Luke 21

Epa eka kagbwǝri ka nya Ashili

ka lenyong le yende

1Yeso ka ara okpwe naka laka ana ocǝ yende aneya taara emate a nyimi ara le’eke le emate akwilǝ Ashili. 2Naka kang laka kagbwǝri kandaye a ka tare eyo emate e batebate leere a nyimi ara le’eke leme kanza.

3Na ka bekaana, “Eyang baala o ying epeng eme, epa eka kagbwǝri kandaye kaana ka tare ba nyimi me, e kale o dangareme ba pate. 4Obena pate ana ocǝ name ane nya a baate a nyimi epa e cake ka neya ka e, kai kanza ba nyimi odera naka nya pate emate epaolya kai ka lenyong le yende.”

Yeso ka baale epa eka eyo mane aromo kai

5Ana ondo a nyimi ana o tarea kai neya beya angmǝ aza akwilǝ a Ashili, ka nangka a babara ai ka acale emamate, a magogoro maaka a nyaza mo gole akwilǝ me. Na ka bekaa ne na, 6“Magogoro maana eya gonta me, a were ya deya ka lecale leyende ato baya le aza le yende zora o bacakare ne.”

7Nane pirkǝ kai na, “Ondo baala, ngmǝyamea aya eza mapapa mana? Eya teyo laka ka te rose bena a were me a amara ko deya?”

8Naka kabare na, “Doola na ka edang tana ondo wilǝrǝ ying ne. Obena aromo a cake ya deya ka leze leng, ane beye majakari na, ‘Mea Ondooka Ashili a zake,’ ane kang beya na, ‘A were o maare a amara.’ Tane tare ne ne. 9E kang kona angmǝ o makara ka o ara anyong, tane kerke ne. Seeka a bore o ya a nyimi, a omaare tata izi.”

10A wereme na Yeso bekaa ne na, “Makeke mayo eza okara ka makeke ma yende, a togomo teyo eza okara ka togomo te yende. 11Adeze a yo zekimarnu a cake, ka e komo kanza ka makono ato ara cak. A yo kang laka mapa ma boome ka mapa maaka a ta a tukǝ o laka me ne a susǝ aza shili.

12“Zongka nyimi, neyo gǝǝzǝ ying a cak. Neyo ale ka ying a madandaro ma o gwarzanang maYahuda ka core angmǝ aza o ying. A kang a aleze ka ying a tokwilǝ to pateze ana o eza epa e buru ▼

▼Aya beeze ka e canti na kurkuku.

a yo pirǝ ying angmǝ a begeshe ba agomo a batebate ka a moole ▼

▼A beye ka e canti na Magomna.

aza o bena ying e tareng. 13Nyimia wayo itǝ orona o bele one angmǝ aza ong. 14Aza nyimi terana anyong aying tana e eze madoola nangka eyo kabare angmǝ aza o ying ne, 15eyang nya ying angmǝ a woma ka o rosa nangka ana o nyana o ying neto kang ama o itǝ ka ying ne. 16Pate ana ate ka iini, arone a lome, ana akwilǝ aying, ka ejaa, neyo nyana, ane niyi ying ka wonze ana ondo o ying. 17Komana wayo nyana ying aza o bena ying e tareng. 18Pate ka nyimi lekpwi le yende okpwe o ying to wilǝ ne. 19E itǝ ka legoone eng yang nya ying ebeene o dera o maro.

20“A e laka apeng Urushalima à á ringgari ai ka ana o tesa geza a moole, e rose o bena a were o posa ai wa amara. 21Aza nyimi andaaka neyo makeke ma Yahudiya aane song kane zale mayara, andaaka neya nyimi apeng ane suri, kanza andaaka neye a topepeng to batebate to yangga o Urushalima kana ne lyǝ a nyimi apeng ne. 22A were name a yo itǝ o taasa aza andaaka ne eza epa e buru, kanza angmǝ aka ana o beya angmǝ ka mawo ma Ashili ne wele, a yo pena. ^c 23Wayo itǝ ka o zitǝ cake andaye aka neye ka e tumǝ ka andaye amea neya nyaza ayana maane a tomore tonname. O mungi Ashili wayo oko aza aromo ana, aane yo zitǝ jǝng. 24A yo wonga ana ondo one ka o sagali, a yo kang beza odanggare one azara a ale a pate makeke ma lerambo le Ashili. A Urushalima a yo itǝ epa ma zelakong ara aworme ka neyo eza togomo ara o danggare one ▼

▼Neya ka e sanga aworme.

a ale a were aka neyo dukǝ bekazo be ne.

25“A yo laka magogoro ma sau, ongme, oreka ka e werewere. Ara kaana a deze, aromo neyo kona o burǝ ane kang kona boome aza behoowo ka o tambalana lepong. 26Aromo neyo kona boome aza epa eka ne laka eya oko a deze, o bena o bare o nyimi shili Ashili a yo zukarnǝ mai. 27A were namea komana me wayo laka Kena ka Oromo aka ya deya a nyimi mawere ka o bare okai ka o gongnga kai o cake. ^e 28E bora o gonta magogoro mana, erana ba itǝ e ara tokpwe toying aza, aza o bena o boza o ying wa amara.”

29Ka bele ne angmǝ gerpo na, “Laka na uti o saya ka mati ba pate. 30Ne bora o sǝrsǝzǝ ma rane, eyo laka ka tokpwe toying na lekoze le amara. 31Nyimia waaza, ba laka pate epa ena eya ale, e rose o bena togomo te Ashili te amara.

32“Ang bele ying e peng eme, aromo a were ana neto gbwizǝ a pate ne zongka mapapa maana ma wore okpwe mai. 33Azaa shili ka deze neyo maro angmǝ ang ato maro ne.

34“Ekena teto. Kana e baya anyong aying aye maring ka o sosoza, kanza ka magogoro ma were anane. Kana e baya a lengme lenname le meke ying eta rosa ne. 35Lengme lenname ya deya aza pate ondooka waya ka ebeene a pate lerambo le Ashili leena. 36Ekena teto koonang a were, e beye angmǝ ka Ashili nangka eyo bisǝ a pate epa eka eya deya, kanza nangka eyo ama o itǝ a begeshe be kena ka Oromo ka o kona o leba.”

37Koonang lengme Yeso ka ale akwilǝ Ashili kaka baale, a koonang lyǝlu aka kuri kaka maare lelyaare ba za oyara o Zaitun. 38A aromo a cake gwarzanang akwilǝ Ashili koonang leleere kane koneze kai.