Mat 1 | XBIY | STEP | Sank epie ka apulp nti manmakn Jisaselel. Jisas ka ntieyarkup Devitel, pe Devit ka ntieyarkup Abrahamel.

‏ Matthew 1

Nia Antuel Milman Mipmakn Jisas Kraiselel

1 Sank epie ka apulp nti manmakn Jisaselel. Jisas ka ntieyarkup Devitel, pe Devit ka ntieyarkup Abrahamel.

2 Abraham ka ra Aisak
Aisak ka ra Jekop
Jekop ka ra Juda antempel nti es knuan ankilel. ^{▼▼1:2 - Juda amposel nti es knuan ankilel ka ar niorknel nti 12-pla wopmweink antuel likekn likekn, pe nti ka manmakn antuel Israelel.}
3 Juda ka ra Peres antempel Sera. Mamam ntiwuyeel ka Tamar.
Peres ka ra Hesron.
Hesron ka ra Ram.
4 Ram ka ra Aminadap.
Aminadap ka ra Nason.
Nason ka ra Salmon.
5 Salmon ka ra Boas. Mamam ankilel ka Rahap.
Boas ka ra Obet. Mamam ankilel ka Rut. ^{▼▼1:5-6 - Nia antuel maken ka antemp nti Israel nkisel epie, ka nti ntieyarkup yatelel antun mper nti, aser nti ka makn Jisasel. Nia antuel ka ntalekil, Tamar nti Rahap antempel Rut.}
Obet ka ra Jesi.
6 Jesi ka ra moule mamp Devit.
Devit ka ra Solomon. Ampueikel mamam Solomonel ka maken Uriael.
7 Solomon ka ra Rehoboam.
Rehoboam ka ra Abiya.
Abiya ka ra Asa.
8 Asa ka ra Jehosapat.
Jehosapat ka ra Jehoram.
Jehoram ka ra Usia.
9 Usia ka ra Jotam.
Jotam ka ra Ahas.
Ahas ka ra Hesekia.
10 Hesekia ka ra Manase.
Manase ka ra Emon.
Emon ka ra Josaia.
11 Josaia ka ra Jehoiakin ampueipel nti knuan ankilel. Wank ekilelel nti Babilon ka aimpar nti Israel, nkiyir nti mpi kitapm antuel Babilon, pe nti Babilon nakantup nti na korokn ampu mpi yemp antuel Israel.
12 Nti ar Babilonel i, Jehoiakin mira Sealtiel.
Pe Sealtiel ka ra Serubabel.
13 Serubabel ka ra Abiut.
Abiut ka ra Eliakim.
Eliakim ka ra Asor.
14 Asor ka ra Sadok.
Sadok ka ra Akim.
Akim ka ra Eliut.
15 Eliut ka ra Eleasar.
Eleasar ka ra Matan.
Matan ka ra Jekop.
16 Jekop ka ra Josep. Josep ka minkan Mariael. Maria ka ra Jisas, ka nti aiyimpil Krais, moule ka Wulapm Weink yuwakel.
17 Nti manmakn ka yek Abraham lala tnei Devitel ka 14. Pe yek Devit lala tnei nti Israel ka ar Babilonel ka 14. Pe yek Babilon lala tnei Kraisel ka 14. Sank epie ka nak apulp nti manmakn Jisasel.

Maria Ra Jisas Kraisel

18 Sank apulp Jisas Krais ka Maria ra kilel ka ntalekil. Mamam ankilel ka Maria, ka nti antupinta kil na yintemp Josep nkis. Aser ka peyar, Maria karokn antemp Josep nkis aser kil ampu apmot knuamp, kil ninkilapmelim. Apulpaser Pirpm Sepmel Wulapm Weinkel ankil awulmpil i, kil ninkilapmelim.

19 Aser minkan ankilel Josep kil ka moule akosepm, niumuaipm niluknunel, kil ka nakerpm sankwunamp Wulapm Weinkel ka Moses nakel. Kil eipm aser Maria ninkilapmelim. Eti kil karokn na yupul Maria wule maiyaknel, na nkiyir kil yer niampepm antuel mentitmakenel, karokn. Eti kil na sirkempil nkuwepmel. 20 Josep peyar wunempwaiyimp yayapel kil na yupul sopel. Aser kil ar niumpu ninkiniepmel aser na ensel Wulapm Weinkelel ninkemil nakimpil na, “Josep, moule ntieyarkup Devitel, yikn korokn sirkemp Maria. Ko yikn sompil, ka maken aiyiknel. Yikn ampu eipm apm. Ninkilapm po ar kil lunkoel, ka Pirpm Sepmel Wulapm Weinkelel ankil awulmpil i kil ninkilapmelim. 21 Kil arai ra ninkilapm ntit, pe nia ankilel ko yikn yimpil Jisas. Niupukn nia Jisasel ka nak na kil arai nantip mua yirkomp nti mentitmaken ankilel, nti ka nkis wunamp'uretelel. 22 Ampueikampueikel moule ka nakaworp yapmunemp Wulapm Weinkelel, sank Wulapm Weinkel ka naikul niepm ankilel nak na,Makenel, kil peyar arokn antemp minkan, aser kil ka ninkilapmelim, i ko kil mira ninkilapm ntit. Nia ankilel ko nti yimpilel, Emanuel. (Aisaia 7:14) (Niupukn nia Emanuelel ka nak na Wulapm Weink ka antemp ant ar.) Sank ampueikel, pie ant niampepm nkupmus, pie niminink.”

24 Josep ampu nkarp niumpuel i, kil apul misop sank karep ensel Wulapm Weinkel nakimpilel, i kil nkamump maken ankilel Maria. 25 Aser Josep karokn ampu rap Maria ninkilapm irpm mpimpi Maria mira ninkilapm ntit. I Josep amiyimpil Jisas.