1Ch 14 | XteSC | STEP | Tirus mutu neitamai, sun ila nimi deiyo ngebo, Raja Hiramdi, Daud er pe ati dona tep, nimi wepra dokotepu. Ada, ati don co, er si cemara co, weik co cap, ati dona kael neng cap, co cangne neng cap, tonda gel ati dona tep, gel urasin telep kuna tep, gel bongopra dona neng cap, dopra deipudi, sun aneng yuma dokotepupa, sun yuma Daud er damai yai dingeda, Daud er ila ati gonga keap domi.

1 Chronicles 14

Dauddi Yerusalem mutu neitamai pel talepra doramunge tep, pepu upu

1 Tirus mutu neitamai, sun ila nimi deiyo ngebo, Raja Hiramdi, Daud er pe ati dona tep, nimi wepra dokotepu. Ada, ati don co, er si cemara co, weik co cap, ati dona kael neng cap, co cangne neng cap, tonda gel ati dona tep, gel urasin telep kuna tep, gel bongopra dona neng cap, dopra deipudi, sun aneng yuma dokotepupa, sun yuma Daud er damai yai dingeda, Daud er ila ati gonga keap domi. 2 Ange yuma ukupka deiki di, ataruda er Daud kael kepudi, ‘Ange yumada, Allah er si Yahwehdi, telep kweipmanere. Ada, Allahdi, ‘Angebo ne mawa nesala talepra, ila deiyo ngebo Raja kunkamre,’ teneramneutopu, ‘Nimi deiyo ngebo kepra deipneue,’ tenepu. Tonda, Allahdi, ‘Israel yala nesala yumada, pio teleppu kunkameng’ tenen, ila nimi deiyo ngebo Raja keipneudi, ne talenun keca yuma pio telep kupra derinerure. Akupunge yumada, ne pe tep gume. Deiyoda, Allah Yahweh er mawa neng, sun Israel yala nesala makuna tep ukupneue,’ teneramudi, Dauddi kael kepu.

3 Daudda, dakuramnganen, Yerusalem mutu neitamai kuramu taruda, nerapu weka di domu. Domu dingeda, er nyapuda nimi cap, nerapu cap deiamu. 4 – 5 – 6 – 7 Daudda, Yerusalem mutu kuramudi deiamu nyapu sun sida adano. Ada, Siamua cap, Sobab cap, Natan cap, Salomo cap deiamu. Tonda, Yibhar cap, Elisua cap, Elpelet cap, Nogah cap, Nepeg cap, Yapia cap deiamu. Ton ngeda, Elisama cap, Beelyada cap, Elifelet cap, yuma deiamu.

Raja Dauddi Filistin yala neng popbisipka tep, seki upu

8 Ataru neitamaida, yuk nengdi, “Daudda, Israel yala neng, sun ila nimi deiyo ngebo Raja kepmare,” pepra lap pepipa, sun podan neng, Filistin tara nengdi gekepidi, adipapu, ‘Angeboda, nundi bisbisa kapra, poptapkup’ tenen, nimi gung pio weika di buluprapidi, ‘Er Daud damai dan do?’ tenen diryai. Diryai taruda, Daud konum gekepu. Gekepu dingeda, adipapu, ‘Sun Filistin tara nengda, popkun’ tenen, sun damai bena kunmau. 9 Ukupu taruda, sun Filistin yala neng weik yaidi, mutu si Refaim mutu neitamai, ila pala ban mutu, sun dipapu dinipi. Ukupi dingeda, ‘Amutu kunge nesala, sun talenung kecada, nundi dalupra dopropkamep’ tenen, sun anesaladi amutu neitamai yana, akeca-keca weika di upula dopropi.

10 Ukupipa, atara nengdi lap pepipa, Raja Daudda, aupu yuma konum gekepu dingeda, Dauddi er nai bo Allah tep asipetepu. “Ne nai Allah, kan tep asipetepkene. Ne adipapu sun Filistin yala neng tep porbenkun do, gum do? Atep Allah kandi ne nimi porbisina tep deiyo kecada, kandi ne deiki karepnemempa, anesala popra bisbisa kapkamne do, gum do?” pepra asipetepu. Upepupa, Allah Yahwehdi Daud tep pepu. “Dyo, telepe. Daporbenkurume. Ukupmempa, nedi nimi porbisina deiyo kecada, kan deiki deipkenepa, sun Filistin neng yuma popra gawal dakurume,” pepu.

11 Allahdi Daud tep aupu konum pepu pangeda, Dauddi mutu si Bahal-Perasim perami mutu damai beudi, amutu kurami Filistin yala neng yumada, popra gawal daku. Konum popra gawal daku dingeda, Dauddi upepu. “Ne nai bo Allah, kandi melipmanerempa, ne podan neng yuma cap, sun kunai cap, sun nong yuma capda, me ila di opredi yawaramamretopu, konum kupne. Ada, ne nai kandi mepra banmamumdi, kan puto deiki melipmanemumpa, ne amenda yanmandi, aneng yuma popbisipmane,” pepu. Dauddi upepka tep nengeda, aneng yuma popu mutuda, ukupu si ton karepupa, perami. Amutu er sida, ‘Bahal-Perazim, ada me ila di opra baramretopu kurure’ tenen, perami.

12 Dauddi Filistin neng konum popbisipu pangeda, kware kupupa, sun jen talena nengda bendopi. Sun amutu tapra bei taruda, Filistin yala nengdi, sun isok si eremami keca, isok si sekra nimi urasin utopu kupra, petupra derirami kecada, aceipu taprapidi, sepdaro bendopi. Ukupi pangeda, Dauddi er melimna neng tep, ‘Ukupkurume,’ pepra deipupa, anengdi aisok si eremna keca petupra deiaminge yumada, dopra uku dongopipa, uku di akeca yuma jeprapudi gawal daku.

13 Sun yuma dakuramipanen, amenda taru sun Filistin tara neng, kange di ton cap tamupra yaidi, aila ban mutu, er si Refaim mutu banaida, yana mar podanmai. 14 Ukupi pangeda, Dauddi Allah tep kange di ton cap, ‘Ware kupkun do?” pepra, asipetepu. Asipetepupa, “Allah er si Yahwehdi tamupra pepu, “Kanda, ‘Acei di adipapu benedi popkune,’ tenena meme. Ange gum dinin, sun Filistin yala nesala, sun amnyo tara bememdi, ila di tengamre co palpal, er si murbei co urasin tara kepmem dingeda, sun aneng poryankamrume,” pepu. 15 “Ukupra bememdi, gekenmamepanen, sun jen neng banmangedi, yan lelim peramengtopu, kipyal co dupai di, ila lelim peprepa gekepmemnyopda, kan peda adipapu jen dopropkurume. Ada, lelim gekenmamem taruda, sundi, ‘E ukuda, Allah er si Yahwehdi, menepra banmarada, nun tep melipserya deiki di, sun Filistin yala neng yumada popkupe’ tenen, adipapu porbenkurume.” Allahdi Daud tep pepu.

16 Ange-ange yumada, Allahdi er Daud tep, “Ukupkamarume,’ peipmautopu, Daudda ukupudi, sun Filistin neng yuma tep porbei. Porbeidi, aneng yuma tep poptapra bisbisa kapi. Ada, Gibea mutu di gonga kepra, adinin dipdongopra, Geser mutu damai, Filistin yala jen talen neng yumada, popra gawal daku. 17 Ange yuma, Raja Dauddi ukupka tep nengeda, dana-dana tara kurami nimi yumadi, nimi deiyo ngebo Raja Daud, er sida mutu-mutu yuma di kael keami. Tonda, Allah er si Yahwehdi, amutu neitamai tep, kware kun keca deipupa, dana-dana tara kurami nesala, yala-yala yumada, er Raja Daud tep, kware weik kupupa, ‘Uo,’ teneramidi kurami.