1Ch 12 | XteSC | STEP | Raja Daudda, tenpu ngebo er sida Kisy, erdi deiamu ngebo Raja Saul damai di goupra, Ziklag mutu neitamai inimbenamu. Deiyoda, Raja Sauldi, ‘Angebo popkun’ tenen, epra yanmaua cadi, Daudda inimbenamu. Ukuramupa, Daud er tara jen talena neng, kware tenena pio gum nengdi, Daud er damai Ziklag mutu yana melipi. Ajen nengda, Daud er podan neng tep, mar porbenamu taru, sundi yana Daud tep melimami.

1 Chronicles 12

Raja Daud, Ziklag mutu kuramu taruda, ‘Er melipkamep’ tenen, er damai yakarami neng tep, pepu upu

1 Raja Daudda, tenpu ngebo er sida Kisy, erdi deiamu ngebo Raja Saul damai di goupra, Ziklag mutu neitamai inimbenamu. Deiyoda, Raja Sauldi, ‘Angebo popkun’ tenen, epra yanmaua cadi, Daudda inimbenamu. Ukuramupa, Daud er tara jen talena neng, kware tenena pio gum nengdi, Daud er damai Ziklag mutu yana melipi. Ajen nengda, Daud er podan neng tep, mar porbenamu taru, sundi yana Daud tep melimami. 2 Ayakanmai neng yumada, sun Benyamin yala neng kuramya cadi, nimi deiyo ngebo Raja Saul kuramutopu, er yala nengpu kurami. Sun ayakanmai neng yumada, nimi pona tep, gel dekdongopra don keca, er si kartapel dona cap, tonda jen di dipra dorameng mar dona cap, ila kael neng kurami. Sundi sun dumsisi buru deiki pe, tebalal buru deiki di dona peda, sun pio ila kael neng kuramidi, Daud melimna tep yakanmai. 3 Sun ajen talena neng, sun sida ake. Ada, sun deiyo ngebo Abiezer cap, tonda, Yoas cap, abutene nengda, Gibea mutu ngebo, er si Semaa, er nyapu kuramrei. Aneng sunda Daud tep, ‘Nimi deiyo ngeboda keptu’ tenen, pio pe deipra kurami. Ton nengda, sun si ake. Ada, Azmawet er nyapu butene Yeziel cap, Pelet cap kuramrei. Tonda, Berakha cap, Anatot mutu ngebo Yehu cap dakuramrei.

4 Tonda, Gibeon mutu ngebo er sida Yismaya, erda jen talena neng, sun gungda tiga puluh neng (30), sun deiyo ngebo kepra kuramu. Sun yumada, pio kware tenena gum neng kurami. Tonda, Yeremia cap, Yahaziel cap, Yohanan cap, Yozabad cap, sun adumbari nengda, Gedera mutu neng kurami. 5 Tonda, Eluzai cap, Yerimot cap, Bealya cap, Semarya cap, tonda Sefaca cap, sun apamu bari nengda, Harufi mutu neng kurami. 6 Tonda, Elkana cap, Yisia cap, Azareel cap, Yoezer cap, tonda Yasobam cap, sun adumbari nengda, Korahdi deipupa, dadeipdanen yakarami nengdi deiami neng kurami. 7 Utopu, Yeroham er nyapu butene ada, Yoela cap, Zebaja capda, Gedor mutu neng kuramrei.

Daudda, nimi pio gum mutu, ila katawai mutu neitam dinin, gel imir pumbon iniamu taruda, er damai yana melimami neng tep, pepu upu

8 Men taruda, Daud er puto kemna cap, bouna di dim pepra kuna cap tep, tenpu mutu nimi pio gumai, katawai mutu neitamai dinin, er podan nengdi men wekmantoai bena kuramu. Ataruda, nimi Gat yala neng ton, nimi deiyo ngebo Raja Saul tapidi, Daud damai tara yana melipi. Sun Gat yala nengda, ila kael jen talena neng kuramidi, ila puto neng cap, kware tenena pio gum neng cappu yai. Tonda, sun pedi gonga kepra, nimi porbana keca yuma ila di kael kepi. Ada, sun pe dipapu taram damai lelimna tep keca cap, nimi lungna tep mar tombak capda, sun pe dipapu ila kael nengpu yai. Sunda, singa yu pus nimi popkurya tep, yu deipra sepra beredi, adipapu nimi poramretopu, sun peda, kware tenena pio gum di, balila weik neng kurami. Sunda, nimi pona yu neng kuramya tepa. Tonda, rusa bisam, mutu dupai sepra baramretopu nengpu kuramya cadi, pio sepdaro benmanto neng kurami. Aneng yumada, ‘Daud melipkamep’ tenen, Daud er damai yai.

9 Raja Daud damai yanmai nengda, sun aneng si nepra seknada ake. Tenpu ngebo sun deiyo ngeboda, Ezer kuramu. Er amutara deiyo ngebo, butene ngeboda, Obaja kuramu. Obaja er amutara kuramu weneri ngeboda, Eliab kuramu. 10 Dumbari ngeboda, Mismana kuramu. Pamubari ngeboda, Yeremia kuramu. 11 Ngantan bari (6) kuramu ngeboda, Atai kuramu. Yoneitam bari (7) ngeboda, Eliel kuramu. 12 Banbari (8) ngeboda, Yohanan kuramu. Toupnebari (9) ngeboda, Elzabad kuramu. 13 Morokyo di dutara yuma (10) ngeboda, Yeremia kuramu. Angebo er amutara ngeboda, er si Makbanai kuramu.

14 Sun aca di si sekmapu Gat yala nesala yumada, ila jen talena deiyo nengpu kurami. Ton neng dingeda, pio weika di jen talena neng denge weik, seratus (100) jen neng tep, deiyo kepra taleramidi upu perami. Ton neng dingeda, pio weika di jen talena neng denge weik, seribu (1.000) jen neng tep, deiyo kepra, taleramidi upu perami. 15 Anengda, sun Gat yala nesala, sun jen talen neng kuramya cadi, keteng yakan tara di, Yordan me goupra, ortara keteng dangban tara bei. Sun bei taruda, ware tenpu deiki di konum me di onmaupa, goupra ortara bendopi. Ame onmaua peda, sun balila di ame goupra ortara bei. Ukupudi, Yordan me pirman tara kurami nesala yumada, kware weik kupupa, sun ati arum tapidi, sepdaro bura saka bendopi. Ada, keteng yakan tara mutu kurami nesala cap, ame ortara keteng dangban tara kurami nesala cap peda, enepra dokotepi.

Nimi deiyo ngebo Daud tep melipra embana nengda, Benyamin yala neng cap, Yehuda yala neng cap tep, pepu upu

16 Utopu tenpu taruda, ton tara neng sun Benyamin yala neng cap, tonda sun Yehuda yala neng cap, yu neng men wekmantoai er nimi deiyo ngebo Daud puto kemna tep kuramngai utopu, nimi gum mutu, katawai mutu neitamai gel imir damai bei. 17 Bei pangeda, nimi deiyo ngebo er Dauddi epu dingeda upepu, “Sunda tek sisi ne tep, ‘Nun kabo sisa,’ tenepnerumdi, melimyanerum do? Udingeda, nun cap kikiman nun tarapu kepropkupe,” pepu. “Atep nengeda, nundi sun tep nun kange dipru telep deiki dipapu dopropsepe,” pepu. “Dinino sun kange yumada, nun tep, ‘Potepe’ tenen, kange doupra yarumdi, ne nong dopra, sun yu neng tep dopra, karepkunemum dingeda, ne Dauddi ton, sun tep yu tenepkamsene,” pepu. “Atep, telepe nun apu yapu nengdi er si eremami Allah, erdi ange epredi, sunpu ila di wenepra menenga keca karepkamsere,” pepu.

18 Upepu taruda, Allah er Lek Sambala Amasia er deiki diniku. Tiga puluh neng (30) sun deiyo ngebo er Amasiadi pepu. “Isai, erdi deiamu ngebo Daud. Nunda, kan cap kan nyapu yuma cap kikiman akupmape. Tek sisi Isaidi deipu ngebo kan cap, nun kan melimna neng capda, bouna dipapu kikiman akupmape. Tonda, Allahdi melipkerepa, telep deikipu kupmareme. Tonda, kan tep melipkenge neng peda, Allahdi meliprepa, telep deikipu kupkamenge. Kan nai bo Allah, er dipapu kan tep melimkerura tep pepkene,” pepu. Upepka tep nengeda, Dauddi er damai yai neng tep, ‘Telepe, kikiman kunkamepe,’ pepudi, aneng yuma doupra, ‘Ne jen talena neng, sun deiyo-deiyo neng kunkameng’ tenen, aneng wepra deipupa, apel talepra kurami.

Nimi deiyo ngebo Daud, er melimna tep yai nengda, Manasye yala neng tep, pepu upu

19 Filistin yala nengdi, Israel yala nesala sun nimi deiyo ngebo Raja Saul mar pona tep yai taruda, Dauddi, ‘Ne cap wisipra melipkune’ tenen, yau. Ataruda, Manasye yala neng kankan di, ton jen talena neng ton, Raja Saul tara di tapra, ‘Daud cap wisipra melipkupe’ tenen, Daud tara keamidi, ajen neng peda yai. Ataru tek sisi ngeda, Dauddi sun Filistin yala jen neng tep men melipu. Ange deiyoda, sun Filistin neng sun deiyo-deiyo Raja nengdi, upu talepdaidi upepi. ‘Gume, Daud kanda tamupra benkurume, men wisipra melipsetume,” pepi. Aupuda, Filistin nesala, sun deiyo-deiyo Raja nengda, ‘Gume, nun podan taru neitamaida, Daud erdi tamupra, er tara ngebo Raja Saul cap, kange di tamupra kepredi, nun Filistin neng yuma popserur,’ tenepidi, “Nun kware,” pepra, upu seki.

20 Atep nengeda, Daudda Ziklag mutu tamupra banmau taruda, sun Manasye yala neng nimi deiyo ngebo Raja Saul tara di taprapidi, tamupra Daud er tara kepropi. Daud er tara kepi neng, sun cap kikiman Ziklag mutu tamupra banmai nengda, sun sida ake. Ada, Adnah cap Yozabad cap, Yediael cap, Mikhael cap, yuk ngebo ton, er si Yozabad cap, Elihu cap, Ziletai cap, sun yuma Daud cap tamupra bei. Sun aneng yuk-yukda, Manasye yala neng kuramidi, men taruda Saul er jen talena neng talepra upu pena tep, deiyo kepra kuramidi, sun amutarada jen talena neng ton denge weik, seribu (1.000) neng kuramidi, yuk mutu nesala tep porbarami.

21 Sun anengda, Manasye yala neng kuramidi, nimi deiyo ngebo Daud tep wisiprapidi melipra porbarami. Ada, bura tara kurami yu nengdi, amutu-amutu yuma poryakaramidi, amutu neitamai kurami nesala, sun keca dalupra dodorami taruda, aManyase yala nengdi, Daud cap melipra porbaramidi, sun bura tara kurami yu neng tep, popra bisbisa kapi. Sun aManasye yala neng yumada, nimi deiyo kepra, Manasye mutu jen talena neng talepra kuramya cadi, sunda nimi tep kware tenena gum dipapu, balila deipra, nimi pona tep, puto weik nengpu kurami. 22 Ataru neitamaida, tumi-tumi yuma, tamna gum di, yuk neng ton, gung keprapidi, nimi deiyo ngebo Daud, er damaipu doryakaramidi, er cap wisipra melimami. Ukuramya tep, Daud er jen talena neng yumada, ila di tamak baramipa, pio weik kurami. Sun dengeda, pio weik kupbaramya tep, Allah er im deiki jen talena malaikat gung utopu kurami.

Daud er jen talena neng cap, Hebron mutu yaidi tamaki neng tep, pepu upu

23 Nimi porbana tep, jen talena neng kenengameng keca yuma douprapidi, ‘Nun nai Daud tep wisipra melipkupe’ tenen, nimi deiyo ngebo Daud, er Hebron mutu kunmauaipu, er tarapu kepropidi, yakarami neng ton weik kurami. Ada, ‘Israel yala nesala talerur ngebo, nimi deiyo ngebo Raja Saul tep mar porbepedi, bisbisa kapmepedi, nimi deiyo kemna keca yumada, nundi dopropmepedi, Daud tepapu karenkamepe’ tenen, Daud tara kepropidi, Hebron mutu yakarami. Ange yumada, ‘Allah Yahwehdi peiamutopu, Daud dipapu Raja Saul punupredi, Israel yala nesala, sun ila nimi deiyo ngebo Raja kunkamsere’ tenen, Daudpu melipra yakarami. 24 Sun ayai neng denge yumada, adinin dutara sekupe. Ada, Yehuda yala neng yumada, denge pio weik, enam ribu delapan ratus (6.800) neng, ‘Saul tara nesala porbenkamep’ tenen, Daud tara wisipra yai. Ajen talena nengda, nimi porbana keca yuma ila di kael kepidi, nimi nong taram damai lelimna tep, melimne gat keca cap, er si perisai cap, tonda nimi lukra pona tep, er si tombak capda, sun pe dipapu ila kael nengpu yai.

25 Utopu, sun Simeon yala nengda, denge weik tujuh ribu seratus (7.100) nengda, ila di kael keami jen talena neng yai. Anengda puto cap, nimi kware tenena gum nengpu, ‘Saul tara neng porbenkamep’ tenen, yai. 26 Utopu, sun Lewi yala jen nengda, empat ribu enam ratus (4.600) neng, Saul tara neng porbana tep yai. 27 Tonda, yuk ngebo ton, er si Yoyada, erda Harundi deipupa, dadeipdanen yakaramyanen, deiami nengdi deipi ngebo kuramu. Er cap, er jen talena neng cap, sun Lewi yala neng cap wisiprapidi, kikiman yai. Yoyada cap kikiman yai jen talena nengda, denge weik tiga ribu tujuh ratus (3.700) neng yai. 28 Ange utopu, tenpu ngebo ton, er si Zadok, erda kware tenena gum, kaber ngebo kuramu dinin, nimi pona tep, kael keamu. Er cap, sun Lewi yala neng cap, wisiprapidi yai. Zadok cap, er yala neng cap, yai jen talena deiyo nengda, dua puluh dua (22) deiyo neng, Zadok cap kikiman yai.

29 Tonda, Benyamin yala neng ton, Daud tara kepra yai. Aneng sun dengeda, tiga ribu (3.000) neng kurami. Anengda, nimi deiyo ngebo Raja Saul, er yala neng kuramya cadi, sun men taruda, ‘Saul er dipapu nun deiyo ngebo kunkamsere’ tenen, er tarapu kurami dinin, ataruda, sun yuk kange tenepidi, Daud er tarapu kepropidi, Hebron mutu melipra yai. 30 Tonda, Efraim yala nesalada, denge pio weik, dua puluh ribu, delapan ratus (20.800) nengda, sun puto weik cap, tonda kware tenena gum neng cap kurami. Tonda, Daud tara keprapidi yai. Anengda, nimi porbana tep, ila kael keami neng kuramya cadi, sun yuk-yuk dinin, sun pe yala nengdi, ajen talen neng, sun si yuma kael keamidi, gispal dorami.

31 Utopu ton, sun Manasye yala nesala dinin, sun yala neitamai bokra, Yordan me goupra ortara, keteng dangban tara kurami neng peda, Daud tara kepropidi yai. Anengda, denge pio weik, delapan belas ribu (18.000) neng kurami. Sun yai tara nesaladi, aneng wepra deipidi, “Sunda Daud tara keprumumdi, sunda Saul tara neng tep melipra mar porbenkurume,” pepra dokotepi. Ada, ‘Sundi meliprumupa, nimi deiyo ngebo Daud, Israel yala nesala yuma talepseredi, Raja kunkamsere’ tenen, melipra yai.

32 Utopu, Isakar yala nesala neitamaida, ila kael kemna deiyo neng, dua ratus (200) neng ton yai. Adeiyo neng cap, sun nyapsilip cap, Daud tara kepra yai. Adeiyo-deiyo nengda, akeca-keca pio weik kael keamidi, mambul keca kael neng kuramya cadi, sunda, ‘Israel yala nesala yumadi, talepra kupkameng ngeda, ake’ tenen, konum tenerami. Tonda, adeiyo nengda, ‘Ataruda ange ukupkamepe, ataru ton ange ukupkamepa tep, telep taruda ake’ tenen, ila kael keca lap pena deiyo neng kurami.

33 Utopu ton, Zebulon yala nesalada, denge pio weik, lima puluh lima ribu (50.000) jen talena neng ton, Daud tara keprapidi, yai. Ajen neng yumada, ‘Nimi porbetepe’ tenen neng yuma cap, nimi pona tep, jen yala-yala yumada, ‘Ukupra kuptepe, ukupra kuptepe’ tenen, ila kael neng kuramidi, Daud tara kemna tep, Hebron mutu yai. Aneng yumada, kange tenimtona pio gum dipapu, ‘Daud er dipapu, nun ila deiyo ngebo kepra, er dipapu Raja kepra talenkamsere,’ teneramidi yai.

34 Tonda, Naftali yala nesala neitamai di, ila jen talena deiyo neng, denge weik seribu (1.000) neng cap, sun amutara jen talena neng cap, denge pio weik tiga puluh tujuh ribu (37.000) neng wisipra yai. Ajen talena nengdi, nimi pona tep keca, er si tombak cap, tonda nimi nong taram damai lelimna tep melimne gat keca, er sida perisai cap, animi pon keca kael neng kuramya cadi, akeca ton doupra, Daud damai duyai. 35 Utopu ton, sun Dan yala nesala neitamaida, jen talena neng, denge pio weik, dua puluh delapan ribu, enam ratus (28.600) neng ton, nimi porbana tep, ila kael nengpu kuramya cadi, nimi podan keca yala-yala yuma taleramidi, Daud damai yai. 36 Tonda, Asyer yala nesala neitamaida, jen talena neng, denge pio weik, empat puluh tujuh ribu (47.000) neng, nimi porbana tep, pio ila di kael kemna neng kuramya cadi, nimi podan keca yala-yala yuma taleramidi, Daud damai yai.

37 Utopu ton, Yordan me goupra ortara, keteng yakan tara di Daud melimna tep yakarami nengda, Ruben yala neng cap, Gat yala neng cap, Keteng yakan tara di kurami Manasye yala neng cap, Daud tara keprapidi, er damai yai. Sun ajen talena neng yumada, denge pio weik, seratus dua puluh ribu (120.000) neng, Daud damai yai. Sun ajen talena nengdi, nimi porbana tep keca, yala-yala yuma ketenepra douamidi, Daud damai yai. 38 Adeiki tara sekmapu jen talena neng yumada, sun pe kange dipapu tenepi. Ada, ‘Hebron mutupu yapedi, Daud tara kepmepedi, Saul tara neng tep nimi porbenkamep’ tenen, ketenepra, Hebron mutu wengbei. Ukupi dingeda, ‘Saul tara neng popra bisbisa kepmepedi, Israel mutu neitamaipu kunkamep nesala tep, nimi deiyo ngeboda, Daudpu erepra deipmepepa, er dipapu, nun ila nimi deiyo ngebo Raja kunkamsere,’ tenepi. Tonda, sun Israel yala nesala dinin, aneng sun tara nesala yumada, kange dipru tenpu keprapidi, ‘Angepu kupkamepe,’ tenepi.

39 Hebron mutu yai taruda, sun ajen talena neng yumada, Daud cap kikiman amutu neitamaipu kunmaidi, jen cap, me cap yumada, sun kayapu neng, sun mutu yuk-yuk kurami Israel yala nesala yumadi, konum ketenepra deiamya cadi, me pe jen peda, aceipu dopra, kikiman kuramidi, jen keca jerami. 40 Ange utopu, sun Isakar yala nesala cap, Zebulon yala nesala cap, Naftali yala nesala cap, meneng damai akurami nengda, gam kure keca er si keledai bisam bali deiki di, ajen keca yala-yala yuma ketenepra deipidi, tapke di getepyopda, adipapu Hebron mutu duyai. Tonda, unta bisam cap, bagal cap, keledai bisam utopu kamu keca cap, tonda er sapi bisam dipapu tepung utopu keca duyakaramu. Tonda, Arah co du cap, kismis cap, anggur me mokon cap, minyak Saitun me mokon cap, kikiman doupra yai. Aneng yuma peda, sapi bisam cap, domba bisam cap popra, sekra deipnedi, dopra jerami cap tep, sun Israel nesalada, pio kange derirami.