1Ch 21 | XteSC | STEP | Isok-isok yuma, sun ila deiyo ngebo Seramkidi, ‘Sun Israel yala nesala yumada, ikin keca weik, sun nong deiki deipnedi, gum kupra deipkamne,’ tenepu. Utenepudi, Raja Daud er dipru neitamai di pel dopka deiki, Dauddi, ‘Israel yala nesala kankan di, ware kupra neng jen talena neng kunung do?’ tenepudi, ‘Israel yala nesala yuma tep, sun si nukrap, sun si sengna pel dopkupe,’ tenepu.

1 Chronicles 21

Dauddi nimi si nungna cap, si sengna cap tep, pel dopu upu

1 Isok-isok yuma, sun ila deiyo ngebo Seramkidi, ‘Sun Israel yala nesala yumada, ikin keca weik, sun nong deiki deipnedi, gum kupra deipkamne,’ tenepu. Utenepudi, Raja Daud er dipru neitamai di pel dopka deiki, Dauddi, ‘Israel yala nesala kankan di, ware kupra neng jen talena neng kunung do?’ tenepudi, ‘Israel yala nesala yuma tep, sun si nukrap, sun si sengna pel dopkupe,’ tenepu. 2 Utenepka tep, Raja Dauddi jen neng yuma, sun ila deiyo ngebo Yoab cap, er amutara kurami jen talena neng, gung yuk-yuk tep, deiyo kepra kurami neng cap tep, upepu. “Uku taruda, sun yumadi Israel yala nesala kunungai yumada, dapu tara mutu neitamai cap, tonda akati arum Bersyeba mutudi dipra, iknapi tara cap, nukra bamamumnyanen, itara mutu neitamai cap, Dan yala neng kunung mutu neitamai yumada, sun Israel nesala nukra, sun si sekamrume. Akupmumnya deiki di, ‘Israel mutu neitamai kunung nesala yumada, denge ware kupra kunung do?’ tenen, ne kael kepkamne,” Dauddi pepu.

3 Upepu dinino, Yoabdi Raja Daud tep upepu.

Telep ngeda ataru, ‘Allah Yahwehdi, telep kweipsetumdi, nun Israel nesalada, ton cap tapaksetupa, nun anesalada pio weik kuptepe,’ tenepne. Ne deiyo ngebo Raja, sun Israel nesala yumada, kandi talepmum nesala men kununga tep, ‘Nukune,’ tenepmum do? Gume naio, nun yumada, kan amutara kupedi, kan pelpu donkamepe. Ware deiyo keca tep, kandi nun tep, “Israel nesala nukra, si sengna pel doprumpa, ware kupra kunung do?’ tenen, kael kepkamane,” pepmaserem do? Uo naio, kandi apepmaserem si nungna pel dopmepe pangeda, mali kupkamepa tep, doryankamre taruda, nun deikipu ikin kecada yarepa, menengada dopropkamepe. Yoabdi pepu. 4 Yoabdi upepu dinin, Raja Dauddi ton men gekepka tep, erdi, “Ukuprume,” peipmautopu, Yoabdi apeipmautopu kuprapudi, er cap, er amutara deiyo neng cap, sun Israel yala nesala kurami mutu embeidi, sun amutu-amutu kurami nesala yuma, nukra kael kemna tep, si sengna pel dopi. Konum dopyopda, tamupra Yerusalem mutupu yai.

5 Ukupkopda, Yoabdi Raja Daud dam yaudi, sun Israel tara kurami nesala neitamai di, jen talepra nimi porbenmanto du neng dengeda, satu milyar, seratus ribu (1.100.000) neng kepi. Tonda, sun Yehuda tara kurami nesala neitamai di, jen talepmanto neng dengeda, empat ratus tujuh puluh ribu (470.000) neng kepi. Ange yumada, Raja Daud er damai yan lap pepu. 6 Dinino, Israel yala nesala si sengna pel donmau taruda, Lewi yala kurami neng cap, Benjamin yala kurami neng cap, sunda men nuku. Ayala butene men nukunge deiyoda, Yoabdi, ayala neng kunung mutu neitamaida, Raja Dauddi, ‘Nimi nukra, si sengna pel dopkamnerume,’ pepneu ngeda, ne kware. Nedi sun si nukra, men si sekamane. Angeda, pio mali kun keca cadi, angeda ne pio songe,’ tenepudi, ayala neng, men nukudi, sun si men seku.

7 Dinino, Dauddi, ‘Animi nungna cap, si sengna cap pel dopkurume,’ peipupa, apel dopi ngeda, Allahdi kange men deipu cadi, Allah erdi sun Israel nesala yuma tep wenepudi, ikin keca sun nong deiki deipu. 8 Wenepudi ikin keca karepu pangeda, Raja Dauddi Allah tep moropudi upepu, “Uo, ne nai Allah, anesala nukmana deiki di, tek sisi ila mali keca kupmane. Neda walwal ngebo cadi, nedi mali kupmane. Ne nai, kan damai mali kupmana tep, ne wenemna tep tali lupra poptapnetum dinin, ne mali kupmasi ngeda, kandi kau kepnetumdi, ange gum kupra deipnetume’ tenen, moropkene,” pepra moropu.

9 Upepra moropu pangeda, Allahdi Raja Daud damai upu pedina tep nengeda, nabi ngebo er si Gad, er damai yana, upu pepra deipu. 10 Allahdi anabi ngebo Gad tep pepra deipu upuda ake. “Kanda Raja Daud er damai bememdi, er tep upepkurume. ‘Daud, ne Allahdi deiyo weneri keca karepkamken’ tenen, keteneipmane. Atep akarepkamaken kecada, Daud kandi, ‘Ne deikida, angepu karepnerepa, dopropkamane,’ peprengepu karepkamana tep, kandi bena pepmempa, ‘Angepu dopropkamane.’ Tonda apeprem ngepu, yana peipkunerume,” Allahdi nabi ngebo Gad tep peipupa, lap perbeu. 11 Nabi Gad, adipapu Daud damai yaudi, Allahdi pepra deipmau upuda, Raja Daud er damai yana pepu. Aupuda ake. “Daudda, Allah Yahwehdi kan damai yankamaker ikin kecada, weneri akapmarenge neitamaida, waretonge yakerepa, tenpu deiyongepu doropkamarem do?” pepra, bena asipetepu.

12 Tonda, aupu pepu. “Uda ukupmantoda, aikin keca weneri ketenepmarnge neitamaida, tenpu ngepu wepkurume. Amutu neitamai, Allahdi ukupkamara tep, ketenepmar kecada ake. Tenpu ngeda, ‘Keteng tamun weneri neitamaida, ila jen putanange ton karepkamne,’ tenepmare. Butene ngeda, ne deiyo ngebo Raja, kan tep nengeda, ware weneri neitamaida kan podan nengdi, ‘Israel nesala popkup’ tenen, domnapu kukengedi, kan tara neng weika di ponkamenge,’ tenepmare. Allahdi ange ton ketenepmare. Tonda, weneri ngeda ake. Ada, ‘Amutu neitamai, ila kange mun pu jena deiyo keca, tumi weneri deiki karepnepa, dena deiyo keca talena malaikatdi, amutu neitamai yuma doupra embarepa, Israel nesala poprepa, weikanun ton denkameng’ tenen, ketenepmare.

Atep, ne deiyo ngebo Raja, kandi, ‘Ne damaida, angepu yanerepa, doropkamane,’ tenepmem ngeda, kandi, ‘Angepu dopropkamane,’ pepmem pangeda, nedi Allah er damai adipapu bena, lap pepkune,” pepra, nabi Gaddi yana lap pepu. 13 Upepupa, Raja Daud erdi tamupra pepu. “Uo, ange pepmanerema tep nengeda, ne pio kange mun kupnere. Dinino, ne kangeda, tuai nimidi ikin keca dopra, ne deiki derinada, ne pio songe. Atep, pio telep ngeda, Allah Yahweh, er pedipapu ne deiki ikin keca deipnetupa, doproptene. Ada, ne nai bo Allah Yahweh, nun tuai nesala tep, ila di bicau teneserur ngebo kurura tep pepne,” Dauddi, nabi Gad tep pepu.

14 Upepu pangeda, Allah Yahwehdi ila kange mun pu deiyo keca karepu. Ada, ton ngebo pu jenmaryanen, depre pangeda, kange di, ton ngebo cap beneprepa, pu jenmaryanen, yuk neng deiki ton sakrorepa, weika di depi. Allahdi nimi dena deiyo pu, ila kange mun nge karepupa, Israel nesala yuma, ila pu jenapu kuramu. Apu jenmau taru neitamai di, denmai nesala dengeda, tujuh puluh ribu (70.000) neng depi.

15 Tonda, Allahdi, ‘Yerusalem mutu nesala popra gawal dakamne,’ tenepudi, er pel amutara dona ngebo, nimi popmanto malaikat wepra deipupa, Yerusalem mutu neitamai kurami nesala poryakana tep yau. Dinino, amalaikat yana, keteneipu taru neitamai di, gandum yaniramidi, du telepnge wena cap, dorona cap tep, pel doramyaida, ada Yebus mutu ngebo er si Arauna, er kuramngai di, ‘Nimi popkun’ tenen, malaikat di konum keteneipu. Ukupu taruda, Allah Yahwehdi, kange di ton cap tenipterepudi, ‘Uo, Yerusalem mutu kunge nesala yuma popra gawal dakun,’ tenepmanada, yapnedi men kupkune,’ tenepu.

Utenepudi, er pel dona malaikat tep, “Ukuna gume, yapkurume. Aceipu deipkurume,” pepra upu seku. ‘Amutu neitamai yumada, konum gum kupra deipkamane,’ tenepmau kange yumada, adipapu tapu. Ukupudi, upu peipupa, amalaikat gekepudi, yapropu. Nimi ton cap men poptapu.

16 Ataru dipapu, nimi deiyo ngebo Raja Dauddi, dindeupa, ‘Israel yala neng, ila ati arum dominge Yerusalem mutu neitamai kurami nesala yuma popkun’ tenen, yakau malaikatda, tuai dukwapne, im dikwapne neitamaida, lakra yakaudi, nimi pona tep yu parang ya doupra, yakaupa epu. Ukupupa, Dauddi epkopda, Dauddi amutu neitamai kurami nesala tep, yuk-yuk deiyo kepra talerami neng, sun tep pepupa, sun yumadi mali karung di wiami opkal keprapidi, “Uo, nun mali kupmapa cadi, popkusera tepa,” pepra, mali kange doupidi, tu deiki saka mapi.

17 Ukupyopda, Daudda Allah morona deiki di, aupu pepu. “Uo, ne nai Allah Yahweh, mali kupman ngeboda, neke. Nedi Israel mutu kunung nesala yuma tep, ‘Sun si sengna pel dopmumpa, nukra pepnerumnyopda, kael kepkamane,” pepsipa, pel dopi. Sun amutu kunung nesaladi angeda men kupi. Tonda, sundi mali men kupye. Ne puda mali kuna deiyo ngebo kunune. Atep, ne nai bo Allah, kan sipu eremkenune. Kanda Allah Yahweh, kandi ne apu yapu, sundi deiami neng cap, ne cap, ne nyapsilip cap, nun damaipu ikin keca deipsememdi wenepseo. Tonda, kan nyapu amutu neitamai kunung nesala, sun deikida, ila ikin keca, kange mun pu deipmarem ngeda, tapkurume naio,” pepra moropu.

Allahdi peipupa, Raja Dauddi Allah karena tep, mesba keteneipu upu

18 Amenda taruda, Allah er pel dona ngebo malaikatdi, nimi deiyo ngebo Raja Daud perbana tep, pepu. “Kanda nabi Gad, adipapu Raja Daud er damai bena aupu peipkurume. Ada ake. ‘Raja Daud kanda adipapu tenpu ngebo er si Aruana, er gandum du taingna cap, du telepnge wena cap tep, pel dorurai bememdi, Allah er si eremna cap, er karena cap tep keca, pala gel dopra yakra deipmemdi, mesba dopra deipkurume,’ upepra lap peipkurume. Allahdi er malaikat tep, “Ukupkurume,” pepu. 19 Upepupa, Allah er pel don ngebo malaikatdi, nabi Gad damai bena, aupu pepra deipupa, er Gaddi Raja Daud damai yana lap pepupa, aupu gekeprapudi adipapu beu. Ada, nabi Gaddi peipmautopu, Daudda, angepu ukupu. 20 Ataruda, ange bo er si Aruana cap, er nyapu dumbari neng cap, sun gandum du taingna pel donai, pel donmaipanen, Allah er malaikat sun damai yau pangeda, Aruana epu. Epkopda, apelpu tupa apelpu donmau. Bukni, er nyapu dumbari epi dingeda, ‘Uo, Malaikatdi nun poptapkuser’ tenen, kware kupupa, sundi bura saka sepra inimbei.

21 Atarupuda, angebo Aruanadi dinmaupa, nimi deiyo ngebo Raja Daud yakanmauanen, Arauna er damai banmaupa epu. Epu dingeda, ‘Uo ne deiyo ngebo Raja, ne damai yanmanera tep, gispal dopkun’ tenen, er adipapu Raja Daud damai tu deiki bena mapudi gispal dopu. 22 Konum gispal dopu pangeda, Raja Dauddi Aruana tep moropudi pepu. “Kan gandum du taingna cap, telepnge wena cap tep, pel dorumaida, nedi ‘Kunupkaman’ tenen, yanmane. Atep aca tu kunumna tep nengeda, ware kupra pepra moropkamanerem do? Kandi tenepmemtopu, ange yuma karepkukene,” pepra moropu. “Atu kunupnedi, ne adipapu Allah Yahweh er gispal dona cap, er karena cap tep, telep keca karepmengepa, uku dongonai dopra deipkamne. Ukupnepa, ila kange mun pu jenmaredi, Israel neng denmanga ngeda, adipapu dim pepkamare,” pepu.

23 Upepupa, Araunadi Daud tep aupu pepu. “Gume ne nai Rajao, nedi akupra tamnun ngeda, kandi, ‘Angeda telepe,’ tenepmem ngeda, tali lupra dopropmemdi, Allah tep karepkurume. Tonda, kandi Allah karena tep, popra uku dongona tep, ne sapi bisamda, aca damai kunmangeda, ketenepra karepkukene. Tonda, asapi popra uku dongona tep, uku coda gandum du ^{▼▼gandum du – Gandum du taikra kareami ngeda, Allahdi, ‘Ukupkamrume,’ peiamutopu, Allah er karena tep, yapi keca porami taru yumada, tu kecada dempu men karerami. Tu keca cap, tonda gandum du ton cap, ange taikra keteneamidi, tu keca cap, gandum cap tapakra karerami. Aupu deiyoda, aca dinkurume: Keluaran 2.28-41; Imamat 2.1-16; Bilangan 15.1-10} telepnge wena tep kunedi, ketenepra deipsi co cap, co lasi cap, ange dipapu karepkenepa, uku dongopkurume. Tonda, Allah karena tep, gandum du ton aca wepra deipman ngeda, dopropmemdi, Allah tep amesba deiki karepkurume. Tonda, akupkumemnge yuma tep, ne deiyo ngebo kandi co bo men kunupkurume. Akeca-keca yumada, kunumna gum dipapu, ne kange deipra tali tep karepkene,” pepu.

24 Araunadi Daud tep aupu pepu dinino, nimi deiyo ngebo Raja Daud erdi tamupra upepu. “Gume, kandi angeda ukuna gume. Akeca-keca yumada, kunumna gum dipapu tali tep men karepkunerume. Kan keca yumada, yuk nengdi, co bo weika di kunuptenga utopu, nedi ange utopu karepkenedi, kunupkamakene. Nedi Allah Yahweh er gispal dona cap, karena cap tep nengeda, kan pe kecapu tali lupra dopropnedi, Allah tep men kareptene. Atep, tali men karepkunerume. Nedi kunumna keca karena gum, ikin men kupnere dipapu, tali Kange deipra tali karepnetum keca dopra, ne nai bo Allah Yahweh tep men karepmanto,” Dauddi angebo Arauna tep pepu. 25 Raja Dauddi upepka tep nengeda, erdi angebo Arauna tep, er gandum du taingna cap, wena cap tep, pel doramngai yuma dorona tep, kunumna weik gat keca, er si emasda, denge pio weik enam ratus (600) dopra karepka deiki di, atu kunupu. Akarepu emas keca er ikinda, tujuh kilo (7 kg) kupka cadi, er kunumnada pio weike.

26 Dauddi atu cap, akeca yuma cap, konum kunupra seng pepu dingeda, Allah Yahweh er gispal dona cap, er karena cap tep, ila pala gel taplakra yakra deipudi, yapi keca popra uku dongoryakanai, er si mesba keteneipu. Keteneipu dingeda, asapi bisam poprapudi, ‘Allahdi ne mali kun keca daepkamner’ tenen, uku sekudi, asapi bisam galemnada, uku dongopupa, uku di jepropu. Aukuda, Daud er dipapu men seku. Dauddi, Allah tep moropu pangeda, Allah im deiki di uku bu dokotepupa, amesba deiki ketenepra deipmau co cap, asapi galemna cap, uku di yana, jepra gawal dakropu. Ukupra jepropu. Ukupudi agandum duda, Allah tep karepu. Ada, ‘Allah cap, ne cap, telep kupra antapnemedi, kikiman kunkamnem’ tenen, akeca ton karepu.

27 Akeca-keca yuma konum karepkopda, Allah Yahwehdi, er pel don malaikat tep pepu. “Kanda, kan dopra keteneipmarem yu parang ya, nimi pona tep yu ya kange di, er kin keca kipdongopkurume,” pepu. Upepupa, Allahdi peputopu, animi pon ya doupmau ngeda, tamupra er kin keca pumbon kipdongopu. Ada, ‘Er parang ya er kinai dongopyopda, ila kange mun pu karenmaupanen, Israel nesala weika di denmang ngeda, ange yuma dim pepkamre’ tenen, aupu pepu. 28 Ataruda, Raja Dauddi ange yuma epudi kael kepu. Ada, ‘Gume, Yebus yala ngebo er si Aruana, er gandum du telepnge wena tep keteneipu tu, acapu kunmane taru neitamai di, ne nai bo Allah Yahwehdi, ne moropmanu keca konum karepmanere,’ tenepudi kael kepu. Atep nengeda, Allah er gispal dona cap, er karena cap tep, Dauddi akeca-keca yuma konum kange deipra karepra sengpepu.

29 Uda, sun Israel nesalada, ila katawai mutu tali embarami taruda, Musadi, “Ukupra keteneipkurume, Allah er si eremna tep, lyom opkal bol di keana dodin tenda ati dopmumdi, deipkurume,” pepra deiamutopu, ange konum akwamu. Dauddi apel dopu taru neitamaida, Allah er si eremna ati, adodin tenda atida, yuk mutu dup deiki deiamipa dakwamu. Ange utopu, Allah er gispal dona cap, karena cap tep, gel pala yakra deiami keca, er si mesbada, ange peda Gibeon mutu neitamai dinin, tenpu mutu dup deiki kwamu. 30 Amesba cap, Allah er si eremna tep, lyom opkal bol di, keana dodin tenda ati keteneipi ngeda, Gibeon mutu dup deiki konum akwapu dinin, Daudda, ‘Gume, akecada, pio lengna keca cadi, nedi akeca damai tek sisi men betene,’ tenepudi, kware weik kuramu. Deiyoda, ‘Akeca damai tali lupra benyopda, Allah er pel dona malaikat doure yu parang ya di, poptapnerur’ tenen, kware weik kupu.