu ati: «Tsekayi lamba bila bye itsinda dze paki.» 9 Bangu basunwunle nedzi ati: «Wetondo witi betse lamba dzangu niwi?» 10 Zezu ne bangu ati: «Ndili ye beyi bidzangale se ngundu, beyi bekwanyele ne mutu abapa mbungu ye mangu. Bingayi wangu se ndaku yedzi inyidzilele.» 11 Tandayi ne kunwu we ndaku yayu ati: «Kunwu asunwunle we ati, liyi ye ndaku yami idzele bila bye itsinda dze paki, ne bebingi bami ni yowi?» 12 «Mutu wayu alakele beyi liyi ye ndaku yineni yidzi ikulu ye bayebise, ne bineni byesi. Awawu ni buma ye beyi bitse lamba bila bye itsinda.» 13 Bangu batse, bakobise mesi nda Zezu etanda bangu, ne bangu balamba bila bye itsinda dze paki.

Bila bye Kunwu

14 Ndili ye udza ya dzanga, Zezu asunda untsitsi ne udza bila bane betuma bedzi. 15 Zezu ne bangu ati: «Me metondo dza bila bye itsinda dze paki kone ne beyi, me ne ubanda yene membaba. 16 Yayu, metanda beyi, me ndetse vele dza bila bye paki, ndzii ne vusa ve manvu mamu mitse ya se Ukani ve Nzambi.» 17 Yumana, ye Zezu iboko kopi ye melaku, avutise Nzambi live, amana vutise Nzambi live, ne bebingi bedzi ati: «Bokayi kopi ye melaku yi, notayi tima ye beyi, 18 metanda beyi, me ndetse vele noto melaku, ndzii ne vusa ve Ukani ve Nzambi vitse ya.» 19 Ye Zezu eboko pembe, amana vutise Nzambi live, atsita akabaka bangu pembe ati: «Ayi ni nyulu yami, yami ikaba utsina ne beyi. Pikayi vavu mendili mesi ne uyivile me.» 20 Wangu akaba bangu ne kopi ye melaku, bemana dza, ati: «Kopi yi, ni umbatsi ve tsawen ve tima ye Nzambi ne batu, unsu nwami nwetse tanga utsina ne beyi. 21 Wayayi mutu witse sumbise me adzi wa, untsitsi kone nami ne udza bila. 22 Ee, we yikwene Mutu atse waa nda Nzambi etanda, ni ndoko ne mutu witse sumbise wangu!» 23 Ye bebingi be Zezu bewowe tima ye bangu ati: «Witse sumbise Zezu tima ye bebe niza?»

Witakwe boko tima ye bebingi be Zezu niza?

24 Ye bebingi be Zezu bedze ne lwana tima ye bangu, ne ufumba yiba witakwe boko ubutu. 25 Zezu ne bangu ati: «Bekani be melongo benyokile bangu, ne bidzi ne ukunwu kule bangu, befumba nati bebanga bangu bembatsi be batu. 26 Ni beyi nde pika nda bangu, ni witakwe boko tima ye beyi uve adze nda nwana unte, ne widzi butu ye boko uve adze nda undzandzi. 27 Ni witakwe boko niza, widza bila na wikabaka bila, yedzi ni widza bila, ka vavu? Yayu me, medzi tima ye beyi ni nda undzandzi we beyi. 28 Beyi bedze si konami ndili yami edze se membaba. 29 Ni me, metuka kaba beyi Ukani nda Tata wami ekaba me. 30 Yayu beyi betse dza bila, ne unywa konami se Ukani vami, ye beyi bitse dze mitsitsi se bibuma bye bekani, ne upama manvu me mekaka iku ne mole me batu be Izayeli.»

Zezu atanda nda Pyeli itse luna wangu

31 Zezu atanda ne Simon Pyeli ati: «Simon, Simon, yuka me tsenguse we, Satan asunwunle ne unyingise beyi nda binyigise mbulu se lipila ne unanguse bipandzi. 32 Ni mabondo nowe, toko wafiya ivukidze. Yowe itseya vutse kwele yami, wakaba ne boko singa.» 33 Pyeli ne Zezu ati: «Kunwu, tsawen metuka tse ungenenge benu, mawaa benu.» 34 Zezu akalule nedzi ati: «Metanda we, Pyeli velolo, sangwe we susu ne ulongo, uve watanda bidzuku bisatu witi wende yiba me.»

Bedolo, nwanza, ne pusezunlu

35 Ye Zezu evele tanda bangu ati: «Ndili yami eluma beyi ne utse tanda misisili mive, beyi beke bapa bedolo, myanza, ne bekotoko, beyi befiya yila tine yotu?» Bangu bakalule ati: «Nyen, besu beke fiya yila tine yotu.»

36 Ye Zezu etanda ne bangu ati: «Ni tsanwen, widzi ne bedolo abapa, widzi ne wanza aboko, wende pusezunlu, asumbise ingoyi ne usumba pusezunlu.» 37 Metanda beyi, uve me betende se Sangunvu ye Nzambi nami maya, se Sangunvu ye Umpene batende ati: «Batu betse boko mutu yu nda unpita, ni, me betanda nami, metse ya.» 38 Bebingi bedzi nedzi ati: «Kunwu, yene bepusenzulu bole.» Zezu akalule ne bangu ati: «Yakuka.»

Zezu abondo kule kudzi ye Olivye

39 Zezu apula ne utse se Kudzi ye kunvu wili nwen olive, nda wangu ipika keke ne kala. Bebingi bedzi babinga wangu. 40 Ndili yedzi ekalwe buma mene, wangu ne bangu ati: «Bondayi ne ubomo singa, yayu ndili ye bitse maama beyi, beyi nde nawen.» 41 Ye Zezu eteme kone ne bebingi bedzi, alawise va metambi ne bangu, avuna mebongo se sendze abondo 42 ati: «Tata, ti watondo, lawuse membaba mami inotele nda binoto mangu. Ni wende pika nda mitondo, ni pika nda witondo.» 43 Ye tuma we Nzambi motu eyinga ikulu ne ukaba wangu singa. 44 Zezu ayene bongo ne bayi, yedzi evele bondo ne singa. Itukume dzedzi dzayikwe nda metanga me unsu minanwen sina. 45 Amana bondo, yedzi etelime, aya kwele ye bebingi bedzi. Wangu akobise bangu bembula badamba subii, 46 yedzi etanda ne bangu ati: «Beyi benanga bembula ni neyi? Nyusayi, beyi bebondo, ne ubomo singa ndili ye bitse maama beyi.»

Bakwata Zezu

47 Ndili yedzi edze ne tanda vavu, unkuka nwen batu nwaya. We kunvu Zuda se betuma bedzi iku ne bole, edze busu ve bangu, yedzi etsindene kone Zezu ne usanzile wangu. 48 Ni Zezu nedzi ati: «Zuda, we sanzile we yikwene Mutu ni ne usumbise wangu?» 49 Ye bebingi be Zezu beyene mitse ya, bangu basunwunle wangu ati: «Kunwu, besu belwana ne bepusenzulu be besu?» 50 Ye umbingi we Zezu motu, etsita iluyi dze boko ye sangwe dze undzandzi we kani we ndaku ye Nzambi. 51 Zezu ati: «Dzikayi, ya kuka.» Zezu abetime ne iluyi dze mutu mene, alungise wangu. 52 Yumana vavu, ye Zezu etanda ne bekunwu be ndaku ye Nzambi, ne bekunwu be bewolo bibata ndaku ye Nzambi, ne bibutu beya boko wangu ati: «Beyi beya ne bepusenzulu, ne bipanda, ne uya boko me nda unpita? 53 Masi mesi medze ne beyi se ndaku ye Nzambi, ni beyi beke kwata me. Ni ayi ni ndili ye beyi, ne ye batu bidzandza se pindzi.»

Pyeli abaya Zezu

54 Bangu bakwata Zezu, ye bangu betse nedzi se ndaku ye kunwu we bekani be ndaku ye Nzambi. Pyeli edze ne binga Zezu ne ulayi. 55 Batakise nwunyan tima ye lipangu. Batu mitsitsi unkolo nwen nwunyan, ne Pyeli asunda untsitsi kone bangu. 56 Undzandzi we nwatu ayene Pyeli untsitsi unkolo nwen nwunyan. Wangu awaya Pyeli too ne bangu ati: «Ne mutu yu se edze bane Zezu.» 57 Ni Pyeli akalule ne nwatu mene ati: «Nyen mende yiba wangu.» 58 Yumana, mutu moko ayene Pyeli nedzi ati: «Nowe, weni umbingi we Zezu.» Ni Pyeli akalule ne mutu wayu ati: «Nyen, kaka me.» 59 Bemana vavu, ndili mbotu ye suta, mutu moko aya sikidze ati: « Unbu, mutu yu, nedzi edze bane Zezu, nedzi ni mutu we Galile.» 60 Ni Pyeli akalule ati: «Mende yiba mowe ifumba tanda.» Ndili mene mbotu yedzi edze ne wowe, sangwe we susu alongo. 61 Zezu ayikwene awaya Pyeli to. Ye Pyeli eyivile me Kunwu etanda wangu, Kunwu etanda wangu ati: «Velolo, sangwe we susu nde longole ti wende lunele me bidzuku bisatu.» 62 Pyeli apula se lipangu alila uyitsi. 63 Batu bedze ne bata Zezu basewe Zezu, babuma Zezu luba. 64 Bangu badziba Zezu pamza, nedzi ati: «Tanda, we medamaka we niza?» 65 Ye bangu bavele tanda wangu manvu moko meyitsi ne utukene wangu.

Zezu busu ve bepami be bezwifi.

66 Ndili ye vusa ve senwen, bibutu bye bezwifi, bekani be ndaku ye Nzambi, ne belakisi be bitsila bakwanye. Bangu babapa Zezu busu ve bepami beneni, 67 ye bangu besunwunle wangu ati: «Weni we Nzambi etobo? Tanda besu.» Zezu akalule ne bangu ati: «Ti matanda beyi, beyi nde mekidzele me, 68 ti makaba beyi undzitsi, beyi nde kalulele me. 69 Ni tsawen mene yi, we yikwene Mutu asundele untsitsi kwele ye boko ye sangwe ye Nzambi we singa.» 70 Ye besi betanda ati: «Yayu weni nwana we Nzambi?» Zezu akalule ne bangu ati, beyi mene ni bitanda ati: «Meni nwana we Nzambi.» 71 Ye bangu betanda ati: «Besu baya nde dzanvu ne batu boko ne uya pita Zezu. Besu mene bayuka medzi me wowe.»