1Ch 11 | XteSC | STEP | Israel mutu neitamai kurami nimi deiyo neng yumadi, Raja Daud er damai Hebron mutupu yakanmaidi upenmai. “Nunda, nun deiyo ngebo Raja Daud, kan tara neng sisa yakanmape. Kan apu yapuda, nun peda nun apu yapupu kuramya cadi, nun yalada tenpu neng pua. Atep, kandi nun kael kepkuserume.

1 Chronicles 11

Nimi deiyo ngebo Raja Daud, er Israel mutu cap, Yehuda mutu neitamai cap, deiyo ngebo kepu upu

1 Israel mutu neitamai kurami nimi deiyo neng yumadi, Raja Daud er damai Hebron mutupu yakanmaidi upenmai. “Nunda, nun deiyo ngebo Raja Daud, kan tara neng sisa yakanmape. Kan apu yapuda, nun peda nun apu yapupu kuramya cadi, nun yalada tenpu neng pua. Atep, kandi nun kael kepkuserume. 2 Uda nun kaele. Pumun taru, Raja Sauldi nun tep, upu peramseu dinino, ataru neitamai peda, kan Dauddi Israel mutu neitamai kurami jen talena neng tep, tumi-tumi yuma gonga kepropnedi, sun deiyo ngebo kuramumdi, ‘Nimi porbenkupe,’ peramsemume. Ange utopu, Allah Yahwehdi kan tep, konum pepkeu. Ada, ‘Kan Daudda, ne nyapu sisa, sun Israel yala nesala melipra kunkamre ngebo, kan tep wepra deipkamkene. Tonda, sun damai nimi deiyo ngebo Raja kepra, sun upu pena deiyo ngebo kunkamrume. Kandi anesala yuma talepra, Raja kunkamrume,’ pepra peipkeue,” Israel deiyo neng yumadi, Daud tep pepi.

3 Upepi dingeda, Israel mutu neitamai talepra kurami nimi deiyo-deiyo neng yumada, Hebron mutu, Daud er damaipu bulupra yakanmai. Yai pangeda, Hebron mutu sun deiyo ngebo Daud, Allah Yahweh er damai kunmaudi, gekenmauai Dauddi, “Angeda, sun Israel nesala tep ukupra-ukupra kunkamsene. Ukupkamsene taruda, sundi ne upu gekenerumdi, ne tep ukupra-ukupra kunkamnerume,” pepra, pedina upu deiki di, pepra deipu. Upepupa, sun animi deiyo-deiyo nengdi, Daud er giso deikida, minyak zaitun me dikra deipi. Ada, ‘Angeboda, Allahdi konum Israel mutu neitamai di, nimi deiyo ngebo wepra deipmasere’ tenen, petenkemna tep kupi. Akupi ngeda, Allah Yahwehdi, nabi Samuel er deiki peiamupa, Samueldi pemutopu kupi.

Yerusalem ila ati arum dominge, bisbisa kaprapidi, dalupra dopropinge tep, pepu upu

4 Tenpu taruda, sun deiyo ngebo Raja Daud cap, Israel mutu neitamai kurami nesala yuma cap, Yerusalem mutu porbana tep bei. Ataruda, amutu tenpu dinin, amutu si tep Yebus mutu perami. Deiyoda, sun Yebus nengda, amutu sisa neitamai neng kuramidi talerami. 5 Yebus nengdi balila kupupa, Raja Daud tep upepi, “Kanda amutu neitamai yana wengna tep nengeda, men kupmanto kupkere,” pepi. Upepi dinino, Dauddi amutu bisbisa kaprapudi, dopropu. Dalupra dopropudi, pumun taru amutu nesaladi, ila puto gel beilya deipra domi ati arum, er sida Sion ^{▼▼Sion – Pumun taruda, ati arum weik domipa, sun ila nimi deiyo ngebo er si Raja Daud amutu neitamai kuramu. Amutu sida, Sion perami. Ukutaruda, amutupu dinin, amutu sida, kota Yerusalem, angepu penupe.} mutupu dopropu. Ukupka cadi, ukutaruda, amutu si tep, ‘Raja Daud er ati arum ake,’ pepra penunge. 6 Tonda, menop taru neitamai dipapu, Raja Daud er nyapu yuma tep, upu karepudi upepu. “Amenda taruda, menmena Yebus nesala popra bisbisa kapkamre ngeboda, jen talena deiyo neng, sun ila deiyo ngebo, panglima keipkune. Tonda, amutu kunkamenge nesala talepredi, sun deiyo ngebo kunkamre ja,’ pepu. Atep nengeda, Yebus mutu bena popterepi taruda, Yoab erda menmena taru, Yebus neng porbenamu ngebo cadi, erda jen talena neng, sun deiyo ngebo panglima kepra deipupa, kuramu. Yoab er ninda, Zeruya kuramu.

7 Raja Daud apepmai mutu, Sion mutuda, ila puto gel di deipra wiami lyom beilya neitamai domi ngeda, tupa akunmau. Ukunmaua tep nengeda, amutu neitamai er si tep, “Daud er ila ati arumda ake. Erdi talenkamre mutuda ake,” perami. 8 Dauddi amutu neitamai, ila gel beilya ongopdongopra dopu. Ukupudi, er pel gonga kepu tarada, Milo mutu tara tu di erepra deipudi, gonga kepra, keteng yakan tara mutu dupai deriryau. Ukupu pangeda, er Yoabdi dukdongopra doramnganen, Yebus mutu ati arum dana-dana tara lepsisikra dopudi, gawal daku. 9 Raja Daud dakupbaramu tarada, ila puto kepbaramu. Ukupka deiyoda, Allah Yahweh akeca-keca yuma talepra, deiki tara kurur ila puto ngebodi, Daud tep meliamupa ukuramu. Allah er puto kareamnga deiki di, Daudda puto weik kupbaramu.

Daud er tep, ‘Nimi deiyo ngebo Raja kepkamre’ tenen, kurami nengda, kael keami upu

10 Nimi deiyo ngebo Raja Daud, er jen talena neng, yuk neng tep kwar dangna gum di, Daud cap melipra embana tep, ila deiyo neng, sun sida arup pepkupe. Sun aneng cap, sun Israel mutu neitamai tali kurami neng cap, kikiman nimi deiyo ngebo Raja Daud tep, ‘Er dipapu talepseredi, welepkamre’ tenen, er upu gekeramidi, er tep meliami. Ukuamyanen, Raja Daud er teppu, Allah Yahwehdi, “Israel nesala, sun deiyo ngebo ukupkamre,” pepra pedina upu peipudi, sun Israel yala nesala deiki peiamutopu, Daud nimi deiyo ngebo erepra deipipa, telep kupra kuramu. 11 Nimi deiyo ngebo Raja Daud, er damai kunmai ila jen talena kael nengdi kurami ngeda, lap pepkupe. Ada ake. Hakhmoni erdi deiamu ngebo, er si Yasobam pemu. Angeboda, jen talena tep, ila kael ngebo kuramudi, sun yuk jen talen neng, puto weik neng kurami dinin, sun deiki tara menmena deiyo ngeboda, er kuramu. Angebo Yasobam erda, ila puto jen talena deiyo neng ton, weneri neng tep, gonga kemna deiyo ngebo kuramu. Angebo Yasobamda, pumun taru, pio kwar dangna gum dipapu, tenpu nimi porbana tep benami taruda, yuk mutu nesala, nimi denge pio weik tiga ratus (300) neng, nimi pona tep keca, er si tombak di lukamupa, ataru dipapu sun yuma deami.

12 Raja Daud er amutara dinin, sun ila puto jen talena deiyo neng, weneri neng ^{▼▼weneri neng – Aupu deiyoda, ake. Raja Daud kuramu taruda, er amutara, jen talena neng, puto weik nengda, gung 30 neng ton kuramipa, Israel nesala yumadi, atigapuluh neng sun si kael keami. Agung 30 jen talena nengda, sun deiyo ngebo Abisai kuramu. Sun kan-kanda, pio ila kael keamidi, puto pio weik kurami jen talena neng ton, weneri neng ton kurami. Aweneri neng, sun deiyo ngeboda, Yasobam kuramu. Er amutara dinin, butene ngeboda, Elieser kuramu. Elieser er amutarada, tenpu ngebo ton kuramu dinin, angebo er si men kael keamupu. Ajen talena weneri nengda, Israel nesala yuma sun si kael keamidi, pio ila di gispal dorami.} kan-kan neitamai, menmena ngeboda er si Yasobam, er amutara butene ngeboda, Elieser kuramu. Elieserda, er nai boda, Dodo kuramu. Elieser er nai Dododa, Ahohi mutu ngebo kuramu. 13 – 14 Menop taruda, Pas-Damim mutu neitamai di, Elieserda Daud er cap kikiman wisipra, sun Filistin neng porbana tep kunmarei. Ukupmarei taruda, sun Israel tara jen talena neng yumada, ‘Uo, sun Filistin nengdi popsenung’ tenen, sun damai di adipapu sepdaro bandanmaidi, Daud cap, Elieser cap, tapra bendopi. Ukunmai taruda, Elieser cap, Daud capda, kware gum dipapu, tenpu gandum wa peamya neitamai tekmareidi, Filistin neng ponmareipa, sun Filistin nengdi, ‘Aneng butene popkup’ tenen, yakanmai dinin, sun Daud cap, Elieser cap, sun butenedi, Filistin jen talena neng denge weik 300 neng ponmarei. Ataruda, Allah Yahweh er ila puto sun aneng butene deiki deipupa, ila kange mun porbisina popbisispreidi, Filistin neng tep popra gawal dakrei.

15 – 16 Tonda, tenpu taru ton, Daud er ila kael jen talena nengda, 30 neng kurami dinin, sun kankan di, nimi weneri nengda, ‘Nun nimi deiyo ngebo Raja Daud cap, er antapkamep’ tenen, tenpu mutu er si Adulam mutu peramyaida, amutu damai kwamu gel imir bei. Nimi deiyo ngebo Daud erda, ila gel di domyai, ‘Podana gum di, bouna dipu kunkamne’ tenen, Adulam mutu kwamu gel imir dam domi ati kunmau. Amutu neitamai kunmau taruda, sun Filistin neng, iknapi dam tara dinin, Refaim perami ban mutu kunmai. Atarupu dinin, ton gungda, sun Filistin jen talen nengda, Betlehem mutu ton bulupra kunmai. 17 Sun yuma dakunmaipanen, tenpu tumida, nimi deiyo ngebo Raja Daud, er pe mutu tep tenenmaudi pepu. “Uo, ne tenipnedi putapnere. Ne me jena tep, nimi ton Betlehem mutu wengban bisi damaida, me bungna di me gwepra karepnetengepa, ne kange deiptene,” tenepudi pepu. 18 Upepupa, sun ila kael jen talena neng, sun nimi weneri nengdi, dim pepra dato-dato di Filistin jen talena neng, sun kalengamyaidi, bisipra beidi, me gweprapidi, inipra tamupra yai. Ame gwepra yai dingeda, adipapu doupra, Daud damai duyai. Doupra yai dinino, Daud erdi ame men jepu. Ame adipapu Allah Yahweh er karena cap, er eremna cap, petenkemna cap tep, ame diktapu.

19 Ame diktapudi, Raja Daud erdi pepu. “Teka ne nai bo Allah kan si deiki di pepne. Ameda ne men jepkune! Ne ame jepnyopda, mali kupkune. Ada, sun anesala gam kuna tep nge yuma dopra, ne melimna tep acapu deipmanenge. Filistin nengdi, aweneri neng popmanto kupmarya peda, anengdi ormutu bena, gwepra duyanmanenge. Atep, ame jepnyopda, ada sun weneri neng, sun yapi dopra jena utopu kuna tep, angeda men kuptene,” pepu. Atep Daudda, ame tek sisi pio men jepu. Angeda, sun ila kael jen talena neng, weneri nengdi kupinge tep sekmapu.

20 – 21 Uda, Yoab er weit bo Abisaida, gung tiga puluh jen talena deiyo neng, sun deiyo ngebo kuramu. Erda, pio kware gum ngebo kuramu. Ada, er Abisaida, nimi denge pio weik, tiga ratus (300) neng ton, nimi pon keca, er si tombak di, lukamupa sun yuma deami. Ange tep nengeda, nimi gung tiga puluh (30) ngeda, sun deiyo ngebo kuramu. Amutu nimi yumadi, er si kael keamidi, ‘Uo, erda ila mambule’ tenen, er tep gispal dorami. Sun Israel nesaladi, sun jen talena neng, gung 30 kurami neng kael keami dinin, sun neitamaida, er Abisai tep, ila di gispal doramidi, er si kael keami. Dinino, sun jen talena ila kael keami neng, sun weneri nengda, Abisai sun utopu men kuramnga cadi, er Abisaida sun weneri neng amutara utopu kuramu.

22 Tonda, nimi si Yoyada, erdi deiamu ngebo Benayada, yu jen talen ngebo kuramu. Benaya erda, Kabzeel mutu ngebo kuramu. Benaya erda, kware pio tenena gum, tonda erda yuk nengdi men kupmanto keca, ila kange mun nge pel doramupa, nimi yumadi er si kael kemami. Benaya erdi, Moab mutu neng ila puto jen talena neng butene ton pomu. AMoab mutu neng butene pomu ngeda, sun nai bo sida, Ariel kuramu. Ange utopu, tenpu taru bul li neitamaida, im neitamai di pio bul mo cemamu taruda, akeca er si salju kwereramu taruda, angebo Benayada, tenpu mutu neitamai ila bon kwamu. Atu pumbon wekamu taruda, ila yu pus, er si singa tenpu ton akwamupa, Benayadi popu.

23 Tonda, pumun taruda, Benayadi Mesir mutu ngebo, ila nong lyom ngebo ton pomu. AMesir mutu ngebo, er nong lyomda, pio weik kiklinada, dua setengah meter (2.5 meter) di nemu. Apomu ngebo peda, er nimi pon keca douamu ngeda, er si lyom weik tombak, ila lyom cap, ikin cap nge ton douamu. Dinino, Benayadi Mesir ngebo damai, tali macapu doupra yau. Yau dingeda, Mesir ngebo doupmau nimi pon keca, tombak daluprapudi, Benaya dipapu angebo er pe tombak di, aMesir mutu ngebo poptapu.

24 Ange utopu kecada, Yoyada er mi Benaya kuramupa, amutu neitamai kurami nesala yumadi, er si kael keami. Sun Israel nesaladi, sun jen talena neng, sun gung 30 kurami neng kael keami dinin, sun neitamaida, er Benaya tep, ila di gispal doramidi, er si kael keami. Dinino, sun jen talena ila kael keami neng, sun gung weneri nengda, Benayada sun utopu men kuramnga cadi, Benyada sun amutara utopu ngebo kuramu. 25 Atiga puluh (30) jen talena ila kael neng kan-kanda, er Benaya peda, sun gung neitamai ton kuramu. Kware gum dipapu, puto weik kuramnga cadi, amutu nengdi, er si kael keamidi, gispal dorami. Dinino, Benyada, ila-ila kael kemna gung weneri ngeda, sundi yuk neng men kupmanto keca, ila kange mun keca kuramitopu, er Benaya ton ange utopu men kuramu. Dinino, puto weik ngebo kuramnga tep, Raja Dauddi, ‘Yu nengdi ne popnenung’ tenen, er pe nong kalengna tep, jen neng ton wepra deipu taruda, Benaya ton ereprapudi, sun deiyo ngebo keipupa, Raja Daud kalengna pel talepra kuramu. Raja Daud er pe nong tep kalengna deiyo ngebo kepra deipu.

Dauddi, sun ila kael keamidi, jen talena puto weik neng tep, pepu upu

26 Uda, Raja Daud er jen talena neng, sun ila puto cap, ila kael kemna cap, kurami jen talena nengda, sun si ake. Ada, Yoab er weit bo Hazael kuramu. Tonda, Dodo er mi Elhananda, Betlehem mutu ngebo kuramu. 27 Utopu, Haroddi deipupa, dadeipdanen yakarami nengdi deipi ngebo, er si Samot kuramu. Tonda, Pelonidi deipupa, dadeipdanen yakarami nengdi deipi ngebo, er si Heles kuramu. 28 Tonda, Tekoa mutu ngebo Ikes, erdi deiamu ngebo Irada kuramu. Abiezerda, Anatot mutu ngebo kuramu. 29 Husa mutu ngebodi deipupa, dadeipdanen yakarami nengdi deipi ngebo, er si Sibkai kuramu. Ahohi mutu ngebodi deipupa, dadeipdanen yakarami nengdi deipi ngebo, er si Ilai kuramu.

30 Tonda, Maharaida, Netofa mutu ngebo kuramu. Tonda, Baana er mi Heletda, Netofa mutu ngebo kuramu. 31 Tonda, Ribai erdi deiamu ngebo Itaida, Gibea mutu ngebo dinin, Benyamin yala neng kurami tara neitamai kuramu. Tonda, Beanayada, Piraton mutu ngebo kuramu. 32 Huraida, Gaas mutu pirman dinin, amutu banai tara ngebo kuramu. Tonda, Bet-Araba ngebodi deipupa, dadeipdanen yakarami nengdi, deipi ngebo er si Abiel kuramu. 33 Azmawetda, Bahurim mutu ngebo kuramu. Elyahbada, Saalbon mutu ngebo kuramu. 34 Hayemda, Gizon mutu ngebo kuramu. Sage er mi Yonatanda, Harari mutu ngebo kuramu. 35 Sahar er mi Ahiamda, Harari mutu ngebo kuramu. Ur er mi Elifal kuramu.

36 Tonda, Mekerati ngebodi deipupa, dadeipdanen yakarami nengdi deipi ngebo, er si Hefer kuramu. Ahiada, Peloni mutu ngebo kuramu. 37 Hezraida, Karmel mutu ngebo kuramu. Ezbar erdi deiamu ngebo, Naarai kuramu. 38 Natan er weit bo sisada, Yoel kuramu. Hagri erdi deiamu ngebo, Mibhar kuramu. 39 Amon yala nengdi deipipa, dadeipdanen yakarami nengdi deipi ngebo Zelek kuramu. Yoab er jen cap, mar cap, parang capda, Beerot mutu ngebo, er sida Naharaidi duyanamnga cadi, er ton dakuramu. 40 Ira cap, Gareb capda, Yetri mutu neng kuramrei.

41 Uriada, Het yala nengdi deiamipa dakuramu. (Er ner sida, Batsyeba kuramu). Ahlai erdi deiamu ngebo, Zabad kuramu. 42 Siza erdi deiamu ngebo, er sida, Adina kuramu. Erda Ruben yala nesala, sun deiyo ngebo, jen talena gung tiga puluh (30) deiyo ngebo kepra taleamudi dakuramu. 43 Maakha erdi deiamu ngebo, er sida Hanan kuramu. Yosafatda, Mitni mutu ngebo kuramu. 44 Uziada, Asytarot mutu ngebo kuramu. Hotam er nyapuda, Syama cap, Yeiel cap, sunda Aroer mutu neng kuramrei. 45 Tonda, Simri er nyapuda, butene. Ada, Yediael cap, Yoha cap, kuramrei. 46 Elielda, Mahawim mutu ngebo kuramu. Elnam er nyapuda, butene kuramrei. Ada Yeribai cap, Yosawya cap, kuramrei. Yitmada Moab mutu ngebo kuramu. 47 Nimi si weneri Eliel cap, Obed cap, tonda Yaasiel capda, Mezobaya mutu neng kurami. Sun asi sekmapu neng yumada, Raja Daud, er jen taleami nengda, ila kael keamidi, puto weik jen talena neng kurami.