1Ch 5 | XteSC | STEP

1 Chronicles 5

Rubendi deiamupa, dadeipdanen yai nesala tep, pepu upu

1 – 2 Rubenda, Yakub er mi du ngebo kuramu. Ukuramnga cadi, er nai bo depkopda, erdi er nai bo taleamu keca weik tara dopropmatue. Dinino, er nai bo Yakub kapul men deamu taruda, er pel tali doramu ner, aner peda dopra domu. Er mi Rubendi, aner cap kikiman mapreia deiki di, mali kupra deipdanamu. Ukuamnga deiki di, Yakub er mi du ngebo dopropmanto kecada, Ruben tep men karepu. Ange gum dinin, er weit bo Yusufdi deiamu nyapu tep karepu. Yakubdi er nyapu deiamnga neitamai di, ila mambul ngeboda, menmena deipu ngebo Ruben kwamtu dinin, mali weik kupra deipdanamu.

Atep nengeda, nimi si sekami buku yumada, menmena deipmenge ngebo, er si sengnung dinin, Ruben er sida, menmena men sengnunge. Yehudada, er duyapu silip neitamaida, ila mambul ngebo kuramu. Tonda, erdi deipupa, dadeipdanen yakarami nengdi deiami ngeboda, ila nimi deiyo ngebo talepra, Raja kuramu. Ukuramu dinin, sun apu bo Yakubdi, er menmena deipu mi dopropmanto kecada, Ruben tep men karepu. Angeda, Yusufdi deiamu nyapu tep karepu.

3 Uda, Israel, er si ton Yakubda, er mi du ngeboda, Ruben kuramu. Ruben erdi, deiamu sal nyapuda, dumbari neng deiamu. Sun sida ake. Ada, Henok cap, Palu cap, Hezron cap, Karmi cap kurami. 4 – 5 – 6 Tonda, Rubendi tenpu ngebo ton deipudi, angebo er sida, Yoel kuramu. Yoeldi deiamupa, dadeipdanen yakarami nesala, sun si sekra deiami. Yoeldi deiamu ngebo, er sida Semaya kuramu. Semaya erdi deiamu ngeboda, Gog kuramu. Gog er mida, Simei kuramu. Simei er mida, Mikha kuramu. Mikha er mida, Reaya kuramu. Reaya er mida, Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupkada, ‘Baal pepetepmengepa, ikin kuprepa, ‘Bal sisa tenepnung’ tenen, nundi Bahal sekmupke. Si yuk sekmepu dinino angeboda tenpua.} kuramu. Bahal er mida, Beera kuramu. Amenda taruda, Beerada, Ruben yala nesala, sun deiyo ngebo kepra kuramu. Ukuramu dinin, Asyur mutu pio karen mutu ila nimi deiyo kepra taleamu ngebo, er si Tiglat-Pileser, erdi Beera taleamu mutu tep, popra bisbisa kapudi, Beera tomopra, Israel mutu neitamai di tapra, er pe mutu tamupra, Asyur mutu dubenamu.

7 Ruben yala nesala, sun co puna neng cap, tonda Rubendi deipupa, dadeipdanen yakarami yala nesala, sun deiyo kepra talerami neng yuma cap, sun si sekra deiamitopu, aca peda sekmepu. Aneng sun sida ake. Ada, Yeiel cap, Zakaria cap, Bela cap kurami. 8 Bel er nai bo sida, Azas kuramu. Azas er nai bo sida, Sema kuramu. Sema er nai bo sida, Yoel kuramu. Rubendi deiamupa, dadeipdanen yakarami yala nengda, denge weik kurami. Rubendi deiamupa, dadeipdanen yakarami neng, ton tara nengda, Aroer mutu ila ati arum damai kurami. Amutu di gonga kepra, benamyanen utarada, Nebo mutu ati arum cap, Bahal-Meon mutu ati arum bena, dopra dakurami. 9 Ruben yala nesala dinin, ton tara nengda, ortara keteng yakan tara dinin, itara karen mutu ton bena kurami. Amutuda, ila di embaramre me, er si Efrata me embarurai dinin, itara mutu, Efrata me duman mutu bena kurami. Sun kurami mutuda, atara dinin, ortarada ila katawai mutu, me pio men kwamu mutu kwamu. Menop taruda, Gilead mutu neitamai kurami dinin, sun periami gam kecada, domba bisam cap, kambing cap, sapi bisam cap, pio weik peiramya cadi, apeirami keca, sun jena tep kecada, pio weik men kwamu. Sun anesaladi talepra, sun peirami kecada, pio weik kuramnga tep, sun anesalada, keteng yakan tara dinin, itara mutu Efrat me duman, yambul karenai itara bena kurami.

10 Raja Sauldi nimi deiyo kepra, Israel nesala taleamu taruda, Ruben yala nengdi deiami ngebo, er si Bela, er yala nengdi, Gilead mutu keteng yakan tara kurami nesala popra bisbisa kapidi, gawal daki. Ayala nesala, sun Hagri nesalada, Hagardi deipupa, dadeipdanen yakarami nesala kurami. Akurami nesala yumada, Bela yala nengdi, Hagri nesala popra tamipa, tenpu pe ton gam men kurami. Ukupidi amutu tu yumada, Bela er yala nesaladi, atu yuma dalupra dopramidi kurami.

Gaddi deipupa, dadeipdanen yakarami neng tep, pepu upu

11 Ruben yala nesala, sun tara mutu ada, utara dapu tara Basan mutu kurami. Basan mutu neitamaida, sun cap, Gad yala nesala cap, mening damaipu kurami. Gad yala nesaladi amutu bena, aca di dipra benamnganen, pio karenai keteng yakan tara, Salka mutu benamidi, ati arum domidi, dabena kurami. 12 Gad yala nesalada, Yoeldi sun ayala nesala tep, menmena deiyo ngebo kepra kuramu. Yoelda, ila ngebo kuramu dinin, er pel melimna tep, butene ngeboda, Safandi talepra kuramu. Tonda, Yaena cap, Safat capda, Basan mutu kurami yala nesala tep, ‘Ukupkurume,’ pepra, upu bongdina tep, sun peda deiyo neng kepra kuramrei.

13 Tonda, Gad yala nengpu dinin, yuk nengdi deiamipa, dadeipdanen yakarami yala neng ton kurami. Ada, ayoneitam bari yala neng, sun deiyo nengda, sun si ake. Ada, Mikhael cap, Mesulam cap, Syeba cap, Yorai cap, Yakan cap, Ziya cap, tonda Eber cap kurami. 14 Sun aneng yumada, Huri er mi Abihaildi deiamupa, dadeipdanen yakarami nesala, sun denge weik kurami. Huridi, Abihail deipu. Huri er nai boda, Yaroah kuramu. Yaroah er nai boda, Gilead kuramu. Gilead er nai boda, Mikhael kuramu. Mikhael er nai boda, Yesisai kuramu. Yeisai er nai boda, Yahdo kuramu. Yahdo er nai boda, Bus kuramu. Atep, sun gung yuma dadeipgerekdanen, yakarami nengda, ukuprap sun denge pio weik kurami.

15 Tonda, sun adeipgerekdanen, yakarami neng, sun yala tep deiyo kemami nengda, ake. Ada, Abdiel er mi Ahi deiamu. Tonda Abdielda, er nai boda, Guni kuramu. Sun ayala nesalada, sun ila deiyo ngeboda, Ahi kuramu. 16 Uda, Gad yala nesalada, Gilead mutu cap, tonda Basan mutu cap, neitamai bena kurami. Tonda, amutu tara neitamaida, ati arum doramidi, sunpu dabena kurami. Tonda, ila pala ban mutu, er sida Saron tara ton, dabena kurami. Tonda, Saron tara neitamaida, mutmuta pio weik kuramu mutu, sun ayala nesala ton, atara bena dakurami. 17 Aca di deiki tara, nimi si sekmapu nengda, Yehuda tara kurami nesala yuma taleamu ngebo, er si Yotamdi, Raja kepra, amutu taleamu taru cap, tonda, Israel yala nesala kurami mutu, Yerobeamdi Israel yala nesala deiyo kepra taleamu taru cap, sun adeipgerekdanen, yakarami nesala, yala yuk-yuk kuramipa, sun si sekra deiami.

Yordan mekin, keteng yakan tara kurami yala nesaladi, mar podana neng wepra deipya tep, seki upu

18 Keteng yakan tara kurami nesalada, Rubendi deiamupa, dadeipdanen yakarami yala neng cap, tonda Gaddi deiamupa, dadeipdanen yakarami yala neng cap, tonda Manasyedi deiamupa, dadeipdanen yakarami yala neng cap dinin, sun Manasye yala nengda, neitamai di bokrapidi, dakurami. Ayala-ayala neng yuma neitamai di, jen talena neng wepra, deipi neng, sun dengeda, empat puluh empat ribu, tujuh ratus enam puluh (44.760) nengpu wepra deipi.

Sun anengda, mar podana taru lelimna kecada, teng utopu dinin, buru di taleramenge nge, er sida, perisai douna cap, tonda, nimi pon ya douna cap, tonda mar douna cap keca yumada, ila di kael keami neng wepra deiami. Sun anengda, jen talena tep, ila kael kemna neng kurami. Tonda, ‘Ukuptepe, ukuptepe,’ tenena ngeda, pio piripra weika di kael kemna neng kurami. Sunda kware men tenerami. 19 Sun ajen talena nengdi, yala dana-dana tara nesala tep, ‘Mar porbenkamepe’ tenen, ketenepra deiami ngeda, asi pepkup yala nesala tep, mar porbenami. Mar porbenami nesalada, sun si ake. Ada, Yetus yala neng cap, Nafis yala neng cap, tonda, Nodab yala neng cap, tonda Hagri yala nengdi deiamipa, dadeipdanen yakarami yala nesala, sun tep mar porbenami.

20 Sun ajen talena neng yumada, Allah tep teka tenerami neng kuramya cadi, sundi, ‘Allah tep moropmepepa, tek sisi Allahdi melipkamser’ tenen, moropi pangeda, Allahdi sun aneng mororami ngeda, gekepudi, sun tenepra mororamitopu kupra melipu. Ukupka deiki di, sun aweneri yala nengdi, Hagri yala nesala cap, sun tara keami yala nesala cap, sun yumada popra gawal daki.

21 Ruben yala neng cap, Gad yala neng cap, tonda Manasye yala neng neitamai di bokropi neng capdi, sun Hagri yala neng dinin, Yetur yala neng cap, Nafis yala neng cap, tonda Nodab yala neng capdi popidi, bisbisa kapi. Ukupi dingeda, sun ayala-ayala nengdi peirami keca, dalupra dopropi. Ada, unta ^{▼▼unta – Akeca gambar dina tep, Kejadian 12:16 dinkurume.} bisamda, lima puluh ribu (50.000) cap, domba bisam dua ratus lima puluh ribu (250.000) cap, keledai bisam dua ribu (2.000) cap, ange yuma dalupra dopropi. Ada amutu nesala tep, mar porbenamyanen, konum poptapidi, apoptapi mutu nesala, sun peirami keca dalupra dopropi. Tonda, amutu kurami nesalada, seratus ribu (100.000) neng ton, tomoprapidi, ateng koupra dubenamidi, wenemna ati dongopi. Angepu gum dinin, tomopra aderiryai neng dengeda, seratus ribu neng (100.000) tomopra deriryai. Uda, akupi ngeda, Allahdi, ‘Ukupkamenge,’ tenemutopu kupi.

22 Ada, Ruben yala neng cap, Gad yala neng cap, tonda Manasye yala neng neitam di bokropi yala neng cap, sundi amutu kurami nesalada, pio weik popi. Ukupi dingeda, sun yala neng yumada, adalupra doropi mutu tuaipu bena kurami. Ukuramipane, Allahdi Israel nesala sun wenemna tep, go karepupa, yuk karen mutu, Babel mutu nesaladi, amutu neitamai kurami nesala yuma, popra bisbisa kapidi, amutu kurami nesala pio weika di dopra, sun pe mutu, Babel mutu neitamai dubenamidi, deribeipa, dakurami.

Yordan me duman dinin, keteng yakan tara kurami nesala, ada Manasye yala neng neitamai tep, sekeipi upu

23 Manasye yala nengdi deipipa, dadeipdanen yakarami nesalada, neitamai di bokra, yuk-yuk bena kurami. Ton tara nengda, Manasye yala neitamai di bokrapidi, ayala nengda, Basan mutu utara, dapu mutu tara di dipdongopra, kupbenamyane, pio karenai Bahal-Hermon mutu cap, Senir mutu cap, tonda Hermon mutu damaipu bena, ati dopra dakurami. Ukuramidi, sun ayala nesalada, pio weik kupbarami. 24 Sun ayala nesala tep, deiyo kepra talerami nengda, sun si ake. Ada, Hefer cap, Yisei cap, Eliel cap, Azriel cap, Yeremia cap, Hodaya cap, tonda Yahdiel cap, kurami. Sun aneng yumada, ila puto di jen talepra kuna neng kuramipa, atara nesala yumadi, sun si kael keami.

25 Anengda, ila mambul neng, puto weik neng kurami dinin, Israel nesala sun co puna nengdi si eremami Allah, erdi, “Ukupkamrume, angeda pio men kupkamrume,” pepra, deiamu upu, moupra men taleamidi, Allah tep amnyo kepra tami. Ukuramidi, Kanaan tara nesala, menop taru di amutu kurami nesala, sundi talepra si eremami isok-isok tep, Israel nesala peda, akeca tep, ‘Nun nai,’ tenen, atali keca si eremami. Ada, Allah erdi enepra donokamu neng, sundi si eremami isok-isok tepapu, Israel nesala peda, si eremamidi, mali weik kurami.

Yordan me duman goupra, keteng yakan tara kurami Israel yala nesala yumada, bisbisa kapra, tomopra yuk karen mutu dubeiya tep, pepu upu

26 Israel yala nesala dinin, Kanaan tara isok-isok si erepra kuramya tep nengeda, Allahdi, pio karen mutu, Asyur mutu taleamu nimi deiyo ngebo, er sida Raja Pul, tonda er si Tilgat-Pilneser, er dipru neitamai pel dopupa, animi deiyo ngebodi, Yordan me goupra ame dumanda, keteng yakan tara kurami yala nesalada, Ruben yala neng cap, Gad yala neng cap, tonda Manasye yala neng dinin, neitamai di bokropi neng cap, sun yumada tomopra, Asyur tara neitamai, wenemna ati derirbei.

Ada, Raja Puldi sun ayala neng tep, tomopra derirbeu mutu sida ake. Ada, Halah mutu cap, Habor mutu cap, Hara mutu cap, tonda Gason me damai mutu cap, dopra deribeu. Bena deiamupane, ataru di dipra, dakuramipanen, abuku sekra deipmepu taru peda, sunda orkaren mutu tupa dakununge.