1Ch 18 | XteSC | STEP | Ware kupra taru do, konum kupu pangeda, nimi deiyo ngebo Raja Dauddi, sun Filistin tara neng yuma popbisipu. Ukupu dingeda, adipapu ila ati arum er sida, Gad mutu cap, amutu dana-dana tara kurami yambul nimi ati-ati arum yuma capda, erpu dopropu pangeda, sun Filistin neng tupa gam kurami nengda, er amutarapu kurami.

1 Chronicles 18

Dauddi yuk mutu neng yuma popbisipunge tep, seki upu

1 Ware kupra taru do, konum kupu pangeda, nimi deiyo ngebo Raja Dauddi, sun Filistin tara neng yuma popbisipu. Ukupu dingeda, adipapu ila ati arum er sida, Gad mutu cap, amutu dana-dana tara kurami yambul nimi ati-ati arum yuma capda, erpu dopropu pangeda, sun Filistin neng tupa gam kurami nengda, er amutarapu kurami. 2 Ange utopu, nimi deiyo ngebo Raja Daud, er dipapu Moab tara neng peda, popra gawal daku. Ukupu pangeda, sun Moab yala nesala yumadi, er amutara genepdongopra kurami. Ukuramidi, sun tupa gam kurami Moab yala nengdi, Raja Daud amutara kuramidi, er gispal dona tep, ‘Amutu neitamai tupa teleppu kunkamepe’ tenena tep, co bo cap, telep karen keca capda, Daud er damai kareryakarami.

3 Utopu tonda, nimi deiyo ngebo Raja Daud, erdi itara karen mutu talepra, Raja Hadadezer cap, er jen talen neng yuma cap, poptapu. Angebo Raja Hadadezerda, er taleamu mutu sida Zoba. Amutuda, ila ati arum domyai, amutu sida Hamat mutu, angeda Siria mutu neitamai kwamu. Dauddi angebo poptapu taruda, ada Raja Hadadezerda, ‘Itara karen mutu, Efrata me damai di, ne puto di dalupra dopropkamne’ tenen, kuramu. Ukuramu taru neitamaipu, Daud imutu banmaudi, angebo tep poptapu.

4 Angeboda, Raja Hadadezer cap, er jen talena neng cap, poptapudi, itara bisi banmau taruda, nimi porbana tep, kuda bisamdi gipra, tu deiki embaramudi, nimi bukra ban keca, er sida kereta kuda, nimi deiyo ngebo Raja Hadadezer er erdi taleamu kereta kudada, seribu (1.000) kwamu dinin, Dauddi ange yuma menmena dalupra dopropu. Tonda ukupupa, kuda bisam bali deiki di welepra yandi, nimi porbarami jen talen neng ton, tujuh ribu (7.000) neng tomopra dubeu. Tonda, dua puluh ribu (20.000) jen talena neng ton, tu deiki bisi di embarami jen talena neng ton tomopra dubeu. Daud ukupu dingeda, erdi peipupa, amutu neng sun kuda bisamda, nimi porbana tep welepra tekidi, tu deiki embanmai keca, akereta kuda, tapke getepra gipra banmai kuda nimi pon ngeda, akuda Daud er jen talena nengdi, ‘Ton cap men sepra benkameng’ tenen, sun yan melmel yumada sekropi. Dinino, ton kuda yuk nge, seratus (100) ekor ton, sun yan melmelda, sun jen talena nengdi men seki.

5 Tonda, ataru dipapu, Siria mutu jen talena neng ton, ila ati arum er si Damasik di, ‘Nimi deiyo ngebo Raja Hadadezer, er ton melipkamep’ tenen, er damai yai taruda, Raja Dauddi ayala neng peda, poptapupa, denge weik, dua puluh dua ribu (22.000) neng depi. 6 Adipapu nimi deiyo ngebo Raja Dauddi, Siria tara neitamai dinin, ila ati arum Damsyik mutu neitamai di, er jen talen neng, sun akuna tep, akati arum pumbon wepra deipupa dakurami. Ukuramya tep nengeda, sun amutu nengda, nimi bon neng utopu kurami. Amutu tu deiki akuna tep, co bo cap, telep karena keca cap, sundi buluprapidi, apajak co bo dopra, Daud er damaipu kareryakarami. Tonda, Raja Dauddi, ‘Nimi yuk mutu neng porbenkuna tep, bena podan taru yuma capda, Allah Yahweh er putoda, Daud deiki deiamudi melimamupa, yuk mutu neng tep, portamnapu kuramu. Yuk mutu nengdi er Daud tep, yanipra bisbisa men kapmanto kurami.

7 Uda, Dauddi ange kupu dingeda, Raja Hadadezer poptapu taruda, Hadadezer er tara jen talena neng, sun taram damai lelipdongomi gat keca, er si perisai ada, kunumna pio weik keca, er si emas di keteneipi ngeda, adipapu doupra Yerusalem mutupu dubeu. 8 Ukupra dubeu dinin, ton bokra er Dauddi weikanun ton dopropu keca, urasin pio telep gat keca, er sida perunggu, dalupra dopropudi, Yerusalem mutu tamupra dubeu. Akeca perungguda, Hadadezerdi taleamu mutu butene, Tibhat mutu cap, Kun mutu cap neitamai di, akeca-keca yuma dopropu. Dopra Yerusalem mutu deiamupanen, amenda taruda, erdi deiamu mi, Raja Salomo, erdi agat keca, urasin pio telep keca perunggu yumada, taleamudi imam nengdi, sun buri tang me kuna tep keca, ila pala me mokon derinkamngai tep dopra ketekeiamu. Tonda, Allah er si eremna ati, ila gel di domu atida, ‘Akati dopkuna’ tep, ingameng keca ayumnya co tep nengeda, agat keca perunggu deiki di ketenepra deiamu. Tonda ange utopu, sun imam-imam nengdi, Allah Yahweh er si eremna ati bo di, pel dona tep keca ton, agat keca perunggu deiki di keteke deiamu.

9 Nimi deiyo ngebo Raja Tou, ada Siria tara neitamai dinin, mutu si Hamat mutu taleamu ngeboda, yuk nengdi, ‘Raja Daud, nun tara ngebo pona tep, Zoba mutu taleramu Raja Hadadezer cap, er jen talena neng cap poptapu. “Popra tapmange,” pepipa, Raja Dauddi aupu gekenmau. 10 Gekepu dingeda adipapu, er mi Yoram tep wepra deipupa, nimi deiyo ngebo Raja Daud damai yaudi, ‘Akupmarem ngeda, pio telepe,’ pena tep, er mipu wepra deipu. Akupunge deiyoda, Raja Hadadezerdi, angebo Raja Tou tep, sunda men di ton popdanamrei. Atep nengeda, “Dauddi konum Hadadezerda popra tapmare,” pepya tep, Raja Toudi, ‘Uo, angebo poptapmarum ngeda, pio telepe, pepkaman’ tenen, Raja Toudi er mi Yoram wepra dokotepu. Yoramda, Daud er damai yakanmau taruda, er tep ‘Telepe’ pena keca tep, telep karen kecada, kunumna weik gat keca emas cap, perak cap, perunggu cap, weika di doupra yaudi karepu.

11 Yoramdi adoupra yau keca yumada, Raja Dauddi adipapu Allah Yahweh er gispal dona cap, er si eremna cap tep, ‘Akeca yumada, Allah erngepu kunkamre’ tenen, adipapu Allah Yahweh tep karepu. Allah er si eremna ati neitamai, pel don taru kuna cap, akeca yumada, Allah tep karepu. Ange yuma doupra yana kareputopu, bung kecada, emas cap, perak cap, Raja Hadadezer damai di dalupra dopropu keca yuma cap, tonda erdi poptapu mutu yumada, Edom yala neng cap, Moab yala neng cap, Amon yala neng cap, Filistin yala neng cap, Amalek yala neng cap yuma, poptapu taru di, dalupra dopropu kecada, kunumna pio weik keca yumada, Allah er si eremna tep bena karepu.

12 Uda Daud er jen talena deiyo ngebo tenpu, er si Abisai, kuramu. Er ninda, Zeruya kuramu. Sun Edom yala neng, sun tara neitamai dinin, Asin mutu tara kurami nengda, denge weik, weik delapan belas ribu (18.000) neng poptapu. 13 Ukupu pangeda, adipapu nimi deiyo ngebo Raja Dauddi, Edom tara neitamaida, er jen talen neng kuna tep, akati arum pumbon wepra deipupa, dakurami. Ukuramya tep nengeda, sun amutu nengda, nimi bon neng kuna utopu kuramidi, amutu tu deiki kuna tep, co bo cap, telep karen keca cap, buluprapidi, pajak co bo karena utopu, Daud er damaipu kareryakarami. Ukuramipa, Edom mutu neitamai kurami neng yumadi, Raja Daud tepapu, amutara kepra kurami. Tonda, Raja Dauddi, ‘Nimi yuk mutu neng porbenkuna tep, bena podan taru yuma capda, Allah Yahweh er putoda, Daud deiki deiamudi melimamupa, yuk mutu neng tep, portamnapu kuramu. Yuk mutu nengdi, er Daud tep, yanipra bisbisa men kapmanto kurami.

14 Raja Dauddi ange yuma ukuramnga cadi, Raja Daud er dipapu, sun Israel nesala yumada, erdi taleamupa, sun teleppu dakurami. Tonda, er dipapu amutu neitamai yumada, kalengamupa, sun Israel nesalada, sun upu bongdina cap, lepsisikra pena cap, dumsisi kuna taru yuma tep, erdi telep upu periramupa, sun yumada telep kupra kurami. Ada, nimi urasin dina gum deiki di, ‘Sun yumada, ne amngaipu kununga cadi, dumsisi kupra, upu bokra bokeipkamne,’ teneramudi, ukuramu. 15 Raja Daud, er amutara kuramidi, nimi deiyo kepra kurami nengda ake. Anengda, nimi deiyo ngebo Raja Daud, erda ila deiki tara eremna neng tep, wepra deipu neng, sun sida ake. Jen talena neng, sun ila deiyo ngebo tenpu, er si Zeruyadi deiamu ngebo, er si Yoab wepra deipu. Daud er ati neitamai si sengna tep, sengna deiyo ngeboda, Ahilut er mi Yosafat wepra deipu. Utopu, sun imam-imam nengda, Ahitubdi deipu ngebo Zadok cap, tonda Abyatardi deiamu ngebo, er si Ahimelek cap, wepra deipu.

16 Utopu ton, akeca-keca pel doraminge cap, ukuraminge yuma cap, sengna tep, sengna deiyo ngebo sipen mutuda, ‘Angebo er si Sausa, erdi apel donkamre’ tenen, wepra deipu. 17 Tonda, er pe Raja Daud melipra embana cap, kalengna cap tep, jen talena ngeboda Yoyada, erdi deiamu ngebo Benaya wepra deipu. Angebo Benayada, Kereti mutu cap, Peleti mutu cap, kurami nesala tep taleamu. Atep nengeda, ila mambul pel pemerintahan deiyo talepra pel dona neng yumada, nimi deiyo ngebo Raja Daud, er pe nyapupu erepra deipupa, apel talepra dorami.