1Ch 15 | XteSC | STEP | Raja Daud Yerusalem mutu neitamaida, nimi deiyo ngebo Raja Dauddi peipupa, amutu nengdi, Daud er atida, weika di dopi. Tonda, Daudda, ‘Allahdi mem upu peiamupa, sekeiami upu, co bekin, er sida Peti Perjanjian pumbon dongorami ngeda, telepai deipkune’ tenen, ila lyom opkal bol di dodin tenda ati doraminge keteneipudi, ‘Amambul co bekin kecada, aila tenda ati pumbon dongopkamne ja,” teneramudi, atenda ati keteneiprapudi, dopra deipu.

1 Chronicles 15

Allahdi peiamu mem upu seku ngeda, co bekin, er si Peti Perjanjian pumbon dongopi ngeda dopra, yukai derirbana tep, seki upu

1 Raja Daud Yerusalem mutu neitamaida, nimi deiyo ngebo Raja Dauddi peipupa, amutu nengdi, Daud er atida, weika di dopi. Tonda, Daudda, ‘Allahdi mem upu peiamupa, sekeiami upu, co bekin, er sida Peti Perjanjian pumbon dongorami ngeda, telepai deipkune’ tenen, ila lyom opkal bol di dodin tenda ati doraminge keteneipudi, ‘Amambul co bekin kecada, aila tenda ati pumbon dongopkamne ja,” teneramudi, atenda ati keteneiprapudi, dopra deipu. 2 Aila tenda ati konum ketenepra deipu dingeda, Dauddi pepu. “Allahdi peipu mem upu sekra, Peti Perjanjian pumbon deipi ngeda, Lewi yala nengpu erepra dubankamnunge. Yuk yala neng yumada, apel men doptenge. Deiyoda, Allah Yahwehdi, ‘Sun Lewi yala nengda, amem pel dona cap, akati keca doupra embana cap, kalengna cap, moupra deipnedi dina capda, Lewi yala neng dipapu pio tupa-tupa, ne si eremna pel talepra donkameng’ tenen, Allah er si Yahwehdi, Lewi yala neng tep konum wepra deiamu.” Dauddi pepu.

3 Atep nengeda, Daudda Allah er si Yahwehdi mem upu peipudi, gel deiki sekrapupa, co bekin pumbon deiami. Akeca Peti Perjanjian doupra derina tep, Dauddi telep opkal dodin tenda ati domudi, konum ketenepra deiamngaipu, ‘Abekin doupra dubenkameng’ tenen, kong pepupa, Yerusalem mutu neitamaipu kurami nesala yuma bulupra wengyai. 4 Ataruda, Dauddi, “Sun adipapu yankurume,” pepra, kongpepu nesala, sun sida, ake. Ada, Harundi deipupa, dadeipdanen yanamidi, sundi derirami neng yuma cap, tonda, sun Lewi yala nesala dinin, yuk neng cap tep, kong pepupa, bulupra yai. 5 Aneng kankan neitamai di, aneng ton bulupra yanami. Ada, Lewidi deiamu ngebo, butene ngebo er sida Kehat, erdi deipupa, dadeipdanen yanamidi, sundi derirami nesala cap, tonda ayala neng, sun deiyo ngebo Uriel cap yai. Urieldi deiyo talepra, gonga kepupa, er amutara neng yumada, 120 neng yai.

6 Utopu, Lewidi deiamu ngeboda, weneri ngebo er si Merari, erdi deipupa, dadeipdanen yanamidi, sundi derirami nesala cap, sun nyapsilip cap yai. Merari yala neng kankan di, tenpu ngebo er si Asaya, erdi deiyo talepra, gonga kepropupa, er amutara nengda, 220 neng yai. 7 Utopu, Lewidi deiamu ngebo, menmena du ngeboda, er si Gerson, erdi deipupa, dadeipdanen yanamidi, sundi derirami nesala cap, sun nyapsilip cap yai. Gerson yala neng kankan di, tenpu ngebo, er si Yoeldi deiyo talepra, gonga kepropupa, er amutara nengda, 130 neng yai.

8 Tonda, tenpu ngebo er sida, Elsafandi deipupa, dadeipdanen yanami neng, sundi derirami nesala cap, sun nyapsilip cap yai. Elsafan yala neng kankan di, tenpu ngebo er si Semayadi, deiyo talepra, gonga kepropupa, er amutara nengda, 200 neng yai. 9 Tonda, tenpu ngebo er sida Hebron, erdi deipupa, dadeipdanen yanamidi, sundi derirami nesala cap, sun nyapsilip cap yai. Hebron yala neng kankan di, tenpu ngebo er si Elieldi, deiyo talepra, gonga kepropupa, er amutara nengda, 80 neng yai. 10 Utopu tonda, tenpu ngebo er si Uzieldi deipupa, dadeipdanen yanamidi, sundi derirami nesala cap, sun nyapsilip cap yai. Uziel yala neng kankan di, tenpu ngebo er si Aminadabdi, deiyo talepra, gonga kepropupa, er amutara nengda, 112 neng yai.

11 Aneng-aneng yuma konum bulupra weki pangeda, Daud erdi imam Zadok cap, imam Abyatar cap, sun Lewi yala neng ngangtan bari neng cap tep, kong pepu. Aneng sun sida ake. Ada, Uriel cap, Azaya cap, Yoel cap, Semaya cap, Eliel cap, tonda Aminadab cap tep, kong pepupa yai. 12 Akong pepu neng yai pangeda, Daud erdi aneng tep pepu upuda ake. “Sun nyapsilipda, tenpu yala Lewi yala neng, sun kikiman nengpu kurume. Atep, sundi, ‘Allah Yahweh, er mambul pel dona tep, nun nong yuma cap, dipru neitamai capda, pio telep kupra deipdape dingeda, Allah er si Yahwehdi peipupa sekeiamu upu dopra, dongomi co bekin, er si Peti Perjanjianda, nun yumadi akeca doupra embanada telep kunkamepe’ tenen, keteneipkurume. Ada, nun Israel nesaladi si eremnup Allah, nun nai bo Allah Yahweh, erdi upu peipudi, gel deiki sekra karepupa, co bekin pumbon dongominge doupra, nedi amambul keca derina tep, ati konum keteneipsaipu, derirbenkurume.

13 Menmena taruda, Allahdi mem upu peiamudi, gel deiki sekeipupa, ange dopra, co bekin pumbon deiami ngeda, adipapu doupra bana tep nengeda, sun Lewi yala neng ton, amambul keca doupra ban taruda, ton pio men kuramrume. Lewi yala neng gum dinin, yuk tali yala nesaladi, akeca doupra benpetepi dinin, ange tep nengeda, Allah er si Yahwehda, nun nai bo Allahda, nun kankan neitamai di, nimi yuma wenepseue. Deiyoda, nundi nun nai Allah Yahweh tep, ‘Naie, nun peda ukupkamepe, tenepmepe ngeda, kuptepe do, gum do? Dan yala nengdi, kan upu kiami bekin doupra dubetenge do?’ tenen, asipetepra men mororamepu. Ukupmupkada, mali weik kupmupupa, ange tep Allahdi wenepseue,” Raja Dauddi pepu.

14 Raja Dauddi aupu pepka tep, sun Lewi yala imam-imam neng cap, sun yuk Lewi yala neng capda, ‘Pio telep kupra lengna nengpu kepdana kunkup’ tenen, Allahdi peiamutopu, sun yuk-yuk apel doramidi, keteneipdai. Apel dopinge deiyoda, ake. Ada, Allahdi mem upu peiamupa, pala gel deiki sekeiamupa, Musadi dopra, co bekin, er sida Peti Perjanjian pumbon deiamu ngeda, sundi, ‘Adipapu abekin doupra, telep kupra bana tep nengeda, menmena apel dopmepedi, ketenepra deidapedi, kunkamape,’ tenerami. Allah Yahwehda, er mawa nesala, sun Israel yala nesala yumadi, er si tepapu erepra, er tep gispal dorami. Er dipapu, sun Israel nesala kalekra taleramudi melimamu.

15 Lewi yala nengdi konum ketenepi dingeda, Allahdi peiamupa sekeiamu upu, co bekin, er si Peti Perjanjian pumbon deiaminge doupra, yukai dubenkamai taruda, sun aLewi yala neng, lyom co ton dopra, abekin dana-dana tara keteneipi bon dongopi. Ukupya cadi, alyom co ereprapidi, sun morokyo deiki di deipra bankoi taruda, co sirik gum-gum dana-dana tara talepra doupnedi, bana tep keteneipi. Akupinge yumada, Allah er si Yahwehdi, Musa tep, “Ukupkamrume,” peiamupa, Musadi Israel nesala tep, “Ukupkamrume, aPeti Perjanjian erepra dubankamrume,” pepra, deiamutopu kupi.

16 Tonda, ataru Daud adipapu, Lewi yala neng, sun nimi deiyo-deiyo neng tep peipupa, sun yala nesala tep, nimi ton pel bokra yuk-yuk karepi. Sun Lewi yala nesala tep, deiyo kepra gonga kepi nengdi, ‘Apel dopkung’ tenen, wepra deipi nengda, apel talepra dorami. Apel deipi ngeda ake. Ada, ‘Allah er gispal don mut pena cap, kange pio telep deiki di mut pena cap, tonda mut pen taru doun keca, er si kecapi cap, tonda ila lelim penange, bongopnepa lelim weik peramre keca, er si simbal dinin, er si ton cera penung keca cap, kange deipra, ila upu deiki di penkamepe’ tenen, keteneipi.

17 Raja Dauddi, sun Lewi yala deiyo neng tep, ‘Nimi wepra deipkurume,’ pepra deipu pangeda, sun Lewi yala deiyo nengdi, ‘Nun tara neng gispal don mut penkameng’ tenen, nimi ton wepra deipi. Ada, Lewi yala neng, sun yala ngebo Yoel, erdi deiamu ngebo Heman cap, er kayapu neng cap tep, “Tekurume,” pepu. Er kayapu nengda, Berekhya erdi deipu ngebo Asaf cap, tonda Kusaya erdi deipu ngebo, Etan cap, wepra deipi. Etanda, er apu boda, Merari kuramu. Aneng yuma wepra deipipa teki.

18 Lewi yala neng gung butene ngeda, sun kikiman wisipra penkameng neng tep nengeda, sun Lewi yala nengdi wepra deipi neng ton ake. Ada, Zakaria cap, Yaaziel cap, Semiramot cap, Yehiel cap, Uni cap, Eliab cap, Maaseya cap, tonda Benaya cap, Maaseya cap, Matica cap, Elifele cap, Mikneya cap, wepra deipi. Anengda, mut pena tep ketenepra deipi. Tonda, Dauddi Allah er si eremna tep, keteneipu opkal bol di dodin tenda ati wengbana tep, buplan kalengna nengda, butene neng ton wepra deipi. Aneng sun sida, Obed-Edom cap, Yeiel cap kuramrei. Aca deiki tara si sekamupu neng yumada, ‘Allah er gispal don mut pena cap, kange pio telep deiki di mut pena cap, tonda mut pen taru doun keca, er si kecapi cap, tonda simbal dinin, er si ton cera penung keca cap, kange deipra, ‘Ila upu deiki di penkamenge’ tenen, wepra deipi.

19 Sun Allah si eremna tep, ‘Mut penkameng’ tenen, wepra deipi neng sida ake. Ada, Heman cap, Asaf cap, Etan capda, sundi gat keca er si tembaga di keteneipi keca bongopnepa, lelim weik peramre kecada, er si simbal, ton sida cera penge keca cap, ‘Angeda ukunkameng’ tenen, wepra deipi. 20 Ton nengda, ‘Mut pepmengepa, anengdi yambulanun gitar utopu keca, tapke di lelim pengepa, ila di peramre keca, er sida gambus cap, ‘Apel donkamenge’ tenen, wepra deipi nengda, sun si ake. Ada, Zakaria cap, Aziel cap, Semiramot cap, Yehiel cap, Uni cap, Eliab cap, Maaseya cap, tonda Benaya capda, ‘Kecapi mut pepkameng’ tenen, wepra deipi. 21 Ton nengda, ‘Mut pepmengepa, anengdi yambulanun gitar utopu keca, banbari tapke di lelim pengepa, er upuda banbari welepya kwerepya kemna mut pena neng tep, kecapi di, ‘Apel donkameng’ tenen, wepra deipi neng sun si ake. Ada, Matica cap, Elifele cap, Mikneya cap, Obed-Edom cap, Yeiel cap, tonda Azazya cap, tapke banbari di kecapi deiki di mut pepkameng’ tenen, wepra deipi.

22 Nimi si Kenanya, erda mut pen taru nimidi perami ngeda, pio ila di kael ngebo kuramu. Ukuramnga tep nengeda, erdi Lewi yala neng sun mut pena tep, lelim pen keca pon taru cap, nimi upu deiki di perameng taru capda, erda upu pena di lepsisingna cap, ila di kael keamnga tep, erdi gonga kemna deiyo ngebo kepu. 23 Berekhya cap, Elkana capda, Allahdi peiamu upu co bekin, er sida Peti Perjanjian pumbon deipra, opkal bol di dodin tenda ati doraminge pumbon deipipa, ‘Akati wengbana tep, bisi buplan damai kalengkameng’ tenena tep, animi butene ton wepra deipi. 24 Tonda, sun imam-imam neng utara si kapu neng, sun si ake. Sebanya cap, Yosafat cap, Netaneel cap, Amasai cap, Zakaria cap, Benaya cap, Elieser cap, Allahdi peiamu upu sekeiamupa, Peti Perjanjian buplan damai teknedi, ila lelim pen keca, er si terompet, sundi lelim pena tep, aneng wepra deipi. Tonda, sun Obed-Edom cap, Yehia capda, Allahdi peiamu upu co bekin pumbon deipra, akati wengban bisi buplan kalengna tep, sun ton wepra deipi.

Allah er si Yahwehdi mem upu peiamupa, sekra deiami co bekin, er si Peti Perjanjianda dopra, Yerusalem mutu dubana tep, pepu upu

2 Samuel 6:12-22

25 Atep nengeda, nimi deiyo ngebo Raja Daud cap, Israel yala nesala sun mutu neitamai talepra kurami nimi deiyo-deiyo neng cap, tonda jen talena neng, gung dengeda, seribu (1.000) neng tep, deiyo kepra kurami jen neng cap, sun kikiman wisipra, Obet-Edom er ati bei. Sun er ati beiya deiyoda, Allah Yahwehdi mem upu pepra sekeiamupa, Peti Perjanjian co bekin pumbon deiami ngeda, ‘Akeca doupra, amutu di tapra, Yerusalem mutu duyankamep’ tenen, bei. Sun akeca dorbana tep bei neng yumada, pio telep kange doupra bei. 26 Ukupi dingeda, sun Lewi yala nengdi akeca erepra dubana tep, Allahdi aneng sun pel dona tep meliamupa, Allah Yahweh, erdi peiamu mem upu sekeiamipa, deiamidi Peti Perjanjian, pedina upu kiami co bekin doupra, Yerusalem mutu tamupra yakanmai. Yakanmai taruda, Allah er karena cap, er si eremna cap tep, jem sapi bisam yoneitam bari (7) cap, jem domba bisam yoneitam bari cap poprapidi, ila kailya kalepra, Allah er si erepi.

27 Sun aneng yuma yakanmai taruda, nimi deiyo ngebo Raja Daud, er lyom opkalda, juba pio telep boun opkal, er sida kain lenan, ange di wiami opkal keneku. Tonda, er taram deiki deipra keneku kecada, er si efod ^{▼▼efod Akeca er si efod, angeda imam neng, sun deiyo ngebodi, akeca dopra, er nong urasin tara dinin, er taram deiki kenengamu. Akeca Efod deikida, urasin pio telep gel warna-warna yuk akapunge palepra deiami. Ton gelda, er si Urim, ton gelda er si Tumin kwamu. Agel-agel yuma dipeteramipa, Allah er puto deiki di, agel warna yuk kepra deiamnga deiki di, sun imam nengdi, ‘E, Allah Yahweh, erdi nun tep, ‘Ukupkurume, tek sisi ngeda ake, sun kael kepkurum ngeda ake, sun kunkamrum ngeda ake,’ pepra deipserada, akonuma’ tenen, akeca deiki moupra kael kemamidi, Israel tara nesala yuma tep lap perami. Atep nengeda, akeca Efod deiki deiami gel, Urmin cap, Tumin cap, diramya deiki di, peten kemna tep keca kupka cadi, adeiki di sun kunkami keca kael keami.} ton kenekmau. Ange efod peda, pio telep boun opkal, kain lenan di wiami. Sun deiyo ngebo kenekmau utopu, erdi wepra deipupa, Peti Perjanjian doupra embanmai Lewi yala neng cap, mut penmai neng cap, mut pena tep, lelim pena keca gambus cap, kecapi cap, terompet cap doupra, penmai neng peda, sun yumada, aopkal pio telep boun lenan opkalpu kenekmaidi yakanmai. Ange utopu, nimi upu deiki di mut penange, ila di kael keamu ngebo, er si kenanya, er peda aopkalpu kenekmau. Tonda sun Lewi yala nengdi, Allahdi peiamu me upu sekra deiami co bekin doupra embana tep neng peda, aopkal pio boun lenan ngepu kenekami.

28 Ukupmaidi banmaianen, Daud cap, er nyapu sisa cap, er nyapsilip, sun Israel yala nesala yuma cap, kange pio deipmaidi, pung pena keca, er si terompet cap, pereng pen keca, er si Nafiri cap, ila lelim penange simbal cap, tonda gitar utopunge er si kecapi cap, tonda gambus cap, doupra penmaiyanen, mut pepbanmaiyanen Yerusalem mutu welerbei. Abanmai taruda, Allahdi mem upu peiamupa, Musadi ange sekra Peti Perjanjian co bekin pumbon deiamu keca doupmaidi, banmaianen, er nimi deiyo ngebo Raja Dauddi domu ati damai dubei.

29 Uda, Allahdi peiamu mem upu kiami co bekin, er sida Peti Perjanjianda, doupra banmaianen, Dauddi, ‘Allah er si eremna tep dopsi opkal dodin ati dam, akecada akati pumbon deipkamep’ tenen, akati dopka damai weki. Sundi amutu weki taruda, men di Dauddi domu ner, ada Saul er ner mi Mikhalda, er ati jendela bisi bondi dinmau. Dinmaupa, nimi deiyo ngebo Raja Daud, erda mut pepyakanmaudi, erepra busuk, erepra busuk pepyakanmaudi, Allah er si Yahweh tep, ila di kange deipmaudi, mut semaupa epu. Ukupyakanmaupa epka tep, Mikhal er dipru neitamai di Daud tep, yu tulum kange doupudi, ‘Angeboda ne pio songe,’ tenepu.