Rom 7 | XSI | STEP | Niŋgu-nambwe wukale, naporo ŋgua ŋine ilâ pa miki tamâta ŋinde muŋga kapanâna sondo ndo ŋana ŋgua tukuŋa kâ. Miki kasama tu zo ŋana tamâta toŋge imo via yo, ande ŋgua tukuŋa uru ikai poe papa i. Aŋga zo ŋana i ma imâte, ande i imo ŋgua tukuŋa kalo kilo, ande tia.

‏ Romans 7

Kala ŋine ilo-kalo wasaseki uru ikai poe pa kinda

1 Niŋgu-nambwe wukale, naporo ŋgua ŋine ilâ pa miki tamâta ŋinde muŋga kapanâna sondo ndo ŋana ŋgua tukuŋa kâ. Miki kasama tu zo ŋana tamâta toŋge imo via yo, ande ŋgua tukuŋa uru ikai poe papa i. Aŋga zo ŋana i ma imâte, ande i imo ŋgua tukuŋa kalo kilo, ande tia.

2 Naŋa ma asia ŋgua lâ pakâeŋa ne mâsi tini ŋana aveta ŋine ipâŋga nia yo. Ambo taine toŋge ikâe lâ, aku i kaiwa tamâne imo via yo, ande ŋgua tukuŋa ipa i lâ taitu kuku kaiwa tamâne. Ambo taine ŋinde kaiwa tamâne ma imâte, ande i imo pakâeŋa ne ŋgua tukuŋa ŋinde kalo, ande tia. 3 Ambo taine ŋinde kaiwa tamâne imo via yo, andeta taine ŋinde ilâ ikeno kuku tamâne toŋge, ande kinzi ma siporo tu i nde taine ŋana itambira tini potomule kâ. Ambo i kaiwa tamâne imâte lâ, ande i imo pakâeŋa ne ŋgua tukuŋa ŋinde kalo tia. Mine kala, ambo taine ŋinde itu ikai tamâne wasaseki toŋge, ande i ma imo itogo taine ŋana itambira tini potomule kâ, ande tia.

4 Niŋgu-nambwe wukale, miki kala kamo mine nâ. Muŋgani miki kapasipa lâ taitu kuku Kirisi, aku ŋinde itogo miki kamâte kuku i. Mine nde miki ŋandai kamo ŋgua tukuŋa kalo ŋga. Kala ŋine miki kamo tamâta toŋge ne tamâta, tamâtani ndaina Maro Kindeni muŋga ipaŋo lâ mateŋa nianzi imandi imo via kilo. Maro Kindeni iveta mine ŋana ivila kinda tu taveta vetâŋa ara, ikura ipatea pa kinda mine. 5 Nanayoni, lâ zo ŋinde kinda tapono muli yo pa ilo-kalo siŋga ne vetâŋa, ande ŋgua-tukuŋa iveta ilo-kalo sakamao ŋinde ipâŋga nia yo, kala taveta kiesaka. Aku ilo-kalo siŋga ŋinde io kinda lâ nzâla ŋinde ilâ pa mateŋa kâ. 6 Lâ zo ŋinde, Mose ne ŋgua tukuŋa imo itogo wâlo ŋana ipa kinda kaika kâ. Andeta muli ŋga kinda tapasipa kuku Kirisi ne mateŋa. Mine kala zo ŋine kinda tamo ŋgua tukuŋa kalo, ande tia. Muŋgani yo, ande kinda uru tapaveta kuku vetâŋa ndia rârâni kinzi muŋga siŋgere lâ ŋgua tukuŋa ne pepa tini ikeno. Andeta kala ŋine kinda tapaveta kuku vetâŋa wasaseki ndia rârâni Koroani Sapâŋa itula pa kinda. Mine nde kinda taveta wurâta sondo nâ pa Maro Kindeni.

Kiesaka iyaula kinda lâ

7 Mao nâ, muŋga ŋgua tukuŋa iveta ilo-kalo sakamao ŋinde ipâŋga nia yo, kala kinda taveta kiesaka. Mine nde kinda ma taporo mana. Tiambo kinda ma taporo tu, “Ŋgua tukuŋa nde kelekele sakamao ndo, itogo kiesaka mine”, a? Kinda ma taporo ŋgua kaŋa mine tia ndo! Miki kalomi ŋgere sondo ŋga; ambo ŋgua tukuŋa ŋandai itula vetâŋa pinde kilala pwataki tu vetâŋa ŋinde nde kiesaka, ande naŋa ma azizâla tu vetâŋa ndia nde ara aŋga vetâŋa ndia nde sakamao. Ŋgua tukuŋa toŋge ikeno mine tu, “Noko ma ilo yosi pa noko tini pinde nenzi kelekele ndimo.” Ambo ŋgua tukuŋa ŋinde ikeno tia, ande naŋa ma azizâla tu ilo-yosiŋa ne mâsi nde kiesaka. 8 Andeta kiesaka iyoka ŋgua tukuŋa ne nzâla imâ ku igagati iloŋgu kaloŋgu ŋana iloŋgu yosi pa kelekele kie-kie. Miki kaloŋo ŋga; ambo ŋgua tukuŋa ikeno tia, ande kiesaka ne walo ma ikeno ŋana iveta sâ toŋge tia. 9 Muŋgani, lâ zo ŋinde naŋa asama Maro Kindeni ne ŋgua tukuŋa tia yo yo, ande naŋa atu naŋa amo viâŋgu. Andeta muli ŋga apanâna ŋana Maro Kindeni ne ŋgua tukuŋa kâ, aku kiesaka ne walo ipâŋga ŋalae tina, 10 kala naŋa apâŋga lâ nzâla ŋinde ilâ pa mateŋa kâ. Nia ndoyo Maro Kindeni ipatea tu ŋgua tukuŋa ma via ilanzi tamâta. Andeta naŋa ŋandai akai via lâ ŋgua tukuŋa tini ŋga. Ŋgua tukuŋa io naŋa lâ nzâla ŋinde ilâ pa mateŋa kâ, 11 ŋana tu kiesaka iyoka ŋgua tukuŋa ne nzâla imâ ku ilaŋe naŋa. Mine kala kiesaka iveta ŋgua tukuŋa ipâŋga kelekele ŋana ikai naŋa alâ pa mateŋa kâ. 12 Ayo, kinda ma taporo ŋgua kaŋa mana ŋana ŋgua tukuŋa kâ. Maro Kindeni tamwata io ŋgua tukuŋa imâ pa kinda. Mine nde kinda tasama tu i ne ŋgua tukuŋa rârâni nde sapâŋa, aku ne ŋgua tukuŋa rârâni uru ivila kinda sondo ndo ŋana itula vetâŋa ara kilala pwataki pa kinda.

13 Mana mana, a? Tiambo kelekele ara ŋinde io naŋa lâ nzâla ŋinde ilâ pa mateŋa kâ, a? Tia ndo kanaŋo! Kiesaka nâ iveta mine pa naŋa. Kiesaka muŋga ipasipa lâ taitu kuku ŋgua tukuŋa ara ŋinde, kala io naŋa lâ nzâla ŋinde ilâ pa mateŋa kâ. Maro Kindeni isâu pa kiesaka tu ma iveta vetâŋa kie mine, ŋana tu i ilo tu kiesaka kilala ma ipâŋga nia yo. Mine kala Maro Kindeni ne ŋgua tukuŋa ŋinde itula kiesaka kilala pwataki tu ŋinde nde kelekele sakamao ndo.

Kiesaka itu ikai poe pa nenda via

14 Kinda tasama tu Maro Kindeni tamwata io ŋgua tukuŋa imâ pa kinda. Andeta naŋa nde tamâta nâ, kala uru amo tava ilo-kalo siŋga. Mine nde naŋa amo atogo kiesaka ne wurâta tamâta kaa nâ. 15 Naŋa atu asama mine; ŋana sâ kâ ŋga naŋa uru aveta vetâŋa pinde. Andeta ŋinde duvi naŋa asama tia. Vetâŋa ndia naŋa iloŋgu tu aveta, ande aveta vetâŋa ŋinde tia. Aŋga vetâŋa ndia tiniŋgu pwâka ndo tu aveta, ande naŋa aveta vetâŋani ndaina. 16 Naŋa warakâŋgu tiniŋgu pwâka ŋana aveta vetâŋa sakamao pinde, andeta zo katiŋe naŋa aveta vetâŋani ndaina, aku kaloŋgu loko ŋana. Aku ŋinde itula pwataki tu naŋa amora Maro Kindeni ne ŋgua tukuŋa tu kelekele ara nâ. 17 Mine kala naŋa warakâŋgu nâ aveta vetâŋa sakamao ŋinde, ande tia. Kiesaka imo iloŋgu kaloŋgu, aku kiesaka ŋinde nâ iveta vetâŋa sakamao ŋinde. 18 Naŋa nde tamâta nâ, aku asama tu naneŋgu ilo-kalo siŋga ikura tu igagatina ŋana aveta vetâŋa ara toŋge, ande tia. Mao nâ, naŋa iloŋgu tu aveta vetâŋa ara, andeta akura tu aveta mine tia. 19 Vetâŋa ara ndia naŋa iloŋgu tu aveta, ande ŋinde aveta tia. Aŋga vetâŋa potomule ndia tiniŋgu pwâka tu aveta, ande ŋinde naŋa aveta. 20 Naŋa tiniŋgu pwâka tu aveta vetâŋa sakamao pinde, andeta uru aveta vetâŋani ndaina. Aku ŋinde itula pwataki tu naŋa warakâŋgu nâ aveta vetâŋa sakamao ŋinde, ande tia. Kiesaka imo iloŋgu kaloŋgu, aku kiesaka ŋinde nâ iveta vetâŋa sakamao ŋinde.

21 Mine kala naŋa asama tu vetâŋa kie mine uru ipâŋga pana; lâ zo ndia naŋa atu aveta vetâŋa ara pinde, ande vetâŋa sakamao uru isae nzâla pana, kala akura tu aveta vetâŋa sakamao nâ. 22 Mao nâ, naŋa iloŋgu ndo tu apono muli pa Maro Kindeni ne ŋgua tukuŋa. 23 Andeta naŋa asama tu ŋgua tukuŋa kie toŋge ikeno iloŋgu kaloŋgu, aku ŋgua tukuŋa ŋinde uru ipara kuku Maro Kindeni ne ŋgua tukuŋa ŋinde naŋa iloŋgu papa. Ŋinde nde kiesaka ne ŋgua tukuŋa, aku ŋinde uru ipa naŋa kaika wa ikai poe pa iloŋgu kaloŋgu wa. 24 Opopo, malia ŋine uru iyaula naŋa iloŋgu kaloŋgu ndo lâ! Ea ma ivilana ku izavaru kiesaka ne kaika ŋinde piti lâ karaeŋgu ŋine imo mateŋa kalo, a? 25 Naŋa kawâŋgu ndaŋge ŋalae ilâ pa Maro Kindeni! Kinda nenda Maro Ŋalae Yesu Kirisi ma ikai Maro Kindeni ne pavilâŋa imâ pa naŋa.

Mine kala naŋa uru amo mine; naŋa warakâŋgu neŋgu ilo-kalo pinde itu imo Maro Kindeni ne ŋgua tukuŋa kalo. Aŋga naneŋgu ilo-kalo siŋga nde imo kiesaka ne ŋgua tukuŋa kalo.