1Ch 10 | XteSC | STEP | Filistin yala nesala cap, Israel yala nesala cap, podarami. Ukurami dinin, sun Filistin yala nesaladi, Israel yala nesala tep, popra bisbisa kapmanto kupidi, tupa podanmaipanen, Raja Saul cap, er jen talena neng cap kware kupupa, sun gawal tupa tapi neng yuma, bura saka sepdaro bei. Israel yala nesalada, apodaramyai di weikanun depi. Ton nengda, Gilboa mutu damai poptapipa, acapu depi.

1 Chronicles 10

Israel yala nesala, sun deiyo ngebo Raja Saul depu upu

1 Filistin yala nesala cap, Israel yala nesala cap, podarami. Ukurami dinin, sun Filistin yala nesaladi, Israel yala nesala tep, popra bisbisa kapmanto kupidi, tupa podanmaipanen, Raja Saul cap, er jen talena neng cap kware kupupa, sun gawal tupa tapi neng yuma, bura saka sepdaro bei. Israel yala nesalada, apodaramyai di weikanun depi. Ton nengda, Gilboa mutu damai poptapipa, acapu depi. 2 Saul cap, er jen neng cap, bura saka beipane, sun Filistin neng amenda dombeidi, Saul er nyapuda, weneri neng ton bena popi. Aneng sun sida ake. Ada, Yonatan cap, Abinadab cap, tonda Malkisua cap, sun aweneri neng yuma popi. 3 Apodanada, sun Filistin yala nesaladi, ila yu kange tenepra podana deiki di podanmai. Ukunmaiya cadi, sun Filistin yala neng, sun podanmai jen di marapipa, ange di Saul peda marapi dinin, adipapu men depu. Mar di marapipa, Saul er ila susu jeramudi, dila kwamupa, depmanto kupu.

4 Ukunmaipa, Saul depmanto kunmau dinin, nimi podana tep, er melipra ikin keca cap, er jen cap talepra embaramu kaber ngebo tep upepu. “Kan nimi pona tep doupmum parang ya di dopropmemdi, lukra poptapneo. Filistin nengda, Allah er si walwal neng kununga cadi, sun den bam bol deiki tarange men sengnunge. Atep, Allah er damai men yanmanto neng kununge. Tonda, sun amali weik kunge nengdi, ne tep, ‘Erda tali ngebo’ tenen, ne tep mali kweipnengedi, popkamnenge. Ukupnenunga tep, parang ya dopmemdi, kan dipapu lukra poptapneo,” pepra moropu. Upepra moropupane, akaber ngeboda, kware pio weik kupka tep, Saul men lukra popu. Akaber ngebo, er ila kwar kupupa tapu. Ukupu pangeda, Saul er pe kipmau yu weik parang dopra ikmaudi, aya si deiki dourbeupa, adipapu lukra popdaudi, depu.

5 Saul konum depupa, Saul er melimna tep, nimi porbana taru kenengamu gat opkal cap, er jen cap, talepra embaramu kaber ngebo, konum epu dingeda, er peda kwar kupupa, er nong erepra, er pe parang ya dopra ikmaudi, aya takke deiki douryaupa lukudi, popdapupa depu. 6 Ange yuma ukuramya deiki di, Saul cap, er nyapu weneri neng cap, sun yuma depi. Ukupya deiki di, Saul er nimi deiyo talepra, Raja kepra kuramu ngeda, acei apu kupu. Er cap, er nyapsilip yuma capda, konum depya tep, sirya daki.

7 Atarupuda, Yizreel mutu ban kurami Israel yala neng, ange kael kepidi, ton tara nengda, “Uo, Filistin nengda, Saul cap, er nyapu weneri cap, konum popra gawal daki. Tonda, Israel mutu jen talen neng yumada, konum bura saka bendopmange,” pepra, lap pepipa, Israel yala nesala yumada, abamur upu gekenmai dingeda, kware kupupa, sun mutu cap, sun ati arum doramidi kuramyai yuma tapra, bura saka bendopi. Amutu kurami Israel nesaladi bendopi pangeda, sun Filistin yala neng ange epidi, amutu yana, amutu neitamai telep kwamu keca yumada, dalupra dopropidi, sundi amutu ati arum yuma wekrapidi, acapu kunmai.

8 Amutu yana arapra dopropmaidi, mapmaiya bereku pangeda, Filistin mutu jen talena neng yaidi, ‘Sun Israel yala jen neng popmap neng yuma, sun talerami keca cap, opkal cap, sun nong deiki tupa akapmarenge yumada, upula dopropkup’ tenen, Israel neng popra tapmaiyai yana epi. Ada, Gilboa mutu deiki welepidi, Saul cap, er nyapu weneri neng cap, poptapmai neng yuma cap, sun nong epi. 9 Epidi, Saul er nimi porbana taru kenengamu gat opkalda, yana kwiripra dopropidi, Saul er gisopu sektapra bulukropidi, kipra bei. Ukupi dingeda, ‘Filistin mutu neitamai kurameng nesala yuma gekenkameng’ tenen, kai perbana tep, nimi ton wepra deipidi, doproipipa, aupu gekepi nengdi bena, amutu-amutu yuma neitamai lap perbenmai. Amutu nesala kurami ati arum cap, amutu nesaladi, ‘Nun nai bo’ tenen, tali keca si eremaminge deriramyai yuma cap, ila upu deiki di, lap perbenmai. Atep, anengdi aupu lap perbanmaipa, amutu neitamai kurami nesala yuma gekenmai.

10 Sauldi, ‘Nimi porbenkun’ tenen, kenengamu gat opkalda, Filistin jen talena nengdi, ange dopra, Filistin yala nesala, sun isok si eremna tep domi ati pumbon deiami. Tonda, Saul er giso dukda, sun si eremami isok, er sida Dagon perami keca, er si eremna ati pumbon neitamai di gerekotepi. 11 Akupmai dinin, Yabesh mutu nesala, ada Gilead mutu damai kurami Israel yala nengdi, ange yuma gekenmai. Ada, yuk nengdi, “Uo, Filistin yala jen talena nengdi, Saul popmangdi, er giso dukda, Filistin nesala sun si eremnung isok, er si eremna ati pumbon bena, gerekotepmange,” pepipa gekepi.

12 Gekepi dingeda, Yabesh-Gilead mutu neng, yu weik neng kuramya cadi, kwardangna pio gum di, balila weik neng wepra deipipa, aneng beidi, Saul cap, er nyapu weneri cap, poptapmayai di bena, sun nong doprapidi, Yabesh mutu tamupra duyai. Konum doupra yai dingeda, sun popmai neng, sun nong cap, sun yo cap yumada, ila co tekamnga deiyo amutara yana, tu palipra peipi. Ukupidi, sun Israel nesala yumada, ue yoneitam bari tumi neitamai yumada, ‘Uo, nun deiyo ngebo Saul popmaiye,’ tenen, jen jena gum dipapu, jen si tepra, tali engenapu kurami.

13 – 14 Saul depka deiyoda ake. Ada, Sauldi Allah tep, “Kan gispal dona tep, ukupkamne, ukupkamne,” pepra, pedina upu deiki pemu ngeda, dukdongopra men kuramudi, tapu. Tonda, Allah Yahwehdi pemu upu talepra, dukdongopra men kuramnga deiki di depu. Ada, Allah Yahwehdi, “Ukunkamrume, angeda, pio men kunkamrume,” pepra, deiamu mem upu tep nengeda, Sauldi aupu gekepra, men kuramnga deiki di depu.

Angepu gum dinin, tonda, Saulda, Allah tep, “Ne walwal kupmaner ngeda, kandi peterepnemempa, angepu kunkamne,” pepra, Allah damai bena men mororamu dinin, erda nimi konum deamenge neng, sun sambala cap, upu sisingna kael neng, aneng damai bena moropu. Erdi, ‘Ange kupkamne do, ange kupkamne do?’ tenena gum di, walwal kuramu taruda, amali pel dopra kurami neng, sun damai bena, moropka tep, Allah Yahwehdi, Raja Saul tep, yu kupupa, er wenemna tep keca, karepupa depu. Depu pangeda, er pununa tep, Allah Yahwehdi Saul erdi Israel nesala tep, nimi deiyo kepra, Raja kemamudi, amutu yuma taleramunge pununa tep, Isai er mi Daud tep karepu.