1Ch 23 | XteSC | STEP | Raja Daud konum wisi deipu taruda, erdi deiamu ngebo Salomo dopra, ‘Sun Israel yala neng nimi deiyo ngebo kuna tep punupneredi, Raja kunkamre’ tenen, erepra deipu.

1 Chronicles 23

Lewi yala neng pel dona tep, seki upu

1 Raja Daud konum wisi deipu taruda, erdi deiamu ngebo Salomo dopra, ‘Sun Israel yala neng nimi deiyo ngebo kuna tep punupneredi, Raja kunkamre’ tenen, erepra deipu.

2 Ange konum kupyopda, nimi deiyo ngebo Raja Dauddi, sun Israel mutu neitamai taleami nimi deiyo neng yuma cap, sun Allah si eremna ati pumbon pel dorami neng, imam-imam neng cap, sun yuk Lewi yala neng cap, aneng yuma bulupra deipu. 3 Lewi yala nesala yuma bulupra deipu dingeda, Raja Dauddi sun nena tep, keteng tamun denge tiga puluh (30) tahun di, deiki tara keamne neng tep, yuk-yuk wepra nuku. ALewi yala nesala yuma nukunge er dengeda, pio weik tiga puluh delapan ribu (38.000) neng kupu.

4 Sun Lewi yala neng nuku dingeda, sun anengdi wilipra, dua puluh empat ribu (24.000) neng ton wepra, Allah Yahweh er si eremna ati neitamai talepra, pel dona tep deiyo neng kepra deipu. Tonda, aLewi yala neng yuma kan-kan di, yuk gung ton wepra deipupa, sunda enam ribu neng (6.000) kupu. Anengda, akati deiyo neng kunkamenge. Ton nengda, nimi upu bongderina deiyo neng kunkamenge. ‘Apel talepra Allah si eremna ati pel don neng kunkameng’ tenen, wepra deipu.

5 Tonda, aLewi yala neng kan-kan dipu, ton gung wepra deipu ngeda, empat ribu neng (4.000) kupu. ‘Anengda, Allah er si eremna ati wengbana tep bisi buplan dam kalengna deiyo neng kunkameng’ tenen, wepra deipu. Ton gungda utopu, empat ribu neng (4.000) wepra deipudi, Raja Dauddi pepu. “Anengda nedi konum dopra deiamsi musik pen keca dopra, sunda, Allah Yahweh er si eremna tep ati damai, mut pepmengedi, mut pen taru lelim pena keca, akeca sida alat musik yala-yala yuma, ne Raja Dauddi, ‘Ukupkurume,’ peipsipa, kael nengdi akeca konum ketenepra deiamya cadi, akeca dopra, mut pepmengedi, Allah tep, er si eremkamenge,” pepra deipudi, aneng ton wepra deipu. 6 Sun Lewi yala neng yumada, nimi deiyo ngebo Raja Dauddi, sun Lewi yala neng gung yuk-yuk bokra deipu. Ada, sun Lewi yala nengdi deipipa, dadeipdanen yakarami Lewi yala nengdi deipi neng kuramitopu, sun awepra deipu nengda, gung weneri yuk-yuk deipu. Aneng sun apu yapu nengda, sun sida ake. Ada, Gerson yala neng cap, Kehat yala neng cap, tonda Merari yala neng cap wepra deipu.

7 Uda, Gerson er nyapuda, sal nyapu butene sun sida ake. Ladan cap, Simei cap deiamu. 8 Ladan erdi deiamu nyapuda, sal nyapu weneri kupu. Ada, menmena deipu ngebo Yihel deiamudi, adinin butene ngeboda Zetam deipu, weneri ngeboda, Yoel deiamu. 9 Gersondi deipu ngebo Simei, erdi deiamu nyapu sun sida ake. Ada, Selomit cap, Haziel cap, Haran cap, deiamu. Ada weneri nengpu deiamu. Sun aneng yumada, Ladan erdi deipupa, dadeipdanen yakarami nesala tep, deiyo kepra anesala cap, sun nyapsilip cap talepra upu perami. 10 – 11 Gersondi deipu ngebo Simei, erdi deiamu nyapu, yuk dumbari nengda, sun sida ake. Ada, Yahat menmena deipudi, er weit nyapuda, Ziza cap, Yeus cap, Beria cap deiamu. Aneng kan-kan di, Yeus cap, Beria capdi deipreipa, dadeipdanen yai ngeda, nimi weik gume. Anengdi yambulanun pua. Ange tep nengeda, sun aneng butene cap, sun nyapsilip capda, yala tenpu neng utopu nukra, sun si sekra deipi. 12 Kehat erdi deiamu nengda, dumbari deiamu. Ada, Amram cap, Yizhar cap, Hebron cap, Uziel cap, ukuprap nengpu deiamu.

13 Kehatdi deiamu ngebo Amramdi deiamu nengda, butene kuramrei. Ada, Harun cap, Musa cap, deiamupa dakuramrei. Atep, Allahdi Harun tep nengeda, ‘Ne ati pumbonda, pio telep mambul pel donkamre’ tenen, wepra deipu. Ukupka cadi, Harundi deipupa, dadeipdanen barami neng yumada, ‘Pio mambul pel, telep lengna pelpu talepra donkameng’ tenen, Allah si eremna ati pumbon pel dona deiyo kecada, ayala neng sun deiki deipu. Harun er yala neng dipapu, ‘Israel nesala sun mali kun keca tep, Allahdi kau kepredi, gum kupra deipkamser’ tenen, gam keca popra, Allah Yahweh damai dinin, mesba deiki uku dongorami. Tonda, ‘Allahdi, sun Israel nesala telep kweipkamre’ tenen, sun ayala neng dipapu, Allah er si deiki di, telep upu peprapidi, Israel yala nesala deiki derirami.

14 Dinino Musada, Allahdi wepra deiamupa, Allah er upu moupra taleamudi, pio teleppu kuramudi, Allah er amutarapu kuramu. Ukuramudi, Musa erdi deiamu sal nyapu yuma tep nengeda, Allahdi upepu. Ada, “Musa cap, er nyapsilip cap yumada, Lewi yala neng utopu kunkamenga cadi, Lewi yala neng sengmenge taruda, Musa er nyapsilip peda, sun si wisipra sekra derinkamrume,” peiputopu kurami. Ukuramya cadi, Musa cap, er nyapsilip capda, sun Lewi yala neng gungda, tenpupu kepropi.

15 Musadi deiamu nengda, Gerson cap, Elieser cap deiamu. 16 Gersondi menmena deiamu ngeboda Sebuel kuramu. 17 Musadi deipu ngebo Elieser, erdi deipu ngeboda, tenpu ngebo er sida, Rehabya kuramu. Dinino, Rehabya erdi deiamu nyapuda, pio weika di deiamu. 18 Kehat erdi deiamu mi Yizharda, nimi si butene deiamu. Erdi deiamu ngebo er sida Lomit. Angebo erdi deipupa, dadeipdanen yakaramyanen, deipu ngebo kuramu.

19 Kehatda, erdi deiamu ngebo weneri ngeboda, Hebron kuramu. Hebron erdi deiamu sal nyapuda, dumbari kurami. Ada, menmena deipu ngeboda, Yeria, adininda Amarya cap, tonda, Yehaziel cap, tonda Yekameam cap, ukupra neng deiamu. 20 Kehatdi deiamu ngebo Uzielda, dumbari ngebo kuramu. Uzieldi deiamu nyapu buteneda ake. Ada, menmena du ngebo deipu ngeda, Mikha kuramu. Adinin, er weit boda Yisia deiamupa kuramu.

Ton ngebo er sida Merari, erdi deiamu neng tep, seki upu

21 Merari erdi deiamu sal nyapu peda butene. Aneng sun sida, Mahli cap, Musi cap deiamu. Mahli er nyapuda, butene deiamu. Ada, Eliasar cap, Kish cap deiamu. 22 Dinino, Mahlidi deipu ngebo Eliasarda, sal nyapu ton derina gum dipapu depu. Dinino, ner nyapupu deiamu. Ukuamu nerapuda, Kishdi deiamu neng, sun kayapu neng kurami dinin, Kish er nyapu dipapu, Eliasardi deiamu nerapu domi. 23 Merari erdi deiamu ngebo Musi, erdi weneri neng deiamupa kurami. Sun sida, Mahli cap, Eder cap, tonda Yeremot cap deiamu.

24 Aca di deiki tara sekmepu nimi si, anengda Lewi yala nesaladi deiamipa, dadeipdanen yakaramyanen, deiami nesala kurami. Sun si nukra sengna cap, sun co puna deiyo neng si sengna cap, sun deipdanen yakarami yala neng, si sengna cap, sun nyapsilip talepra kuna deiyo neng yuk-yuk si sengna cap, akuramitopu ketenepra sekeipmupu. Sun aca sekmepu nesalada, sun derin keteng tamunda, dua puluh (20) tahun adinin, konum deiki tara keamne nengpu sekeiamitopu, nun peda aca sekmepu. Aneng yumada, ‘Allah Yahweh er si eremna ati mambul pel talepra dona tep, pel deiyo neng kunkameng’ tenen, wepra deipidi, apel kareramipa, dorami.

25 Ataruda, sun Lewi yala neng wepra deiamya deiyoda, tali tep gume. Nimi deiyo ngebo Raja Dauddi pepu. “Nun Israel nesaladi, er si eremnup Allah Yahwehdi, nun Israel nesala tep, ‘Ne mawa neng pio kunkameng’ tenen, wepra deiamseudi, pio melimamseu. Allah erdi, ‘Telep kweipkamsene,’ pepu. Tonda Allah di, ‘Yerusalem mutu neitamaida, pio tep kunkamne,’ peiamseu. Tonda, nun nai bo Allahdi, nun dana-dana tara kuramupu nesala yuma tep, konum poptapra bisbisa kapu pangeda, ukutaruda nun Israel nesala amutu neitamai di, nimi podana gum dipapu, pio bouna di, dim pepra teleppu kunupe.

26 Ukutaruda, yuk mutu neng podanapu men kunupa cadi, ange tep nengeda, sun Lewi yala nengdi, Allah Yahweh er si eremna ati, opkal bol di dodin tenda ati deiamepu ngeda, tupa dopra men embankamenge. Utopu, akati neitamai deiami keca yuma cap, akati pumbon mambul pel don keca cap, sun Lewi yala imam-imam nengdi, tupa-tupa doupmengedi, yuk karen mutu ton men embankamenge. Acapu kunkamepa tepa. 27 Uda ataruda, nimi deiyo ngebo Raja Daud erdi, ‘Ukupkamrume,’ pepra deipudi, sirya upu peiamutopu, sun Lewi yala neng dinin, sun nenada keteng tamun dua puluh tahun (20) deiki tara keamne nengpu, sun nong nukra, sun si sengami.

28 Uda, sun Lewi yala nesala, ada Harun erdi deiamupa, dadeipdanen yakarami imam-imam nengda, Allah Yahwehdi aneng wepra deiamnga cadi, sundi er si eremna ati neitamai, ila mambul pel talepra dorami. Ada, menop taru keteneiami ati, ada Allah cap, nimi cap antamna tep, opkal bol di dodin tenda ati dominge pe, amenda taru ila urasin telep gel cap, co cap, gat keca cap di dominge peda, sun aneng dipapu apel melipra donapu kurami.

Anengdi pel talepra dorami ngeda, Allah er si eremna ati dam dinin, bura tara cap, akati pumbon neitamai cap, akati neitamai kwamu pio telep lengna keca, pel don keca cap, ‘Akeca yumada, Allah erngepu kurura cadi, mali keca tenpunge peda, akati pumbon men kupkamre’ tenen, akeca yuma me kuna cap, buta daemna cap, Allah karena cap deiki di, akeca yuma telep-telep kupra deriramipa, pio lekpu kuramu. Sun Lewi yala neng dipapu apel talepra dorami. 29 Tonda, anesala yuma adipapu, Allah er karena tep, roti kwanengda, Allah Yahweh er damai di pio tupa-tupa ketenepra derinapu kurami. Tonda, Allah Yahweh gispal dona cap, ‘Nun cap, Allah cap, telep kupra kikiman kunkamep’ tenena tep kareramupu keca, er sida tepung terigu cap, metek jen keca, er si kue, nena gum keca, er si ragi di tapakra dana gumnge cap, tonda tepungda minyak saitun me mokon di lingmangedi, tapangmenge nge cap, ketenepra derirami.

Sun ayala neng dipapu, ware karen keca do yuma, ‘Er ikinda, ware kupra kurur do? Tonda, er nongda, ware kupra lyom cap, er pala capda ware kupra kurur do?’ tenen, deripra kiklimterena capda, aneng dipapu, apel talepra dorami. 30 Ton ngeda, sun imam deiyo nengdi peipipa, sun amutara kurami Lewi yala neng dipapu, tumi-tumi ipna taru pe, lukunda taru neitamai yuma peda, Allah Yahweh er si eremna tep, mut peramidi, “Nun nai bo Allah, kanda pio telep kurume. Kandi melimsemem keca yuma tep nengeda, pio telepe pepkepe,” pepra, mut peramya deiki di, Allah Yahweh tep gispal doramidi, er si eremami.

31 Tonda, ange utopu, tumi-tumi yuma Allah Yahweh er si eremna cap, er karena cap tep, pel dona gum dipapu, beipye peingna tumi, Sabat tumi deiki di, gam keca popnedi, akeca yuma doupra yakaramidi, uku dongorami taru peda, Lewi yala nengdipu mut peramidi, Allah er si eremami.

Ange utopu, ukupu war kupre taru pe, Allahdi peiamutopu,” Awar, atanggal deiki di, ila mambul tumi kupyopda, ne karena cap, ne gispal dona cap, ne si eremna cap tep, akeca karenkamnerume,” pepra deiputopu, sun Lewi yala neng dipapu, akeca dopra kareramidi, mut perami. Ataru-ataru yumada, sun imam deiyo nengdi, ‘Ukupkamrum-ukupkamrum,’ pepra lap peramitopu, sun amutara kurami Lewi yala neng dipapu, apel talepra dorami. Menop taru kurami utopu, ukupu kunange yuma peda, sun aLewi yala neng sun dipapu, apel talepra pio dopbaramitopu, tupa pel donunge.

32 Uda, sun Lewi yala neng dipapu, Allah Yahweh cap, nimi cap, antamna tep, opkal bol di dodina tenda ati, Allah Yahweh er si eremna ati pumbon wilipra keteneipidi, dopyai pio telep lengne nge cap, tonda akati bura tara dana-dana cap, akati pumbon kalengna pel dona tep, melimna pel don neng cap tep, ketenepra deiyaminge yumada, pel talepra doramitopu, tupa donunge.

Apel donungada, imam Harun, erdi deiamupa, dadeipdanen yakaramyanen, deipi nengdi, sun kayapu Lewi yala neng dinin, sun amutara kurami neng tep, “Ukupkurum-ukupkurum,” pepra deiami topu, sun Lewi yala nengdi, apel talepra dorami. Angeda, Allah er si eremna ati tep, menop taru ketenepra, lyom bol di opkal dodin tenda ati dominge pe, amenda taru Salomo erda ila gel di domu ati peda, sun Lewi yala nengdipu, apel talepra doramitopu, tupa donunge.