1Ch 29 | XteSC | STEP | Israel mutu neitamai kurami neng, sun ila nimi deiyo kepra kuramu ngebo, Raja Dauddi, er damai bulupra yanmai nesala yuma tep, pepu. “Uda ne kayapu nengo. Ne mi Salomoda, Allahdi, ‘Angeboda Raja kunkamre’ tenen, konum wepra deipmasere. Angebo wepra deipmar dinino, erda kaber ngebo tupa kunmare taru wepra deipmara cadi, er pel donada, kapula. Erda ukupu kael kemenge neng utopu kurure. Tonda, nun nai bo Allah Yahweh, er si eremna ati dona tep nengeda, pio ikin pel kurure. Deiyoda, aila atida, tali tuai neng, depkameng nengdi wengkameng ati gume. Nimi sisa sun wengna ati guma dinin, akatida, Allah er si Yahweh, akeca-keca deiki tara kure ngebo, er ati kurura tepa.

1 Chronicles 29

Allah Yahweh er si eremna ati dona tep, akeca yala-yala yuma bulupra, Allah karepya tep, seki upu

1 Israel mutu neitamai kurami neng, sun ila nimi deiyo kepra kuramu ngebo, Raja Dauddi, er damai bulupra yanmai nesala yuma tep, pepu. “Uda ne kayapu nengo. Ne mi Salomoda, Allahdi, ‘Angeboda Raja kunkamre’ tenen, konum wepra deipmasere. Angebo wepra deipmar dinino, erda kaber ngebo tupa kunmare taru wepra deipmara cadi, er pel donada, kapula. Erda ukupu kael kemenge neng utopu kurure. Tonda, nun nai bo Allah Yahweh, er si eremna ati dona tep nengeda, pio ikin pel kurure. Deiyoda, aila atida, tali tuai neng, depkameng nengdi wengkameng ati gume. Nimi sisa sun wengna ati guma dinin, akatida, Allah er si Yahweh, akeca-keca deiki tara kure ngebo, er ati kurura tepa.

2 Ange tep nengeda, akati don keca yuma tep nengeda, ne Raja Daud, sun ila nimi deiyo ngebodi, ne damai akwapneu ati don keca, nedi bulupra deipmanto keca emas deiki di, akati don keca yala-yala yumada, bulupra deipsi. Nedi bulupra deipsi keca yala-yala yumada, kunumna weik gat keca emas cap, perak cap, perunggu cap, gat keca besi cap, urasin telep gat co cap, pio urasin telep gel cap, gel si permata gel cap, beraneka warna kunumna weik gel, pio urasin telep kupra derin gel cap, kunumna weik gel, tonda urasin telep gat gel, er sida pualam gel cap, ange yumada, weika di bulupra deipsi. 3 Akeca-keca yuma, akunumna weik keca, yuk-yuk mutu neng di, duyana kareamneipa, buluamsidi, ‘Allah er ange utopu deiyoda, ne Dauddi konum Allah er ati dona tep, pio tenenuna cadi, akeca yuma Allah er si eremna teppu kareamsi. Angepu gum dinino, ne pe ngeda, kunumna ila mambul keca, ne pe talenun ngeda, emas cap, perak cap dopra, akati dona tep konum ketenepra kareamsi.

4 – 5 Nedi, ‘Akati dopkamep’ tenen, ketenepra deiamsi keca, er si emas, pio telepnge, ara Ofir mutu emasda, ikin pio weik 110 ton (1.100 kilogram) urasin pio telep keca, er si perak murni, er ikinda pio weik, 240 ton (2.240 kilogram) konum ketenepra deiamsi. Akeca emas cap, perak cap dopropmengedi, Allah Yahweh er si eremna ati, ‘Akati urasin pio telep kupkamre’ tenen, dela pena tep palepra deipkamenge. Ange yuma, akati dona tep konum bulupra deipsi. Tonda, apel yumada, sun ila di kael keami nengdi, apel talepra donkamenge. Emas kecada, emas di dopra, petupra derinkamenge. Perak keca tep nengeda, perak di dopra petupra derinkamenge. Sun ati dona pio ila kael keami nengdi donkameng yala-yala keca yuma capda, deiyo keca yuma konum buluipsi. Uda, atep nengeda, ukutaruda, ware ngebo, ‘Allah Yahweh er tep doupra yangedi karepkune,’ tenepre ngeboda, er kange dipru yumada, telep tenepre deiki dipapu kareyankamre do? Sun yumadi kareryakankamrume,” Raja Dauddi pepu.

6 Raja Dauddi aupu yuma konum pepudi seng pepkopda, sun Israel yala nesala, sun yala-yala dakuramya utopu, sun yala deiyo neng cap, Israel mutu neitamai talepra kunge deiyo neng cap, jen talena neng denge weik, seribu (1.000) jen neng, sun deiyo-deiyo neng cap, tonda seratus jen talena neng, sun deiyo neng cap, tonda, sun yuk upu pena deiyo neng cap, sun yumada, nimi deiyo ngebo Rajadi, “Ukuda karepsyo,” pepu pangeda, sun yuma, sun pe kange dipapu, akeca-keca bulupra, ‘Karepkupe’ tenen, akeca duyakanmaidi karepi. 7 Sun Israel nesala deiyo-deiyo neng yumadi, akeca yuma bulupra, Allah Yahweh er si eremna ati dona tep, yana karepi kecada ake. Ada, kunumna weik gat keca emasda, ikin pio weik 170 ton (1.070 kilogram) ^{▼▼ton – Aupu deiyoda, 1000 kilogram nukmengedi, ange yuma dukdongopra jumlah pena tep, ‘Tenpu ton’ penunge.} duyai. Utopu kunumna weik keca perakda, ikin weik 340 ton (3.040 kilogram) doupra yai. Tonda, gat dona keca er si tembaga peda, utopu kupra ikin pio weik, 620 ton (6.020 kilogram) duyai. Tonda, gat keca besida, ikin pio weik, tiga ribu empat ratus ton (3.400) weika di doupra yai.

8 Tonda, amutu neitamai upu pena deiyo neng sun urasin pio telep gel, er si permata gelda, tenpu ngebo er si Yeihel, er tep doupra kareryai. Ada, Allah Yahweh er ati neitamaida, nimidi talen keca derin ati pumbon, mawa derina cap, kalengna cap tep, ‘Ukupkurume-ukupkurume,’ pena deiyo ngebo kuramu. (Yeihelda, Lewi yala ngebo dinin, Gersondi deiamupa, deipdanen yakaramyanen, yana deiami ngebo kuramu.) 9 Amutu neitamai bulupra dirami nesala yumadi, aneng-aneng yuma, sundi dopra kareryakarami keca diramidi, sun dipru neitamai di kange derirami. Deiyoda, adeiyo-deiyo neng yumada, sun pe kange deiki di, ‘Nun nai Allah tep, akununma weik keca tali karepkupe,’ tenepnedi, Allah Yahweh tep karerami. Adoupra yana karerami neng yumada, gung weik kurami dinin, sun yumada, tenpu kange douna utopu kupra, tenpu ngebo kuna utopu kepra, akeca-keca weika di buluprapidi kikimanpu kareryakarami. Tonda, ila nimi deiyo ngebo Raja Daud, er peda pio kange deriramu.

Nimi deiyo ngebo Raja Dauddi, Allah er si erepudi, pepu upu

10 Israel nesala yuma bulupra wekmaiya neitamai di, Raja Daud erdi Allah Yahweh er si erepudi gudinmau. Allah er si erepudi pepu, “Uo teka nun apubo Yakubdi si eremamkeu Allah, kanda Allah Yahweh kurume. Kanda tek sisi pio-pio telep kurume. Kanda pumun taru di dipra, dorkunkamre taru peda, pio telep-teleppu kunkamruma cadi, kan sipu pio tep eremkamkepe,” pepu. 11 Upepu dingeda, aupu ton pepu. “Kanda pio teka, ila ngebo kurume. Tonda kanda akeca-keca deiki tara kumemdi, pio ila puto ngebo kurume. Uo, kanda tek sisi ila mambul weik ngebo kuruma cadi, tuai nesala yumadi, kan si kael keamidi, ‘Uo’ tenepra gudinkenunge. Kan puto deiki di, yuk mutu nesala yuma cap, yuk puto kure keca yuma cap tep, popra bisbisa kapra deiki tara kurume. Kanda pio dumsisi ngebo, ila nimi deiyo ngebo, gonga kemna deiyo ngebo kuruma cadi, yuk Raja neng yumada, kan amutarapu kununge.

Angeda, tali tep men pepkene. Ukumemdi, im alau tara kure keca pe, tuai mutu neitamai kure keca yuma peda, kan pe ngepu kurure. Kanda Yahwehdi akeca-keca yuma cap, nimi ban-ban yuma cap, talerumdi, ila deiyo ngebo kurume. Sun yumada, kan amutara kunung dinin, kanda pio deiki tarapu kumemdi, akeca-keca yuma talerume. Atep, ne nai bo Allah Yahweh, kanda akeca-keca yuma cap, ware nesala do yuma tep, kan dipapu nimi deiyo neng kepra derirume. Atep naio kanda, ila puto yumada, kanpu talepmumdi, akeca-keca yuma ketekepra deipmumdi, talepra kurum ngebo tep, telepe pepkene. 12 Ware telep keca do yuma, nimidi talepra isomka kunung keca yuma cap, kunumna weik keca cap, kan dipapu tuai nesala tep karerume. Tonda telep dumsisi kunge keca cap, nimi tuai neng tep, yuk mutu nengdi sun si kael kepmengedi, ‘Uo, anengda mambul weik kununge,’ tenenange deiyo keca peda, kan pe buru dipapu kareserume. Dinino, akeca-keca yumada, kan puto dipapu talerume. Tonda, ange yumada kanpu, kan ila puto deiki dipapu, ‘Ukupkamne,’ tenemum keca yumada, kan tenememtopu kurume. Ange yuma talepra kumemdi, ware nesala do yuma, nimi deiyo kemna cap, puto kemna cap tep neng yumada, kan dipapu erepra derirume.

13 Ange-ange yuma tep nengeda, ukutaruda, teka nun nai bo Allah, nundi nun nai bo kan tep, “Pio telepe,” pepkepe. Tonda, nun nai bo kan si tepapu, ila di erepkepedi gudinapu kunupe. Kan pio telep si, kan sipu eremkamnupe.” Raja Dauddi aupu penmau. 14 Upenmau dingeda, aupu ton dukdongopra pepu. “Dinino, ne kangeda, uo ne cap nedi talepsipa amutu neitamai kunup nesala yumada, nunda wareto nesala kupmepedi, ange kupmap do? Ada, nun kange dipapu ware kupra kan tep, telep karen keca autopunge weika di bulupra karepketepe do? Deiyoda, tek sisi akeca-keca yumada, nun nai bo kan dipapu kareserume. Kan buru deiki dipapu karesemempa, akeca talenupe. Atep, nundi kan tep, doupra yapedi, karekenupnge yuma peda, Allah Yahweh kan pengepu kurur dinin, nundi akeca dopra karekenupe.

15 Angeda, tali tep men pepne. Ada uo, Allah Yahweh kanda, kan kaele. Kan disemempa, nun apu yapu yuma peda, nimi bo neng utopu kan damai di doupra yanamidi, dana-dana dopra orbenapna-ayanapna kemtoramipa, kan peda kael keamume. Atep, nun amutu neitamai kunup nesala peda utopu, keana mutupua kunupe. Ukupmantoda, nimi kukida, keteng di katuai kuprepa, longdaryanen, kange di tamupra dim peramretopu kunupe. Atep naio, ‘Nun pedipapu pio telep kunkamep ja, amenda men depkamepe,’ men teniptepe. Angeda, tek sisi men kupmanto cadi, angeda pio men tenenkamepe. 16 Atep tek sisi Allah Yahweh, nun nai bo Allah kan tep, nimidi, ‘Ada ila mambul keca,’ tenenange yumada, amutu neitamai konum bulupra deipmepudi, ‘Kan ati tenpu dopkamepe. Ukupmepedi, kan si adopmepe ati neitamai di, kan pio telep lengna ngebo, kan sipu eremkamkepe,’ tenepmepu. Dinino, tek sisi ange bulupmapu keca yumada, kan pe buru di dopra kareserume. Kan dipapu karesememnge di, dopropmepedi kan pepu karenkamkepe. Ada kan pengepu dinino nun naio.

17 Ne Dauddi konum kaele keamsi. Ne nai bo Allah, nimi yuma sun dipru neitamaipu dimemdi, asimpeterume. Tonda, er dipru neitamai pio telep kuramre ngebo, dumsisi kuramre ngebo tep, kange pio derirume. Atep, nedi akeca yumada, ne kange pio telep deiki dipapu tali karepkene. Tonda ukutaruda, nedi kan nyapu sisa, abulupmapu Israel nesala peda, konum epmane. Ada, acei yanmangdi, akeca yuma sun kange dipru neitamai di, ‘Uo, nun Allahda pio telepe’ tenen, telep kange doupra, pingpina deiki di, akeca doupra yana karepmang nengda, konum epmane.

18 Teka, Allah Yahweh kanda, nun apu yapu Abraham cap, Ishak cap, Yakub cap, tonda nun apu yapu Israel nesala yuma cap tep, melimamupa, sundi kange deipra, kan si eremamkei. Atep nun nai bo Allah, kandi kan nyapu sisa tep melipmempa, ukutaru sundi telep keca dopra, kan gispal dona tep, talipu karenmakeng nge utopu, amenda taru peda kupmengedi, pio tep kunkameng’ tenen, moropmepe. ‘Ukupkamteng’ tenena tep, kandi sun melimkamrume. Tonda sun kan nyapu sisa tep, melipmem pangeda, sundi kan tepapu tenenkamkenge. 19 Tonda, neda Dauddi, ‘Ne deiamsi mi, Salomo melipkamrume’ tenen, moropkene. Ukupmempa, erdi, ‘Ange kupkamne do, gum do?’ tenena gum dipapu, pio tek sisi tenpu kange dipapu, kandi, ‘Ukupkamrume, angeda men kupkamrume,’ pepra, deipmum mem upu cap, kandi, ‘Telep kuna ngeda ake,’ peipsemum upu cap, ‘Ne tara nengdi, angepu talepra kunkamenge,’ pepra deipsemum upu cap, ange yumada, Salomo moupra teneredi, dombakeredi, kan sipu eremkamkere’ tenena tep moropkene. Ukupra kuptuopda, nedi, ‘Kan si eremna ati dopkamkene’ tenen, ati don keca yala-yala yuma konum ketenepra deipsi ngepu, ‘Ne mi Salomo dopropredi, kan ati donkamkere’ tenen moropkene, ne nai Allah.” Aupuda, Dauddi Allah tep pepka deiki di moropu.

20 Aupu yuma konum upepra Allah tep moropu dingeda, nimi deiyo ngebo Raja Dauddi, sun amutu neitamai bulupra wekmai neng tep pepu. “Nun nai bo Allah er si Yahweh, nun melimsere Allah tep, ‘Telepe,’ pepra gudinkamrume.” Dauddi upepu pangeda, sun awekmai neng, Allah er mawa nesala, er nyapu sisa Israel neng yumadi, “Allah Yahwehda, nun nai bo Allah, nun apu yapu sun melimamum ngebo, kanda pio telepe,” pepi. Upepi dingeda, sun anesala yumadi gutam tu dipdongopra, sun giso tu deiki mapi. Ada, ‘Nun nai bo Allah Yahweh cap, tonda nun deiyo ngebo Raja Daud cap tep, pio kange deipra, gispal dopkup’ tenen, kupi.

21 Adinin, mapmaiya bereku tumida, sun adipapu, ‘Allahdi nun mali kun keca kau kepseredi, gum kupra deipkamser’ tenen, sun peirami gam keca popra, uku dongopidi, Allah Yahweh tep, er si erepi. Ukupi dingeda, amutu neitamai kurami nesala yuma tep bokra deipi. Adinin yuk ngeda, Allah er karena tep, sapi bisam jem ngeda, seribu sapi (1.000) popra uku dongopi. Utopu domba bisam jemnge ton, seribu (1.000) domba bisam poprapidi, uku dongopi. Tonda, ukupu deipi domba bisam minge capda, pio weika di seribu (1.000) popra uku dongomna tep, ketenepra gel pala di taplakra yakeiamyai damai mesba deiki deipra, uku dongopi. Tonda, agam keca tu cap, agam keca deiki diktapi anggur me cap, yuk keca cap karenange ton, Allah tep karepidi, er si ila di eremai. Ange yumada, denge weika di karemaidi, ‘Nun Israel nesala yuma tep, nun malinge daepkamsere,’ tenena tep kupi.

Dauddi deipu ngebo Salomo tep, ‘Raja kepra talenkamser’ tenen, ereipi upu

22 Ange yuma konum kupidi, akeca-keca yuma, Allah tep konum karepi dingeda, atumi dipapu sun anesala yumadi, anggur me cap, jen keca yala-yala yuma cap, kange deipidi jen jenmai. Ukupiopda, Allah Yahweh er damaipu, ila di kange deipmaidi, er tep, ‘Telepe,’ pepra, gispal donmai. Ukupi dingeda, ue butene ngeda, atumida, ‘Daud erdi deipu ngebo, er mi Salomoda, er ila tumi ake’ tenen, tonda, ‘Angeboda, nun deiyo ngebo Raja kepkamser’ tenen, peten kemna tep, ila tumi ketenepra deipidi, minyak zaitun mokon dopra, Salomo er giso deiki dikra deipi. Ukupya deiki di, ‘Angebo Salomoda, Allah Yahweh er amutara kurur dinin, ila deiyo ngebo kunkamsere’ tenen, kupi. Tonda, ataru dipapu tenpu ngebo er si Zadok, ‘Allah er si eremna ati pumbon pel donkamre. Erda, imam ngebo kunkamre’ tenena tep, minyak zaitun me mokon, er giso deiki dikra deipi. 23 Ukupi pangeda, Salomo er adipapu Allah Yahweh er bungne keca tahkta deiki nimi deiyo ngebo Raja Daud, er nai bo yo pununa tep, ereipi. Ataruda, Salomo konum kupu. Ukupupa, sun Israel nesala yumadi, kange pio deipi.

24 Amutu neitamai talepra kurami nimi deiyo-deiyo neng yuma cap, jen talena neng yuma cap, nimi deiyo ngebo Raja Daud, erdi deiamu neng Salomo tep, “Erda Raja kunkamsere,” pepra, deiami neng cap, tonda, er Salomo tep “Pio-pio meliprapmepedi, er cap domembankamepe,” pepra melipi. 25 Ukupipa, Allah Yahwehdi Salomo tep, sun Israel nesala sun damai pio kange deipra, ila kepra deipu. Tonda, ukupu pangeda, Salomo erdi talepra, kunkamre deiyo mutu pemerintahan weik kepra deipu. Tonda, Israel mutu neitamai Salomo Raja men tekamu taru di, talepra kurami nimi deiyo neng Raja-Raja yumada, yambul mambul dinin, Salomopuda ila puto cap, mambul cap, telep cap kure ngebo kepra deipi.

Daud talepra, nimi deiyo ngebo kuramunge tep, seki upu

26 – 27 Ange tep nengeda, Isai er mi Dauddi keteng tamun empat puluh tahun deiki di, sun Israel nesala kurami mutu neitamai taleamudi upu peramu. Ukuramu taruda, nimi deiyo ngebo Raja Daud, erda Hebron mutu neitamai keteng tamun tujuh tahun deiki di, talepra upu peramutopu, Yerusalem mutu neitamai tiga puluh tiga keteng tamun erpu talepra kuramudi, upu peramu. 28 Ukupra taleamnganen, er pel don taru lyoma di, konum kupu pangeda, adipapu Daud depu. Atalepra kuramu taruda, nimi deiyo Raja. Daud konum ila isomka ngebo kuramupa, sun yumadi kange pio derirami. Adinin, konum er nai bo Daud konum depu pangeda, adipapu er mi Salomo yo punupudi, er nimi deiyo ngebo Raja teku. 29 Nimi deiyo ngebo Raja Daud, er kuramudi, pel gonga kepra doramunge di dipdongopra, sirya gawal abena deipunge yuma, peten kemna tep, si sengna buku, er si tep pepra seki ngeda, ake. Ada “Nabi Samuel cap, nabi Natan cap, nabi Gat cap pepra sekeipi.

30 Abuku neitamai nungna upu pepra deipidi, seki ngeda, “Daud erdi Israel nesala cap, amutu cap, taleamudi upu peramu ngeda ake,” pepra deipidi, seki. Tonda, Daud er ila puto deiki cap, sun Israel nesala yuma damai deiyo kepra upu peramunge cap, tonda, Israel mutu neitamai cap, yuk-yuk mutu nesala daneitamai kurami dinin, sun Israel nesala sun damai meneng akuramipa, sun yuk mutu neng yumadi kael keamidi, kuraminge capda, abuku er sida “Sejara Raja Daud,” pepra sekeipi.