1Ch 6 | XteSC | STEP | Lewidi deiamu sal nyapuda, weneri neng deiamu. Sun sida ake. Ada, Gerson cap, Kehat cap, Merari cap, sun ukuprap neng kurami.

1 Chronicles 6

Lewi yala nengdi deipipa, dadeipdanen yakarami nengdi, ‘Allah er si eremna ati pumbon pel donkameng’ tenen, imam neng keamya tep, seki upu

1 Lewidi deiamu sal nyapuda, weneri neng deiamu. Sun sida ake. Ada, Gerson cap, Kehat cap, Merari cap, sun ukuprap neng kurami. 2 Lewidi deipu ngebo Kehatda, sal nyapupu dumbari deiamu. Ada, Amran cap, Yizhar cap, Hebron cap, tonda Uziel cap kurami. 3 Kehatdi deiamu ngebo Amran, er nyapuda, sal nyapu butene deiamu. Ada Harun cap, Musa cap deiamu. Tonda erdi deiamu ner mida, Miryam deiamu. Harunda, sal nyapu dumbari deiamu. Ada, Nadab cap, Abihu cap, Eliazer cap, tonda Itamar cap deiamu. 4 Harundi deipu ngebo Elieserdi deipu ngeboda, er si Pinehas kuramu. Pinehasdi deipu ngeboda, Abisua kuramu. 5 Abisuadi deipu ngeboda, er si Buki kuramu. Bukidi deipu ngeboda, er si Usi kuramu.

6 Uda, Zerahyadi deipu ngeboda, er si Merayot kuramu. 7 Amaryadi deipu ngeboda, er si Ahitub kuramu. 8 Sadokdi deipu ngeboda, er si Ahimaas kuramu. 9 Azaryadi deipu ngeboda, er si Yohanan kuramu. 10 Yohanandi deipu ngeboda, er si Azarya kuramu. Uda, Azaryada, Allah upu si eremna cap, karena cap tep domi ati pumbon tep, mambul pel dona ngebo kuramu. Akatida, Raja Salomodi Yerusalem mutu neitamaipu domu. 11 Azaryadi deipu ngeboda, er si Amarya kuramu. Amaryadi deipu ngeboda, er si Ahitub kuramu. 12 Ahitubdi deipu ngeboda, er si Sadok kuramu. Sadokdi deipu ngeboda, er si Salum kuramu.

13 Salumdi deipu ngeboda, er si Hilkia kuramu. Hilkiadi deipu ngeboda, er si Azarya kuramu. 14 Azaryadi deipu ngeboda, er si Seraya kuramu. Serayadi deipu ngeboda, er si Yozadak kuramu. 15 Yosadak erda, Allahdi Yehuda mutu kurami nesala cap, tonda ila ati arum Yerusalem mutu nesala cap, yuk karen mutu ila nimi deiyo ngebo, Raja Nebukadnezardi, atara nesala yuma, popra bisbisa kapudi, ton tamipa, tupa gam kurami nengda, ateng kouprapidi, sun pe karen mutu, Babel mutu dubenami. Ada, Allahdi, Babel mutu taleamu ngebo, Raja Nebukadnezar deiki di puto karepupa, Yehuda tara kurami nesala yuma bisbisa kapudi, yuk mutu doupra derirbenamu.

Lewi yala neng dinin, ton yuk tara di, deipi neng tep, seki upu

16 Lewi er nyapuda, sal nyapupu weneri deiamu ngeda ake. Ada, Gerson cap, Kehat cap, tonda Merari cap deiamu. 17 Lewidi deipu ngebo Gerson, er nyapuda ake. Ada, Libni cap, Simei cap, ukupra deiamu. 18 Kehatdi nyapu ton deiamupa, sun sida ake. Ara, Amran cap, Yishar cap, Hebron cap, tonda Uziel cap, sunda Kehatdi deiamu neng kurami. 19 Lewidi deiamu ngebo Merari kuramu. Meraridi deipu nyapuda, Mahli cap, Musi cap, sunda Meraridi deiamu. Sun Lewi yala nengdi deipipa, dadeipdanen yakaramyada, sun ila deiyo neng si asengamitopu, nun peda asekmepu. Aila nengda, sun si ake.

20 Gersondi deipu mida, Libni kuramu. Libnidi deipu mida, Yahat kuramu. Yahatdi deipu mida, Zima kuramu. 21 Zimadi deipu mida, Yoah kuramu. Yoahdi deipu mida, Ido kuramu. Idodi deipu mida, Sera kuramu. Seradi deipu mida, Yeatrai kuramu.

22 Kehatdi deipu ngebo ton Aminadab kuramu. Aminadabdi deipu mida, Korah kuramu. Korahdi deipu mida, Asir kuramu. 23 Kehatdi deipu ngebo Asirdi deipu mida, Elkana kuramu. Elkanadi deipu mida, Ebyasaf kuramu. Ebyasafdi deipu mida, Asir kuramu. 24 Ebyasafdi deipupa, Asirdi deipu mida, Tahat kuramu. Tahatdi deipu mida, Uriel kuramu. Urieldi deipu mida, Usia kuramu. Usiadi deipu mida, Shaul kuramu.

25 Elkana er sal nyapuda, butene ton deiamu. Sun sida ake. Amasai cap, tonda Ahimot cap kuramrei. 26 Ahimotdi deipu mida, Elkana kuramu. Elkanadi deipu mida, Sopai kuramu. Sopaidi deipu mida, Nahat kuramu. 27 Nahatdi deipu mida, Eliyab kuramu. Eliyabdi deipu mida, Yeroham kuramu. Yerohamdi deipu mida, Elkana kuramu. Elkanadi deipu mida, Samuel kuramu. 28 Samuel er nyapuda, sal nyapupu butene deiamu. Ton ngeboda, Yoel kuramu. Ton butene ngeboda, Abija deiamu.

29 Uda, yuk ngebo er si Meraridi deiamu ngebo, er sida, Mahli kuramu. Mahlidi deiamu ngebo er sida, Libni kuramu. Libnidi deiamu ngebo er sida, Mahli kuramu. Mahlidi deiamu ngebo er sida, Simei kuramu. Simeidi deiamu ngebo er sida, Uza kuramu. 30 Uzadi deiamu ngebo er sida, Simea kuramu. Simeadi deiamu ngebo er sida, Hagaia kuramu. Hagaiadi deiamu ngebo er sida, Asaya kuramu.

Allah si eremna taruda kecapi cap, suling cap, mutu pena keca bung-bung pena doupnepa, mut perami neng tep, pepu upu

31 Allahdi, “Ukunkamrume, angeda pio men kunkamrume,” pepra, pedina upu deiki di pepra deipupa, Musadi asekamu upu deiami co pumbon keteneipi peti co, er sida Peti Perjanjian, ange dopra, Allah Yahweh, ^{▼▼Yahweh – Allah er pe si, tek sisi ngeda, ‘Yahweh’ kurure. Ibrani upu deiki di, asi er deiyoda, ‘Ne pio akunune,’ kurure. Ada, akeca-keca yuma kapul men ketekeipra deiamu taruda, Allah konum akuramu. Tonda, ataru di dipra, pio dorkunkamre taru peda, Allah pio akunkamrure. Allahdi Musa tep, er si katuai di lap pepu (Keluaran 3:14). Ibrani upu deiki di, ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra, ne tep gispal donkamnerume,” pepu. Ibrani nesaladi huruf YHWH sengnung dinin, nundi, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ pepra sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda, lap pena upu nomor 49 dirume.} er si eremna cap, er karena cap tep ati, Yerusalem mutu neitamai di, aco peti pumbon derirbei. Apeti co, er si Peti Perjanjian derirbei taruda, Raja Dauddi, ‘Anengda, Allah Yahweh er si eremna tep, mut upu penkamsenge,’ tenen, nimi yuk neng wepra deipu. Tonda, ‘Nun pelda ace’ tenen, dumsisikra Allah er si eremna ati, keana taru tep, opkal di dodin tenda ati pumbon, ‘Amut pena pel donkamseng’ tenen, wepra deipu.

32 Raja Dauddi aneng wepra deipupa, ataru di dipra, dortaru Raja Salomodi, Allah cap, nimi cap, antamna tep ati, Allah er si eremna ati domu taruda, ila ati arum er sida, Yerusalem neitamai domu. Ataru neitamai yumada, anengdipu mut perami. Aneng yumada, keana tep, Raja Dauddi opkal bol di dodina tenda ati ^{▼▼tenda ati – Akeca gambar dina tep, Imamat 1:1 dinkurume.} ketenepra deiamunge di, Allah si eremna mut pena tep nengeda, tenpu-tenpu neng tep go karepmantopu, perami. Ange yumada, Raja Dauddi, “Ukupra kunkamrume,” pepra, deiputopu, sundi angepu talepra kurami.

33 Allah er si eremna ati, mut pena tep go kareami neng, sundi deipipa, dadeipdanen benami neng, sun sida ake. Ada, sun aneng yumada, Kehat yala neng kurami. Ayala nengdi deiami ngebo, er si Yoelda, erdi deipu ngebo Hemandi mut peramu. Heman er nai boda, Yoel kuramu. Yoel er nai boda, Samuel kuramu. 34 Samuel er nai boda, Elkana kuramu. Elkana er nai boda, Yeroham kuramu. Yeroham er nai boda, Eliel kuramu. Eliel er nai boda, Toah kuramu. 35 Toah er nai boda, Zuf kuramu. Zuf er nai boda, Elkana kuramu. Elkana er nai boda, Mahat kuramu. Mahat er nai boda, Amazai kuramu.

36 Amazai er nai boda, Elkana kuramu (Angebo Elkanada, Zuf er weit gume. Angeboda, er si utotopu dinin, erda yuk Elkana kuramu.) Amazai er nai bo Elkanada, er nai boda, Yoel kuramu. Yoel er nai boda, Azarya kuramu. Azarya er nai boda, Zepanya kuramu. 37 Zepanya er nai boda, Tahat kuramu. Tahat er nai boda, Asir kuramu. Asir er nai boda, Ebyasaf kuramu. Ebyasaf er nai boda, Korah kuramu. 38 Korah er nai boda, Yizhar kuramu. Yizhar er nai boda, Kehat kuramu. Kehat er nai boda, Lewi kuramu. Lewi er nai boda, Yakub, er si ton Israel perami.

39 Asafda, Allah er si eremna ati neitamai mut pena neng, sun gonga kemna ngebo dinin, deiyo butene ngebo kuramu. Mut pena deiyo kemna ngebo, Yoel er mi Heman, er melimna ngeboda, Asaf kuramu. Er cap, er melipra mut perami neng capda, Heman er dumsisi tara tengamidi, mut perami. Asaf er nai boda, Berekya kuramu. Berekya er nai boda, Simea kuramu. 40 Simea er nai boda, Mikhael kuramu. Mikhael er nai boda, Baaseya kuramu. Baaseya er nai boda, Malkia kuramu. 41 Malkia er nai boda, Etai kuramu. Etai er nai boda, Zerah kuramu. Zerah er nai boda, Adayah kuramu. Adayah, 42 Adayah er nai boda, Etan kuramu. Etan er nai boda, Zima kuramu. Zima er nai boda, Simei kuramu. 43 Simei er nai boda, Yahat kuramu. Yahat er nai boda, Gerson kuramu. Gerson er nai boda, Lewi kuramu.

44 Uda, mut pena deiyo ngebo Heman, er tebalal tara tengamudi mut peramu ngeboda, Etan kuramu. Etanda, Allah er si eremna ati pum neitamai mut pena tep gungda, deiyo weneri ngebo kuramu. Erda, Meraridi deipupa, deipdanen yakarami nengdi deiami ngebo kuramu. Amutu mut pena nengda, sun deiyo ngebo Etan, er nai boda, Kisi kuramu. Kisi er nai boda, Abdi kuramu. Abdi er nai boda, Maluk kuramu. 45 Maluk er nai boda, Hasabya kuramu. Hasabya er nai boda, Amazia kuramu. Amazia er nai boda, Hilkia kuramu. 46 Hilkia er nai boda, Amsi kuramu. Amsi er nai boda, Bani kuramu. Bani er nai boda, Semer kuramu. 47 Semer er nai boda, Mahli kuramu. Mahli er nai boda, Musi kuramu. Musi er nai boda, Merari kuramu. Merari er nai boda, Lewi kuramu.

48 Uda, sun co puna ngebo Lewidi deipupa, dadeipdanen yakarami neng, sun Lewi yala neng, yuk neng yumada, wepra deiamipa, Allah er si eremna ati pumbon pel, yuk pel ton bokra karepipa, apelpu talepra kurami. Ataruda, Allah er si eremna cap, er karena tep nengeda, opkal bol di dodin tenda ati ketenepra deiami. Atenda ati damai cap, neitamai capda, sun Israel yala nesala yumadi Allah tep, telep keca kareramidi, er sipu eremami.

Harundi deiamupa, dadeipdanen yakarami neng tep, pepu upu

49 Uda, Harun cap, erdi deipupa, dadeipdanen yakarami neng cap, sun pelda ake. Ada, Allah si eremna tep, domi ati pumbonda, siltong telep keca dopra, uku seknedi, akeca uku dongoramipa, uku jeramu. Ayala nengpu dinin, ton neng bokra, wepra deiamipa, Allah er karena tep, gam keca popnedi, akeca deiki deriryakanai, er si mesba ketenemdina pel cap, tonda Allah karena tep, yapi keca doupra yangepa, mesba deiki jeramu uku dongona pel cap, ‘Ayala nengdi, apelpu talepra donkameng’ tenen, wepra deipi. Allah er si eremna ati pumbon dinin, mali keca tenpunge pe, pio men kwamgai, Pio Lek Telep Lengna Ati neitamaida, apel-apel yuma talepra dorami. Apel doraminge deiyoda ake. Ada, ‘Nun Israel nesala mali kunup keca tep, poptapsetudi, gawal daksetu dinin, amalinge yumada, daepsetudi, gum kupra deipkamser’ tenen, agam keca popra kareryakaramidi, mesba deiki uku dongorami. Harun cap, erdi deiamu nyapu cap, sundi akeca talepra pel dorami. Akuraminge yumada, Allah er pel don ngebo Musadi, “Angeda kunkamrume, angeda pio men kunkamrume,” pepra, deiamunge tepapu tenepra, akati pel talepra kurami.

50 Uda, Harundi deipupa, dadeipdanen yakarami nengda, sun si ake. Ada, Harundi deipu ngebo er sida, Elieser kuramu. Elieserdi deipu ngebo er sida, Pinehas kuramu. Pinehasdi deipu ngebo er sida, Abisua kuramu. 51 Abisuadi deipu ngebo er sida, Buki kuramu. Bukidi deipu ngebo er sida, Usi kuramu. Usidi deipu ngebo er sida, Zerahya kuramu. 52 Zerahyadi deipu ngebo er sida, Merayot kuramu. Merayotdi deipu ngebo er sida, Amarya kuramu. Amaryadi deipu ngebo er sida, Ahitub kuramu. 53 Ahitubdi deipu ngebo er sida, Zadok kuramu. Zadokdi deipu ngebo er sida, Ahimaas kuramu.

Lewi yala neng kurami mutu tep, pepu upu

54 Harundi deiamupa, dadeipdanen yakarami nesala, sundi sun tu talepra kurami mutu-mutu yumada ake. Harundi deiamu ngebo Kehat, erdi deipupa, dadeipdanen yakarami yala nesalada, sun kuna tep, kareami mutu tuda ake. Ada, ‘Lewi yala nesala tep, amutu neitamaida, akati arum ton dopra, ormutu neitamaida, akati bena dopra, talepmengedi dakunkameng’ tenen, wepra kareami mutu tuda, ake. Ada, menmena tarada, sun Kehat yala nesaladi doropi. 55 Atep, sun Kehat yala nengdi taleami mutu tuda ake. Yehuda tara neitamai dinin, akati arum sida, Hebron mutu karepi. Tonda, amutu damai dinin, dipdongopra, benamnganen, amutu dana-dana tara, amutu damai katuai manmaning telep pamu mutu yumada, wepra karepipa, sun Kehat yala nengdipu atu taleami. 56 Dinino, Hebron mutu damai dinin, yambul ati arum dopra kuraminge cap, amutu di ortara, yambul karenai mutu wa peamyai capda, Yefune er mi Kalep tep, wepra karepipa, atu talepra dakurami.

57 – 58 – 59 Atep nengeda, Harundi deipu ngebo Kehot, erdi deiamupa, dadeipdanen yakarami nesalada, Hebron mutu wepra karepi. Tonda, Hebron mutuda, mambul mutu kwamu. Ada, Israel nesala neitamai di, tenpu ngebo ton, er mankau di kundenkap, yuk ngebo poprepa, yuk nengdi angebo tep, ‘Nun kap popmau ngeboda, nundi kwaya dakra popkup’ tenen, domange neng, sun telep kupra wengbana mutu kwamu. Mangkau di nimi popmaua deiyo ngeboda, amutu bena wekyopda, yuk nengdi er tep tomoptengedi, men wenepra poptenge. Amutuda, Hebron mutu tu karepi. Amutu sida ake. Libna ati arum cap, Estemoa ati arum cap, Hilen ati arum cap, Debir ati arum cap, Asan ati arum cap, Bet-semes ati arum capda, amutu-amutu wepra, Kehat yala neng tep karepi. Tonda, ayambul ati arum yuma, dana-dana tara bukamodi, ila manmaneng paramu mutu, aban yuma capda, Kehot yala nesala tep karepi.

60 Tonda, Benyamin yala nesala, sun mutu tu dopropinge neitamaida, Kehot yala nesala tep karepi. Ayambul-yambul ati arum sida ake. Geba ati arum cap, Alemet ati arum cap, tonda Antot ati arum cap karepi. Tonda, ayambul ati arum dana-dana tara kwamudi ila manmaneng paramu mutu banai cap karepipa dopropi. Ada, yambul ati arum dominge dengeda, tiga belas (13) ati arum dopra kuramyaida, Kehot yala nesala, sun tara nyapsilippu kuna tep dopropi. 61 Manasye yala nesala dinin, neitamai di bokra kurami neng, sundi taleami mutuda, morokyo di dutara ton (10), ati arum dopra kuramyaida, Yordan me duman dinin, keteng dangban tara kuramyai tu dorona tep nengeda, ‘Anengdi dopropkung do, yuk yala neng di do?’ tenena tep, jenek kael kemna deiyo tep peten kemna keca, er si undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} pel dopidi, Kehatdi deiamupa, deipdanen yakarami nesala dinin, mutu tu ton men doprami yala neng tep, akati arum dopra karepi.

62 Gersondi deipupa, dadeipdanen yakarami yala nesala, sun tara nengda, yambul ati arumda, tiga belas (13) karepi. Amutu-amutu yumada, Isakar yala nesala cap, Asyer yala nesala cap, Naftali yala nesala cap, tonda Manasye yala nesala dinin, neitamainge cap yumada, sundi talepra kurami mutu neitamai di dopra, Kehat yala nesala karepi. Amutu-amutuda, Yordan me duman dinin, ame goupra ortara keteng yakan tara, Basan mutu neitamai, sun ayala nesala talepra, kurami mutu neitamai kwamu ati arumda, 13 bokra Kehatdi deiamupa, dadeipdanen yakarami nesala karepi.

63 Angetopu, undi pel dopi dingeda, Meraridi deipupa, dadeipdanen yakarami nesala peda, sun kunkami mutu tu tep, karepipa dopropi. Adopropi mutu tuda, amul di dutara yuma ati arum, 12 desa dopropi. Ada, Ruben yala nesala cap, Gad yala nesala cap, Zebulon yala nesala cap, ayala nesala talepra kurami mutu wepra karepipa, dopropi.

64 Ange yuma ukuramya deiki di, sun Israel yala nesaladi, sun tu men doprami yala neng, Lewi yala nengda, sun talepra kunkami mutu ada, yambul ati arum dopra, kunai mutu tu cap, tonda domba bisam jena tep, betei telep kupra paramu mutu tu capda, sun tep bokra karepipa, dopropi. 65 Tonda, undi pel dopya deiki di, Yehuda yala nengdi taleami mutu tara cap, Simeon yala nengdi taleami mutu tara cap, tonda Benjamin yala nengdi taleami mutu tara cap yumada, yambul-yambul ati arum dopra, sun kurami mutu tu peda, bokra karepipa, sun Lewi yala nesala tep karepipa, dopropi. 66 Ange utopu, sun Efraim yala nesala sun mutu tarada, ton tara wilipra, Kehat yala neng tep karepipa, dopropi. Ada, yambul-yambul ati arum doramyai cap, domba bisam peinaida, manmaning telep kupra bongoramu mutu tu tep, ange yuma bokra karepipa, Kehat yala nengdi dopropi.

67 Amutu-amutu neitamaida, sun Israel nesala kan-kan di, tenpu ngebo ton, er mankau di kundenkap, yuk ngebo poprepa, angebo tep yuk nengdi, ‘Nun kap popmar ngebo kwaya dakra popkup’ tenen, domange neng wengbana tep, telep mutu ton karepi. Amutu sida, Gezer mutu cap, Sikhem mutu cap, tonda, amutu dam tara kwamu manmaning paramu banaida, domba bisam peinai tep, karepipa dopropi. 68 Ange utopu, Yokmeam ati arum cap, Bet-Horon ati arum cap, amutu dam tara bukamu mutu manmaning paramu banai, domba bisam peinai tep, karepipa dopropi. 69 Ange utopu, Ayalon ati arum cap, Gat-Rimon ati arum capda, amutu dam tara kwamupa manmaning paramu banai, domba bisam peinai tep, Kehot yala nesala karepipa dopropi.

70 Tonda, Manasye yala neng dinin, neitamai di bokra, Yordan me duman dinin, ame goupra, keteng dangban tara kurami nengdi, sun taleami mutu ton wepra karepi. Amutu tu karepi. Ada, mutu si, Aner mutu ati arum dopra kurami mutu cap, Bileam mutu ati arum dopra kuramyai cap karepi. Tonda, amutu tu damaida, manmaneng telep kupra bongoramudi paramu mutu ton karepipa, sun Kehot yala nengdi dopropi.

71 Gersondi deiamupa, dadeipdanen yakarami yala nesala, sun tep nengeda, yambul-yambul ati arum dorami mutu tu cap, manmaneng telep kupra paramu mutu cap, bokra karepipa dopropi. Amutu karepi nengda, Manasye yala neng dinin, neitamai di bokra, Yordan me duman dinin, ame goupra, keteng yakan tara kurami nengdi karepi. Basan tara neitamai dinin, Golon mutu cap, tonda Asytarot mutu damai mutu cap, ange yumada, bokra karepipa, sun Gerson yala neng dopropidi, amutu dakurami.

72 – 73 Tonda, Isakardi deiamupa, dadeipdanen yakarami yala nesala, sun tep nengeda, yambul-yambul ati arum dorami mutu tu cap, manmaneng telep kupra paramu mutu cap, yuknge ton bokra karepipa, dopropi. Amutu sida ake. Ada, Kedes mutu damainge cap, Daberat mutu damainge cap, Ramot mutu damainge cap, Anem mutu damainge cap karepipa, talepra dakurami.

74 – 75 Tonda, Asherdi deiamupa, dadeipdanen yakarami yala nesala, sun tep nengeda, yambul-yambul ati arum dorami mutu tu cap, manmaneng telep kupra paramu mutu cap, yuknge ton bokra karepipa, dopropi. Amutu sida ake. Ada, Masal mutu damainge cap, Abdon mutu damainge cap, Hukok mutu damainge cap, Rehob mutu damainge cap karepipa, talepra dakurami. 76 Tonda, Naftali yala nengdi taleami mutu ton wepra karepi. Amutu tu karepi. Ada, mutu sida, Kedes mutu ati arum damai dinin, Galilea tarange ton bokra karepi. Tonda, Hamon mutu ati arum damainge cap, tonda Kiryataim mutu damainge cap, karepipa dopropi. Tonda, amutu tu damaida, manmaneng telep kupra paramu mutu ton karepipa, sun Kehat yala nengdi dopropidi dakurami. 77 Uda, Lewidi deiamupa, dadeipdanen yakarami nengdi, Merari deipi. Angebo Meraridi deipupa, dadeipdanen yakarami neng, sun kunkami mutu tuda, kapul men dopropi nesalada, yambul-yambul ati arum dorami mutu tu cap, telep mutmuta paramu mutu tu cap, bokra karepipa, Merari yala neng dopropidi, sunda amutu neitamai kurami. Aneng tep tu karepi yala nengda, sun Zebulon yala nengdi karepi. Amutu sida ake. Rimono ati arum damainge cap, Tabor ati arum damainge cap karepipa, sun Merari yala nengdi dopropi.

78 – 79 Angetopu, Meraridi deipupa, dadeipdanen yakarami neng, sun kunkami mutu tu tep nengeda, Rubendi deiamu yala nengdi, sun mutu tu ton bokra karepi. Ruben yala neng, sun mutuda, Yordan me duman goupra, orketeng yakan tara kurami. Atarada, ila ati arum Yeriko mutu dorami. Sun Ruben yala nengdi, Merari yala neng tep, karepi mutu tuda ake. Ila katawai me gum mutu damai dinin, amutu sida, Besser mutu ati arum damainge cap, Yahas mutu ati arum damainge cap, Kedemot mutu ati arum damainge cap, Mefaat mutu ati arum damainge cap, karepi. Tonda, akati-akati arum damai dinin, telep mutmuta paramu mutu tu cap, bokra karepipa, sun Merari yala nengdi dopropidi, amutu talepra dakurami.

80 – 81 Angetopu, Meraridi deipupa, dadeipdanen yakarami neng, sun kunkami mutu tu tep nengeda, Gaddi deiamu yala nengdi, sun mutu tu ton bokra karepi. Sun Gad yala nengdi, Merari yala neng tep karepi mutu tuda ake. Ada, Gilead tara neitamai dinin, mutu sida, Ramot mutu ati arum damainge cap, Mahanaim mutu ati arum damainge cap, Hesybon mutu ati arum damainge cap, Yaezer mutu ati arum damainge cap, karepi. Tonda, akati-akati arum damai dinin, telep mutmuta paramu mutu tu cap, bokra karepipa, sun Merari yala nengdi dopropidi, amutu talepra dakurami.