1Ch 13 | XteSC | STEP | Nimi deiyo ngebo Raja Dauddi, sun er jen talena deiyo neng yuma bulupra deiprapudi, upu talepu. Ajen talena nengda, ton nengdi deiyo kepra, sun amutara jen talen neng dengeda, seribu (1.000) neng taleramidi upu perami. Ton deiyo nengda, deiyo kepra, sun amutara jen talen neng 100 neng taleramidi, upu perami.

1 Chronicles 13

Allahdi, “Angeda kunkamrume, angeda pio men kunkamrume,” pepra deiamupa, aupu sekra deiami co bekin, er sida, Peti Perjanjianda, Kiryat-Yearim mutu di dubei upu

1 Nimi deiyo ngebo Raja Dauddi, sun er jen talena deiyo neng yuma bulupra deiprapudi, upu talepu. Ajen talena nengda, ton nengdi deiyo kepra, sun amutara jen talen neng dengeda, seribu (1.000) neng taleramidi upu perami. Ton deiyo nengda, deiyo kepra, sun amutara jen talen neng 100 neng taleramidi, upu perami.

2 Upu talepmau taruda, Dauddi er damai kunmai Israel yala nesala yuma tep pepu.

“Ne kayapu nengo, tek sisi sundi, ‘Telepe,’ tenepnemumtopu, nun si eremnup Allah, nun nai bo Allah Yahweh peda, ‘Telepe,’ tenepsetuopda, ukunkamepe. Ada, nundi nimi wepra dokoteptepepa, nun yala neng cap, nun kayapu neng cap, tupa Israel mutu neitamai tupa dakunmang Israel yala neng yuma tep, ‘Nun upu gekepra, nun damai yakankameng’ tenen, nimi wepra deipmepedi, ka di upu pena tep dokoteptepe. Tonda, nun adipapu sun imam-imam neng damai cap, sun Lewi yala neng kunung mutu neitamai cap, ila ati arum kunung neng cap, yambul ati arum kunge mutu-mutu yuma cap tep, upu dokotepmepepa, sun yuma nun damai yangedi, nun cap kikiman aceipu yangepa, bulupra kunkamepe. Ataruda, upu sisingkamepe.

3 Upu talepmepe dingeda, Allahdi, ‘Angeda kunkamrume, angeda pio men kunkamrume,’ pepra deipupa, sekra deipi co bekin, er sida Tabut, tonda, Peti Perjanjianda, ^{▼▼Peti Perjanjian – Aupu deiyoda ake. Pumun taru, Allahdi peipupa, sun Israel yala nesaladi, abekin pumbon dongopi ngeda, ake. Ada, ila katuai mutu neitamai jerami keca, er si mana cap, Mesir mutu tapra bendopi taruda, Harundi taleamu maca cap, Allahdi, ‘Angeda ukupkamrume, angeda pio men kupkamrume,’ pepra, deiamu mem upu, Allah er buru di pala gel deiki sekra, deiamu upu cap, abekin pumbon dongopi. Tonda, sun Israel nesaladi, ‘Peti Perjanjian damaida, Allah Yahweh tek sisi nun meneng damai yana kuserure,’ tenerami. Abekinda, Allah er si eremna ati pumbon dinin, Pio Lek Telep Lengna Ati pumbonpu deiami.} ange dakupmaryai di dopra, nun damai duyankamepe. Deiyoda, ila nimi deiyo ngebo Saul taleamseudi, Raja kuramu taru di, abekinda dopra, nun damai men deiamupu cadi, ukutaruda dorbenkamepe. Sauldi taleamseu taru neitamaida, nunda, ‘Allahdi ware upu pepserepa, gekepmepedi kunkamep do?’ tenen, aPeti Perjanjian bekin damai bena, Allah Yahweh tep, pio men asimpeteramepu.

4 Dauddi aupu pepupa, sun Israel yala nesala, ayana bupra wekmai nengdi gekepidi, ‘Telepe, apepmaseremtopu, nun ange yuma ukupkamepe,’ tenepidi, kange pio deipra kunmai. 5 Sun Israel yala nesala, aca bulupra wekmai nengda, ‘Telepe tenepya tep, nimi deiyo ngebo Raja Dauddi peipmautopu, upu dokotepupa, Israel yala nesala, dana-dana tara mutu neitamai kurami neng yuma, bulupra deipu. Ada, Mesir mutu bisi wilimdonai, Sihor me damai di dukdongopra, iknapi dam tara di dipdongopra, Hamat mutu ila ati arum domi tara di dukdongopra, amutu yuma neitamai kurami nesala yumada, bupra deipu. Ada, Allahdi, ‘Angeda kunkamrume, angeda pio men kunkamrume,” pepra deipupa, sekra deiamu ngeda, mambul co bekin, er sida Peti Perjanjian ^{▼▼Peti Perjanjian – Tonda, akeca tep, ‘Pedina Upu Kin Bekin’ peptepe. Peti Perjanjian kael kemna tep, Keluaran 25:11 dinkurume.} pumbon deiamyada, Kiryat-Yearim mutu deiamyai di doupra, Yerusalem mutu duyakana tep, anesala yumada, bulupra deipu.

6 Uda, Kiryat-Yearim mutu beiya neitamaida, Yehuda yala nesala, sun kurami mutuda, Allah Yahwehdi, ‘Angeda kunkamrume, angeda pio men kunkamrume,’ peiamupa, sekeiami gel dopra, Peti Perjanjian dongopinge dorbana tep bei. Ada, Raja Daud cap, erdi, ‘Ne damai yana melipneso,” pepra deipupa, sun Israel yala nesala gekerami nengdi, mutu si Balah ati arum damai bei. Amutu si butene ngeda, Kiryat-Yearim mutu perami. Aco bekin, er si tep nengeda, Peti Perjanjian perami ngeda, aco bekin deiki tara dinin, dana-dana tara pol dipdongopu keca, er si Kerub damaida, Israel nesala yumadi, ‘Akeca Kerub ^{▼▼Kerub – Kerub perami ngeda, ada im deiki malaikat tep, asi perami. Peti Perjanjian perami co bekinda, ‘Ila mambul keca,’ teneramya cadi, malaikat urasin utopu keca butene petupra deipidi, Peti Perjanjian deiki tara deipi. Akeca si tep nengeda, Kerub perami.} butene petupra deiaminge, pol dipdongopreiyai aneitamaipuda, Allah abungrure. Aca damaipu Allahdi nun damai yakaserure,’ teneramidi, teka tenerami.

7 Allahdi peiamu upu, gel deiki sekeipupa, sundi akeca dopra, co bekin, er sida Peti Perjanjian pumbon deiami ngeda, menop taru nimi si Abinadab, er ati pumbon deiamyai di, sun Israel yala nesala yumadi dopropi. Abinadab er ati pumbon di dopropidi, ukupu tu deiki embana tep, dopmai keca, er si kereta sapi deiki deipi. Ada, ‘Asapi butene di, aikin keca gipra dubenkamseng’ tenen, deipi. Deipi pangeda, akereta sapi bisam gipra banmai taruda, nimi butene, Abinadab deiamu ngebo, er nyapu ton ngebo, er si Uza cap, ton ngebo er si Ahyo capdi, ‘Akeretada, abisi benkamre, orbisipu benkamre’ tenen, akereta tapke talepra menmena banmareipa, sun sapi bisamda abisipu banmarei.

8 Banmarei pangeda, sun Daud cap, erdi taleamupa, er cap kikiman amutu yai nesala, sun Israel yala nesala capda, ila puto di kange pio deipmai. Akupmainge deiyoda, ‘Uo, amambul keca dopra, nun mutu deiyoi neitamai di deipkamep’ tenen, ila telep kange deipidi, Allah er gispal dona tep, mut peryanmai. Mut pepra yakanmai taruda, bung-bung penada, weika di doupmai. Akecada ake. Ada, kecapi cap, rebana cap, cera cap, er si ton simbal cap, tonda terompet cap, ila lelim pepyakanmaidi, Allah er si eremaidi, mut penmai.

9 Banmaiyanen, nimi si Kidon, er gandum du taingna damai bei dingeda, asapi bisam sun yan dum dukupa, sun gipra dubanmarei keca, er sida gerobak, long-long pepupa, agerobak deiki dubanmai co bekinda, sakmanto kupu. Ukupka cadi, Uzadi, ‘Uo, Allah er mambul upu dongopi bekin, er sida Peti Perjanjian, tuai sakrur’ tenen, Uzadi er pe buru dokotepra, amem upu sekra deiami co bekinda, gum-gum tara talepu. 10 Ange ukupka tep nengeda, ataru dipapu, Allah Yahwehdi Uza tep, tulum kupupa, adipapu Uza poptapu. Deiyoda, amem keca Peti Perjanjianda, tali-tali nengdi pio men talepmanto keca kupka cadi, ukupu.

Allahdi angebo Uza poptapu pangeda, adubanmai mem keca damaipu saka depu. Uzada, imam ngebo guma, erda tali ngebo cadi, amem keca tali lupra talepka cadi, er wenemna tep nengeda, Allahdi angebo popupa, acapu depu. 11 Allah er si Yahwehdi Uza popunge tep, Raja Dauddi Allah tep pio mali kange doupudi, yambulanun ton yu kupu. Ange tep nengeda, ataru dipapu amutu tep, er si ton dopu. “Amutu er sida, Peres-Uza mutu penkamepe,” pepra dopupa, tupa asipu penunge. Sun Ibrani upu deiki di, aupu deiyoda, ‘Yu deiki di, Uza popu,’ tenena tep, asi perami. Allah Yahwehdi Uza popupa, Dauddi Allah tep mali kange doupu.

12 Allahdi ukupupa, Dauddi, ‘Uo, Allah er si Yahwehdi, nun yuma ton popkuserur do?’ tenen, kware pio weik kupu. Kware pio weik kupupa, Dauddi pepu, “Uo, ware kuptene do? Ware kupra Allahdi peiamupa sekra deipi upu kiami co bekin, er sida Peti Perjanjianda, ne damai Yerusalem mutu neitamai duyatene do? Men duyatene do?” pepra asipetepudi, teniptopnapu kupu. 13 Daud er kware pio weik kupka tep nengeda, aduyakarami bekin, er si Peti Perjanjianda, akeca dopra Dauddi, “Ne ketenepra domsi ati arum, ne kune mutu Yerusalemda, akeca men doupra benkun dinin, keana taru tep, Gat mutu ngebo, er si Obet-Edom, er ati pumbonpu keana taru tep acapu deipkune,” pepu. 14 Upepka tep, Allahdi peiamu upu sekra deiami co bekin pumbon, Peti Perjanjianda, ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepidi, aco lase deikida, ‘Urasin pio telep kupkamre’ tenen, kunumna weik keca emas dopra adeiki palepra deipi. Tonda, Allahdi, “Ukunkamrume, angeda pio meme,” pepra, mem upu peamudi, gel pala deiki seku upuda, Musadi ange doupra, apeti pumbon dongopupa dakuramu. Tonda, imam neng sun ila deiyo ngebodi, keteng tamun yuma tenpu tumi deiki dipu, Pio Telep Lengna Ati wekudi, aPeti Perjanjian deiki tara bublan deikida, domba bisam popunge, er yapi dopra, akeca deiki gege pepra deipu. Ada, ‘Allahdi, Israel nesala mali kunge keca yuma kaukepredi, daepra gum kupra deipkamre’ tenen, apel doramu. Tonda, akeca lap pena tep, ‘Pedina Upu Kin Bekin’ peptepe. Peti Perjanjian kael kemna tep, Keluaran 25:11 dinkurume.} ange dopra baramyanen, Gat yala ngebo Obet-Edom, er ati pumbon deipipa, ware weneri deiki di acapu kuramu. Awar weneri taru neitamai yumada, Allah er si Yahwehdi Obet-Edom cap, er ati neitamai kurami nesala cap, er taleramu keca yuma cap tep, pio telep kweipu.