1Ch 19 | XteSC | STEP | Uda ukuramiyanen, ware kupra taru konum kupu pangeda, nimi deiyo ngebo Raja Nahasda, Amon mutu neitamai talepra kuramu ngebo depu. Depu pangeda, er mi Hanundi punupra nimi deiyo ngebo Raja kepu.

1 Chronicles 19

Dauddi Amon mutu nesala cap, Siria mutu nesala cap, poptapu upu

1 Uda ukuramiyanen, ware kupra taru konum kupu pangeda, nimi deiyo ngebo Raja Nahasda, Amon mutu neitamai talepra kuramu ngebo depu. Depu pangeda, er mi Hanundi punupra nimi deiyo ngebo Raja kepu. 2 Ukupka tep, Raja Dauddi upepu, “Men taruda, Raja Nahas erda, ne kabo sisa keamnemu. Nun buteneda, pio kikiman dukdongopra kuramnemu. Erda telep ngebo kuramudi, ne tep nengeda, teleppu teneramneu. Pio men tamamneu. Ange tep nengeda, ukutaru peda, ne adipapu Nahas er mi Hanunda, ‘Ne kabo sisa utopu kepnedi, er tep teleppu,’ tenepra kunkamne. Angebo melipnedi men tapkamne,” tenepudi pepu. Upepu dingeda, Raja Dauddi er melimna neng wepra deipupa, ‘Angebo Hanunda, er nai bo depka cadi, er dipru kwa dimkameng’ tenen, er melimna tep nimi ton wepra doproipupa bei.

3 Awepra deipmau neng, Amon mutu konum bei pangeda, amutu neitamai talepra kurami nimi deiyo neng yumadi, Raja Hanun tep upepi, “Nun deiyo ngebo Raja Hanun, kanda Raja Daud erdi wepra deipmardi dokotepmar neng tep nengeda, ‘Nun deiyo ngebo kan nai bo Nahas depmara tep, gispal dopra melimyanman neng ja,’ tenena gume,” pepi. “Tek sisi ngeda, Raja Daud er nyapu wepra deipmarpa, nun damai yanmange ngeda, amutu neitamaida, ware kupra kunung do,’ tenen, miryanmasenge. Sundi, ‘Amutu nesalada, ukupra-ukupra kununge,’ tenen, epmepedi, yana popmepedi, ‘Amutu dalupra dopropkamep’ tenen, kamo diryanmasenge,” pepi.

4 Upepipa, nimi deiyo ngebo Raja Hanundi, Daud wepra deipmaupa yanmai neng yumada, tomopu. Ukupra sun aneng bana potong, ton tara yumada, toupra tapu. Tonda, sun kenekami opkal der damai dipapu sekra tapu. Ukupu dingeda, sun aneng yuma tep, “Ukutaruda benkurume,” pepupa, tamupra bei. 5 Dauddi wepra deiamupa yanmai nengda, sun pe mutu tamupra banmai taruda, ali pio weik kupu. Ukupupa, yuk nengdi Daud damai bena lap pepipa, aupu gekepu dingeda, er Dauddi, “Sunda, Yerikho mutu kuramumpane, bana potong touptapsei ngeda, tamuprapkamserure,” peipu. Upeipka tep, gekepidi, sun anengda Yerikho mutu bei.

6 Sun Amon mutu nesaladi, akupinge moupra kael kepidi utenepi. ‘Gume, nun kupmapu ngeda, Raja Daud epmardi nun tep yu tenepmasere,’ tenepi. Utenepi ngeda, Raja Hanun cap, Amon yala neng cap, ‘Daud tep porbenkamepe,’ tenepidi, sundi kunumna weik gat keca perak, er ikinda tiga puluh empat ribu kilogram (34.000 kg) bulupra deipi. Ange deiyoda, kuda bisamdi gipra, nimi porbana tep, tu deiki embana keca, er si kereta kuda perang cap, tonda kuda bisam deiki bukra, mar porbanung jen talen neng cap, ‘Ange yuma kunupkamep’ tenen, kupi. Akeca ila di kael keami nimi podana neng, sun Mesopotamia tara kurami jen neng cap, tonda Maakha mutu kurami jen neng cap, Zoba mutu kurami jen neng capdi, yana melimyakana tep, bul kemna keca yana karepi. 7 Amon yala nesala talepra kurami yoneitam bari nimi deiyo nengdi, tiga puluh dua ribu (32.000) kereta perang kunupi. Tonda, Maakha mutu talepra kuramu ngebo tep, “Melipserume,” pepipa, er jen talena neng cap doupra yau. Yaudi, Medeba mutu damai yana, dodina ati er si tenda yana dopi. Tonda, Amon mutu neitamai kurami jen talena neng yumada, sun ati damai di bulupra tenpaipu wengyai.

8 Akunmai ngeda, yuk neng lap pepipa, Raja Daud gekepu. Gekepudi, er jen deiyo ngebo Yoab tep, “Kan cap, kan jen talena neng yuma cap, sun adipapu nun podan neng tep, mar porbenkurume,” pepu. 9 Sun Amon mutu jen talena neng yumada, bulupra yaidi, sun aila ati arum wengbana tep, ila bisi buplan damda, Raba mutu yaidi, ketenepra lepsisingmaidi tengmai. Dinino, sun yuk mutu nimi deiyo kepra talerami neng tep, “Sundi nun damai yana melipserume,” pepra, moropmai neng, sun jen talena neng yumada, tali bura tara katawaipu ketenepra lepsisingmaidi tengmai.

10 Ukunmai taruda, Yoabdi dindepkap, er urasin damai tara pe, amnyo tara pe, er podan neng dipapu, yan dekpepra ongopdongopmaipa epu. Epkopda, Yoabdi sun Israel jen talen neng neitamai di, mar podana pio telep kupra kael keami neng yumada, wepra deipudi, Siria mutu jen neng, sun urasin deipmaiya dam tarapu ketenepra deipupa, acapu bulupi. 11 Tonda, Yoabdi Israel jen talen neng, yuknge yumada bokrapudi, er weit bo Abisaitara ton karepu. Ukupupa, Abisai er gonga kemnada, Amon mutu jen talena neng, sun urasin keipmai tarapu ketenepra teki.

12 Yoabdi er weit bo Abisai tep upepu, “Ukupmanto, nedi sun Siria mutu jen talen neng bisbisa kamna tep, men kupmanto kupnedi, puto boun kupnere pangeda, kan adipapu yana melipkamnerume,” pepu. “Tonda utopu, ukupmanto, ne weit bo kan peda, Amon yala jen talen neng tep, men bisbisa kapmanto kupmemdi, puto boun kupkere pangeda, nedi kan tep, yana melipkamakene,” pepu. 13 Upepu dingeda, aupu ton pepu. “Nun yala nesala cap, tonda nun nai bo Allah Yahweh cap, er mawa mutu neitamai kure ati arum cap yuma tep, kware pio gum dipapu, balila deipra puto dipapu kunkamape. Ada, Allah Yahweh erdi, ‘Ukuptene,’ tenepmaretopu kurure. Atep ormutu neng porbenkupe, pepne,” pepu.

14 Upepkopda, Yoab cap, er jen talen neng cap, sun adipapu, ‘Siria mutu jen talen neng popkup’ tenen, sun damai porbei. Ukupipa, Siria mutu jen talen neng yumada, kware kupupa, bura saka, sepra bendopi. 15 Ataru dipapu utopu, sun Amon mutu jen neng peda dinmaipa, Siria mutu jen talena nengda, kware tep bura saka sepra banmaiya epi. Epyopda, sun Amon mutu jen neng peda, Abisai er dam di, bura saka sepdaro adipapu tamupra, ila ati arum dorami mutu neitamaipu bei. Ukupyoda, sun yumadi Amon mutu ila ati arum neitamai inipi. Ukupyopda, Yoab er cap, er jen talen neng yuma capda kange di tamupra, adipapu Yerusalem mutupu bei.

16 Siria mutu nengda, ‘Sun Israel yala nesaladi popbisipsenung’ tenen, kware kupupa, sun pe mutu tamupra bei. Bei dingeda, sundi moupra tenepidi kael kepi. ‘Gume, nunda konum popra gawal dakmanto kupmaseiya cadi, yuk mutu neng ton melipsetengepa, nundi Israel nesala popra bisbisa keptepe,’ tenepi. Ukupra tenepyopda, sun pe yala neng, Siria mutu yala jen talena neng dinin, karen mutu Efrat me duman, adinin orketeng yakan tamna kurami neng tep, ‘Yana melipseso,’ pepra moropi. Tonda, nimi deiyo kepra, Siria tara taleamu ngebo, Raja Hadadeser, er jen deiyo neng, sun deiyo ngebo er sida Sofak, er dipapu gonga kepra, ajen neng duyanmau.

17 Efrat mutu, itara kurami neng cap, sun Siria tara neng cap, kange di ton cap bulupra keteneipi taruda, nimi deiyo ngebo Raja Dauddi aupu gekepu. Aupu konum gekepu dingeda, Raja Daud adipapu er jen talena neng, Israel mutu neitamai kurami neng yuma tep, bulupra deipupa, sun adipapu Yordan me goupra ortara, keteng yakan tara porbei. Abei mutuda, sun Siria mutu jen neng peda, ‘Raja Daud cap, er jen neng cap, popdankamap’ tenen, sun lelepra tengmaidi, ketenemai. 18 Popdanen yakanmai dinino, Israel yala nesala, sun jen talena nengdi, Siria mutu jen talena neng weika di bena popropi. Daud cap, er jen neng cap, sundi, Siria mutu jen talena neng taleami kecada, tapu gerekdongopra gipropnepa, tu deiki emban keca, er sida kereta perang, akeca deiki tekra emban nengda, tujuh ribu (7.000) neng yuma popi. Tonda, sun pe yan deiki embanmai jen talen neng ton, empat puluh ribu (40.000) neng ton popi. Aponmaiyai dipapu, Siria tara neng, sun jen talena deiyo ngebo Sofak peda, Israel neng sun jen dokotepipa, mar di yarepra popya cadi, apodanmaiyai dipapu depu.

19 Ataruda, Hadadezerdi, ila nimi deiyo ngebo kepra taleamupa, er amutara nimi deiyo-deiyo kepra kurami neng cap, er tara jen talen neng yuma capda, Israel yala nesala jen neng dipapu popra sirya daki. Ukupi ngeda, sun Siria tara nesala yumadi konum gekepra kael kepi. Atep nengeda, sun Hadadezer amutara kurami nesala cap, deiyo-deiyo neng cap, sun yuma yaidi, Israel nesala tep, “Sun dipapu talepsemumpa, nun cap, sun cap antapra, nunda sun amutara tali dim pepra, telep kupra kikiman kunkamepe,” pepra, yana moropipa, amutu kurami nesala yumada, Israel nesala dipapu talepi. Talepya tep nengeda, Siria mutu nengdi ton cap balila di, sun Amon mutu nesala tep kange di ton cap pio men melimami. Sun yuk-yuk kepropidi dakurami.