1Ch 22 | XteSC | STEP | Ataru dipapu nimi deiyo ngebo Raja Dauddi, “Nun nai bo Allah, er sipu eremnup ngeboda, Allah Yahweh kurure. Acapu, er si eremna cap, er karena cap tep atida dopkamepe. Tonda, nun Israel yala nengdi, ‘Allahda nun mali kunup keca kaukepra daepredi, gum kupra deipkamser’ tenen, gel pala doupra, taplakra yakra deipmepedi, mesba dopkamepe. Dopmepyopda, akeca deiki uku sekmepedi, gam keca popra, uku dongopmepepa, uku jepkamra deiki di, Allah tep karenkamepe,” pepu.

1 Chronicles 22

Allah Yahweh er ati dopkamya tep, ketenemami upu

1 Ataru dipapu nimi deiyo ngebo Raja Dauddi, “Nun nai bo Allah, er sipu eremnup ngeboda, Allah Yahweh kurure. Acapu, er si eremna cap, er karena cap tep atida dopkamepe. Tonda, nun Israel yala nengdi, ‘Allahda nun mali kunup keca kaukepra daepredi, gum kupra deipkamser’ tenen, gel pala doupra, taplakra yakra deipmepedi, mesba dopkamepe. Dopmepyopda, akeca deiki uku sekmepedi, gam keca popra, uku dongopmepepa, uku jepkamra deiki di, Allah tep karenkamepe,” pepu. 2 Atep nengeda, nimi deiyo ngebo Raja Dauddi, “Sun yuk mutu neng, nimi bon neng kurum dinin, Israel mutu neitamai kumum nengda, bulupkurume,” pepu. Upepu dingeda, “Pel donkurume,” pepra, pel karepu. Ukupra pel dipudi, ton nengda, ‘Gat keca besi di, urasin telep gel sekmengepa, urasin pio telep kupyopda, Allah Yahweh er si eremna tep ati dopkameng’ tenen, yuk neng ton wepra deipu.

3 Upepu dingeda, Raja Dauddi Allah Yahweh er ati dona tep, adipapu gat keca, er si besi weika di ketenepra deipu. Angeda, ‘Akati co talena tep keca, er si paku cap, tonda buplan pangna tep, buplan dana tara talena tep keca, er si ensel cap, ange yumada, pio weika di ketenepra deipkameng’ tenen, besi keca deipu. Tonda, er adipapu yuk yala gat keca er si tembaga, pio weika di ketenepra deipupa, nimi yumadi er ikin weik tep men nukmanto kupi. 4 Tonda, sun karen mutu, ada itara Tirus mutu neng cap, Sidon mutu neng capdi, urasin telep gat co er sida, cemara co pio weika di doupra Daud damai duyanami. Ange tep, Dauddi, cemara co deiyo men nukmanto kupra, ketenepra deipu.

5 Raja Daud tenepudi kupunge deiyoda ake. ‘Gume, Allah Yahweh er si eremna ati dona tep, putapkamre keca yumada, ne adipapu ketenepra deipkamne,’ tenepu. Utenepudi pepu. “Akeca ketenepra derinmana deiyoda, ake. Ne mi Salomo erda, ukupu ngebo kurura tep, akati utopunge kapul men doramnga cadi, er pel dona tep nengeda, yambul weika di men tenerura tepa. Amenda taru Allah Yahweh er ati amenda dopkamre ngeda, urasin pio telep-telep kupkamre. Ukuprepa, ila mutu ban-ban yuma kunge nesala yuma epmengedi, ‘Uo, akatida urasin pio telep kurura cadi, yuk mutu neitamaida, akati utopunge ton pio men kurure. Akatida, aceida ake, ange pua,’ tenenkamenge. Atep, ne Raja Daud men depmane taru dipapu, ati don keca yumada, pio telepngepu ketenepra deipkamne,” pepu. Upeputopu, Daud kapul men depu taru neitamai yumada, akati dona tep pio telep keca ketenepra deiamu.

6 Uda, Raja Daud erdi deiamu ngebo Salomo tep, kongpepu. Kongpepudi, “Nun Israel nesala melimrur Allah tep, kan Salomodi adipapu Allah Yahweh er si eremna cap, gispal dona cap tep ati dopkurume,” pepra deipu. 7 Upepu dingeda, aupu ton pepu. “Ne mio, men taruda, ne pe tenepsidi, ‘Ne nai bo Allah Yahweh er si eremnun Allah tep, er si eremna ati, pio telepnge dopkamne. Angedi er si tep ila di gispal donkamne,’ teneramsidi keteneipsi.

8 Keteneipsi dinino, Allah Yahwehdi ne tep upepneu upuda ake. ‘Kan Daudda, nimi porbana gonga kepmumdi, jen talena puto weik ngebo kuramuma cadi, nimi pio weika di konum popmume. Yuk mutu nesala tep, nimi mar porbanapu kuramume. Ne dinai di nimi weik popmumpa, sun yapi weik embaramupa diramsi. Ange tep nengeda, kandi ne si eremna cap, gispal dona cap tep atida, pio men dopnetume,’ pepneu. 9 Dinino, pio tek sisi kupkamken ngeda, ake. Kandi sal mi deipkamrume. Angeboda, pio bouna di dim pepra kuna ngebo kunkamre. Erda yuk neng cap yu kuprepa, men podankamre. Tonda, ne Allahdi er tep pio melipnepa, er tep mar pona nengda, dana-dana tara mutu nengda, er damai men poryakankamenge. Ange kupkamrenge deiyoda, er si Salomo ^{▼▼Salomo – Aupu Salomo peraminge deiyoda, sun Ibrani upu deiki di, nimi podana gum dipapu, pio bouna di yuk neng cap, telep kupra kikiman kuna tep nengeda, ‘Salem’ perami. Atep, angebo er si ‘Salomo’ peramya cap, ‘Salem’ peramya capda, er gekena yambulanun utopu kwamnga cadi, angebo er sida ‘Salomo peramu.} penkamenge. Tonda, ne Allahdi karepnepa, kan mi Salomodi, deiyo kepra Israel nesala talenkamre taru neitamai yumada, er dipapu upu peramrepa kunkamenge. Tonda, ne Allahdi karepnepa, dana-dana tara kunge nesala cap, Israel nesala cap, mar podana gum dipapu, bouna di telep kupra kikiman kunkamenge. Salomodi talepra upu penkamre taru yumada, podana gum di, dim pepra kunkamenge.

10 Atep, kandi deipkamrem ngebo Salomo, er dipapu ne si eremna tep, pio telep ati dopkamnere. Angebo Salomopu, ne mi sisa utopu kunkamnere. Ne Allahda, er nai bo sisa utopu kunkamne. Ukupnedi, Salomo erdi deiyo kepra, Israel nesala talepredi, er upu penkamre taruda, nedi er puto kemna deiyo keca, er deiki deipnepa, erdi deiprepa, dadeipdanen bankameng neng neitamai di, er tara neng, ne mawa neng, sun Israel nesalada, pio tep talengedi, nimi deiyo kepra Raja neng kunkamenge. Er gerekdanen bangedi, sun dadeipdanen bankameng Israel nesala deikipu pio tep, ne puto sun deiki derinkamne. Allahdi menop taru aupu peipneu.” Dauddi er mi Salomo tep pepu.

11 Raja Dauddi, aupu pepu dingeda, aupu ton dukdongopra Salomo tep pepu. “Atep ukutaruda, kan ne mi Salomo, ne putapnerepa, kan tep Allah moronkamken ngeda ake. Ada, ukutaru di dipra dorkunkamrem taruda, Allah Yahweh er cap, kikiman kurerumudi pel don kamreru taruda, erdi melimkerepa, pio kunkamrerume. Ukupkeryopda, Allah Yahwehdi melimkerepa, kandi kan nai bo Allah Yahweh, er si eremna ati telep kupra donkamrume. Ada, ‘Allah er pe dipapu, pedina upu deiki di peiamutopu dopmempa, akatida nong tek sisi kupkamre’ tenen, moronkamne. 12 Tonda, kan nai bo sisa Allah Yahweh, erdi kan tep, ila kael kemna deiyo keca cap, tonda ‘Angebo kuna telep keca cap, tonda angeda mali kun keca, betapra tenena deiyo keca cap yumada, kan deikipu deipkerepa, sun Israel yala nesala kunung mutu cap, Israel yala nesala yuma cap talepra kumemdi, upu penkamrum taru yumada, Allah er upupu moupra talepmemdi, angepu kupbankamrume. Ada, kandi er si eremrum Allah, Yahwehdi, ‘Ange kupkamrume, angeda pio men kupkamrume,’ pepra deiamseu upupu, ‘Kandi aupupu moupra talepmemdi, kunkamrum’ tenen, nedi pepkene.

13 Allah Yahwehdi, ‘Angeda kunkamrume. Angeda pio men kunkamrume,’ pepra, deipu upu cap, ‘Telep kunada ake, mali kuna ngeda ake,’ pepra deipudi, ‘Ukunkamrume-ukunkamrume,’ peipu upu yuma cap tep, pio moupra tenepmemdi, angepu kupmemnyopda, kan kupkamrum keca yumada, telep kupra nong kupkamre. Aupu yumada, Allah Yahwehdi Musa tep, ‘Sun Israel nesala kunkameng ngeda, ‘Angeda kunkamenge, angeda pio men kunkamenge,’ pepra, deiamu upu tep pepkene. Allahdi apeiamu upu moupra tenepmemnyopda, kan kwar pio men kunkamkere. Puto weik kunkamrume. Tonda, ware ikin keca tep do yuma, kandi kware tenena cap, uo tenena capda, pio men kunkamkere. Puto kepmemdi, telep kupra pel donkamrume. Kware pio men kunkamkere.

14 Allah Yahweh er ati dona cap, akati neitamai derinkamrum keca cap tep nengeda, ikin kupneua peda, ne Dauddi pio tek sisi pe deipra, telep keca weik ketenepra deipsi. Ada, emas er ikinda, denge pio weik, tiga ribu empat ratus ton (3.4000) bulupra deiamsi. Tonda, kunumna weik gat keca er si perak, er ikinda denge pio weik, tiga puluh empat ribu (34.000) ton konum ketenepra deiamsi. Ton yuk gat kecada, perunggu cap, besi capda, akeca ikinda denge pio weik, men nukmanto weika di ketenepra deiamsi. Tonda, pio urasin telep gat co cap, urasin telep gel cap yumada, nedi konum weika di ketenepra deiamsi. Dinino, kandi ton cap tapakra derinkamrume. Akeca yumada, Allah er si eremna ati dona tep, ketenepra derinkamrume.

15 Tonda, akati pel dona tep ila kael nengda, pio weik kununge. Ada, gel urasin telep kuna tep, besi keca di gel sengna kael neng cap, tonda gel ati dona kael neng cap, co deiki deipra ati dona ila kael neng cap, tonda yuk urasin telep keca ketenepra derina ila kael neng cap, apel yala-yala yumada, ila kael nengpu kununge. 16 Tonda, apel-apel yuma ila kael keami nengdi, kunumna weik gat keca emas cap, perak cap, tembaga cap, tonda gat keca er si besi cap, ange yuma deiki di, urasin pio telep keca ketenepra deipmanto ila kael nengda, pio men nukmanto weike konum akununge. Atep nengeda, Allah er si eremna ati dona pelda, menmena pel gonga kepra donkamrume. Apel donkamrum taru neitamai yumada, Allah Yahweh er pe dipapu melimkeredi, kikiman kunkamrume.

Raja Dauddi, er mi Salomo tep pepu.

17 Upepu pangeda, nimi deiyo ngebo Raja Daud, erdi Israel mutu neitamai talepra kurami nimi deiyo neng yuma tep, ‘Ne mi Salomo melimkamrume,’ pepra deipupa, sun yumadi Salomo tep melipra pel dorami. 18 Tonda, akati pel gonga kepra dopkoi taruda, Dauddi sun Israel yala nesala yuma tep upepu.” Tek sisi pepsene. Sun nai bo Allah tep, sundi er si eremrum Allah Yahwehda, sun Israel nesala tep konum pio melimserure. Allahdi puto kareamneua deiki di, nedi gonga kepra, nun cap dana-dana tara kunung nesala cap, nun podan neng yumada, konum porbenamupka deiki di, aneng yala-yala yuma konum bisbisa kapra gawal dakmepu. Atep ukutaruda, sun cap, yuk yala neng yuma cap, podana gum dipapu, telep kupra bouna dipu dim pepra kurume. Allah er buru deiki di, amutu neitamai yumada, antapra deipseudi, konum telep kupra deipseudi kurure. Tonda, amutu yuma cap, amutu neitamai kurami nesala yuma capda, Allah Yahweh cap, erdi wepra deiamseu Israel nesala yumada, konum amutara kepra deipu.

19 Atep ukutaruda, sun nong cap, sun kange dipru cap yumadi, Allah Yahweh nun Israel neng melimserur Allah tep, pio pe deipra, piripra kurumudi, ‘Allah er upupu moupra talenkamepe. Erdi tenesere ngepu kunkamepe’ tenen, Allah damaipu kunkamrume. Sundi si eremrum Allah tep, enapu kunkamrume. Ukupra kumum dingeda, adipapu gonga kepra, pio telep lengnai, Allah Yahweh er si eremna ati donkamrume. Ukupmum pangeda, menop taru Allah Yahwehdi, ‘Angeda kunkamrume, angeda pio men kunkamrume,’ pepra deiamseudi, aupu sekra karepupa, Peti Perjanjian co bekin pumbon deipi keca cap, tonda, er si eremna ati pumbon pel don keca, pio telep lengna keca yuma capda, sun imam nengdi akeca yuma dopra, Allah Yahweh er si eremna ati neitamai wekmengedi, deipkamenge. Akati dopkamrumada, nun nai bo Allah Yahweh, er si eremna tep, dopkamrume.

Raja Dauddi sun Israel yala nesala yuma cap, sun deiyo-deiyo neng cap tep pepu.