1Ch 4 | XteSC | STEP | Yehudadi deiamu nengda, ton tara neng sun sida ake. Ada, Peres cap, Hezron cap, Karmi cap, Hur cap, tonda Syobal cap, kurami.

1 Chronicles 4

Yehudadi deiamupa, dadeipdanen yakarami nesala tep, seki upu

1 Yehudadi deiamu nengda, ton tara neng sun sida ake. Ada, Peres cap, Hezron cap, Karmi cap, Hur cap, tonda Syobal cap, kurami. 2 Syobaldi deiamu ngebo Reayada, erdi sal mi deipu. Angebo er sida, Yahat pemu. Angebo Yahat dingeda, sal nyapu butene deiamu. Sun sida, Ahumai cap, Lahat cap, deiamu. Sun anengda, Zora mutu ati arum dopra kurami nesala, sun co puna neng kuramrei. 3 Kaleb er ner Efratdi deiamu mi, er sida Hur kuramu. Hurda, Kalebdi menmena du ngebo deiamupa kuramu. Angebo Hurdi Betlehem mutuda gonga keap, ati arum doramu. Hurdi deiamu neng, sun sida ake. Ada, Etam cap, Penuel cap, tonda Ezer cap deiamu. Ukupupa, Etamdi sal nyapu weneri deiamu. Sun sida, Yizreel cap, Isma cap, Idbas cap, tonda, ner mi tenpu deiamu. Aner er sida, Hazelelponi pemu. 4 Hurdi deipu ngebo Penuelda, Gedor deipu. Hurdi deipu ngebo Ezerdi, er sal mi ton Husa deipu.

5 Yehudadi deiamu ngebo Hesronda, erdi sal mi ton Ashur deipu. Amenda taruda, angebo Ashurdi er mi ton Tekoa deipu. Tonda, Asyurda ner butene domu. Sun sida ake. Ada, Hela cap, Naara cap, domupa kuramrei. 6 Asyurdi er domu ner Naara cap kuramrei dingeda, sal nyapu dumbari deiamrei. Anyapu sun sida, Ahusam cap, Hefer cap, Temeni cap, tonda Ahastari cap, ukupra deiamupa dakurami. 7 Ange utopu, Asyurdi domu ner Hela cap, kikiman kurei dingeda, sal nyapu weneri deiamrei. Sun sida ake. Ara, Zeret cap, Yezohar cap, tonda Etnan cap, Kos cap, sun ukupra neng deiamrei. 8 Asyurdi deiamu ngebo Kosda, er dingeda, sal mi weneri deiamu. Sun sida ake. Anub cap, Hazobeba cap, sun nai boda, Kos kuramu. Tonda, sun nai bo Kosda, Aharhel yala neng, sun co puna ngebo kuramu. Ton ngebo, er si Harun, erdi angebo Aharhel, er nai bo kuramu dinino, Aharhel yala neng, sun co puna ngeboda, Kos kuramu.

9 Uda Yehudadi deipupa, dadeipdanen yakaramyanen, tenpu ngebo ton deipi. Angebo er sida, Yabes kuramu. Telep kupra kuramupa, yuk nesala yumadi er tepapu, si eremami dinin, er kapu neng sisa tep, aneng ton sun si men eremami. Er nindi, ami Yabes tep, “Ami deipkusi taruda, mi deiyo donmasi taruda, pu weik jeramneupane, siryada ami deiamsa tep, amida er si Yabes penkamepe,” pepra, si karepu. Asi Yabes pepra, er si pepya deiyoda, sun upu deiki di, ‘Ila pu jerure’ tenen, peramya tep, ami er sida, asi pepra domi.

10 Uda, Yabesdi Israel nesala kalekra meliamu Allah tep, moropudi upepu, “Uo, ne nai Allah, kandi, telep kupra deipkunerume. Tonda, ne talepkamne mutuda, go weik karepnemempa, amutu tu weika di talenkamne. Tonda, kan weika di melimnemempa, neda kan amutara kunkamne. Ukunkamne taruda, ne damai ikin keca yanerepa, kange mun kange doupnun cadi, kandi kaleknemem pangeda, ila ikin kecada, dopra karenai donokamnerume,” pepra, Allah moropu. Ukupra moropupa, Allahdi amoropunge gekepudi, amoroputopu kupra melimamu.

Ton tara nyapsilipdi deipipa, dadeipdanen yakarami nesala tep, si sekeipi upu

11 Uda, Yehudadi deipupa, dadeipdanen yakaramyanen, tenpu ngebo ton deipi. Angebo er sida, Suha kuramu. Angebo Suha, er kabo sisa Kelub, erdi sal mi ton deipu. Kelubdi ami er sida, Mehir pepu. Ukupupa, angebo Mehir peda, sal mi tenpu ton deipu. Ami er sida, Eston pepra, si karepu. 12 Eston dingeda, sal nyapu weneri ton deiamu. Sun aneng sida ake. Ada, Betrafa cap, Paseah cap, tonda Tehina cap, pemu. Angebo Tehina, erdi Nahas mutu gonga kepra, ati arum domi. Dinino, sun aneng cap, sundi deiami neng yuma capda, Reka mutu kurami.

13 Uda, Yehudadi deipupa, dadeipdanen yakaramyanen, tenpu ngebo ton deipi. Angebo er sida, Yufene. Yufeneda, sal mi ton er si Kaleb deipu. Amenda taruda, Kalebdi deiamu nyapuda, sun si ake. Ada, Iru cap, Ela cap, Naam cap kurami. Kaleb erdi deipu ngebo Ela dingeda, er mi ton Kenas deipupa, kuramu. Kenasda, sal nyapu butene deiamu. Sun sida, Otniel cap, Seraya cap, deiamu. Otniel peda, sal nyapu butene deiamu. Sun sida, Hatat cap, Meonotai cap, deiamu. 14 Otnieldi deipu ngebo Meonotaida, er mi ton deipudi, er sida Ofra pemu. Utopu, Kenasdi deipu ngebo Serayadi sal tenpu deipu. Adeiamu mi er sida, Yoab pemu. Yoabdi deipupa, dadeipdanen yakarami nengda, tenpu telep ban mutu kurami. Atara nesala yumadi, aban mutu tep, “Akeca-keca petupra don keca cap, nimi buru di domenge keca capda, amutu nesala ila di kael keamidi, pio telep kupra donunge,” perami. Yoabdi anesala kurami ati arum gonga kepra doramu. Ukuamupa, amutu banai kurami nengda, akeca-keca ketenepra pel donada, ila keal nesala kurami. 15 Ton ngebo er si Yufene, er mi Kalebdi sal nyapu weneri deiamu. Sun sida ake. Ada, Eru cap, Ela cap, tonda Naam cap deiamu. Tonda Eladi deipu ngeboda, Kenas kuramu.

16 Uda, Yehudadi deipupa, dadeipdanen yakaramyanen, tenpu ngebo ton deipi. Angebo er sida, Yehaleleel kuramu. Yehaleleelda, sal nyapu dumbari deiamu. Sun sida, Zif cap, Zifa cap, Tireya cap, tonda Asareel cap, deiamu. 17 Uda, Yehudadi deipupa, dadeipdanen yakaramyanen, tenpu ngebo ton deipi. Angebo er sida, Ezra kuramu. Ezradi, sal nyapu dumbari deiamu. Aneng sun sida, Yeter cap, Mered cap, Efer cap, tonda Yalon cap deiamu. Meredda, Mesir mutu Raja keamu ngebo, er ner mi er sida Bica domu. Dopu pangeda, sun ner mi tenpu deiamrei. Er sida, Miryam pemrei. Tonda, sal nyapu butene deiamrei. Sun sida, Samai cap, Yizba cap, kuramrei. Angebo Yizbada, sal mi ton deipu. Angebo er sida, Estemoa kuramu.

18 Ezrada, Yehuda yala ner ton dopra domu. Aner dopudi deiamrei sal nyapuda, weneri kurami. Aneng sun sida ake. Ada, Yered cap, Heber cap, Yekutiel cap kurami. Yereddi er mi Gedor deipudi, gonga keap tenpu ati arum, Gedor mutu doramu. Heberdi er mi Sokho deipu. Tonda, gonga keap tenpu ati arum doramudi, amutu si tep, Sokho mutu pemu. Ange utopu, Yekutieldi er mi Zanoah deipudi, gonga keap tenpu ati arum doramudi, amutu si tep, Zanoah mutu pemu.

19 Ton ngebo er sida, Hodia kuramu. Angebo Hodiadi, ton ngeboda, er si Naham kuramu. Angebo Naham, er mal nerda, Hodiadi anerpu dopra domu. Aneng buteneda, sun nyapu butene deiprei. Ton ngeboda, er mi Abu-Kheila deipu. Abu-Kheilada, sun Garmi mutu kurami nesala, sun co puna ngebo kuramu. Ton ngeboda, er mi Estemoa deipu. Estemoada, sun Maakha mutu kurami nesala, sun co puna ngebo kuramu.

20 Uda, Yehudadi deipupa, dadeipdanen yakaramyanen, tenpu ngebo ton deipi. Angebo er sida, Shimon kuramu. Shimonda, sal nyapu dumbari deiamu. Sun sida ake. Ada, Amnon cap, Rina cap, Benhanan cap, tonda Tilon cap, deiamu. Tonda, Yehudadi deipupa, dadeipdanen yakaramyanen, tenpu ngebo ton deipi. Angebo er sida, Yisei kuramu. Yiseidi sal nyapu butene neng deiamu. Sun sida Zohet cap, ton ngeboda Ben-Zohet cap deipudi, asi sipemu.

Seladi deiamupa, dadeipdanen yakarami neng tep, sekeipi upu

21 Yehudadi deiamu ngebo tenpu, er si ton Sela kuramu. Sela erdi deiamu neng sun sida ake. Ada, Ere cap, Lada cap, deipu. Angebo Ereda, erdi Lekha ati arumda, gonga kepra domu. Er weit bo Ladadi Meresa mutu ati arum gonga kepra domu. Sun anengdi deiamrei nengda, Bet-Asybea mutu kuramidi, urasin pio telep opkal, kunumna weik opkal er si kain lenan, aopkal wina tep, sunda ila kael nesala kurami. 22 Tonda Yehudadi deiamu neng weneri kurami. Ton ngebo er sida Yokim, ton ngebo er sida Yoas, ton ngebo er sida Saraf kurami. Tonda, Koseba mutu kurami nesala, sun co puna ngeboda, Yehuda kuramu. Aneng Yoas cap, Saraf capda, sunda Moab mutu bereidi, amutu nerapu bena dopra doprei. Ukuprei dingeda, tamupra Betlehem mutu yana kuramrei. Uda, aneng sun si cap, sundi kurami keca capda, anungna yumada, menop taru di sekra deiamingepu, mawa deiamipa, akwamnganen, ukutaru tupa akurure. 23 Sun anesala yumadi, Raja er me jen mau cap, er gamna keca panci-panci cap, dona tep nengeda, pio gat kerah tu di dopra telepnedi, dodina nesala kurami. Ukuramidi, anesala sunda Netaim mutu cap, Gedera mutu cap, kurami. Sun mutu ila deiyo talepra, Raja kuramu ngebo tep, pel doramidi dakurami.

Simeondi deipupa, dadeipdanen yakarami nesala tep, sekeipi upu

24 Yakubdi deiamu ngebo Simeondi, sal nyapu pamubari deiamu. Sun sida ake. Ada, Nemuel cap, Yamin cap, Yarib cap, Zerah cap, tonda Saul cap, deiamu. 25 – 26 Sauldi er mi Salum deipu. Utopu, Salumdi deiamu mida, Mibsam. Mibsamdi deiamu mida, Misma kuramu. Mismadi deiamu mida, Hamuel. Hamueldi deiamu mida, Zakur. Zakurdi deiamu mida, Simei kuramu. Sun ukuprap nengpu deiami. 27 Simei er nyapuda, dua puluh dua (22) deiamu. Erdi deiamu sal nyapuda, enambelas (16) neng deiamu. Erdi deiamu ner nyapuda, ngantan bari deiamu. Dinino, Simei er kayapu nengda, nyapu weik men deiami. Sunda yambulanunpu deiami. Simeondi deiamupa, dadeipdanen yakarami nesalada, er weit bo Yehudadi deiamupa, dadeipdanen yakarami nesala weik kuramitopu, sun Simeon yala nengda, utopu men kurami.

28 – 29 – 30 – 31 Simeondi deiamupa, dadeipdanen yakarami nesalada, amutu-amutu ati arum dopra kurami. Ada, Bersyeba mutu cap, Molada mutu cap, Hasar-Sual mutu cap, Bilha mutu cap, Toldad mutu cap, Betuel mutu cap, Horma mutu cap, Ziklag mutu cap, Bet-Markabo mutu cap, Hazar-Susim mutu cap, Bet-Biri mutu cap, tonda, Saaraim mutu cap kurami. Akati-akati sida, ada Simeondi deiamupa, dadeipdanen yakarami nesalada, aila ati arum neitamai yuma kuramyanen, dakuramipanen, Daudda ila nimi deiyo ngebo keprapudi, Raja kuramu. 32 Sun anesalapu, aila ati arum doaminge damaida, yambul ati ton pamubari dopra kurami. Amutu sida ake. Ada, Etam mutu cap, Ain mutu cap, Rimon mutu cap, Tokhen mutu cap, Asan mutu cap, ayumada yambul ati arum dopra kurami.

33 Aila ati arum doramiai yumada, yambul-yambul ati arum peda, amutu-amutu neitamaipu doramidi akurami. Adi dopra benamyanen, Bahal mutu ila ati arum doramya damaipu bena, ati doramidi kurami. Amutu yumada, Simeondi deiamupa, dadeipdanen yakarami nesalapu talepra kurami. Atep, Simeondi deiamupa, adeipdanen yakarami nesala yumada, sundi deiami neng yumada, sun si sekra derirami.

34 – 35 – 36 – 37 – 38 Simeondi deiamupa, dadeipdanen yakarami nesala, sun yala neng tep, deiyo kepra talerami neng, sun sida ake. Ada, Mesobab cap, Yamlek cap, Amzia er mi Yosa cap, Yoel cap, Yosibya erdi deipu ngebo Yehu cap deiamu. Tonda, Seruya er mida Yosibya. Yosibya er apu boda, Asiel kuramu. Tonda, yuk yala deiyo nengda, Elyoenai cap, Yaakoba cap, Yesohaya cap, Azaya cap, Adiel cap, Yesimiel cap, Benaya cap, Ziza cap deiami. Tonda, Ziza erda, Zifei er mi kuramu. Sifeida, Alon er mi kuramu. Alon er mida, Yedaya kuramu. Yedaya er mida, Simri kuramu. Simri er mida, Samaya kuramu. Sun anesaladi deiamipa, dadeipdanen yakarami nesala, sun yala nesalada, weik kupbarami. 39 – 40 Atep nengeda, Simeondi deiamupa, dadeipdanen yakarami nesalada, goupra keteng dangban tara, ban mutu ada, Gedor mutu dabena kurami. Ada, ‘Nun peinup keca, domba cap, sapi cap, sun jen putana tep, telep mutu erbenkamep’ tenen, amutu neitamai bena dipetepidi, epi. Amutu neitamaida, mutmuta weik kuramudi, telep kupra bongoramu mutu bena epidi kurami.

Tonda, amutu neitamaida, sun domba bisam gung cap, kambing bisam gung capda, telep kupra peipmanto mutu bena emi. Amutuda, pala weik mutu kuramu. Tonda, nimidi pona gum dipapu, telep kupra kikiman kuramidi, lelim weik men peramu mutu kwamu. Men taruda, Nuhdi deiamu ngebo, er si Ham, erdi deiamupa, dadeipdanen yakarami nesalada, amutu yuma talepra kurami.

41 Dinino, Simeondi deiamupa, deipdanen yakaramidi, sun yala-yala deiyo nengda, Gedor mutu beidi, Hamdi deiamupa, dadeipdanen yakarami nesala, podanapu kurami. Ukurami pangeda, Ham er tara nesaladi, amutu ati arum yuma dopra kuraminge yuma cap, tonda Raja Hiskiadi taleamu taru kurami nesala, sunda, Meunim yala neng cap, sundi dorami ati cap, sun nong cap yumada, popra eneproidi amutuda, Simeondi deiamupa, dadeipdanen yakarami nesaladi, amutu bena darapra dopropidi kurami. Ada, amutu neitamaida, mutmutada pio weik mutu cadi, sun domba bisam peina cap, kambing bisam peina capda, amutupu bena peirami. 42 Tonda, amutu damai yakarami nesala, sun neitamaida, Simeondi deipupa, dadeipdanen yakarami neng ton ake. Ada, er mi Yiseidi deiamu dumbari neng, sundi gonga keamidi, Edom tara kurami nesala tep porbei. Yisei erdi deiamu nyapu dumbari, sundi Edom mutu nesala porbei. Adumbari neng, sun sida ake. Ada, Pelaca cap, Nearya cap, Refanya cap, tonda Uziel cap, Edom tara kurami nesala porbei. Aneng sun meliami nesalada, Simeondi deipupa, dadeipdanen yakarami nengpu, ton bokra yuk nesalada, lima ratus (500) neng ton cap kepra, sundi meliami.

Ukupra gonga kepra, keteng yakan tara Edom tara, tonda atara si butene ngeda, Seir mutu perami. Amutu neitamai kurami nesala tep bena, popra gawal daki di, amutu talepra dakurami. Ataru di dipra, uku taru peda, Simeondi deipupa, dadeipdanen yakarami nesalada, Edom tara neitamai dakuramitopu, ukutaru tupa acapu kununge.

43 Sun anesalada, Simeondi deipupa, dadeipdanen yakarami nesalada, Edom tara neitamaida, Amalek yala nesala ton, yambulanun gawal tupa akurami nesalada, bena popra gawal dakami. Amutu kurami nesala popra, gawal dakidi, bisbisa kapi taru dipapu, amutu tu peda, dalupra dopropidi, taleamidi kurami.