1Ch 20 | XteSC | STEP | Ukupu keteng tamun neitamai, akeca-keca pangamredi kupne taruda, sun nimi deiyo neng Raja-Raja yumadi, ‘Nun podan tara neng porbenkup’ tenen, ketenemnunge. Israel mutu neitamai, ukurami taruda, Israel yala jen neng, sun deiyo ngebo Yoabdi, er jen talen neng yumada, ketenepra deipudi, doupra beu. Ukupu dingeda, Yoab cap, er jen neng capdi, Amon yala neng, sun kurami tara yumada, adipapu bena mar poramidi, mutu-mutu weik popra bisbisa kapi. Ukupudi amutu tu yuma cap, amutu ati arum dominge yuma cap, dalupra dopropi. Tonda, Amon yala nesala sun ila ati arumda Raba, ada sun mutu deiyoida, ‘Aneng poptapmepedi, sun mutu dopropkamep’ tenen, akati arum yuma warekra ongopdongopidi, ‘Amutu nesala yukai men benmanto’ tenen, akati arum damai bena dakunmai. Ataruda, Israel nesala ila nimi deiyo ngebo Raja Daudda, Yerusalem mutupu tupa akunmaua cadi, ataruda er cap kikiman men beu. Dinino, amenda taru er cap, er jen taleneng cap, sun buluprapidi, ormutu bena, Yoab cap, er jen talena neng cap, sun cap, adipapu Raba mutu neitamai warekra ongopdongopi. Ukupi dingeda, amutu neitamai kurami nesala yuma popidi, aneng yuma gum kupra deipi.

1 Chronicles 20

Raja Dauddi Raba mutu di dopropu upu

1 Ukupu keteng tamun neitamai, akeca-keca pangamredi kupne taruda, sun nimi deiyo neng Raja-Raja yumadi, ‘Nun podan tara neng porbenkup’ tenen, ketenemnunge. Israel mutu neitamai, ukurami taruda, Israel yala jen neng, sun deiyo ngebo Yoabdi, er jen talen neng yumada, ketenepra deipudi, doupra beu. Ukupu dingeda, Yoab cap, er jen neng capdi, Amon yala neng, sun kurami tara yumada, adipapu bena mar poramidi, mutu-mutu weik popra bisbisa kapi. Ukupudi amutu tu yuma cap, amutu ati arum dominge yuma cap, dalupra dopropi. Tonda, Amon yala nesala sun ila ati arumda Raba, ada sun mutu deiyoida, ‘Aneng poptapmepedi, sun mutu dopropkamep’ tenen, akati arum yuma warekra ongopdongopidi, ‘Amutu nesala yukai men benmanto’ tenen, akati arum damai bena dakunmai.

Ataruda, Israel nesala ila nimi deiyo ngebo Raja Daudda, Yerusalem mutupu tupa akunmaua cadi, ataruda er cap kikiman men beu. Dinino, amenda taru er cap, er jen taleneng cap, sun buluprapidi, ormutu bena, Yoab cap, er jen talena neng cap, sun cap, adipapu Raba mutu neitamai warekra ongopdongopi. Ukupi dingeda, amutu neitamai kurami nesala yuma popidi, aneng yuma gum kupra deipi.

2 Konum ukupi pangeda, nimi deiyo ngebo Raja Dauddi, Raba mutu neitamai kwamu keca yala-yala yumada, pio weika di yana dopropu. Abung keca yuma doronmaua neitamaida, ila mambul keca tenpu dopropu. Ada pio telep keca, kunumna weik keca emas di keteneipi keca dalupra dopropu. Akeca er sida mahkota, sun ila nimi deiyo ngebo Raja, er giso deiki deriramipa, er dipapu kenengamu. Atep, Dauddi, ‘Amutu nesala yuma, ne amutara kunkameng’ tenen, Amon yala neng, sun nimi deiyo ngebo kenengamu keca, mahkota ton dopropu. Amahkota er ikin ukupmantoda, 34 kilogram kwamu. Ada emas di keteneipi dinin, aneitamaida tenpu kunumna weik gel, er sida permata ton deipi. Amahkotada, er ikin weike, tonda er urasin pio telep kupra deiaminge kwamupa, Dauddi dopropu. Ukupu dingeda, adipapu Raja Daud er giso deiki keneku. Ataruda, Daud erdi amutu neitamai kwamu telep keca yala-yala yuma, pio weika di dalupra dopropu.

3 Utopu, Raja Daud erdi Raba mutu neitamai tupa gam kurami neng tep, ikin pel dipudi, angeda co sengna tep kecada, “Gergaji di ukupkuprumudi pel dopkurume,” peramudi pel dimau. “Tonda, tu palin keca, er si pikwel di palinkamarume. Tonda yayal di dongorameng ya, er si kapak di pel donkamarume,” pepra, ikin pel dimau. Ange peda, sun Amon yala neng, yuk mutu neng peda, Dauddi ange utopu kupupa, amutu-amutu neng yumadi, ikin pelpu pio dorami. Ange yuma konum kupra seng pepi dingeda, adipapu Raja Daud cap, er jen talen neng cap yumada, sun pe mutu Yerusalem mutu neitamaipu tamupra yai.

Israel yala nengdi, Filistin tara neng poptapidi, sun mutu deiki yanipi upu

4 Ange yuma konum kupi pangeda, ware kupra taru do, sun Israel nesala cap, Filistin nesala capda, mutu si Gezer mutu neitamai podarami. Apodarami taruda, Husa mutu ngebo er si Sibkai, erdi nong ila lyom weik ngebo cap, tonda er si Sipai, poptapu. Poptapupa depu. Sipaida, menop taru kurami neng, sun nong ila lyom weik nengdi deipipa, dadeipdanen yakarami nengdi, angebo ton deiami. Sun yuma podanmaiyanen, Israel nengdi poptanapu kupi pangeda, sun Filistin yala neng yumada, Raja Daud er amutarapu kurami.

5 Dakuramipanen, amenda yuk taruda, sun Israel yala neng cap, yuk mutu kurami Filistin yala neng cap, kange di ton cap podanmai. Podanmai taruda, tenpu ngebo er si Yair, erdi deiamu ngebo Elhanandi, yuk ngebo er si Lahmi poptapu. Angebo Lahmida, er du boda, Gat mutu ngebo tepa, ila lyom weik cap, puto weik cap kuramu ngebo, er si Goliat kuramu. Atep, Elhanandi, Gat yala ngebo Goliat, er weit bo sisa Lahmi poptapu. Goliatda, ila puto weik ngebo cadi, erdi taleamu nimi pon tembokda, ayumnya co utopu, ilange, ton ikin pio weiknge taleamu. Ukupmantoda, nimidi opkal bol er si kain lenan wirameng taru, pel donung co, urasin balok utopunge kwamu.

6 Utopu ton, yuk taru peda, Gat mutu neitamai mar podana ton podanmai. Apodanmai mutu neitamaida, tenpu ngebo er nong pio ila lyom ngebo ton akuramu. Angeboda, pumun dortaru dordi, er derinada ila lyom yala nengdi deiamipa, dadeipdanen yakaramyanen, yana deiami ngebo kuramu. Angebo, Gat mutu neitamai kuramu. Nong pio weik ngebo, er yan du cap, buru du capda, yuk-yuk ngangtan bari (6) di kwamu cadi, er buru cap, yan cap, dana-dana yumada, dua puluh empat (24) di kwamu. 7 Angebo, erda ila lyom ngebo, er Gat yala ngebodi, sun Israel nesala tep nalemau. Nalemaua cadi, nimi deiyo ngebo Raja Daud, er du bo sisa, er si Simea, erdi deiamu ngebo Yonatandi, aila lyom ngeboda poptapu.

8 Atep nengeda, nimi deiyo ngebo Raja Daud cap, er amutara jen talen neng capdi, nong ila lyom yala nengdi deiamipa, deipdanen yakarami yala neng, Gat mutu neitamai kurami yu nengda, sun yuma konum poptapipa deami.