1Ch 24 | XteSC | STEP | Imam Harun er sal nyapuda, dumbare di deiamu. Ada, Nadab cap, Abihu cap, Elieser cap, tonda Itamar cap deiamu.

1 Chronicles 24

Pel dona deiyo keca dopra, sun imam neng tep, karepi upu

1 Imam Harun er sal nyapuda, dumbare di deiamu. Ada, Nadab cap, Abihu cap, Elieser cap, tonda Itamar cap deiamu. 2 Nadab cap, Abihu capda, sun pe nai sisi kapul men depu taru dipapu, sun anengda menmena deprei. Adeprei taruda, sun nyapu ton pio men deiamrei dipapu deprei. Ange tep nengeda, sun kayapu neng buteneda, Elieser cap, Itamar cap sun butenepu, imam neng keiprei. 3 Daudda Harun erdi deipupa dadeipdanen yakarami neng yuma tep, gung yuk-yuk kepra deipudi bokeipu. Ada, sun Allah er si eremna ati pumbon pel dona tep wengne taru cap, tonda pel yuk-yuk donkameng nge tenepudi, wepra deipu dingeda, aneng sun gung yuk-yuk bokeipu. Apel dona tep, Dauddi gung yuk-yuk wenmau taruda, Elieserdi deiamupa, dadeipdanen yakaramyanen, deiami ngebo Zadok cap, tonda Itamar deiamupa, dadeipdanen yakaramyanen, deiami ngebo Ahimelek cap, tonda sun yala neng yuk neng cap, nimi deiyo ngebo Raja Dauddi bokeipupa, apel talepra dorami.

4 Ataruda, sun dipetepipa, Elieserdi deipupa, dadeipdanen yakarami yala neng kan-kan di, Allah er si eremna ati deiyo kepmanto neng kurami. Tonda, ‘Allah er mambul pelpu dopkameng’ tenen, wepra deipmanto neng ton dakurami. Ange utopu, Itamardi deipupa, dadeipdanen yakaramyanen, deipi yala neng kan-kan di, apel-apel talepra dopmanto neng ton dakurami. Ange tep nengeda, Daud cap, sun imam-imam deiyo neng capdi, ‘Ayala nengda, telep dinin, ortara yala nengda gume,’ tenena deiki di, ‘Aneng men bokeipkamepe,’ tenepya cadi, nimi urasin dina gum dipapu, Allah si eremna ati pel dona deiyo kepmanto nengda, sun kael kemna petenkemna keca er si undi ^{▼▼undi – Aupu deiyoda, pumun taruda, sun Israel nesaladi, ‘Ange kupkamep do, ange do? Angebo wepra ereipkamep do? Yuk ngebo do?’ tenen, metek co dopropidi, aco deiki nimi si do, yuk peten kemna keca ton seki dingeda, ayambul co dopra, tenpu mau pumbon dongopidi, long-long pepi dingeda, tu deiki diktapi. Ukupipa, ametek co deiki seki nimi si, menmena si katuai kupunge epi ngeda, ‘E, akonuma, angepu wepra ereipkupe,’ teneramidi, apel dorami. Akurami kecada, er si undi, tonda undi perami.} kepya deiki di, adeiyo neng wepra deipi. Atep, Itamar er gerekdanen yanami yala nengda, sun gung denge metek, banbari (8) nengpu kurami. Dinino, Elieser er gerekdanen yanami yala neng, sun gungda enambelas (16) deiyo neng kepra deipidi, aneng sun amutara deipi. 5 Ada, Elieserdi er deipgerekdanen, yakan yala neng cap, Itamardi er deipgerekdanen, yakan yala neng capda, pio teleppu kuramidi, Allah Yahweh er si eremna ati neitamai pel talepra dona tep, deiyo kepmanto neng cap, ‘Allah er upu moupra talepmengedi, er pelpu donkameng’ tenen, wepra deipmanto neng ton, yambul weika di kuramya cadi, sun kael kemna tep petenkemna keca, er si undi pel dopya deiki di, aneng wepra yuk-yuk deipi. Bokeipidi, atara nengda, sun pel ake. ‘Atara nengda, sun pel ake,’ pepra, yuk-yuk wepra deipi. Uda aneng yumada, Allah upu talepra, dumsisipu kuna neng cappu kuramya tep, pel yuk-yuk bokra deipipa, undi kael kemna petenkemna keca deiki di kupitopu, ‘Ange konuma,’ tenepidi, aneng yuk-yuk bokra deipi.

6 Bokra deipi pangeda, adipapu sun kurami keca cap, nimi si yuk-yuk sengna cap, apel dona deiyo ngebodi sekra deipu. Angeboda, Lewi yala ngebo er sida Netaneel, erdi deiamu ngebo Semayadi, sengna pel doramnga cadi, erdi aneng sun si sekra deipu. Undi pel penmaidi, gidanapu kunmai taruda, Itamar er tara neng neitamai di, tenpu yala deiyo ngebo dopropi dingeda, Elieser tep nengeda, er yala deiyo neng butene dopropi. Asi sengna ngebodi, aneng sun si sengmau taru yumada, nimi deiyo ngebo Raja Daud cap, er amutara deiyo neng cap, tonda imam ngebo er si Zadok cap, Abyatar erdi deipu ngebo Ahimelek cap, tonda sun imam-imam neng, sun yala deiyo neng cap, sun Lewi yala deiyo neng cap, sun yumadi dinmai.

7 Sundi undi pel donmai taruda, tenpu ngedi katuai kupupa, dopropidi seki dingeda, adi dipdongopra, yuknge ton sekbanapu kunmaiyanen, ukupra sirya sekinge dengeda, pio weik dua puluh empat (24) yala deiyo neng wepra deipi. Sun kael kemna tep petenkemna keca, er si undi deiki di wepra deipi ngebo, menmena ngeboda, Yoyarib wepra deipipa, erdi gonga kepu. Undi butene deiki di dopi ngeda, Yedaya wepra deipi.

8 Undi weneri deiki di dopi ngeda, Harim wepra deipi. Undi dumbari deiki di dopi ngeda Seorim wepra deipi. 9 Undi pamubari deiki di dopi ngeda, Malkia wepra deipi. Undi ngangtan bari deiki di dopi ngeda, Miyamin wepra deipi. 10 Undi yoneitam bari deiki di dopi ngeda, Hakos wepra deipi. Undi banbari deiki di dopi ngeda, Abia wepra deipi. 11 Undi topnebari (9) deiki di dopi ngeda, Yesua wepra deipi. Undi morokyo deiki di (10) dopi ngeda, Sekanya wepra deipi.

12 Sun kael kemna tep petenkemna keca, er si undi deiki di, kum dam di utara (11) deiki di dopi ngeda, Elyasib wepra deipi. Undi amul di dutara (12) deiki di dopi ngeda, Yakim wepra deipi. 13 Adininda, undi pel dopidi, u deiki di utara (13) wepra deipi ngeda, Hupa wepra deipi. Asuru dam di utara (14) wepra deipi ngeda, Yesebeab wepra deipi.

14 Dan tara amul dam dingeda, (15) undi deipi ngeda, Bilgad wepra deipi. Dana tara kum dam dingeda (16) undi deipi ngeda, Imel wepra deipi. 15 Dana tara morokyo (17) undi deipi ngeda, Hezir wepra deipi. Dana tara morokyo bari (18) undi deipi ngeda, Hapizes wepra deipi. 16 Dana tara topnebari (19) undi deipi ngeda, Petahya wepra deipi. Dana tara banbari undi deipi ngeda, (20), Yeheskiel wepra deipi.

17 Dana tara yoneitam bari (21) undi deipi ngeda, Yakhin wepra deipi. Dana tara ngangtan bari (22) undi deipi ngeda, Gamul wepra deipi. 18 Dana tara pamubari (23) undi deipi ngeda, Delaya wepra deipi. Adininda dana tara dumbari (24) undi deipi ngeda, er si Maazya wepra deipi. Ange yuma konum wepra deipipa, sun yala-yala deiyo neng, sun gung yumada, dua puluh empat (24) neng kepu.

19 Aneng sun si yuk-yuk si pepra seki nengda, sun yala yuk-yuk dinin, deiyo kepra gonga kemna neng kurami. Sun si asekitopu nukra deipi. Sun ayala-ayala deiyo neng, sun pelda ake. Ada, Allah Yahweh er si eremna ati neitamai wengbana cap, tonda akati pumbon mambul pel dona cap, Allah karena cap, er si eremna cap tep, ‘Apel-apel talepra donkameng’ tenen, wepra deipi. Menop taruda, Allah Yahwehdi, imam Harun tep, ‘Ukupkamrume, ange ton men kupkamrume,’ pepra deiamutopu, sun aneng dorami pel yumada, ange utopu pel doramidi, Allah er si eremami. Ada, Allahdi imam Harun tep, “Ukunkamrume, angeda pio men kunkamrume,” pepra deiamupa, dakuramitopu, ataru wepra deipi neng peda, angetopu kupbarami.

Lewidi deipupa, dadeipdanen yakaramyanen, kurami neng, sun si senga tep, seki upu

20 Aca di yuk neng peda, sun Lewi yala nesaladi deipipa, dadeipdanen yakarami nengdi deiami neng ton, sun si sekupe. Ayala deiyo-deiyo nengda, adinen dipra, utara sekra deiami neng sun sida ake. Ada, Amaramdi deipupa, dadeipdanen yakaramyanen, deipi ngebo, er si Subael kuramu. Subaeldi Yehdeya deipu. 21 Elieserdi deiamu ngebo Rehabya, erdi menmena deipu ngeboda, Yisia kuramu. 22 Kohatdi deiamu ngebo Yizhardi deipupa, dadeipdanen yakaramyanen, deipi ngeboda, Selomot deipi. Selomotdi deipupa, dadeipdanen yakaramyanen, yana deipi ngeboda, Yahat deipi. 23 Kohatdi deiamu ngebo Hebron, erdi menmena er mi Yeriya deipu. Yeriya deipu dingeda, amenda taru er nyapu ton weneri deiamu. Ada, Amraya cap, Yahaziel cap, tonda weneringe deipu ngeboda, Yekameam deiamu.

24 Kohatdi deiamu ngebo Uzieldi deipupa, dadeipdanen yakaramyanen, yana deipi ngeboda, Mikha deipi. Mikhadi deipupa, dadeipdanen yakaramyanen, yana deipi ngeboda, Samir kuramu. 25 Mica er kabo sisada, Yisia kuramu. Angebo Yisiadi, er mi Zakaria deipu. 26 Meraridi menmena deipu nengda, Mahli cap, Musi cap, tonda Yaazia cap deiamupa dakurami. 27 Yaaziadi deipupa, dadeipdanen yakaramyanen, deipi nengda, sun sida, Beno cap, Zoham cap, Zakur cap, tonda Hiberi cap deiamu. Yaasaidi er sal nyapuda, weneri di deiamu.

28 – 29 Mahli erdi deiamu sal nyapuda, butene di deiamu. Ada, sun anyapu sida ake. Eliasar cap, Kish cap deiamu. Angebo Eliasardi nyapu ton men deiamu dinin, er kabo sisa Kishdi deiamu ngebo tenpu, er sida Yerahmeel kuramu. 30 Musi erdi deiamu sal nyapuda, weneri deiamu. Ada, Mahli cap, Eder cap, tonda Yerimot cap deiamu. Aca deiki tara sekmupu nesala yumada, sun Lewi yala nesaladi deipipa, dadeipdanen yakaramiyanen, yana deiami neng sun yalada, ila deiyo neng kurami.

31 Sun aneng tep, ‘Angebo ware pel donkamre do, angeboda apel ton donkamre do? Angeda ake’ tenen, adipapu dukdongopra, sun pel dona tep nengeda, sun adipapu kael kemna lap pena tep petenkemna keca, er si undi, apel kange di ton cap kupi. Undi pel dopyaida, sun kayapu neng, Harun erdi deiamu neng yuma peda, utopu kuramingepu sun peda, apelpu donmai. Undi pel dopya deiki di, ‘E, angebo cap, angebo cap tek sisi apel talepra donkamre’ tenen, kael kepi. Undi pel donmai taruda, Raja Daud cap, ila imam deiyo ngebo Zadok cap, Ahimelek cap, sun Lewi yala neng yuk neng cap, imam-imam neng sun yala yuk-yuk kuramitopu dinin, sun yala deiyo neng cap, aneng yumadi, dinmaipa, undi pel donmai.

Ukunmaiyanen, sundi deiami nyapu kuramitopu, menmena deiami neng cap, amenda sirya taru deiami neng cap, sundi wepra karepi pel dona deiyo kecada, utotopu kupu. ‘Keteng tamun weik nerami nengda, ila mambul weik pel donkameng dinin, yambul kanam utopu neramenge neng peda, mambul gum pelpu donkameng’ tenena gum dipapu, aneng yuma tep, telep pelpu wepra karepipa, talepra dorami.