1Ch 26 | XteSC | STEP | Ada, sun Lewi yala nengdi Allah Yahweh er si eremna ati wengban bisi buplan damai kalengna tep, ‘Apel donkameng’ tenen, aneng tep bokra deipi. Ada sun Korah yala neng kan-kan neitamai di, Korahdi deipupa, dadeipdanen yakaramyanen, anengdi deipi ngebo, er si Meselemya wepra deipi. Angebo er nai sisa, er sida Kore kuramu. Kore, er nai bo sisada, Asaf kuramu.

1 Chronicles 26

Allah Yahweh er si eremna ati kalengna neng tep, seki upu

1 Ada, sun Lewi yala nengdi Allah Yahweh er si eremna ati wengban bisi buplan damai kalengna tep, ‘Apel donkameng’ tenen, aneng tep bokra deipi. Ada sun Korah yala neng kan-kan neitamai di, Korahdi deipupa, dadeipdanen yakaramyanen, anengdi deipi ngebo, er si Meselemya wepra deipi. Angebo er nai sisa, er sida Kore kuramu. Kore, er nai bo sisada, Asaf kuramu. 2 – 3 Meselemya erdi deiamu nyapuda, yoneitam bari (7) di deiamu. Ada, menmena deipu mida, Zakaria deiamu. Adinin, Yediael cap, Zebaja cap, Yatniel cap, Elam cap, Yohanan cap, tonda sirya mida, Elyoenai cap deiamu.

4 – 5 Obed-Edom erdi deiamu sal nyapuda (8) delapan di deiamu. Ada, er nai bo Allahda, er tep weika di meliamupa, ukupra banbari nyapu deiamu. Ada, sun anyapu derin keteng tamun adi dipra nukidi sekingeda, menmena deipu ngeboda, Semaya kuramu. Ukupu dingeda, Yozabad cap, Yoah cap, Sakhar cap, Netaneel cap, Amiel cap, Isakar cap, tonda sirik sisa kale ngebo deipkada, Peuletai deiamu. 6 – 7 Obed-Edom erdi menmena taru deipu ngebo Semaya, erdi deiamu nyapuda ake. Ada, menmenada Otni deipu. Adininda, Refael cap, Obed cap, Elzabad cap, Elihu cap, tonda Semakya cap deiamu. Aneng yumada, akeca-keca yala-yala yuma ila kael keamidi, telep kupra pel doramidi, gonga kemna deiyo neng kurami.

8 Obed-Edomdi deipupa, dadeipdanen yakaramyanen, deipipa kurami nengda, ada erdi deiamu neng cap, anengdi deiami nyapu cap, aneng sun nyapsilip yumada, ila kael keami neng kurami. Ada, Allah er si eremna ati pel dona deiyo keca kupmanto neng kurami. Obed-Edomdi deiamu neng cap, sun tara neng cap, sun nyapu cap yumada, denge weik enam puluh dua (62) neng kurami. Sun ayala neng yumada, pel pio telep kupra don nengpu kurami.

9 Ange utopu tonda, tenpu ngebo er si Meselemya, erdi deiamu nyapu cap, er kayapu neng sisa cap, sun yumada pel pio telep kupra don nengpu kurami. ‘Aneng yumadi, Allah er si eremna ati wengban bisi buplan damai kalengkameng’ tenen, aneng yuma nukra delapan belas (18) neng wepra deipi. 10 – 11 Tonda, ‘Allah er si eremna ati buplan damai kalengkameng’ tenen, Merari yala nengdi deipipa, dadeipdanen yakaramyanen, deipi ngebo er sida Hosa kuramu. Hosa erdi deipu ngebo, er si Simri wepra deipi. Hosa er nyapuda, sal nyapu dumbari di deiamu. Hosadi menmena deiamu mida, angebo Simri men kuramu dinin, Hosadi angebo wepra deipudi, deiyo keca karepupa, gonga kemna ngebo kuramu. Hosadi deiamu neng, yuk nengda, sun sida, Hilkia cap, Tebalya cap, tonda Zakaria cap deiamu. Hosadi deiamu neng cap, sun tara neng cap, sun nyapu cap yumada, denge pio weik, tiga belas (13) neng kurami.

12 Aca deiki tara sekmepu neng yumada, Allah er si eremna ati bisi buplan damai kalengna tep, wepra deipipa, anengdi apel talepra doramidi, deiyo kepra gonga kemna neng kurami. Sun aneng cap, sun yala neng cap, sun nyapsilip cap peda, Allah er si eremna ati buplan damai kalengna pel cap, akati damai dinin, yuk pel cap talepra dorami. Ada, sun kayapu neng sisa, sun Lewi yala nengdi melimamitopu, sun peda apel talepra dorami. 13 Sun ayala deiyo neng yumada, ila yala neng cap, tonda yambul yala neng cap, sun yumadi, ‘Ayala nengdi Allah er ati dam wengbana bisi buplan damai kalengkameng do? Ange do, ortarange do?’ tenen, kael kemna peten kemna keca undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} dona pel donmaiya deiki di kael kepidi, abuplan yuma bokra, ayala-yala neng yuma tep, yuk-yuk karepipa, anengdi kalengami. 14 ‘Ange do, ange do?’ tenen, wena deiyo keca, tonda kael keman petenkemna keca, er si undi pel doramya deiki di, undi kemaiyanen, Allah er si eremna ati, keteng yakan tara bisi buplan damai kalengna tep nengeda, Selemya er deiki dourbeupa, er si katuai kupka cadi, abuplanda er yala nengdi kalengami.

Ukupu pangeda, Selemya erdi deipu ngebo Zakaria, kange di ton cap undi keca kepmaipa, angebo er si katuai kupu pangeda, utara dapu tara bisi buplan damai kalengamu. Angebo Zakariada, ila di kael kemna cap, tonda ila di tenena cap, ‘Ukupkurume, ukupkurume,’ pepra telep kunada ake,’ pepra, telep upu pena ngebo kuramu. 15 Allah er si eremna ati wengban bisi buplan iknapi dam tara ngeda, undi keca kepmaiyanen donmaipa, Obed-Edom er si katuai kupka cadi, er cap, er nyapsilip capdi, abuplan kalengami. Ange utopu, undi ton kemaiyanen donmai pangeda, Obed-Edom erdi deiamu nyapuda, Allah er si eremna ati bung keca derin ati tep, kalengna nengpu wepra deipipa, apel talepra dorami.

16 Ange utopu, undi keca ton cap dopra kemaiyanen konum kupu pangeda, Supim cap, er nyapsilip cap, sun si katuai kupka cadi, sunda keteng dangban tara buplan tep kalengami. Utopu ton, undi keca ton cap kepmai pangeda, Hosa cap, er nyapsilip capda, ton buplan er si Syaleket bisi buplan damai kalengna pel karepipa, apel talepra dorami. Abuplanda, Allah er si eremna ati, itara welerban bisi banai tep akwamu. Abuplan yuma kalengna ketengda, utotopu bokra karepipa, ton yala neng weik, ton yala neng metek gume. Aneng-aneng yuma dinin, yuk-yuk dopra, sun pel don ketengda utopu dinin, yuk keteng ton, yuk keteng ton punupra pel dorami.

17 Tumi-tumi yuma utopu kurami. Ada, Lewi yala nengdi, ortara keteng yakan tara buplanda, sun ngangtan bari nengdi, atara buplan kalengami. Utopu dapu tara peda, sun dumbari nengdi atara buplan kalengami. Utopu ton, iknapi dam tara peda, sun dumbari nengpu atara buplan kalengami. Dinino, Allah er si eremna ati pumbon bung keca derinai yuma kalengna tep nengeda, dumbari nengpu kalengami dinin, butene-butene kepra kikiman kalengami. Ada, aketeng ton, aketeng ton, tenpu ati dinin, nimi butene-butene kepra kalengamrei.

18 Keteng wengban tarada, nimi bungnai cap, tonda Allah karen keca ketenemnai cap, er si Pabilyun, atarada ngantan bari neng kalengami. Dumbari nengda, sundi akati welerban bisi tep kalengami. Tonda sun yuk neng buteneda, animi bungnai Pabilyun tara, sundi kalengamrei. Akalengna neng ton wepra deipipa, apel talepra dorami. 19 Aca di deiki tara sekmepu nengda, sun gung yumada, Korah yala nengdi deiami neng cap, tonda Merari yala nengdi deiami neng cap, kuramidi, Allah er si eremna ati wengbana bisi buplan damai, yuk-yuk bisi kalengna tep bokra deipipa, apel talepra dorami.

Allah Yahweh er si eremna ati neitamai yuk-yuk pel dona tep, bokra karepi upu

20 Sun Israel yala nesala yumadi, ataru ton, ataru ton, sun nai bo Allah Yahweh tep, ‘Er si erepra, er gispal dona tep, co bo bulupra deipmepu ngeda, er tepapu karenkamepe’ tenen, Allah er si eremna ati damai kareryakarami. Aco bo cap, gel uang logam cap, kareryakaramipa, sun Lewi yala neng dipapu akeca dopra, telep bekin pumbon dongoramidi, pio kalengami. 21 Tenpu ngebo er si Ladan, aco bo kareramipa, doupra abekin dongorami ngeda, erdi ton kalengamu. Ladan erda, er nai bo Gersondi deiamupa, kuramu. Ladan, erda ware kuprap yala neng gungda, sun apu bo kuramu. Ton ngeboda, er si Yehiel, erdi deiyo kepra, gonga kemna ngebo kupudi, abekin kalengami neng, tenpu gung tep nengeda, sun deiyo ngebo kuramu.

22 Tonda, aco bo dongorami bekin kalengna deiyo neng ton ake. Ada, Yehiel erdi deiamu neng buteneda, Zetam cap, tonda Yoel cap, sundi Allah er si eremna ati dinin, bung keca yala-yala derina tep wilipra deipi ati cap, tonda Allah Yahweh er karerami co bo dongon co bekin capda, ‘Sundi kalengkamreng’ tenen, wepra deipi. 23 Nimi si ton Amram cap, Yizhar cap, Hebron cap, tonda Uziel cap, sun peda deiamipa, dadeipdanen yakaramyanen, yana deipi nengda, sun peda apel dona deiyo neng kuna tep, wepra deipipa apelpu talepra dorami. 24 Tonda, Amram yala neng, sundi deiami nengdi deipi ngebo, er si Subuelda, gonga kemna deiyo ngebo kepra deiamipa, kuramudi aco bo dongorami bekinda erdi kalengamu. Subuelda, Musadi deiamu ngebo Gerson deiamu. Subueldi Allah Yahweh er si eremna ati akeca-keca yala-yala yuma duyakaramipa, akati deriramudi, kalengna deiyo ngebo kuramu.

25 Er angebo Gersonda, er weit bo Elieser, erdi deipupa, dadeipdanen yakaramyanen, yana deiamipa, sundi deiami neng ton, apelpu talepra kikiman dorami. Elieserdi deiamu ngebo Rhabya cap, Rehabyadi deipu ngebo Yesaya cap, Yesayadi deipu ngebo Yoram cap, Yoramdi deiamu ngebo Zikri cap, tonda Zikridi deiamu ngebo Selomit. Sun aneng yumada, apelpu talepra doramidi, akati pumbon keca kalengami.

26 Uda, Zikri erdi deipu ngebo Selomit cap, er kayapu neng sisa cap, sun nyapsilip cap, sun yumada, nimi deiyo-deiyo nengdi Allah tep kunumna weik keca cap, telep lengna keca cap, dopra kareryakarami keca yumada, dororamidi Allah er si eremna ati pumbon dongoramipa, moupra kalengami. Ada, Israel nesala, sun ila nimi deiyo ngebo Raja Daud cap, Israel nesala yala-yala yuma sun deiyo neng cap, jen talena neng, sun deiyo-deiyo nengdi, sun amutara gungda, seribu (1.000) neng tep upu perami neng cap, tonda seratus (100) jen talena neng tep, upu perami deiyo neng cap, tonda yuk tali jen talena neng, yambul deiki tara kurami jen talena neng cap yuma peda, sun aneng yumadi Allah Yahweh tep, ‘Akecada er ngepu kupkamre’ tenen, pio telep kunumna weik keca dopra kareramipa, Selomit er deipgerekdanen yakan nengdi dopra, mawa deriramidi, kalengami.

27 Sun ajen talena deiyo nengdi, doupra yana Allah tep kareryakarami keca yumada, dana-dana tara kurami neng tep, nimi podarbenami mutu neitamai di, anesala popra bisbisa kapidi, sun karen mutu nengdi taleami keca dalupra dopramidi, telep keca ton Allah tep kareryakaramipa, Selomit cap, er kayapu neng sisa cap, er nyapsilip cap, akeca yuma doupra, ‘Allah Yahweh er si eremna ati, yambul mali kwamunge lepsisikra donkameng’ tenen, akati neitamaipu sundi deriyakarami keca kalengami.

28 Ange utopu ton, amenda kupkamu keca diramudi lap pena cap, Allahdi pediramu upu gekepra, lap pena cap kuramu ngebo, nabi Samueldi, ‘Angeda Allah er ngepu kupkamre’ tenen, Allah tep telep keca kareramu. Tonda, menop taru Israel nesala sun ila deiyo ngebo Raja Saul cap, amenda taru er yo punupu ngebo Raja Daud cap, tonda er amutara kuramrei jen talena tep, deiyo kepra kuramrei neng, ada Nardi deipu ngebo Abner cap, tonda Zeruyadi deipu ngebo Yoab cap, sun aneng yumadi, ‘Allah er ngepu kupkamre’ tenen, karerami keca dopra, Allah er si eremna ati pumbon dongorami. Ukupnopda, Selomit cap, er nyapsilip capdi, akeca telep kupra deriramidi, kikiman moupra kalengami.

Lewi yala neng dinin, sun gerekdanen yakarami nengdi, yuk pel bokra karepinge tep, seki upu

29 Nimi si Yizhardi deipupa, dadeipdanen yakarami nengdi deipi ngebo, er si Kenanya, er cap, erdi deiamu neng yuma capda, Allah er si eremna ati pumbon gum dinin, akati bura tarapu, yuk pel dona deiyo keca bokra karepipa, dorami. Tonda, anengdi Israel nesala kurami tara neitamai dinin, yuk-yuk mutu neitamai di, apel talepra dorami. Ada, yuk deiyo kemna pel, upu lepsisikra pena deiyo pel ton taleami. Tonda, sundi, ‘Telep kuna ngeda, ake, mali kuna ngeda ake,’ pepra, wepra deipnedi, nimi upu bongdina deiyo neng kuramidi, apel ton talepra dorami. 30 Tonda, Israel mutu neitamai dinin, Yordan me goupra, ortara keteng wengban tara neitamaida, ‘Allah Yahweh tep, apel donkamepe,’ teneraminge yuma cap, tonda Raja Daud er melimna tep, ‘Pel donkamepe,’ pepra deiaminge capda, nimi si Hebron, erdi deiamupa, dadeipdanen yakarami nengdi deipi ngebo, er si Hasabya, er wepra deipipa, apel talepra, upu pena deiyo ngebo kuramu. Tonda, Hebron er kayapu neng sisa, sun yala neng cap, sun nyapsilip cap yuma, Hasabya tep melimami. Aneng sun gung dengeda, seribu tujuh ratus (1.700) neng wepra deipidi, bokeipipa, apelpu talepra dorami.

31 Hebron erdi deiamupa, dadeipdanen yakaramyanen, deipi ngebo Yerari, er doprapidi, ‘Nun yala neng tep, nimi deiyo kepra, gonga kemna ngebo kunkamre’ tenen, wepra deipipa, apel talepra doramudi, upu peramu. Raja Dauddi, Israel nesala yuma talena tep, deiyo kepra upu peramupa, keteng tamun empat puluh (40) konum kupyopda, ataruda, Raja Dauddi, “Telep deiyo neng ton wepra deipkamna cadi, dirbenkamrume, ukupkurume,” pepra deiputopu, ila kael nengdi, Gilead mutu neitamai di, ‘Ware yala neng kan-kan di do? Tonda, tek sisi ila kael keami nengdi, akeca-keca yuma telep kupra pel donge nengda, dan cei do?’ tenen, Gilead mutu neitamai yuma dipetepra embaramidi, Yazar mutu neitamai di kuramipa, telep neng weik epi.

32 Aneng kan-kan neitamai di, angebo Yerari epidi, dopra Daud damai duyai pangeda, Raja Dauddi, ‘Angeboda nimi deiyo ngebo kupkamre’ tenen, wepra deipu. Ukupu dingeda, Yerari er kayapu neng sisa cap, sun yala deiyo neng cap, wepra deipu. Ukupkopda, ‘Aneng yumadi, sun Ruben yala neng kunung mutu cap, Gad yala neng kunung mutu cap, tonda Manasye yala dinin, neitamai di bokra, keteng yakan tara bena kurami neng, sun mutu cap, ukupu wepra deipman deiyo nengdi, upu pena deiyo neng kunkamenge. Awepra deipka deiyo neng yuma, sun dengeda weike, dua ribu tujuh ratus (2.700) neng kurami. Atep, atara neitamai yumada, angebo Yerari cap, er tara neng capdi, amutu nesala Allah Yahweh er tep pel doraminge cap, Raja Daud tep pel doraminge capda, sun Yerari yala neng dipapu, ‘Ukupkamepe,’ pepra, gonga kemna deiyo neng kurami.