1 Chronicles 27

Israel nesala, sun jen talena tep deiyo-deiyo neng cap, sun amutara jen neng cap tep, seki upu

1Aca di sekmupu nimi si yumada, Raja Daud tep melimami. Sun aneng yumada, jen talena deiyo neng kurami. Ton nengda, sun yala neng teppu taleami. Ton nengda, yuk jen neng, sun amutara sun gung seratus (100) neng taleami. Ton nengda, sun amutara sun yuk jen neng, sun gung seribu (1.000) neng taleami. Ton nengda, ajen talena deiyo neng amutara kurami dinin, sun peda deiyo kepra kurami. Ajen talena deiyo neng, sun gung yuk-yuk wepra deipi dinin, tenpu gungda, denge pio weik, dua puluh empat ribu (24.000) neng wepra deipi. Keteng tamun, keteng tamun neitamai yumada, sun gung tenpu-tenpudi, yuk-yuk dinin, tenpu war deiki di, amutu kalengamidi, Raja Dauddi, “Ukupkurume,” peiamutopu pel dorami. Orware tep nengeda, yuk gungdi, apelpu talepra dorami. Utopu kupra punupra kupbaramidi, amutu kalengamidi pel dorami. Sundi pel dorami ngeda ake.

2Keteng tamun, keteng tamun yuma dinin, menmena war yaryopda, Zabdieldi deipu ngebo, er si Yasobamdi, awar pel dorami jen talen neng tep, deiyo kepra upu pena ngebo kuramu. 3Angebo Zabdielda, nimi si Peresdi deiamupa, dadeipdanen yakaramyanen, yana deiami ngebo kuramu. War tenpunge neitamai di, er dipapu deiyo ngebo kuramnga deiki di, er jen talena neng, sun gungdi amutu kalengami. 4Keteng tamun yuma, war butene ngeda, Ahoi yala ngebo er si Dodai, erdi er yala gung tep, deiyo kepra taleamupa, sundi apelpu dorami. Dodai er amutara melimna tep, yambul deiyo utopu kuramu ngeboda, er si Miklot kuramudi apel doramu. Sun yala gungda, nimi denge weik dua puluh empat ribu (24.000) neng kurami.

5Keteng tamun yuma, ware weneri ngeda, imam ngebo er si Yoyada, erdi deipu ngebo er si Benayadi, er yala gung tep deiyo kepra taleamupa, sundi apelpu dorami. Sun yala gungda, nimi denge weik dua puluh empat ribu (24.000) neng kurami. 6Angebo Benayada, Raja Daud er amutara kurami ila puto weik jen nengda, tiga puluh (30) neng kuramya kan-kan, er ton dakuramu dinin, erda agung tep gonga kepudi, deiyo kepra, sun deiyo ngebo kuramudi upu peramupa, sundi Raja Daud cap nimi porbarami. Benayadi deipu ngebo, er si Amizadab, erdi er nai bo, er amutara kuramudi, melipra pel doramu.

7Keteng tamun yuma, ware dumbari ngeda, Yoab er kabo sisa, er si Asaelda, er yala gung tep deiyo kepra taleamupa, sundi apelpu dorami. Asaeldi deipu ngebo, er si Zebadja, erdi er nai bo konum menmena depu pangeda, er nai bo punuprapudi, deiyo kepra sun yala gung tep gonga kepudi, melipra pel doramu. Sun yala gungda, nimi denge weik dua puluh empat ribu (24.000) neng kurami. 8Keteng tamun yuma, ware pamubari ngeda, Yizrahdi deipu ngebo er si Samhutda, erdi er yala gung tep, deiyo kepra taleamupa, sundi apelpu dorami. Sun yala gungda, nimi denge weik, dua puluh empat ribu (24.000) neng kurami. 9Keteng tamun yuma, ware ngantan bari ngeda, Ikhesdi deipu ngebo, er si Irada, erdi er yala gung tep, deiyo kepra taleamupa, sundi apelpu dorami. Sun yala gungda, nimi denge weik dua puluh empat ribu (24.000) neng kurami.

10Keteng tamun yuma, ware yoneitam bari ngeda, Efraim yala nengdi deiamipa, dadeipdanen yakaramyanen, yana deiami ngebo, er si Helesda, ila ati arum sida Peloni mutu neitamai kuramu. Helesdi er yala gung tep, deiyo kepra taleamupa, sundi apelpu dorami. Sun yala gungda, nimi denge weik dua puluh empat ribu (24.000) neng kurami. 11Keteng tamun yuma, ware banbari ngeda, Zerah yala nengdi deiamipa, dadeipdanen yakaramyanen, yana deiami ngebo, er si Sibkaida, ila ati arum sida, Husa mutu neitamai kuramu. Sibkaidi er yala gung tep, deiyo kepra taleamupa, sundi apelpu dorami. Sun yala gungda, nimi denge weik dua puluh empat ribu (24.000) neng kurami. 12Keteng tamun yuma, ware topnebari (9) ngeda, Benyamin yala nengdi deiamipa, dadeipdanen yakaramyanen, yana deiami ngebo, er si Abiezerda, ila ati arum sida, Anatot mutu neitamai kuramu. Abiezerdi er yala gung tep, deiyo kepra taleamupa, sundi apelpu dorami. Sun yala gungda, nimi denge weik dua puluh empat ribu (24.000) neng kurami.

13Keteng tamun yuma, ware morokyo (10) ngeda, nimi si Zerah, erdi deipu ngebo, er si Maharaida, erdi er yala gung tep, deiyo kepra taleamupa, sundi apelpu dorami. Sun yala gungda, nimi denge weik dua puluh empat ribu (24.000) neng kurami. Angebo Maharaida, ila ati arum sida, Netofa mutu ngebo kuramu. 14Keteng tamun yuma, ware kum dam ngeda, Efraim yala nengdi deiamipa, dadeipdanen yakaramyanen, yana deiami ngebo, er si Benaya, erda ila ati arum Piraton mutu ngebo kuramu. Sundi angebo wepra deipipa, er yala gung tep, deiyo kepra taleamupa, sundi apelpu dorami. Sun yala gungda, nimi denge weik dua puluh empat ribu (24.000) neng kurami.

15Keteng tamun yuma, ware amul dam di ortara dua belas ngeda, nimi si Otniel, erdi deipupa, dadeipdanen yakaramyanen, yana deiami ngebo er si Heldai, ila ati arum, Netofa mutu ngebo kuramu. Angebo wepra deipipa, erdi er yala gung tep, deiyo kepra taleamupa, sundi apelpu dorami. Sun yala gungda, nimi denge weik, dua puluh empat ribu (24.000) neng kurami.

Israel mutu neitamai kurami neng, sun yala nesala tep, deiyo kepra gonga keamidi, upu perami neng tep, seki upu.

16Israel tara neitamai yumada, Israel yala nesala deiyo kepra taleamidi, upu perami neng, sun sida ake. Nimi si Zikri, erdi deipu ngebo, er si Elieser, erdi deiyo kepra, talepra kuramudi upu peramu. Tonda, sun Ruben yala nesala tep, taleamudi, er dipapu upu peramu. Tonda, nimi si Maakha, erdi deipu ngebo, er si Sefaca, erdi Simeon yala nesala tep, deiyo kepra taleamudi upu peramu. 17Lewi yala nesala tep, deiyo kepra taleamudi, upu peramu ngebo, er sida Hasabya kuramu. Er nai boda Kemuel kuramu. Harun yala nesala tep, deiyo kepra taleamudi, upu peramu ngebo, er sida Zadok kuramu.

18Yehuda yala nesala tep, deiyo kepra taleamudi, upu peramu ngebo, er sida Elihu Kuramu. Tonda er, Raja Daud, er du bo kuramu. Isakar yala nesala tep, deiyo kepra taleamudi, upu peramu ngebo, er sida Omri. Er nai boda, Mikhael kuramu. 19Zebulon yala nesala tep, deiyo kepra taleamudi, upu peramu ngebo, er sida Yismaya kuramu. Er nai boda, Obaja kuramu. Naftali yala nesala tep, deiyo kepra taleamudi, upu peramu ngebo, er sida Yerimot kuramu. Er nai boda, Azriel kuramu. 20Efraim yala nesala tep, deiyo kepra taleamudi, upu peramu ngebo, er sida Hosea kuramu. Er nai boda, Azazya kuramu. Manasye yala nesala dinin, neitamai bokrapidi, Yordan me goupra ortara, keteng dangban tara kurami nesala tep, erdi deiyo kepra taleamudi, upu peramu ngebo, er sida Yoel kuramu. Er nai boda, Pedaya kuramu.

21Manasye yala nesala dinin, daneitamai bokrapidi, Yordan me goupra ortara, keteng yakan tara dinin, Gilead mutu kurami nesala tep, deiyo kepra taleamudi, upu peramu ngebo, er sida, Yido kuramu. Er nai boda, Zakaria kuramu. Benyamin yala nesala tep, deiyo kepra taleamudi, upu peramu ngebo, er sida Yaasiel kuramu. Er nai boda, Abner kuramu. 22Dan yala nesala tep deiyo kepra taleamudi, upu peramu ngebo, er sida Azareel kuramu. Er nai boda, Yeroham kuramu.

23Uda, nimi deiyo ngebo Raja Daudda, sun nimi akuramya neitamai yumada, sun anesala konum nerami keteng tamunda, dua puluh (20) di dipra, dutara keamne nengda men nuku. Aneng men nuku deiyoda, Allah Yahwehdi, “Israel nesalada, dipmengepa, dadeipdanen bankameng nengda, denge pio weik kununge. Im deiki kuru weika di ingamretopu kunkamenge,” pepra, pedina upu deiki di, peiamnga cadi, Dauddi sun nena metekanunpu kurami nengpu, men nuku. 24Tonda, nimi si Zeruya, erdi deipu ngebo Yoabdi, Israel nesala sun nimi si sengna pel gonga kepra, doramu dinino, adipapu men gawal daku. Deiyoda, Allahdi, ‘Sun tara neng si sengna gume. Angeda ne songe,’ konum peipupa, Yoabdi konum kael keamnga cadi, ‘Nun Israel nesala deiki, Allahdi ikin keca deipserur’ tenen, nimi si men sekra gawal daku. Ada asi seknya deiki, Allah di yu tenepseredi, wenepra ikin keca deipserur’ tenena tep, apel tapu. Ange tep nengeda, akeca-keca yuma kuna tep sengami buku, nimi deiyo ngebo Raja Daud, er kuramu keca sengami buku neitamaida, ‘Israel nesala ware kupra kunung do?’ tenen, sekra deipi ngeda, abuku sengna deiyo nengdi, ange men seki.

Nimi deiyo ngebo Raja Daud, er amutara yambul deiyo kepra, yuk pel talepra kurami neng tep, seki upu

25Nimi deiyo ngebo Raja Daud, er amutara yambul deiyo kepra, yuk pel talepra kurami nengda, sun si seki ngeda, adinin utara sekmepu. Raja Daud, er ati neitamai kunumna weik bung keca derinai cap, talena cap tep, tenpu ngebo er si Azmawet weipra deipupa, apel talepra kuramu. Azmawet, er nai boda, Adiel kuramu. Ange utopu ton, yuk kunumna weik keca kwamngai yumada, yuk ngebo er si Yonatan wepra deipupa, apel talepra kuramu. Yonatan er nai boda, Uzia kuramu. Yonatandi, kalengamu bung kecada, ila ati arum neitamai gum dinin, bura tara neitamai mawa deriramyai cap, tonda ila ati arum yuk-yuk dinin, ila mambul ati arum doramya neitamai, mawa deriraminge cap, yambul ati arum doramya, neitamai di, mawa deriraminge cap, tonda, ‘Yu nengdi poryasenge taruda, epkamep teneraminge cap tonda, ‘Nun wai dam di kipra, mawa deriramepyai epsunung,’ teneramidi, ila lyom ati doramidi, bung keca deriraminge yumada, Yonatandi gonga kepupa, er tara nengdi akeca yuma tep kalengami.

26Ati dam cap, bura tara cap, wa pena pel donai cap, tu palipra koun keca kouna tep pel don nengda, tenpu ngebo er si Kelubdi deipu ngebo, er si Ezridi, deiyo kepra apel taleamudi, ‘Ukupkurume,’ pepra, gonga kemna deiyo ngebo kuramu. 27‘Anggur wada ukupra pepkurume,’ pena tep deiyo ngeboda, Rama mutu ngebo, er si Simeidi, gonga kepra apel taleamudi, deiyo ngebo kuramu. Ange utopu, ‘Anggur du dakra taikmumdi, anggur me mokon gwepra deipkurumaida ake,’ pena tep, deiyo ngeboda, Syifmi mutu ngebo, er sida Zabdi, erdi gonga kepra, apel taleamudi, deiyo ngebo kuramu.

28Zaitun du mouramu co cap, Arah co du mouramu co cap tep, keteng dangban tara mutu buma bukuai di dopra, derina tep, “Ukupkurume,” pena deiyo ngeboda, Gederi mutu ngebo er sida, Bahal-Hanan ngebodi gonga kepra taleamudi, deiyo ngebo kuramu. Zaitun du taikra, zaitun minyak mokon me derinai tep, upu pena deiyo ngeboda, Yoasdi gonga kepra, apel taleamudi, ila deiyo ngebo kuramu. 29Sapi bisam peirami neng tep, ila pala ban mutu, Saron mutu damaida, “Ukupkupkurume,” pena deiyo ngeboda, Saron mutu ngebo er si Sitrai, erdi gonga kepra apel taleamudi, deiyo ngebo kuramu. Mutu pirmanai dinin, ban tara sapi bisam peina tep nengeda, tenpu ngebo er si Adlai, erdi deipu ngebo, Safatdi apel deiyo ngebo kuramu.

30Unta bisam peiraminge tep, “Ukupkurume pena deiyo ngeboda, nimi si Ismael erdi deiamupa, dadeipdanen yakaramyanen, yana deiami ngebo, er si Obil, erdi gonga kepra apel taleamudi, deiyo ngebo kuramu. Keledai ner bisam tep, “Ukupkurume,” peramnga deiyo ngeboda, Meronot mutu ngebo, er sida Yehdeyadim, gonga kepra apel taleamudi, deiyo ngebo kuramu. Utopu ton, domba bisam cap, kambing bisam cap tep nengeda, Hagri mutu ngebo, er si Yazis, erdi, “Ukupkurume,” peramudi, gonga kepra apel taleamudi, deiyo ngebo kuramu. 31Aca di deiki tara sekmepu nengda, sundi Raja Daud erdi taleamu keca tep, moupra kalengamidi, sun apel dona tep, kalengna deiyo neng kurami.

32Raja Daud, er nai bo, cap, tonda er kabo sisadi deipu ngebo, er si Yonatanda, nimi deiyo ngebo Raja Daud tep, “Ukunada telepe, angeda mali kunangepu kurure,” pepra, er upu melimna tep perang deiyo ngebo kuramu. Yonatanda, sengna keca yumada, er pio ila kael ngebo kuramu. Tonda, Telep ngeda ake, mali ngeda ake’ tenen, ila kael keamu ngebo kuramu. Er cap, yuk ngebo er si Yehiel cap, sun butenedi, Raja Daud erdi deiamu sal nyapu yuma tep, “Telep kunada ake,” pepra, kael kemna deiyo keca yala-yala yuma peteremamrei. Yehiel er nai boda, Hakmoni kuramu. 33Yuk ngebo er sida Ahitofel, erdi nimi deiyo ngebo Raja Daud tep, “Ukunada telepe, angeda mali kunangepu kurure,” pepra, er upu melimna tep peramnga deiyo ngebo, tenpu ngebo ton kuramu. Angeda yambulanun ton, Arki mutu ngebo, er sida Husai, erda, nimi deiyo ngebo Raja Daud, er kap sisa kuramnga cadi, Raja Daud er dipru neitamai kwamu ngeda, angebo tep lap peramupa, er cap upu sisingamreidi, sun kikiman meneng damaipu kuramrei.

34Uda, Raja Daud, er upu melipra pena deiyo ngebo, Ahitofel konum depu pangeda, er yo pununa tep, yuk ngebo er si Yoyadadi apel talepra doramudi, upu melipra peramu. Yoyada er nai boda, er si Benaya kuramu. Tonda, amenda taruda, Yoyada depu pangeda, tenpu ngebo ton, er si Abiatar, erdi Yoyada yo punupudi, Raja Daud, er upu melimna deiyo ngebo kuramu. Tonda, nimi deiyo ngebo Raja Daud, er jen talena neng, sun deiki tara deiyo ngeboda, Yoab wepra deipupa, apel talepra kuramu.