1 Chronicles 17

Allah Yahwehdi pepra deiamu upuda, Natandi Daud tep, pepra deipu upu

1Isarel neng, sun ila nimi deiyo ngebo Raja Daud, er ila ati konum domipa, akati neitamai wekra dakuramudi, dim pepra bukudi kange deipra ati kuramu. Ataruda, Dauddi nabi Natan tep aupu pepu. Natanda tali ngebo gume. Erda Allah er upu lap pena deiyo ngebo nabi kuramu. Dauddi Natan tep pepu upuda ake. “Uo, ne mambul kange doupne. Ada, neda urasin telep ati pumbon kunune. Ne atida, pio telep co, er sida cemara co, Libanon mutu dipapu duyana, ati domneipa, acapu kunun dinin, Allah Yahwehdi peiamu upu sekupa, dopra deiami ngeda, ada Peti Perjanjian co bekin pumbon deiami ngeda, tali opkal bol di dodin tenda ati pumbon dongopra deiamuputopu, tupa akurure,” pepu. 2Upepu pangeda, nabi Natandi Daud tep pepu, “Allah er si Yahweh cap, kan cap kikiman kurumumnya cadi, Allahdi kan tep melimkamkere. Ange tep nengeda, kan kange neitamai di, ‘Ukupkamne,’ tenememtopu, angepu kupkurume.
3Upepu dinino, ataru lukunda neitamai dipapu, Allah er si Yahwehdi, nabi Natan tep upepu. 4“Kandi Daud tep, “Kan tenememtopu kupkurume,” pepra pepmamum dinino, angeda pio gume. Atep kan adipapu bememdi, ne amutara pel don ngebo Raja Daud tep, upepkurume.”
Kan nai bo Allah Yahwehdi peipmaker ngeda adano. “Ne Allah tep, ne si eremna ati donkamner ngeboda, kanda gume. Kandi ne si eremna ati men dopkamnereme.
5Deiyoda ake. Ne mawa nesala, Israel neng Mesir mutu neitamai di lyeprapsidi, anesala doupra, amutu neitamai duyasi taru di, dor di, dipdongopra ukutaru yuma peda, neda co di domenge ati pumbon ton men bukra kuramsi. Tonda tupa men kunune. Ange utopu, gat co di donung ati gum dinino, tali opkal bol di dodin tenda atipu keteneiamneipa, aca pumbonpu kunune. Ukunedi, sun Israel yala nesaladi embaramenge taruda, ne ati peda doupra dubangepa, ne peda kange di banune. Aopkal bol di domi dodin tenda ati neitamai deipmengedi, kange di urupra dubenapna, kange di duyanapna, kemenge taru neitamaida, ne peda ayanapna, orbenapna kunune. Atep, ne pio kun ati ton men kwapmanere.
6Ataru neitamai yumada, ne cap, sun Israel nesala cap, kikimanpu kuramepu. Sun bisi neitamai embarami taru pe, tenpu mutu kurami taru peda, ne cap kikiman kuramepu. Tonda, sun Israel nesala talepra kalengna tep, nedi nimi deiyo kepra upu bongdina deiyo neng kemna tep, wepra deipsi neng tep, “Ne ati dopkurume. Deiyo ware keca deiyo tep, ati co cakra, gat telep ati kapul men dopnerum do?” pepra, pio men peramsi. 7Ange tep nengeda, Natan kandi ne amutara pel donere ngebo, Raja Daud tep pepkurume. ‘Ne Allah Yahweh akeca-keca yuma ketekepra talepsidi, deiki tara kunedi, im deiki kunge jen talena malaikat, sun ila puto deiyo ngebo kunune. Nedi kan Daud tep upepkene. Kan tali domba pel talepra doramum taru neitamaida, konum dopropkesidi, kanda ne mawa nesala, sun Israel yala nesala talepra kumemdi, sun ila nimi deiyo ngebo Raja kepkurume. ‘Ukupkamrum’ tenena tep, nedi kan dopra, erepra deipkesi,’ pepne.
8Ange tep nengeda. Ne Allahdi dan mutu embaramum taru yumada, nedi melimamkesi. Tonda, kan tep, ‘Angebo popkup,’ teneramkei neng yuma peda, nedi sun kange yawarapra deipnedi, melimamkesa deiki di, sun aneng yuma popra gawal dangamume. Nedi kan tep ila di kange deipkesi. Atep nengeda, ‘Tuai mutu ila nimi deiyo neng kurameng utopu neng, kunkamre’ tenen, nedi kan erepra deipmakene. Amutu nesala yumadi kan si kael kepkamenge. 9Ne Allahdi, ‘Ne nyapu sisa, sun Israel nesala kunkameng mutu tep nengeda, pio telep mutu karepkamsene. Ne pepne pangeda, dim pepra teleppu kunkamenge. Yuk mali nengda, Allah tep pio teka men tenenge nengdi, pumun taru kuramidi, Israel yala nesala tep, tupa poryakaramipa, ne mawa nesala pio puto boun kupra depmanto kuramitopu, tupa men kunkamenge. Ange yumada, gum kupra deipnepa, sun Israel nengda, pio telep kweipnepa, teleppu kunkamenge.
10– 11Ada, pumun taru, sun Israel nesala upu bongdina deiyo neng kemna tep, ne Allahdi wepra depsi taru di, dor di, dipdongopra aneitamai taru ton, Israel nesalada ikin weik kurami dinin, ukutaruda, sun mar pena tep nengda, sun amutara kupra deipkamne. Ukupne dingeda, kan Daud tep, ne Allah Yahwehdi, kan erepkenepa, sun Israel nesala tep, ila nimi deiyo ngebo kunkamrume. Angepu gum dinin, ton ngeda, kan dakuramemyanen, amenda taru depmemnyopda, kan co puna neng damai bena kunkamrume.
Ataruda, kandi deipmempa, dadeipdanen, yakankameng neng neitamaida, ne dipapu tenpu ngebo ton ereipnepa, sun Israel nesala dordi deipdanen yakarami neng, sun deiyo ngebo kupredi, upu penkamre. Ne dipapu kan yala neng erepra deipnepa, Israel nesala talepmengedi, pio tep upu penkamenge.
Aupu yumada, Allah Yahwehdi nabi Natan tep lap peipudi, “Kanda Daud tep lap perbenkurume,” pepra deipu.
12Upepudi aupu ton pepu. “Daud kan konum wisi deipmemdi depmemnyopda, kan co puna neng deramipa, tu paliramitopu, kan peda depmempa, tu palipkamkenge. Palipkengopda, kan yo pununa tep, kan pedi deipkamrum mipu weprapnedi, erepra deipkamne. Tonda, kan mi erepra deipnepa, er di Israel nesala talenkamre. Erdi deiprepa, dadeipdanen benkameng nengdi, Israel nesala pio talenkamenga tep, ila puto kupra deipnepa, er yala neng dipapu nimi deiyo kepra talenkamenge. Ukupmengepa, yuk yala nesala yuma pio men popra bisbisa kapkamenge. Tonda, kandi deipkamrem ngebodi, ne si eremna tep kunkamne atida, er dipapu dopkamnere. Akati dopneryopda, sun Israel neng akati pumbon ne si eremkamnenge.
13Ukupnyopda, neda er nai bo Allah kunkamna cadi, erda ne mi sisa utopu kunkamre. Angeboda, ne mi utopu kunkamnere. Atep angebo tep, pio bicau tenenkamnada, tupa tenenapu kunkamne. Pio bicau tenepnedi, er tep pio men tapkamne. Pio atep telep kweipnepa, teleppu kunkamre. Dau, kanda kapul men ereipkesi taruda, Raja Saul mali kupupa, nedi er tep wenepra tapsi. Er nimi deiyo kepra taleamunge yumada, gum kupra deipsi. Ange ukupsi utopu, kandi deipkamrem mi peda, utopu men kupkamne. Er tep tupa bicau tenepnedi, pio melimkamne. 14Kandi deipkamrem mida, nedi erepra deipne pangeda, erdi ne mawa nesala sun Israel yala nengda, pio talenkamre. Tonda, erdi deiprepa, dadeipdanen bankameng neng neitamai di, yuk neng ton erepra deipnedi, puto keipnepa, sundi ton, Israel nesala pio tep talenkamenge. Sunda ne damai kunkamenge. Yuk mutu nesaladi sun tep, popra bisbisa kapra men gawal dakamenge. Ne dipapu pio tep kalekra melimkamne.” Allahdi nabi Natan tep lap peipu.

15Upepupa, nabi Natandi Daud damai bena, Daud tep lap pepu. Ada, Allahdi peipu upu cap, ken mana deiki di yana peiamu upu cap yuma doupra, nabi Natandi Daud tep lap perbeupa gekepu.

Raja Dauddi, “Ne nai bo Allah, kandi melimkamnerema tep, telepe pepkene,” pepra, Allah moropu upu

16Nabi Natandi Daud tep, Allahdi peipu upu konum pepupa, Daud gekepu dingeda, Allahdi peiamudi sekra karepupa, sundi deiami upu dopra, Peti Perjanjian co bekin dongopinge damai beudi bukra, Dauddi Allah tep moropudi upepu.

“Ne nai Allah, kanda Yahweh kurume. Kan cap, kan si cap tepapu, gispal dopra si eremkenune. Dinino, ne kaele, ne cap, ne nerapu cap, ne nyapu cap, ne nyapsilip cap yumada, ila mambul telep nesala pio men kunupe. Nunda tali nesala cadi, nunda ware keca deiyo deiki di, Allah Yahweh kan pe dipapu, weika di melimsemem do? Tonda, neda pio mambul gum ngebo kuramsi taru neitamai di, pio telep kupra doupra yakasememnyanen, ataru peda pio telepai duyanmaseremdi, ne tep pio telep kweipmanerem do? 17Angepu gum dinin, ukutaruda weika di konum melimseruma cadi, kanda ila mambul cap, puto cap ngebo kuruma di, ‘Ange yumada, metektonunpu kurura cadi, akonuma,’ pepra tamsetume. Dinino, ne yala nesala tep, amenda taru neitamai peda, nedi deipnepa, dadeipdanen benkameng neng, ne yala nesala tep telep kweipkamseremnge ton lap peipmanereme. Uo, ne nai Allah, kan si Yahweh kurum ngeboda, amenda taru telep kupra deipkamnerem keca tep, lap peipnerema tep nengeda, ne ila di mambul kange doupne. Neda kan amutara, tali pel dona ngebo kunun dinin, kandi, ‘Angeboda pio mambul ngebo utopu kurure’ tenen, pio telep upu pepmanerema tep, neda, ‘Uo,’ tenen, ne kange deipne.

18Atep nengeda, ne nai bo Allah, nedi ware upu ton pepketene do? Neda, kan amutara melimna ngebopu kunune. Mambul ngebo men kununa cadi, ne kune keca yumada, nai kandi konum kael kemnerume. Naie, kanda ne si ila dereipnememdi, ila deiyo ngebo Raja keipkamnerema tep nengeda, ware upu ton pepketene do? Angeda, kan pedipapu akeca-keca yuma deiki tara talepra kumemdi, kan amutara tali pel dona ngebo, ne tep, akonum kael keamnemume. 19Teka, kanda ne nai bo Allah Yahweh kurume. Ange tep nengeda, kan pe upu cap, kan pe dipru neitamai di, ‘Ukunkamne,’ tenememnge capda, apelpu donkamrume. Atep, kandi, ‘Ukupkamkene,’ pepra, lap pepmanerem mambul keca kupkamremnge yumada, ne melipra telep kudina tep, kupkamnerume. Angeda, nai kandi, ‘Konum ukupkamne,’ pepra, lap peipmaneremnge yumada, katuai dipapu lap peipmanerema tep pepne.

20Teka, kanda ne nai Allah Yahweh kurume. Ukumemdi akeca-keca yuma deiki tara talepra kumemdi, kan tenemem keca yuma kunupsek pepra, pel domem ngebo kurume. Yuk neng tuai mutu neitamai kunung neng ton, ange yuma utopu ton pio men kununge. Kanda, Allah Yahweh tenpu kurume. Yuk nengdi, ‘Allahda ange ton ukurure. Erdi, ‘Ange cap, ange cap konum kuramu,’ pepra, lap pesengepa, nun amul di pio gekenupe. Atep nun kaele, kanda Allah Yahweh kumemnya utopu ngebo ton, tek sisi pio men kurure. Kan tenpu kurume.

21Tonda, dan mutu neng ton kan nyapu sisa, sun Israel yala nesala kungetopu, yuk mutu neng ton utopu kunung do? Gume, yuk yala neng yumada, sun Israel nesala utopu men kununge. Yuk yala nesala yumada, mutu ban-ban yuma neitamai dakunung dinin, kandi, ‘Sun Israel neng puda, ne mawa nesala kungedi, ne si eremkamneng’ tenen, kandi nun dopra, Mesir mutu neitamai di lyepropsemume. Lyepropsemuma deiki di, yuk-yuk mutu kunge nesala yuma gekepra kael kepmengopda, sundi, ‘Uo, tek sisi Allah Yahweh, erda ila puto ngebo, erda mambul weik ngebo kurure’ tenen, kael keami. Tonda, tupa kael kemnunge. Ton ngeda kael kepkamenge.

Mesir mutu neitamai di, konum lyepropsemumdi, Kanaan tara neitamai kurami nesala, nun Israel nesala, nun podan neng yumada, sun pe mutu neitamai di menmena enepra dokotepmumpa, kan mawa nesala, nun Israel neng tep, amutu tu karepsemumpa, ukutaru ange talepra teleppu tupa kunupe. Ange yuma kuramuma deiki di, nimi gekeramidi, ‘Uo, Allah Yahweh er sida, ila mambul ngebo kurure’ tenen, kael kemamkei. 22Tonda, nun nai bo Allah, kan pe dipapu, ‘Sun Israel nesala yumada, ne pe nyapu sisa utopu kunkameng’ tenen, nun Israel yala nesala tep, konum wepra deiamsemum nesalada, kan mawa nesala pio kunkamepe. Ange utopu, nai kan si Yahweh eremkamkenupe. Nun nai bo Allah, kanda pio talepra kunkamsereme.” Raja Dauddi Allah tep pepu.

23Daudda, upepu dingeda, aupu ton dukdongopra pepu. “Ne nai Allah, kan si Yahweh, ukutaru ne kan amutara pel don ngebo cap, nedi deipnepa, dadeipdanen bankameng neng, ne yala neng yuma cap tep, kandi, ‘Ukupkamsene,’ pepra, lap peiamsemumtopu, pio telep kupra kupkamre. Ada, kan dipapu melimsememdi, yuk taru yumada, ‘Ila mambul pel donkamsene,’ peiamsemumtopu, ‘Angepu ukunkamserem’ tenen, moropkene naio. Ukupmemnyopda, ange yumada, men gum kupkamre. Pio atep kupkamre ja.

24Ange tep nengeda, nun nai bo Allah, kandi peiamsemumtopu, kupsememnyopda, ne nai Allah, kan si tep, nimi ban-ban yuma weika di, pio ila di eremkengedi, upenkamkenge. “Uo, Allah er si Yahweh, erda Israel nesala sundi, ‘Nun nai bo Allah ake,’ tenen, si eremenge ngeboda, Allah er cap, er si cap, tek sisi pio tep kunkamre. Erda, im deiki tara kunge jen talena malaikat yumada, erda, sun ila deiyo ngebo kurure. Israel nesaladi, er sipu eremnunge. Allah er dingeda, anesala tepapu, ‘Ne mawa nesala kununge,’ tenen, pio kalekra melimrure,” pepra penkamenge. Tonda, ange yuma ukupsemempa, Daud yala nesala yuma tep nengeda, kandi ila puto karepsemempa, ila nimi deiyo neng kepra, Israel nesala talepra, pio tep kunkamenge. Kanda nun damaipu, pio kalekra melimsememdi, kikiman kunkamepe.

25Ne Daud, ne yala anesaladi, Israel nesala talepra, pio kunkamepa deiyoda ake. Ada, kanda ne si eremkenun Allah, kan pedipapu ne tep konum katuai di lap peipnemume. Ada, kandi, ‘Ukupkamkene, kan pe deipmum ngebodi, Israel nesala talenkamre. Tonda, erdi deiprepa, dadeipdanen yakangedi, deipkameng neng dipapu, Israel mutu neitamai kunge nesala yuma tep, deiyo kepra talenkamenge. Kan yala nengpu, ila nimi deiyo ngebo kepra deipnepa, sundi Israel nesala talepra kunkamenge,’ pepra, pedina upu deiki di peiamnemume. Atep, aupu peipnemuma deiki di, ne nai bo Allah, ne Daudda, kwar tenena gum di, kan tep moropkene.

26Ukutaruda, kanda nun nai bo Allah Yahweh, kanpu kurume. Tonda, nun nai bo Allah kan pedipapu, ‘Pio telep ngeda ukupkamkene,’ pepra, deiamnemume naio. Ange tep nengeda, ne Dauddi ne nai bo Allah kan tep moropkene,” Dauddi pepu.

27Upepudi ange moropu. “Ne nai kanda, Allah Yahweh kurume. Pedina upu deiki di, ‘Telep kweipkamkene,’ pepra, peipnemuma cadi, kan tenepmemdi, perum upu yumada, tek sisipu kupkamre. Nun Israel neng cap, ne pe yala nesala yuma cap tep, pio weika di telep kudiserume. Atep, ‘Nedi deipsipa, dadeipdanen bankameng nesala yumada, ne nai bo Allah, kandi melipmemnya deiki di, sunda pio puto kepra deipmempa, pio tep nimi deiyo neng kunkamenge. Sun tep kandi pio bicau tenepra pio melimkamrum’ tenen, moropkene. Tonda, ukupmemnyopda, ‘Ne yala nesalada, kan damaipu kupmengedi, kan sipu pio eremkameng’ tenen, moropkene naio.”

Dauddi, Allah Yahweh tep upepra moropu.