1Ch 25 | XteSC | STEP | Uda, nimi deiyo ngebo Raja Daud cap, sun Lewi yala neng nimi deiyo-deiyo neng cap, ‘Anengda Allah si eremna taru mut pena cap, alat-alat musik ketenemna tep keca cap, apel talepra kunkameng’ tenen, nimi ton wepra deipi. Ada, Asaf erdi deiamu neng kan-kan cap, Heman erdi deiamu neng kan-kan cap, tonda Yedutun erdi deiamu neng kan-kan cap, wepra deipipa, anengda Allahdi pepra deiamu upu wengna taru pel gonga kemna cap, tonda mut pena taru alat-alat musik er sida, kecapi cap, gambus cap, simbal cap, penmaiya deiki di, Allah er si eremami. Awepra deipi nengdi, apel talepra dorami. Allah upu wengne taru gonga kemna tep nengeda, gung yuk-yuk wepra deipu nengda, sun si ake.

1 Chronicles 25

Allah Yahweh, er si eremna ati neitamai mut pena tep keca, seki upu

1 Uda, nimi deiyo ngebo Raja Daud cap, sun Lewi yala neng nimi deiyo-deiyo neng cap, ‘Anengda Allah si eremna taru mut pena cap, alat-alat musik ketenemna tep keca cap, apel talepra kunkameng’ tenen, nimi ton wepra deipi. Ada, Asaf erdi deiamu neng kan-kan cap, Heman erdi deiamu neng kan-kan cap, tonda Yedutun erdi deiamu neng kan-kan cap, wepra deipipa, anengda Allahdi pepra deiamu upu wengna taru pel gonga kemna cap, tonda mut pena taru alat-alat musik er sida, kecapi cap, gambus cap, simbal cap, penmaiya deiki di, Allah er si eremami. Awepra deipi nengdi, apel talepra dorami. Allah upu wengne taru gonga kemna tep nengeda, gung yuk-yuk wepra deipu nengda, sun si ake.

2 Asaf erdi deiamu neng dumbarida, ada Zakur cap, Yusuf cap, Netanya cap, tonda Asarela cap deiamu neng wepra deipi. Aneng sun gonga kemna deiyo ngeboda, Asaf kuramu. Tonda, Raja Daudda, “Allah erdi, ‘Ukunkamrume,’ pepra, deiamu upu yana penkamre ngeboda, Asafdi penkamre,” pepka cadi, apel ton dopra, Asaf karepipa, erdi ange talepra pel doramu.

3 Ange utopu, er kabo Yedutun, erdi deiamu neng kan-kanda, enam di deiamu neng wepra deipi nengda, sun si ake. Ada, Gedalya cap, Zeri cap, Yesaya cap, Simei cap, Hasapya cap, tonda Matica cap, ‘Sun yuma apel talepra donkameng’ tenen, wepra deipi. Aneng sun gonga kemna deiyo ngeboda, sun nai bo Yedutun kuramu. Tonda, er dipapu, Allahdi pepra deiamu upuda lap peramudi, er mut pen keca kecapi deiki di, Allah mut peramudi Allah er si eremamu. Akuramu taru dipapu, Allah Yahweh tep, “Naie, kanda pio teleppu kurume. Kandi melimsemem keca yuma tep nengeda, pio telepe pepkepe,” pepra, Allah er si eremamu. Er nyapuda, er amutara kurami dinin, sun aneng peda, upu deiki di perami mut cap, mut pena keca, er sida alat musik kecapi cap, gambus cap, simbal cap, penmana deiki di, Allah er si eremami.

4 Ange utopu, er kabo Heman, erdi deiamu neng kan-kan, empat belas di deiamu neng wepra deipi neng, sun sida ake. Ada, Heman erdi deiamu nengda, Bukia cap, Matanya cap, Uziel cap, Sebuel cap, Yerimot cap, Hananya cap, Hanani cap, Eliata cap, Gidalti cap, Romamti-Ezer cap, Yosbekasa cap, Maloti cap, Hotir cap, tonda Mahaziot cap, ukuprap neng wepra deipi. Ada, ‘Allah si eremna taruda, sun anengdi mut penkameng’ tenen, wepra derirami. 5 Hemanda, nimi deiyo ngebo Raja Daud, er pe ngebo sisa melimna tep, “Allahdi upepkere, upepkere,” pepra lap peramudi, nabi ngebo kepra kuramu. Menop taruda, Allah Yahwehdi Heman tep, “Kanda telep ngebo kuruma cadi, puto keipkenepa, teleppu kunkamrume,” pepra, pedina upu deiki di pepka cadi, Heman er nyapuda, empat belas kareamu. Utopu tonda, er ner nyapuda weneri di kareamu. Ada, Allahdi Heman tep, “Ange yumada ukupkenepa, yuk neng epmengedi kan tep, ‘Erda mambul ngebo,’ pepra, gispal dopra gudinkamkenge,” pepra deiamu.

6 Uda, Heman erdi deiamu nyapu, sun empat belas (14) neng yumada, sun nai bo deiyo kepra gonga kepupa, sun yumadi Allah si eremna taru mut perami. Er cap, sun yuma capdi, mut pen keca er si simbal cap, kecapi cap, gambus cap, sun nai bodi gonga kepnepa, Allah si eremna cap, er upu gekena cap tep, wengne taruda, Allah er ati neitamai akeca doupnedi, mut pena cap, akeca pung pena cap, tonda buru di pona cap kurami. Asaf cap, Yedutun cap, Heman capda, nimi deiyo ngebo Raja Dauddi, ‘Ukupkurume,’ pepra deiamutopu, apel dona deiyo keca taleamidi, mut perami. 7 ‘Mut pena pel donkameng’ tenen, wepra deipi neng yuma cap, sun kayapu neng sisi cap, sun nyapsilip cap yumada, Allah si eremna mut pena cap, alat-alat musik pena capda, ila kael neng kurami. Sun gung yumada, denge pio weik dua ratus delapan puluh delapan (288) neng kuramidi, Allah si eremna tep mut pena pel taleami.

8 Sun aneng yuma tep nengeda, ‘Angebo ware pel talepra donkamre do, er kapda dan pel ton talepra donkamre do?’ tenepra, kael kemna tep nengeda, gonga kemna tep, sun deiyo-deiyo nengdi moupra undi kael kemna petenkemna keca kepne dingeda, adeiki di kael kepidi, apel bokeipi. Sun wisi neng pe, yambul kaber neng peda, undi kael kemna peten kemna keca kepna deiki dipu, sun moupra ila kael keamne neng pe, ukupu gonga kepnedi, ‘Kael kepkune’ tenena neng peda, undi kael kemna peten kemna keca domaiya deiki di, aneng sun pel weprapidi, bokra karepipa, apelpu talepra dorami.

9 Undi kepmaiya deiki di, sun anesala denge weik 288 neng yumada, gung yuk-yuk wepra deipipa, sun gungda 24 nengpu, sun yala-yala akuramitopu, yuk-yuk bokropi. Agung kepra deipinge yumada, tenpu ngebodi gonga kepra deipidi, er yala nengda dua belas (12) neng amul dam di dutara kepra deipi. Angeda yuk-yuk nukra nepra deipidi, gung yuk nimi deiyo kepi nengda, adinin dutara akupmare. Ada ake.

Menmenada, Asaf er yala kan-kan di, undi pel kepya deiki di, ‘Mut pena pel donkameng neng’ tenen, wepra deipi. Menmena wepi ngeboda, Yusuf kuramu. Erdi deiyo kepropupanen, er amutarada, er kayapu neng sisa neitamai di, dua belas (12) neng ton wepra deipi. Adininda, undi kedua kepmaiya deike, sundi wepra deipi ngeboda Gedalya kuramu. Er di deiyo kepropu dinin, er amutarada, er kayapu neng sisa neitamai di, dua belas (12) neng ton wepra deipi. 10 Ukupi dingeda, undi weneri kepya deiki di, wepra deipi ngeboda, Zakur kuramu. Erdi deiyo kepropu dinin, er amutarada, er kayapu neng sisa neitamai di, dua belas (12) neng ton wepra deipi.

11 Akupi dingeda, undi dumbaringe dopya deiki sundi, wepra deipi ngeboda, Yizri kuramu. Erdi deiyo kepropu dinin, er amutarada, er kayapu neng sisa neitamai di, dua belas (12) neng ton wepra deipi. 12 Adininda, undi pamubari dopya deiki, sundi wepra deipi ngeboda, Netanya kuramu. Erdi deiyo kepropu dinin, er amutarada, er kayapu neng sisa neitamai di, dua belas (12) neng ton wepra deipi.

13 Adininda, undi ngangtan bari kepya deiki, sundi wepra deipi ngeboda, Bukia kuramu. Erdi deiyo kepropu dinin, er amutarada, er kayapu neng sisa, sun neng neitamai di, dua belas (12) neng ton wepra deipi. 14 Ukupi dingeda, undi yoneitam baringe dopya deiki, sundi wepra deipi ngeboda, Yesarela kuramu. Erdi deiyo kepropu dinin, er amutarada, er kayapu neng sisa, sun aneng neitamai di, dua belas (12) neng ton wepra deipi.

15 Ange ukupya tep, undi banbari kepya deiki sundi wepra deipi ngeboda, Yesaya kuramu. Erdi deiyo kepropu dinin, er amutarada, er kayapu neng sisa, daneitamai di dua belas (12) neng ton wepra deipi. 16 Atep nengeda, undi topnebari kepya deiki di, wepra deipi ngeboda, Matanya kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi. 17 Ukupi dingeda, undi morokyo bari kepmai di, sundi wepra deipi ngeboda, Simei kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi.

18 Ange kupi dingeda, undi kum dam di sebelas (11) kepmaiya neitamai, sundi wepra deipi ngeboda, Azareel kuramu. Erdi deiyo kepropu dinin, er amutarada, er kayapu neng sisa, sun neitamaida, dua belas (12) neng ton wepra deipi. 19 Adinin, undi amul dam di dutara, dua belas (12) kepmaiya deiki, sundi wepra deipi ngeboda, Hasabya kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi.

20 Adininda, undi u deiki di utara tiga belas (13) kepya deiki di, wepra deipi ngeboda, Subael kuramu. Erdi deiyo ngebo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi. 21 Ukupi dingeda, undi dan tara asuru dam di empat belas kepmaiya deiki, sundi wepra deipi ngeboda, Matika kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi.

22 Autopu kupi dingeda, undi dana tara amul dam di kepmaiya deiki di, wepra deipi ngeboda, Yeremot kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi. 23 Ukupidi, undi dan tara amul dam di undi kepmaidi, sundi wepra deipi ngeboda, Hananya kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi. 24 Adingeda, undi dan tara kum di dutara kepmaiya deiki, sundi wepra deipi ngeboda, Yosbekasa kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi. 25 Ange ukupu dingeda, undi danatara morokyo di, dutara kepmaiya deiki di, wepra deipi ngeboda, Hanani kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi.

26 Ukupi dingeda, undi dana tara toupnedi kepidi, wepra deipi ngeboda, Maloti kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi. 27 Adinin, undi dana tara ban di kepidi, sundi wepra deipi ngeboda, Eliati kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi. 28 Adininda, undi dana tara yoneitam di, kepya deiki, sundi wepra deipi ngeboda, Hotir kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi. 29 Ukupidi, undi dana tara ngangtan di kepidi, sundi wepra deipi ngeboda, Gidalti kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi. 30 Ukupya tep, undi dana tara pamubaringe kepya deiki di, sundi wepra deipi ngeboda, Mahaziot kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi. 31 Ukupidi, undi dana tara dumbaringe dopya deiki, sundi wepra deipi ngeboda, Romamti-Ezer kuramu. Erdi deiyo kepropu dinin, er amutarada, er kayapu neng sisa, sun neitamai di, dua belas (12) neng ton wepra deipi.