1 Chronicles 7

Isakardi deiamupa, dadeipdanen yai nesala tep, pepu upu

1Isakarda, sal nyapupu dumbari deiamu. Aneng sun sida ake. Tola cap, Pua cap, Yasub cap, tonda Simron cap, ukupra deiamu. 2Isakar erdi deipu ngebo Toladi, sal nyapu ngangtan bari (6) di deiamu. Sun sida ake: Uzi cap, Refaya cap, Yeriel cap, Yahmai cap, Yibsam cap, tonda Shemuel cap deiamu. Sunda, Tola er yala nesala, sun nyapsilip yuma tep, gonga kemna neng, deiyo talepra kurami. Tonda, sun aneng tep, yuk nesaladi, ‘Gume, sun ajen talena nengda, puto cap, balila kuna capda, weik neng kununge’ tenen, kael kemami. Ataruda, Raja Dauddi nimi deiyo kepra taleamu. Tola er yala nesala, sun nyapsilip yumadi deiamipa, dadeipdanen yakarami nesaladi deiamipa, jen talena pel dorami neng sun dengeda, pio weik, dua puluh dua ribu, enam ratus (22.600) neng kurami.

3Tola erdi deipu ngebo Uzida, sal mi tenpu deiamu. Er sida Yizrahya. Yizrahya erdi sal nyapuda, dumbari deiamu. Sun sida ake. Ada, Mikhanyel cap, Obaja cap, Yoel cap, tonda Yisia cap deiamu. Uzidi Yizrahya deipupa, erdi deiamu neng yumada, ayala nesala sun nyapsilip yumadi deipipa, dadeipdanen yakarami nesala, gonga kemna deiyo neng kurami.

4Yizrahya erdi sal nyapu weneri deiamupa, sundi nerapu weik domidi, nyapu weik deriramya cadi, sundi deipipa, dadeipdanen yakaramidi kurami nesala neitamaida, ‘Animida jen talena neng weike wektenge’ tenen, nukpetepra, sun si sekeipi neng dengeda, pio weik, tiga puluh enam ribu (306.000) neng kurami. 5Isakardi deiamupa, dadeipdanen yakarami nesala, sun nyapsilip yuk-yuk di derirami nesaladi, jen talena pel dona neng yuma tep, nukpetepidi, kael kepinge denge yumada, delapan puluh tujuh ribu (87.000) neng kurami. Aneng yumada, sun yala yuk-yuk dakuramitopu, sun si sekra deiami. Aneng yumada, ila puto weik jen talena neng kurami.

Benjamin cap, Dan cap, sundi deiamreipa, dadeipdanen yai nesala tep, pepu upu

6Benjaminda, sal nyapu weneri deiamu. Sun sida ake. Bela cap, Bekher cap, tonda, Yediael cap deiamu. 7Beladi sal nyapu pamubari deipmau. Sun sida ake. Ezbon cap, Uzi cap, Uziel cap, Yerimot cap, tonda Iri cap deiamu. Sunda, Bela er yala nesala, sun nyapu yuma tep, nimi deiyo talepra gonga kemna neng kurami. Tonda, sun aneng tep, yuk nesaladi, ‘Sun jen talena nengda, puto kuna cap, balila kuna cap, weik neng kununge’ tenen, kael keami. Bela er yala nesala, sun nyapsilip yumadi deipipa, dadeipdanen yakarami nesala tep, sun si sekdina tep buku, neitamaipu sekra deiami. Tonda, jen talena pel dorami neng sun dengeda, dua puluh dua ribu, tiga puluh empat (22.034) neng kurami. 8Bekherda, sal nyapu topnebari (9) neng deiamu. Sun sida ake. Zemira cap, Yoas cap, Elieser cap, Elyoenai cap, Omri cap, Yeremot cap, Abia cap, Anatot cap, tonda Alemet cap, sun ukuprap neng deiamupa kurami. Aneng yumada, Bekher erdi deiamu nyapu kurami.

9Sun aneng yumada, Bekher er yala nesala yuma tep, gonga kemna neng kurami. Bekher er yala nesala, sun nyapu neng yumadi deipipa, dadeipdanen yakarami nesaladi deipipa, jen talena pel dorami neng dengeda, dua puluh ribu, dua ratus (20.200) neng kurami. Tonda, sun aneng tep, yuk nesaladi, ‘Sun jen talena nengda, puto kuna cap, balila kuna cap, weik neng kununge’ tenen, kael keami. 10Yediaeldi sal mi tenpu deiamu. Er sida, Bilhan kuramu. Bilhandi sal nyapu yoneitam bari (7) deiamu. Sun sida ake. Yeus cap, Benyamin cap, Ehud cap, Kenaana cap, Zetan cap, Tarsis cap, tonda Ahisahar cap deiamu. 11Sun anengda, Yediael er yala nesala, sun nyapsilip yuma tep, nimi deiyo talepra, gonga kemna neng kurami. Tonda, ‘Sun aneng tep, yuk nesaladi sun jen talena nengda, puto weik kuna cap, balila kuna capda, pio weik neng kununge’ tenen, kael keami. Yediael er yala nesala, sun nyapsilip yumadi deipipa, dadeipdanen yakarami nesaladi deiamipa, jen talepra pel dorami neng, sun dengeda, tujuh belas ribu dua ratus (17.200) neng kurami.

12Tonda, Shupim cap, Hupim capda, nimi si Ir, erdi deiamu nengdi deipi neng kuramrei. Aher erdi deiamu mida, Husim kuramu.

Naftalidi deiamupa, dadeipdanen yai nesala tep, pepu upu

13Naftalida, sal nyapu dumbari di deiamu. Adeiamu neng sun sida ake. Yahziel cap, Guni cap, Yezer cap, tonda Salum cap deiamu. Aneng, sun apu boda, Yakub kuramudi, er pel dona ner, Bilha dopra dopudi, anyapu deipreiya cadi, aneng sun nin er sida, Bilha kuramu.

Manasyedi deiamupa, dadeipdanen yai nesala tep, pepu upu

14Manasyedi er pel dona ner, Aram mutu ner kuramnga cadi, er cap, aner cap kuramreidi, sal nyapu butene deiamrei. Aneng sun sida, Asriel cap, Makhir cap pepra, si karepu. Ukupuopda, amenda taruda, Makhirdi sal mi tenpu deiamu. Angebo er sida, Gilead pepra karepu. 15Makhirdi Hupim cap, Shupim cap, sundi dopkamrei nerapu tep, eramnganen, epudi karepu. Makhirdi domu ner er sida, Maakha kuramu. Makhir er mi butene ngebo er sida, Zelafehad kuramu. Zelafehadda, sal nyapu ton pio men deiamu. Erdi ner nyapupu deiamu. 16Maakhadi, ada Makhir er nerdi, sal nyapu ton butene deiamu. Sun sida, Peres cap, ton ngeboda, Seres cap pemu. Ukupupa, Peresdi utopu, sal nyapu butene deiamu. Sun sida, Ulam cap, ton ngeboda, Rakem pepra pemu.

17Ulamdi sal mi tenpu ton deiamu. Ami er sida, Bedan pemu. Sun aneng si sekmap neng yumada, Manasyedi Makhir deipu, Makhirdi Gilead deipupa, dadeipdanen yakaramidi, deipi nesala kurami. Anesala yuma, sun apu boda, Manasye kuramu. 18Makhir er mal ner er sida, Molekhet kuramu. Molekhet erdi sal nyapu weneri deiamu. Sun sida ake. Isyhod cap, Abiezer cap, tonda Mahla cap deiamu. 19Gileaddi deiamu ngebo Semi peda utopu, sal nyapu dumbari deiamu. Sun sida ake. Ahyan cap, Sekem cap, Likhi cap, tonda Aniam cap deiamu.

Efraimdi deiamupa, dadeipdanen yakarami nesala tep, pepu upu

20Efraimda, sal nyapu weneri deiamu. Tenpu ngebo er sida, Sutelah kuramu. Efraimdi Sutelah deipupa, Sutelehdi deipu ngeboda, Bered kuramu. Bereddi Tahat deiamu. Tahatdi Elada deiamu. Eladadi er mi deipudi, asi Tahatpu pemupa, angebo dakuramu. 21Angebo Tahatdi, er mi Zabad deipu. Zabaddi er mi Sutelah deipu. Efraimdi deipu nyapu buteneda, Ezer cap, tonda Elad cap, sunda Gad mutu kurami neng, sun peirami keca domba bisam cap, sapi bisam cap, damai bena upula donmaipa, Gad mutu sisi kurami nengdi, anyapu butene popi. 22Popipa, sun nai bo Efraimda, atumi-atumi yuma, er nyapu konum depreiya tep, teneramudi engenapu kuramu. Ukuramu pangeda, er kayapu nengdi, sun kabo er melimna tep, er dipru kwa dinmaiyadi, er kange telep kudiryakarami.

23Amenda taruda, Efraim er ner cap kikiman maramreidi, dakuramreianen, er ner konum mundu douamnganen, sal mi ton deipu. Sal mi deipu pangeda, ami er nai Efraimdi, ami er sida, Beria pepu. Ada, Efraim er nyapu butene pomipa, deamreipa, kange mun kange douamreiya cadi, asi karepu. Sun Ibrani upu deiki di, asi er deiyoda, ‘Kange mun kange douna keca’ tenena tep perami. Atep er mi deipudi, asi Beria pemu. 24Efraimda, ner mi ton deipu. Aner er sida, Sheera pepu. Sheeradi, mutu si Bet-Horon itara mutu neng cap, Bet-Horon arah utara mutu neng cap, tonda Uzen-Sheera mutu cap domu. Ada, anerdi gonga kepra, akati arum weneri domu.

25– 26– 27Tonda, Efraimdi sal mi ton deipu. Angebo, er sida, Refah pemu. Amenda taruda, Refahdi Resef deipu. Angebo Resefdi, er mi Telah deipu. Telahdi er mi Tahan deipu. Tahandi er mi Ladan deipu. Ladandi er mi Amihud deipu. Amihuddi, er mi Elisama deipu. Elisamadi er mi Nun deipu. Nundi er mi Yosua deipu. (Yosuada, Musa depu pangeda, erdi Israel nesala, sun deiyo ngebo kuramu). Sun anesaladi deipipa, dadeipdanen yakami nengda, amutu talepra dakurami.

28Efraimdi deipupa, dadeipdanen yakarami nesalada, sun kurami mutu tuda ake. Ada, Betel mutu cap, amutu dana-dana tara kwamu yambul-yambul ati arum doramyai yuma cap, tonda keteng yakan tara, Naaran mutu cap, tonda keteng dangban tara Gezer mutu cap, amutu dana-dana tara bukamu yambul-yambul ati arum dopra, kurami mutu yuma cap, tonda Sikhem mutu cap, amutu dana-dana tara kwamu yambul-yambul ati arum dopra kurami mutu yuma cap, amutu dipra arah utara bukamu mutu yuma dinin, siriyaida, Aya mutu cap, amutu damai yambul-yambul ati arum dopra kurami mutu cap, amutu-amutu yumada, Efraim yala nesala, sun mutu tupu kwamu.

29Sunda akuramipa, sun damai dinin, amutu wilimdonaida, yuk yala nesala kurami. Ada, Manasyedi deiamupa, dadeipdanen yakarami nesala kurami mutu yumada, akati arum ton kwamu. Ada, Bet-Sean ati arum cap, Taanakh ati arum cap, Megido ati arum cap, Dor ati arum cap kurami. Tonda, amutu-amutu damai kwamu yambul-yambul ati arum dopra kuramyai yuma capda, yuk yala nesala kurami. Amutu cap, akati arum yuma capda, Yakub, er si butene ngeda, Israeldi deiamu mi Yusuf, erdi deiamupa, dadeipdanen yakarami nesalada, sundi amutu-amutu neitamai, tu yumada, dopropidi dakurami.

Asyerdi deiamupa, dadeipdanen yai nesala tep, pepu upu

30Asyerdi sal nyapuda, dumbari deiamu. Sun aneng sida ake. Yimna cap, Yiswa cap, Yiswi cap, Beria cap kurami. Aneng sun mal ner er sida, Serah pemu. 31Ukupupa, Beriadi deiamu sal nyapuda, butene deiamu. Sun sida, Heber cap, tonda Malkiel cap, pepra si pemu. Malkiel erdi Birzait deipu. 32Beria erdi deipu ngebo Heberda, sal nyapu weneri deiamu. Sun sida, Yaflet cap, Somer cap, Hotam cap, tonda ner mi ton deiamudi, er sida Shua pemu. 33Heber erdi deipu ngebo Yaflet peda, sal nyapu weneri deiamu. Sun sida, Pasakh cap, Bimhab cap, tonda Asywat cap pemu.

34Yaflet er weit bo Somerda, erdi sal nyapupu, dumbari deiamu. Sun sida, Ahi cap, Rohga cap, Yehuba cap, tonda Aram cap, ukupra deiamu. 35Helem er weit bo Yafletdi utopu, sal nyapu dumbari deiamu. Sun sida, Zopa cap, Yimna cap, Seles cap, tonda Amal cap deiamu. 36– 37Zopadi deiamu neng sun sida, ake. Ada, Suah cap, Harnefer cap, Syual cap, Beri cap, Yimra cap, anyapuda kumdam bari, sebelas (11) kurami. Aneng sun sida, Suah cap, Harnefer cap, Syual cap, Beri cap, Yimra cap, Bezer cap, Hod cap, Sama cap, Silsa cap, Yitran cap, Beera cap deiamu. Yitrada, er sipu dinin, butene ngeda, Yeter pemu. 38Angebo Yeterdi deiamu neng, sun sida ake. Ada, Yufene cap, Pispa cap, tonda Ara cap, deiamu.

39Uda, Asherdi deipupa, dadeipdanen yai nengdi deipi ngebo, er si Ula pemi. Angebo Uladi deiamu neng, sun sida ake. Arah cap, Aniel cap, tonda Rizya cap deiamu. 40Anesala yumada, Asyerdi deipupa, dadeipdanen yakarami nesala kurami. Tonda, sun aneng yumada, sun yala cap, sun nyapsilip yuma tep, nimi deiyo talepra, gonga kemna deiyo neng kurami.

Tonda, aneng yumada, ila puto di jen talepnedi, kware pio gum, balila deipra, telep neng kurami. Tonda, ila-ila nimi deiyo neng kuramidi, akeca-keca yuma kuramipa, nimi yumadi, sun si kael kemami. Sunda, pio telep kupra kurami. Asyerdi deipupa, dadeipdanen yakaramidi kurami nesala kan-kan di, jen talena pel dona tep, sun si sengami neng dengeda, dua puluh enam ribu (26.000) neng kurami.