1 Chronicles 28

Nimi deiyo ngebo Raja Dauddi, Allah Yahweh er si eremna ati dona tep, “Ukunkamrume-ukunkamrume,” peipu upu

1Raja Dauddi upu pepupa, Israel mutu neitamai talepra kurami nimi deiyo neng yuma, Yerusalem mutupu bulupra yai. Yai dingeda, sun nimi yala yuk-yuk kuramya utopu dinin, sun nimi deiyo talepra kurami yala neng cap, Raja Daud tep, mambul pel melipra deiki tara pel dona deiyo neng cap, upu talena neng yuma cap bulupra yai. Tonda, sun jen talena neng denge weik seribu (1.000) neng talerami jen deiyo neng cap, tonda denge weik seratus (100) jen talena neng talerami deiyo neng cap, Raja Dauddi taleramu bung keca yuma mawa derina cap, kalengna deiyo neng cap bulupra yai. Tonda, Raja cap, erdi deiamu nyapu cap, sun gam kure keca peina tep, upu pena deiyo neng cap, tonda Raja Daud er kuramu ila mambul ati upu talena deiyo akati pumbon pel dorami deiyo neng cap, sun ila puto weik kuramya cadi, nimi weik porami. Animi pon jen talena neng cap, tonda, sun jen talena neng dinin, tali jen neng cap yumada, bulupra Yerusalem mutu neitamaipu yai.

2Bulupra yai pangeda, nimi deiyo ngebo Raja Daud tekroudi, anesala yuma tep pepu. “Ne kayapu neng cap, amutu-mutu neitamai kuramrumpa, nedi talesenun neng yuma cap tep, ne pepkun upuda, moupra gekepkurume. Menop taruda, ne Dauddi, ‘Allah Yahweh peiamu upu sekra deipi ngeda, pio telep co bekin pumbon dongoraminge, er si Peti Perjanjian, akeca dopra derina tep, pio telep ati dopnapu kupkamne,’ teneramsi. Tonda, ‘Nun nai bo Allah Yahweh, er si eremna cap, erda akeca-keca yuma deiki tara kuredi, er cap, er mambul keca cap, pio akunkamrur ati dopkamne,’ teneramsi. Ukupra teneramsa tep nengeda konuma, Allah Yahweh er ati dona tep, pio telep keca yala-yala yumada, konum ketenepra derinune. 3Ukupra kuramsidi, teneramsi dinino, Allah Yahwehdi ne tep konum pepneu. “Gume, ne Allah tep gispal dona cap, si eremna cap atida, kan Dauddi pio men dopkamnereme. Deiyoda, kandi nimi podan taruda, yuk mutu jen talen nengda, pio weika di konum popmumpa, sun yapi weika di konum embeua tep, ne si eremna ati men dopkamnerume,” pepneu.

4Dinino, Allah Yahwehda, nun Israel nesaladi si eremnup ngebo Allah Yahwehdi, Yehuda yala neng tep, ‘Ne pio telep mawa neng kunkamnenge. Tonda, sun kan-kan neitamai di, ila deiyo talepra Raja kupmengedi, Israel nesala talenkameng,’ tenen, Israel yala nesala weik akurami dinin, ‘Yehuda yala nengda, Raja neng kunkameng’ tenen, Yehuda wepra erepu. Adininda, Yehudadi deiamupa, dadeipdanen yakarami yala neng, sundi deiami neng kan-kan di, ne nai bo sisa wepra ereipu. Adinin siryada, ne pe tep wepra ereipneudi, ‘Israel nesala yuma tep, pio talepredi, sun ila nimi deiyo ngebo Raja kunkamre’ tenen, erepra deipneudi, ateneiamneutopu, ukutaruda, Israel nesala tep talenune. 5Ukupra deipneu dingeda, er dipapu nedi deiamsi nyapu yumada, weika di karepneu. Tonda, akarepneu nyapu yuma neitamai dinin, ne mi Salomo tenpu tep, ‘Israel mutu neitamai kunung nesala talepra, Raja kunkamre’ tenen, wepra deipu. Ada, Allah Yahweh, erdi akeca-keca deiki tara kuredi, Israel nesala yuma talerur dinin, er tuai tara melimna tep, ne mi Salomo tep, ila deiyo keca kareprepa, erdi sun Israel nesala yuma talenkamre ja.

6Atep nengeda, Allah Yahwehdi ne tep pepneu upuda ake. “Kan mi Salomoda, ne si eremna ati cap, akati dana-dana tara kupkamrai capda, er dipapu dopkamnere. Deiyoda, ne Allahdi, kan mi Salomo tep, ‘Ne mi sisa kunkamnere. Ukupnerya utopu, nedi er nai bo sisa utopu kunkamne’ tenen, angebo konum wepra deipsi. 7Raja kuna tep, erepra deipnepa, er Salomoda, ataru kuramretopu, amenda taru peda, pio tek sisi tenepneredi, ne Allahdi, “Angeda kunkamrume, angeda pio men kunkamrume,” pepra, deiamsi upu yumada, pio moupra tenepredi, talepra dombanapu kuryopda, ne puto er deiki deipnepa, er dipapu sun Israel nesala pio tep talepra, ila deiyo ngebo Raja kunkamre. Ne puto deikida, erdi Israel nesala talenkamser ngeda, men gum kupkamre.” Allahdi peipu upuda, Dauddi sun Israel nesala tep, lap pepupa gekepi.

8Upepu dingeda, nimi deiyo ngebo Raja Dauddi, aupu ton dukdongopra pepu. “Uda ukutaruda, uo, ne talepra kunun mutu nesala yumada, nun nai bo Allah, er sipu eremnup nesala, er nyapu sisi kurum nesala yumada, acapu Allah Yahwehdi dinmaseraipu, bulupmumdi er upu gekepra dinkamarume. Atep, nedi sun tep, pio tek sisi moropsene. Ada, sun nai bo Allah Yahwehdi, “Angeda kunkamrume, angeda pio men kunkamrume,” pepra deiamseu upu tep, ‘Deiyo aca,’ tenen, pio moupra tenerumudi, kael kemkamrume. Tonda, aupupu moupra talepmumdi, dombanapu kunkamrume. Uda, ukupmumyopda, sun cap, sundi derinkamrum nyapu yuma capda, pio tep, telep mutu neitamaipu kunkamrume. Sun depmumyopda, sun nyapu sisadi, amutu tupa talenkamenge. Acapu kungedi sundi deipmengepa, dadeipdanen bankameng nyapu yuma peda, amutu deiyo neng kupra kupbangedi pio akunkamenge.

9Tonda, ne mi Salomo, nedi er si eremamsi Allah, ne nai bo Allah tep, kan peda kael kemkamrume. Allah er sipu pio eremkamrume. Ada, kan kange dipru yuma moupra tenepmemdi, ‘Ukupkun do, gum do?’ tenen, tenimtona pio men kunkamrume. Pio pe deipra, er teppu, talepmemdi, er sipu eremkamrume. Ada tali tep gume. Deiyoda, Allah Yahweh erda, nimi dipru neitamaipu kure keca yuma wepredi dirure. Tonda, nimi dipru di tenenmange nge cap, ‘Ukupkamepe,’ tenenmange nge cap yumada, kael kemrure. Uda, kandi er tep, ‘Er kange derirur keca epnedi, kael kepkamne. Angepu talepra kunkamne,’ tenepmem dingeda, tek sisi kan adipapu er kure keca tep epmemdi, er pe tep kael kemkamrume. Dinino, ange ukuna gum di, er tapmemdi, men dombememnyopda, er pedi, ‘Gume, angebo ne songe,’ tenepkeredi, pio tep tapkamkere, men melimkamkere. 10Ange yuma tep nengeda, kandi pio moupra tenepkamrume. Ada, kan nai bo Allah Yahwehdi konum weamkeudi, ‘Ne atida, er di pio yuk wepra dopkamnere. Ne pe kunkamnai, pio telep lengnai peda dopra keteneipkamnere,’ konum tenemkeue. Atep, ukutaruda, kan adipapu moupra tenepmemdi, puto di pio pe deipra, apel donkamrume.” Dauddi er mi Salomo tep pepu.

11Aupu yuma konum upepu dingeda, Raja Dauddi er mi Salomo tep, Allahdi, ‘Ukupra dopkamnerume,’ pepra peipupa, Dauddi aupu sekra ketenepra deiamunge dopra, Salomo tep karepu. Ada, Allah Yahweh, er ati dam bura tara dinin, ati dela dam lyomai nimi bungkamengai cap, akati kunumna weik keca mawa derinkameng ati cap, imam neng kunkameng ati-ati cap, akati neitamai pumbon wilipra dopkameng telep ati cap, alau tara dopkameng nge cap, tuai tara dopkameng ati cap, tonda, ‘Allahdi nun mali kun keca kaukepseredi, gum kupra deipkamserai, Peti Perjanjian bekin deipkamengai cap, pio Telep Lengna Ati yuma cap tep, Allahdi men taru, “Ukupra-ukupra dopkamnerume,” peipupa, Dauddi sekeipu upu yumada, Dauddi ange dopra, er mi Salomo tep karepu.

12Ange utopu, nimi deiyo ngebo Raja Dauddi, Allah Yahweh er si eremna ati dona tep, er teneamu keca yuma tep dopra, Salomo tep karepu. Ada, tali nengdi wekmengedi, Allah er gispal dona tep moronkamengai cap, telep keca karenkamengai cap, Allah karena tep karenkameng kunumna weik keca emas cap, perak cap, mawa derinkamengai cap, Allah tep ‘Telepe’ pepra, telep keca karenkameng ati cap, Dauddi tenemudi sekeipu ngeda, Allah Yahweh er bung keca derina ati cap, tonda ange yuma pio telep lengna keca, Allah tep yana karepmengepa, derina ati cap yuma tep, Dauddi, ‘Ukupkamne,’ teneramunge yumada, Salomo tep karepu.

13Ange utopu, imam-imam neng, sun nimi gung yuma peda, ‘Ukupkamenge,’ teneramunge cap, ‘Sun Lewi yala nengdi, apel talepra donkamrume,’ tenenange yuma cap, ‘Sun pel Allah Yahweh er si eremna ati neitamai pel donkamrumada, ake,’ tenenange yuma cap, tonda Allah Yahweh er si eremna cap, karena cap tep, wengna ati mawa gat keca moupra kalengkamenge nge yuma cap tep, Dauddi, Salomo tep, ‘Ukupkamrume-ukupkamrume,’ pepra lap pepu. 14Tonda, Dauddi, ‘Angeda, ukupra dopkurume,’ pepra, kunumna weik gat keca, er si emas cap, perak cap deiki di, Allah er si eremna ati pumbon deipkameng pel don keca ketenemna tep, lap pepu. 15Ada, akati pumbon weica uku jena tep, ingne keca deipra donkamnung keca tep, ‘Emasda, er ikin ukupra-ukupra dopropmumdi, aweica derinai lyom keca er yan cap, adeiki tara weica sisa lilin dongopkamrumai cap, petupra deipkamrume. Ange utopu, kunumna weik keca, perak deiki di ketenepra deipkameng weica derinai peda, aupu utopu lap pepu.

16Utopu derin keca, co di lakra derirameng keca, er si meja-mejada, kunumna weik gat keca, er si perak deiki di palepra dopkameng nge tep, ‘Emasda er ikin ukupra dopra, adeiki palepra derinkamrume,’ pepra lap pepu. Ange utopu, kunumna weik keca perak deiki di ketenepra palepra deipkameng nge peda, aupu utopu lap pepu. Amejada, Allah karena tep, nena gum roti kwaneng dapra, ameja deiki deipkamneng nge tep, ‘Ukupkurume,’ pepra lap pepu. 17Utopu ton, emas pio telepnge di, Allah karena tep, tu keca gapkameng keca arengna cap, lukra derina cap tep keca, er si garpu, akeca dopra derina tep, tonda anggur me jena tep metek mau, er si mangkuk cap, cangkir cap, akeca betamna tep, “Emas er ikinda ukupra dopropmemdi, ketenepkamrume,’ pepra, lap pepra deipu. Ange utopu, kunumna weik keca, perak deiki di, ketenepra deipkamengnge peda, aupu utopu lap pepra deipu.

18Tonda, emas pio telepnge deiki di, nintong telep keca duyana, uku dongnai tep nengeda, “Emas er ikinda, ukupra dopropmemdi, ketenepkamrume,’ pepra, lap pepra deipu. Tonda, Allah Yahwehdi, ‘Ukupkamsene, sundi ukupkamrume. Ukupmumnyopda, nedi telep kweipkamsene,’ pepra, pedina peiamu upu dongopi co bekin, er si Peti Perjanjian, adeiki tara keteneipkameng buplan tep nengeda, “Emas er ikinda, ukupra dopropmemdi, ketenepkamrume,’ pepra, lap pepra deipu. Tonda, abuplan deiki di, ortara-atarada, malaikat urasin utopu keca, er si Kerub butene, sun pol utopu kecada, daneitamai di dukdongopdanmanto kupkamrenge peda, “Emas er ikinda, ukupra dopropmemdi, ketenepkamrume,’ pepra, lap pepra deipu.

Uda, sun Israel nesaladi, ‘Akecada, nimidi tu deiki emban keca, er si kereta kuda deiki bukra embanung keca yambulanun kuramretopu, nun nai bo Allahda, akeca deiki di bukra embankamre,’ tenerami.

19Upepu dingeda, nimi deiyo ngebo Raja Dauddi pepu, “Ange yuma, ne lap pepmasen upu yumada, Allah Yahweh er pe dipapu teneamudi, lap pepra deiamu ngepu, ne tep katuai di peipneupa, nedi gekepsi. Ada, apeipu ngeda, ne damai, “Ange ukupra pel dopkurume,” pepra deipneu. 20Uda, Raja Dauddi er mi Salomo tep, aupu ton pepu. “Kan dipru neitamai di tenepmemdi, puto kepkurume. Tonda, kware tenena gum dipapu, angeda pel dona cap, kuna cappu kunkamrume. Ange tep nengeda, kan kware dangna cap, kware di, ‘Uo,’ tenena cap, pio men kunkamrume. Deiyoda, ne kan nai bodi, er si eremnun Allah, Yahweh, er pedi kan cap, pel melipra dopkamkere. Atep, kan nai bo Allah Yahwehdi, pio men tapkamkere, melimkamkere. Utopu, kandi Allah er si eremna ati cap, akati pel donkameng keca cap, akati dongopkameng keca cap yumada, tupa ketenepra derinkamrum taru yumada, Allah er dipapu, melimkamkere. Ukupkamkera deiki di, akati dona tep, pel donmamemnyanen, ange yumada gawal dankamrume.

21Pio tek sisi ngeda, sun imam-imam neng gung cap, tonda sun Lewi yala neng, yuk neng yuma capda, Allah Yahweh er si eremna ati dona cap, akati neitamai dongonkamep keca ketenemna pel cap yumada, ‘Nun kange dipapu, adipapu dopkamep’ tenen, konum ketenepi. Tonda, sun apel yuma dona tep, pio ila kael keami nengdi, apel yumada, sun tep ila di kange deipra melimkamkenge. Ange utopu, nimi deiyo-deiyo neng cap, amutu neitamai kunung nesala yuma capdi, kandi penkamrum upu yuma tep, moupra gekepmengedi, angepu tenepra, pel donkamenge.”

Raja Dauddi, er mi Salomo tep, aupu ton pepu.