1Ch 1 | XteSC | STEP

1 Chronicles 1

Adamdi deipupa, dadeipdanen yakaramyanen, Abrahamdi yana deiamu neng tep, sekeipi upu

1 – 2 – 3 Tuai mutu nesala ban-ban yuma, sun co puna nengda ake. Allahdi menmena ketekepra deipu ngebo, Adamdi nyapu butene ^{▼▼nyapu butene – Adamdi, menmena taru er mi Abel deipu. Amenda taru, er mi butenenge ton Kain deipu. Weneri deiamu mida, Set kuramu.} deiamu dingeda, amenda taru deipu ngeboda, Set deipu. Setdi deipu ngeboda, Enos deipu. Enosdi deipu ngeboda, Kenaan deipupa dakuramu. Dakuramnganen, Kenandi deipu ngeboda, Mahalaheel. Dakuramnganen, Mahalaheeldi deipu ngeboda, Yared deipu. Yareddi deipu ngeboda Henok. Henok dakuramnganen, erdi Metusala deipu. Metusala dakuramnganen, Metusaladi Lamek deipu. Amenda taruda, Lamek dingeda, Nuh deipu.

Nuhdi deipupa, dadeipdanen yakarami neng, sun yala tep, si sekra deipi upu

4 Nuh dingeda, sal nyapu weneri neng deiamu. Sun sida ake, Sem cap, Ham cap, tonda Yafet cap, deiamupa kurami.

5 Yafetdi sal nyapu ton deiamu. Aneng sun sida ake, Gomer cap, Magog cap, Madai cap, Yawan cap, Tubal cap, Mesek cap, tonda Tiras cap, sun ukuprap neng deiamupa kurami. Sun aneng yumada, sun nai bo sida, Yafet kuramu cadi, Yafetdi aneng yuma deiamupa, kurami. 6 Yafet erdi deiamu ngebo, Gomer kuramu. Gomerdi deipu neng sun sida ake. Ada, Askenas cap, Rifat cap, tonda Togarma cap, deiamupa dakurami. 7 Tonda, Yafet erdi deiamu ngebo Yawan kuramu. Yawandi deipu neng, sun sida ake. Ada, Elisa cap, Tarsis cap deipu ngeboda, er si ton Spanyol perami. Tonda, Kitim cap, Dodanim cap, deiamupa, dakurami.

8 Uda, Nuh erdi deiamu ngebo, er si Hamdi, sal nyapu ton deiamu. Sun sida ake. Ada, Kus cap, Mesir cap, Libia cap, tonda Kanaan cap, deiamupa kurami. Sun anengda, Hamdi deiamupa, dadeipdanen yakaramidi kurami nesala, sun yuma sun co puna neng kurami. 9 Angetopu, Hamdi deiamu ngebo, er si Kusdi deipu nengda, sun sida ake. Ada, Seba cap, Awila cap, Sabta cap, Raema cap, tonda Sabteka cap deiamupa, sunda amutu neng kurami. Tonda, Kusdi deipu ngebo Raema. Raemadi deipu nengda, Syeba cap, Dedan cap, kuramrei. 10 Kusdi sal mi tenpu ton deiamu. Angebo er sida, Nimrod kuramu. Nimrod erda, puto weik ngebo cadi, nimi mutu ban-ban yuma kurami nesala kael keamidi, er tep, “Erda tek sisi ila puto ngebo kurure,’ peramidi kurami.

11 – 12 Tonda, Hamdi deipu ngebo, er si Mesir, erdi deipu neng sun sida ake. Ada, Lidia cap, Anamim cap, Lehabim cap, Nabtuhim cap, tonda, Patrusim cap, Kasluhim cap, kurami. Kasluhimdi deipupa, dadeipdanen yakarami neng, sun anengda, Filistin yala nesala kurami. Filistin yala nengda, sun co puna nengda, Kasluhim yala neng kurami.

13 – 14 Tonda, Hamdi deipu ngebo er si Kanaan, erdi deiamu sal nyapuda ake. Ada, Sidon cap, Het cap, Yebus cap, Amori cap, Gergasi cap, deiamu. Sidonda, du ngebo kuramu cadi, Kanandi deiamupa, deipdanen yakarami nesala yuma, sun co puna neng kurami. Atep Kanandi nyapu deiamupa, dadeidanen yakarami nesalada, sun co puna neng kurami. Sun yuk-yuk dinin, sun yala nesala ton deipyakaramipa, sun co puna ngeboda Kanaan kuramu.

15 – 16 Tonda, Kanaandi deiamupa, dadeipdanen yakarami neng ton ake. Hewi mutu neng cap, Arki mutu neng cap, Sini mutu neng cap, tonda Arwadi deiamu mutu neng cap, Semaridi deiamu mutu neng cap, tonda Hamatidi deiamu mutu neng cap, sun yuma, sun co puna ngeboda, Kanaan kuramu.

Semdi deipupa dadeipdanen, yakaramyanen siryada, Abraham deipka tep, sekeipi upu

17 Sun co puna ngebo Nuh, erdi deipu ngeboda, Sem kuramu. Semdi sal nyapu ton deiamu neng, sun sida ake. Ada, Elam cap, Asyur cap, Arpakhsad cap, Lud cap, Aram cap, Us cap, Hul cap, Geter cap, tonda Mesek cap, deiamupa kurami. Sun anengda, Semdi deiamupa, dadeipdanen yakaramidi, kurami nesala sun yuma, sun co puna neng kurami. Atep nengeda, Semdi deiamupa, dadeipdanen yakarami nesala yumada, sun co puna neng si atempu doramidi, asipu perami. 18 Semdi deiamu ngebo, er si Arpakhsad kuramudi, er mi Selah deipu. Selahdi, Eber deipu. 19 Eberda, sal nyapu butene deiamu. Er mi du ngebo, er sida, Peleg kuramu. Uda angebo er si Peleg pemunge deiyoda, er kuramu taruda, tuai mutu ban-ban yuma kurami nesalada, bokamya tep, asi pemi. Peleg er weit bo er sida, Yoktan kuramu.

20 Yoktandi deiamu nengda, sun sida ake. Ada, Almodad mutu kuramu ngebo cap, Selef mutu kuramu ngebo cap, Hazar-Mawet mutu kuramu ngebo cap, Yera mutu kuramu ngebo cap, 21 Hadoram cap, Uzal cap, Dikla cap, 22 Ebal cap, Abimael cap, Syeba cap, 23 tonda Ofir cap, Hawila cap, Yobab cap, Yoktandi deiamupa kuramya cadi, sun co puna ngeboda, Yoktan kuramu. 24 Tonda, Yoktandi deiamu neng ton, sun si ake. Shem cap, Arpakhsad cap, Selah cap, 25 Eber cap, Peleg cap, Rehu cap, 26 Serug cap, Nahor cap, Terah cap, 27 Abram cap deipu. Abram amenda taruda, Allahdi, er si ton ‘Abraham,’ pepra deiamu. Sun aneng yumada, sun co puna ngeboda, Yoktan kuramu.

Abrahamdi deipupa, dadeipdanen yakaramyanen, deipipa kurami neng tep, sekeipi upu

28 Abrahamdi sal nyapu butene neng deiamu. Sun sida ake. Ada, Isak cap, Ismael cap, deiamupa kuramrei. 29 Anengdi deipreipa, dadeipdanen yakarami neng sida ake. Ismael erdi deiamu neng sun sida ake. Menmena du ngebodi deiamu ngeboda, Neboyat kuramu. Amenda taru deiamu nengda, Kedar cap, Adbeel cap, Mibsam cap, 30 – 31 Tonda, Misma cap, Duma cap, Masa cap, Hadad cap, Tema cap, tonda Yetur cap, Nafis cap, Ketma cap, deiamu. Ada, Ismaeldi sun ukuprap neng deiamupa, kurami.

Abrahamdi tenpu ner er sida, Ketura dopudi deiamu nyapu tep, sekeipi upu

32 Abrahamda, tapakra tarumne ner ^{▼▼tarumne ner – Aupu deiyoda, pumun taru sun Ibrani neng kankan dinin, ton nengda, nerapu weikanun ton tapakra dorami. Menmena doami nerda, ‘Ne ner sisa,’ tenerami dinin, amenda taru doami nerapuda, ‘Ada nyapu weik deiptene’ tenen, tapakra dorami. Amenda taru dorami nerapu tep nengeda, ‘tarumne nerapu’ perami.} ton dopu. Aner er sida, Ketura kuramu. Atarupu anerdi deipu sal nyapu sun sida ake. Ada, Zimram cap, Yoksan cap, Medan cap, Midian cap, Isybak cap, tonda Suah cap, deiamupa kurami. Tonda, Yoksanda, sal nyapu butene deiamu. Sun sida ake. Syeba cap, Dedan cap, deiamupa kuramrei. 33 Tonda, Abraham erdi deipu ngebo Midiandi deiamu neng, sun sida ake. Ada, Efa cap, Efer cap, Hanokh cap, Abida cap, tonda Elaada cap, sun ukuprap neng deiamupa kurami. Aneng yumada, sun nin sisa, er sida, Ketura kuramu.

Abrahamdi deiamu ngebo Isakdi deipu ngeboda, Esau kuramu. Sun butenedi deipreipa, dadeipgerekdanen ban neng tep, si sekeipi upu

34 Abraham er mi Isak deipu. Deipupa dakuramnganen, Isakdi sal nyapu butene deiamu neng, sun sida ake. Ada, Esau cap, Yakub cap, deiamupa kuramrei. (Allahdi Yakub tep yuk si dopudi, er tep ukupu si Israel pemu.) 35 Esaudi deiamu sal nyapu sun sida ake. Ada, Elifas cap, Rehuel cap, Yeus cap, Yaelem cap, tonda Korah cap, deiamupa kurami. 36 Tonda, Esau deipu ngebo er si Elifasda, aneng ton deiamu. Ada, Teman cap, Omar cap, Zefi cap, Gaetam cap, Kenas cap, Timna cap, tonda Amalek cap, deipu. Anengda, sun co puna ngebo Esau kuramu. 37 Tonda, Esau erdi deipu ngebo, Rehueldi deiamu neng, sun si ake. Ada, Nahat cap, Zerah cap, Syama cap, Miza cap, deiamu. Sun co puna ngeboda, Rehuel kuramu.

Edom mutu neitamai tu talepra kurami neng tep, sekeipi upu

38 Esaudi deiamu ngebo ton, er sida Seir kuramu. Seirdi deiamupa, dadeipdanen yakarami nengda, Edom mutu neitamai tu talepra kurami. Seirdi deiamu nengdi, amutu tu taleami. Sun sida ake. Ada, Lotan cap, Syobal cap, Zibeon cap, Ana cap, Disyon cap, Ezer cap, tonda Disyan cap, sun ukuprap neng kurami. 39 Tonda, Seirdi deipu ngebo, Lotandi deiamu sal nyapuda ake. Ada, Hori cap, Honam cap, deiamu. Tonda, Lotan er malner tenpu ton, aner er sida, Timna perami. 40 Tonda, Seirdi deipu ngebo, Syobaldi deiamu sal nyapu sun sida ake. Ada, Alyan cap, Manahat cap, Ebal cap, Syefi cap, tonda Onam cap, deiamupa kurami. Tonda, Seirdi deipu ngebo Zibeondi deiamu nyapuda ake. Ada, Aya cap, Ana cap, kuramrei.

41 Zibeon erdi deiamu ngebo, Ana kuramu. Anadi Disyon deiamu. Tonda angebo Disyondi deiamu nyapu sun sida ake. Ada, Hamran cap, Esyban cap, Yitran cap, tonda Keran cap, sun ukuprap neng deiamu. 42 Seirdi deipu ngebo Ezerdi deiamu nengda ake. Ada, Bilhan cap, tonda Yaakan cap, deiamupa kurami. Tonda, Seirdi deipu ngebo Disyondi deiamu sal nyapuda, sun sida ake. Ada, Us cap, Aran cap, deiamupa kuramrei.

Edom mutu talepra kurami nimi deiyo neng tep, pepu upu

43 Israel mutu atara dinin, Yordan me goupra, ortara mutu neitamaida, Edom mutu perami. Ila nimi deiyo neng Raja kepra, Israel nesala taleami neng kapul men gonga keap talerami taruda, Edom mutu nimi deiyo neng Raja kepra, taleami nengda, sun si ake. Edom mutu nimi deiyo kepra adipapu Raja kepra talerami nengda, sun si ake. Dinhaba mutu ngebo, er si Beor, erdi deipu mi Beladi, nimi deiyo kepra Edom mutu taleamu. 44 Bela ukuamnganen, depu pangeda, Bosra mutu ngebo er sida Zerah, er mi Yobabdi nimi deiyo ngebo kepra, amutu taleamu. 45 Ka dingeda, Yobab depupa, Teman mutu ngebo er si Husyamdi, deiyo kepra, amutu taleamu.

46 Tonda, Husyam depupa, ila ati arum Awit mutu ngebo, er si Bedad, er mi Hadaddi deiyo kepra, amutu taleamu. Uda Hadad erdi Edom mutu taleamu taruda, Midian mutu kurami nesalada, Moab mutu tara beidi, Hadaddi aneng damai bena poptapu.

47 Tonda, Hadad depupa, Masereka mutu ngebo, Samladi deiyo kepra taleamu. 48 Adingeda, Samla depupa, Rehobat mutu neitamai dinin, Erata me pirimanai kuramu ngebo, Shauldi Raja keamu. 49 Aukuamu taruda, Shaul depupa, nimi si Akhbor, erdi deipu ngebo er si Bahal-Hanandi, deiyo kepra, amutu taleamu. 50 Ukuamnganen, er peda depu pangeda, Pahi mutu ngebo, er sida Hadad, erdi deiyo kepra, amutu taleamu. Angebo Hadad, er ner sida, Mehetabeel perami. Aner er nai boda, Matridi deiamu. Matrida, er apu boda, Mezahab kuramu. Amenda taruda, Hadad peda depu.

51 Uda, Edom mutu kurami nesala, sun yalada ake. Ada, Timna yala neng cap, Alya yala neng cap, Yetet yala neng cap, 52 Oholibama yala neng cap, Ela yala neng cap, Pinon yala neng cap, 53 Tonda, Kenas yala neng cap, Teman yala neng cap, Mibzar yala neng cap, 54 tonda, Magdiel yala neng cap, Iram yala neng cap kurami. Sun Edom mutu neitamai kurami nengda, sun yala yuk-yuk akuramitopu kupra kuramidi, ayala-ayala neng tep, nimi deiyo kepra, upu talena deiyo neng kepra upu peramidi, amutu talerami.