1Ch 16 | XteSC | STEP | Sun Lewi yala imam-imam nengdi, Allah peiamudi, gel deiki sekra Musa karepupa, sundi co bekin pumbon deiaminge, er sida Peti Perjanjian ngeda, doupmaianen, nimi deiyo ngebo Raja Daud erdi, ‘Akecada telepai deipkamep’ tenen, Allah er si eremna tep, ketenepra domu opkal dodin ati bena weki. Ada, Allah cap, nimi cap antapra kuna tep ati, bena weki dingeda, akati neitamai pio deipi. Akati neitamai dopra deipi dingeda, sun imam-imamda, ‘Allahdi nun mali kun keca daepkuser’ tenen, yapi keca popra uku dongopi. Tonda, ‘Allah cap, nun Israel nesala cap, telep kupra kikiman dukdongopra, tenpu kange doupra, antapra kunkamep’ tenen, telep karen keca dopra Allah tep karepi.

1 Chronicles 16

Israel nesaladi, Peti Perjanjian dopra, telepai deipinge tep, seku upu

1 Sun Lewi yala imam-imam nengdi, Allah peiamudi, gel deiki sekra Musa karepupa, sundi co bekin pumbon deiaminge, er sida Peti Perjanjian ^{▼▼Peti Perjanjian – Peti Perjanjian kael kemna tep, abuku pasal 13 cap, tonda Keluaran 25:11 cap neitamai dadinkurume.} ngeda, doupmaianen, nimi deiyo ngebo Raja Daud erdi, ‘Akecada telepai deipkamep’ tenen, Allah er si eremna tep, ketenepra domu opkal dodin ati bena weki. Ada, Allah cap, nimi cap antapra kuna tep ati, bena weki dingeda, akati neitamai pio deipi. Akati neitamai dopra deipi dingeda, sun imam-imamda, ‘Allahdi nun mali kun keca daepkuser’ tenen, yapi keca popra uku dongopi. Tonda, ‘Allah cap, nun Israel nesala cap, telep kupra kikiman dukdongopra, tenpu kange doupra, antapra kunkamep’ tenen, telep karen keca dopra Allah tep karepi. 2 Ataruda, Dauddi ayapi keca yuma popra, uku dongopidi, yuk telep karen keca konum karepra seng pepi pangeda, er adipapu Allah tep moropu. Ada, “Nun Israel mutu neitamai kuramnup nesala yuma cap, nun mutu cap, ne nai Allah, kandi telep kweipsememdi, melipsetume,” pepra moropudi, Allah er si deiki di, ‘Israel nesala yumada, teleppu kunkameng’ tenen, erdi telep upu peipu.

3 Upepu dingeda, sun deiyo ngebo Raja Dauddi, Israel nesala yuma tep, jen keca yambulanunpu bokra karepu. Sun aca wekmai nesalada, nimi pe nerapu pe, domba bisam galemna tenpu-tenpu cap, roti kwaneng tenpu cap, tonda tau kwaneng utopu keca, er si kue kismis cap, anesala tep bokra karepupa, sun yuma dopropidi jepi. 4 Akeca-keca yuma bokra deipu dingeda, ataru dipapu nimi deiyo ngebo Dauddi, sun Lewi yala neng neitamai di, yuk gung ton wepra deipu. Ada, Allahdi peiamudi, gel deiki sekupa, Musadi asekeiamu upu, Peti Perjanjian co bekin pumbon deipu ngeda, dopra, Allah er si eremna tep keteneipu ati, opkal bol di dodin tenda ati domunge damai kalengna cap, pel dona cap tep, pel talepra kunkami neng wepra deipu.

Ukupka deiyoda, ‘Anengdi Allah Yahweh, Israel nesala yuma kalekra melimrur Allahda, er si eremna deiki di moronkamenge nge cap, tonda, kange pio deipmengedi, mut penkamenge nge cap, Allah er gispal dona cap, ‘Telepe’ pepra, kunkamenge nge cap, apel yumada, aneng dipapu talepra kunkameng’ tenen, aLewi yala neng wepra deipu.

5 Erdi wepra deipu neng sun sida ake. Ada, Allah er si eremna ati wengna tep menmena gonga kemna deiyo ngeboda, Asaf kuramu. Er amutara nengda ake. Ada, Zakaria cap, Yeiel cap, Semiramot cap, Yehiel cap, Matica cap, Eliab cap, Benaya cap, Obet-Edom cap, tonda Yeielda, gitar utopu keca er si kecapi cap, tonda gambus cap dopra, mut pena deiyo ngebo ton wepra deipu. Angetopu, Asafda gat tembaga keca, er si simbal bongopnepa, ila lelim pena keca bongonkamra deiyo ngebo tep, Asaf wepra deipu.

6 Utopu ton, sun imam neng butene nengda, Benaya cap, Yahaziel capda, pung pepnepa, ila lelim peramre keca, er si terompetda, ‘Akeca lelim penkamre’ tenen, deiyo neng tep, abutene neng ton wepra deipu. Aimam neng buteneda, Allahdi peiamudi gel deiki sekeipupa, Musadi asekeiamu upu dongopu co bekin, er sida Peti Perjanjian dopra, ‘Allah er si eremna ati buplan damaipu, tekrengedi, terompet dopra pung penkamreng’ tenen, wepra deipu.

Raja Dauddi, Allah tep, ‘Telepe,’ pepra seku upu

7 Atumi dipapu, nimi deiyo ngebo Raja Dauddi, Asaf cap, er kayapu neng cap ton, sun Lewi tara nyapsilip cap tep, “Allah er si Yahweh gispal dona tep, mut pepkurume,” pepupa, sundi tamupra, “Telepe, ukupkupe,” pepidi, Allah tep gispal dopi. Sundi aupu pepra, mut penmai ngeda ake.
8 Sun Israel nesala yuma gekepneso. Sun yumadi Allah Yahweh tep, ‘Nun nai Telepe,’ pepmumdi, Allahdi ila mambul pel doramu ngeda, ‘Nesala ban-ban yuma kunge nesala gekepkameng’ tenen, aupu dopra, mutu ban-ban yuma lap perbenkamrume.
9 Allah Yahweh tepapu, kange lon mut pena deiki di, “Allah erda, nimi yumadi men kupmanto keca yuma, ‘Erda apel dorur ngebo,’ pepra, er sipu eremrumnya deiki di, er tep, ‘Telepe,’ penkamrume.
10 Allah Yahweh erda, mali kun keca tenpunge peda men kurya tep, pio lengnapu ngebo, er tenpu kurura cadi, er ila mambul si tep, telep upu penkamrume. Atep, “Nunda Allah Yahweh, er mawa neng kunupa cadi, nunda pingping kange doupra kunkamepe.
Utopu, ware nesala do yuma, Allah er si tep eremengedi, ‘Er dipapu nun taleserure,’ tenen, er tepapu dombanung nesala yumada, kange deipra pingpinga di kunkamenge.
11 Nun Israel yala nesala yumadi, Allah Yahweh er tepapu tumi-tumi yuma si eremepedi, “Nun nai bo Yahweh, kan ila putoda, nun karepsememdi, kan pedi nun damai tupa kumemnyopda, adeiki di nun puto kunkamepe,” pepra, tumi-tumi yuma moronkamepe.
12 – 13 Uo, nun apu bo Yakubdi deiamseupa, dadeipdanen yakunung nengda, Allah er ila mambul upu peramunge cap, erdi nimi men kupmanto keca pel doramu ngeda, lumdongona gum dipapu, ange yuma moupra teniprumudi, aupu peteremna pel taleprumudi, donkamrume. Uo, sunda ne mawa nesala kurume. Sun apu bo Yakub, er sida Israeldi deipupa, dadeipdanen yakaramidi, deiamsei.
Allahdi wepra anuamseu nesala, sunda Allahdi sun kunman keca epnedi, ila kange mun pel doramunge yuma tepapu, pio moupra tenemumdi kunkamrume. Allahdi peramunge cap, pel doramunge cap yumada, lumdongona pio gume.
14 Allah er si Yahwehda, nun nimi yuma, nun deiyo ngebo, nun nai Allah kuserure. Allahdi, “Angeda kunkamrume, angeda pio men kunkamrume. Telep ngeda ake,” peiamseunge cap, tupa peserurnge cap, aupuda, tuai mutu neitamai, ban-ban yuma kunge nesala damaida, pio dakunkamre. Sun yumadi, ange yuma kael kemnunge.
15 Allah Yahwehdi nun tep, “Ukunkamsene. Nedi telep kweipsenyopda, sundi ne tep ukupra-ukupra kunkamrume,” pepra, pedina upu deiki di peiamseu upu yumada, pio men lupronkamre. Tapredi, pio men lupronkamre, tupa tenenapu kunkamre. Erdi peiamseu pedina upuda, tenpunge peda men tapkamre. Aupu yumada, tek sisi nongpu kupkamre.
Tonda, Allahdi, “Angeda kunkamrume, angeda pio men kunkamrume,” pepra, deiamseu upu yumada, pio tep akunkamre. Menmena taru di akuramutopu, ataru peda akunkamre.
Nimidi deipmengepa, dadeipdanen yakaramenganen, derirameng utopu ngebo men kurure. Keteng tamun denge weik, seribu (1.000) peramengtopu, ataru di doryankamre taru peda, pio tep akunkamre. Erdi perur upuda, men gum kupkamre.
16 Angeda yuk upu ton gume. Ada, Allah er si Yahwehdi, “Ukupkamsene,” pepra, pedina upu deiki di peiamu ngeda, nun apu yapu Abraham cap, Isak cap, sun damaida, aupupu pepra deiamu.
Allah Yahwehdi, “Ukupkamsene,” pepra pedina upuda, Abraham er damai pepra deiamu. Ange utopu ton, aupuda Abraham er mi Isak deiki yana dukdongopu. Atep aupuda, Allahdi pio tupa-tupa tenenapu kurure.
17 Tonda, apeiamu upupu, ‘Tupa akapkamre’ tenen, kange di moupra, Allahdi nun apu bo Yakub, er damai yaudi, “Men di yana peipkesi upuda, tek sisi nong kupkamre,” pepra, kange di ton cap tapakra peipu.
Ada, Yakubdi deipupa, dadeipdanen yakarami nesala, nun Israel yala nesala yuma tep, erdi, aupupu pepu. “Ne upu moupra talepmumnyopda, telep kweipkamsene,” pepra deipseua tep, nundi aupupu pio moupra tupa-tupa tenenkamepe. Erdi, aupuda tupa-tupa tenenapu kurure.
18 Allahdi aupu pepu dingeda, sun Abraham cap, Isak cap, nun Israel nesala cap tep, “Kanaan tara kwamre mutu yuma karepsenepa, sun pe mutupu kuprepa, sunda amutu talepra kunkamrume.
Ada tuai nengda, sun nai yapu depkameng taru, sun talerami keca yuma bulupra, sun pe nyapu tep, kareamenga utopu, nedi Kanaan mutu tu yuma karepsenepa, pio tep amutu neitamaipu talepra kunkamrume,” pepu.
19 Pumun taru, Allah er nyapu Israel nesala yuma, Mesir mutu kurami taru, nimi bo neng utopu kupra kurami. Sun Mesir mutu kurami taruda, Israel yala neng yumada, sun nimi gung yambulanunpu kurami.
Nimi denge weik men kuramya cadi, Mesir mutu nesala cap, sun dana-dana tara kurami nesala yuma capdi, sun tep, ‘Israel yala nesalada, dakwapye. Sunda tek sisi mambul neng guma,’ tenerami.
20 Tonda, sun Israel nesala yumada, Mesir mutu tapra, pio katuai mutu embarami taru yumada, tenpu mutupu men kurami dinin, amutu-amutu yumada, sun dipapu dinikamidi, ton mutu kunmana tapra, ton yuk mutu bena kunmananen tapra, amutu di gopra, yukai peda, embanapu kurami. Ukuramya cadi, tenpu mutupu dim pepra, tenpaipu men kurami. Embanapu tali embarami.
21 Ukurami dinino, Allahdi sun Israel yala neng yuma tep, men kau keptamtamnga cadi, tupa teneramudi, go tupa kareamnga tep, yuk mutu nesaladi, sun Israel nesala damai ikin keca ton pio men deriramidi, sun nong deiki tep, bisbisa kapra men talerami. Men taleramidi, ila ikin pel ton men dimami.
Tonda, ‘Yuk mutu ila nimi deiyo nengdi, ne mawa nesalada ikin keca ton, sun nong deiki deipnung’ tenen, sun nai bo Allah Yahwehdi, dana-dana tara kepra, ila nimi deiyo ngebo kepra talerami neng, Raja-Raja deiyo neng yuma tep, “Sundi ne nyapu ikin keca derinada, pio gume,” tenepra, upu sengamu.
22 Allahdi yuk mutu nimi deiyo Raja neng tep uperamu. “Sun Israel yala nesala yumada, ‘Ne mawa nesala kunkameng’ tenen, nedi wepra deipsi neng cadi, sun aneng tep ton pio men dumkamrume.
Tonda, nedi wepra deipsipa, ne upu gekepmengedi, lap perbenkameng neng, sun nabi-nabi neng peda, ikin keca sun nong deiki pio men derinkamrume,” pepu.
23 Tuai mutu neitamai kumum nesala yumada, Allah Yahweh, er si eremna tepapu, ukupu kange lon mut pemumdi, gispal donkamrume. Tonda, tumi-tumi yumada, er sipu eremumdi, “Kanda nimi lyemna tep, ila deiyo ngebo kurume.
Tonda kan pio telep kumemnya cap, kunupsek pen pel domemnya capda, pio telepe,” pepra, mutu ban-ban yuma kunge nesala tep, lap perbenkamrume. Aupu pepra bapepa, kange deipra, gisal donapu kunkamepada, tumi-tumi yuma ukunkamepa tepa.
24 Atep, ‘Nesala ban-ban yuma gekenkameng’ tenen, Allah er pio telep kure keca cap, ila puto di mambul pel dorenge cap tep, lap penkamrume. Ada, ware nesala do, yala-yala yumadi, ‘Allah er mambul pio weik kure keca tep gekenkameng’ tenen, Allahdi kurenge yuma tep, ‘Yuk yala nesala yumadi gekenkameng’ tenen, katuai dipu lap penkamrume.
25 Aupu penkamruma deiyoda ake. Yuk nesala ban-ban yuma gekenkamengada, tali tep gume. Deiyoda, Allah er si Yahweh ila mambul weik ngebo kurura tep, er tepapu pio kange deipra, ila di gudinkamepe.
Yuk tali keca cap, isok si cap tep, nimi tuai nengdi, ‘Nun nai bo,’ tenengedi kware kupra, atali keca tep, si erepra kunung dinino, Allahda akeca-keca yuma deiki tara talepra kurura cadi, kware weik kurepapu, er tep si eremkamepe.
Ada tali tep gume, tali isok-isok keca yumada, amutarapu kurure. Er Allahda, akeca yuma deiki tarapu kurure. Er puda, ila mambul ngebo kurura cadi, telep kupra er sipu eremkamepe.
26 Nesala ban-ban yumadi, sun pe buru deiki di petupra deipmengedi, si eramenge kecada, akeca ketenepra deipmemngedi, ‘Nun nai boda ake’ tenen, akecapu talepra, er tep si eremnunge.
Tuai mutu neitamai talepra kungedi, isok si eremenge keca yumada, tali kecapu kurura cadi, pel tenpu peda pio men doptenge. Dinino, nun nai bo Allah Yahwehda, ila puto ngebo kurura cadi, er dipapu im alau tara kure keca yumada, ketekepra deiamu.
27 Allah erda, pio telep kuredi, erda ila eremna cap, ila mambul weik cap kupra kure ngebo kurure. Atep, nimi ban-ban yumadi, er tep gispal dongedi, er si eremnunge.
Tonda, er si eremna ati pumbonda, er akurura cadi, wekra dinup taru yumada, ‘Uo nun nai bo Allahda, tek sisi puto pio weik ngebo kuredi, diserure’ tenen, pio ila di kange deipra kunupe.
28 Ange tep nengeda, nun tuai mutu neitamai kunup nesala yala-yala yumadi, nun nai bo Allah Yahweh er si tep, “Uo nun nai Allahda, pio telep-teleppu kurure.
Erda, tek sisi ila puto weik ngebo kuredi, erda pio mambul kuryada, pio teleppu kurure,” pepra, er sipu eremkamepe.
29 Allah er cap, er si capda, ila mambul pio weik ngebo kurura cadi, nun tuai mutu neitamai kunup nesala yumadi, er gispal dona tepapu, er si adipapu eremkamepe.
Tonda, Allah er si eremna tep, nun yumadi, karena telep keca dopra, er gispal dona tep keca cap, er si eremna tep karen keca capda, akati damai duyapedi, karenkamepe.
Nun tuai mutu ban-ban yuma kunup nesala yumadi, Allah Yahweh tep, “Uo, nun nai bo Allahda, mali keca tenpunge peda, pio men kurura cadi, er si tepapu, ila di eremkamnupe,” pepra, kunkamepe.
30 Nun tuai mutu ban-ban yuma kunup nesala yuma, er damai yakankamep taru yumada, ‘Uo’ tenen, kware kupserepa, moropsemkamepe.
Ware keca do yuma, Allah er dipapu ketekepra deiamnga cadi, tuai mutu kurenge yumada, men lokamre. Er pe puto dipapu pepra deiamupa, pio dim pepra acapu akunkamre.
31 Atep, im deiki kure keca cap, im neitamai kure keca cap, tuai mutu ban-ban yuma kure keca cap, nesala yuma capdi, kange pio deipra gispal donkamrume.
Ada, “Allah er si Yahwehda, nimi deiyo ngebo kepra, akeca-keca yuma erepra, deiki tara kuredi, akeca yuma taleredi, Raja kurure,” pepra, mutu ban-ban yuma neitamai dakunge nesala tep, aupu lap pepembankamrume.
32 Ange utopu, ila laut mokon deipkai pe, alaut mokon neitamai kure keca yuma peda, akeca yumadi, Allah tepapu ila upu pepmumdi gispal donkamrume!
Ange utopu, mutmuta paramre mutu kuramre keca yuma pe, nimidi wa pepra kourameng keca damai pare keca peda, akeca yala-yala yuma di, ila upu deiki di pepra, Allah tep si erepra gispal donkamenge!
33 Allah er sipu eremrumu pangeda, ila co palpal tekamyai, bura tali daparamre keca yuma peda, akeca yala-yala yumada, ila upu deiki di, Allah tep si erepra gispal donkamenge!
Ada, nun yumadi, Allah Yahweh er si tepapu eremepedi, gispal donkamepa deiyoda, Allah Yahwehdi tuai mutu tamupra yankamre taruda, nun yuma tep, ‘Telep ngeda ace, mali ngeda acei,’ tenepra, upu bokeipseredi, wilipra deipkamsera tep, er sipu eremkamepe.
34 Atep nengeda, nun yumadi, Allah er si Yahweh tepapu, ‘Telepe, kanda pio telepe pua,” pepra, gispal donkamepe. Ada, er dipapu nun tep, pio ila di bicau tenepseudi, tupa-tupa melimserya tepa.
Bicau teneseredi, erdi nun tep, ‘Ukunkamsene,’ pepra, pedina upu deiki di peipseu upu yumada, pio men tamkamre. Ange yuma peda, tek sisi yamupra karenkamsere. Pio men tamkamsere.
35 Tonda, aupu ton penkamrume. Nundi, “Teka, nun nai bo Allah kanda, nun lyemna ngebo, nun tep bicau tenepsememdi, lyepra deipseo.
Nun yuk mutu neng, sun damai kunup neng cap, tonda nun popra bisbisa kapseidi, yuk karen mutu neitamai dubenamseipa, kunup neng cap, nun yuma bulupra deipsemempa, nun yumadi kan si tep, “Kanda pio telep lengna ngebo,” pepra, gispal donkamkepe.
Tonda, ukupsemem pangeda, kan sipu eremepedi, pio kange deipra, ‘Uo’ tenen, kan tep gispal dopra kunkamkepe.
36 Allah Yahwehda, erda nun Israel nesala, nun tep pio kalekra melimserur ngebo kurure. Er Allahda, pio gonga kemne taru di, dipdongopra sirya gawal dangne taru peda, pio akurure!
Ukuruma cadi, kan mawa neng, nun Israel nesaladi, “Nun deiyo ngebo Allah Yahweh tep, ‘Telepe’ pepkepe.” Raja Dauddi pepu.
Upepupa, sun abulupra wekmai neng yumadi, “Teka, ‘Apepmaseremtopu akunkamre’ tenen, nun peda, ‘Telepe akonuma,’ pepmepe,” pepi.

Yerusalem mutu kurami neng cap, Gibeon mutu neng cap tep, Allah si eremna pel dona deiyo karepunge tep, seki upu

37 Raja Dauddi upepu dingeda, Asaf cap, er nyapsilip, sun Lewi yala neng cap, sun nyapsilip yuma capda, Allah Yahweh erdi peiamudi, gel deiki sekeiamu upu, Peti Perjanjian co bekin deiamya damaipu tapu. Ada, ‘Sun aimam neng yumada, men di pel kareamsipa, talepra dorami ngeda, apeipsitopu, tumi-tumi yuma putapseryopda, apelpu dukdongopra pel donkameng’ tenen, acapu tapu. Sun akunmaiyaida, Yerusalem ati arum neitamaipu kunmai. 38 Tonda, aceipu melipra pel donkamu ngeboda, Yedutun erdi deiamu ngebo, er si Obet-Edom, erdi melipra apelpu donmau. Tonda, er yala neng dinin, yuk neng er nyapsilipda, denge yambul weik, enam puluh delapan (68) neng cap, apel melipra donmai. Tonda, Yedutun er mi Obet-Edom cap, Hosa capda, Allah Yahweh er si eremna tep domi opkal dodin tenda ati, atenda ati wengbana bisi buplan damai kalengna neng kuramrei.

39 Dinino, nimi deiyo ngebo Dauddi, imam ngebo er si Zadok cap, er nyapsilip yuk imam-imam neng capda, Allah Yahweh er pio lengna si eremna ati, ada Gibea mutu neitamai deipi ngeda, tupa akupu. ‘Akati damai di melipra kalengna pel donkameng’ tenen, acapu tapu.

40 Sun donkameng pelda, ipna cap, idona cap, tumi-tumi yumada, Allah Yahweh er gispal dona tep, yapi keca popra, uku dongonai tep, gel pala di yakra taplakra deiamyai, er si mesba deiki daramyaipu, acapu dorami. Apel dorami ngeda, Allah Yahwehdi, ‘Ukupkamrume, angeda men kupkamrume,’ pepra, deiamu upu utotopu kupra, apel dorami. Ange peda, Allah Yahwehdi, sun Israel nesala tep peiamupa, sundi sekeiami utopu kurami. 41 Imam Zadok cap, sun aimam-imam neng cap yumada, tonda Heman cap, Yedutun cap, yuk Lewi yala neng cap, ada konum men di Allah Yahweh, er si eremna tep, ‘Kange lon mut, sun aneng dipapu, amut penkameng’ tenen, wepra deiamu neng dipapu melimami.

Ada, Allahdi tali bicau teneramseudi, erdi, ‘Sunda ukunkamrume. Ukuprumu pangeda, nedi ukupra-ukupra kepnedi, kalekra melimkamsene,’ pepra, pedina upu deiki di pediramu ngeda, pio angepu kupkamsere. Men tapkamsere. Utenepmengedi, Allah er sipu pio eremengedi, er tep, “Nun naie, telepe,” pepra, penkamenge. 42 Heman cap, Yedutun capda, sun terompet lelim pena cap, tonda lelim pen keca, er si ceracap, tonda simbal cappu, akeca lelim pena tep weiamu. Tonda, sun Lewi yala neng, yuk nengdi, sun Allah gispal don taruda, mut pen keca yala-yala yuknge peda, pio weika di perami taruda, Heman cap, Yedutan capdi, alelim pena keca ton peramrei. Tonda, Yedutun erdi deiamu neng yumada, Allah er si Yahweh, er si eremna ati bisi buplan damai kalengna tep neng, sun ton ketenepra deiamu.

43 Uda, ange-ange yuma konum kupi dingeda, sun Israel nesala yuma, adipapu tamupra, sun ati yuk-yuk bei. Ukupitopu, nimi deiyo ngebo Raja Daud, er peda er nyapu ati bena dirbeu. Ada, ‘Ne nyapsilip yuma tep, Allahdi telep kweipkamre’ tenen, telep upu pepra, sun nong deiki deipkamne ja’ tenen, er pe ati tamupra beu.