1Ch 9 | XteSC | STEP | Israel nesala, sun yala neng yuma, yuk-yuk deipdanen yakaraminge yuma tep, nukra si seki. Anuki nesala sun si seki bukuda, Israel nesala talerami neng, sun si sekra derirami buku neitamaipu sekra deipi. Abuku sida, “Buku Raja-Raja Israel,” pepra seki. Yehuda tara kurami nesalada, sun pe mali kuramya menenga tep, wenemnada yuk karen mutu, Babel mutu yu nengdi, Israel nesala popra bisbisa kapidi, aneng yuma tomopra, ateng kouprapidi, sun pe mutu, Babel mutupu tamupra derirbenami.

1 Chronicles 9

Yehuda tara kurami Israel nesalada, sun wenemna tep, yu nengdi popra, bisbisa kaprapidi, yuk mutu derirbeipa, dakuramipanen, tamupra sun pe mutu yai nesala tep, sekeipi upu

1 Israel nesala, sun yala neng yuma, yuk-yuk deipdanen yakaraminge yuma tep, nukra si seki. Anuki nesala sun si seki bukuda, Israel nesala talerami neng, sun si sekra derirami buku neitamaipu sekra deipi. Abuku sida, “Buku Raja-Raja Israel,” pepra seki. Yehuda tara kurami nesalada, sun pe mali kuramya menenga tep, wenemnada yuk karen mutu, Babel mutu yu nengdi, Israel nesala popra bisbisa kapidi, aneng yuma tomopra, ateng kouprapidi, sun pe mutu, Babel mutupu tamupra derirbenami. 2 Israel yala nesala, sun wenemna tep, Babel mutu donokamupa, dabena keteng tamun weika di dakuramyanen, tamupra sun pe men di kurami mutu yakana tep, gonga kepra yai nesalada ake. Ada, Allah er si eremna ati pumbon pel dona neng, imam neng cap, iman neng pel melimami neng, Lewi yala neng cap, ayala neng dinin, yuk da ton deiami nyapsilip cap, aneng sun melimna tep, tali pel dorami neng cap, sunda menmena di tamupra yai. Aneng yumada, Israel yala nesala kurami. 3 Tamupra yai dingeda, ton Yehuda yala nesala cap, Benjamin yala nesala cap, Efraim yala nesala cap, Manasye yala nesala neitamai di bokra dan tara nesala capda, yambula di menmena yaidi, Yerusalem mutupu tamupra yana kurami.

4 Yerusalem mutu tamupra yai nesalada, Yehudadi deiamupa, er nyapu sundi deipipa, dadeipdanen yakarami nesalada, denge yambula di kange di tamupra, Yerusalem mutu yaidi kurami. Yehuda erdi deiamu neng tamupra, Yerusalem mutu yai neng sun sida ake. Utai er nai boda, Amihud kuramu. Amihud er nai boda, Omri kuramu. Omri er nai boda, Imri kuramu. Imri er nai boda, Bani kuramu. Bani er nai boda, Peres kuramu. Peres er nai boda, Yehuda kuramu. Sun ukuprap neng tamupra yai.

5 Ton ngeboda, Syeladi deipupa, dadeipdanen yakarami nesala, sun nyapsilip yuma tep, gonga kepra, deiyo keamu ngeboda, Asaya kuramu. Asayada, Syela er menmena weni ngebo deipu. Atep, Asayadi deipupa, deipdanen yai neng peda, sun apu boda, Syela kuramu. 6 Tonda, nimi si, Zerahdi deipupa, dadeipdanen yakarami nesala, sun nyapu yuma tep, gonga kemna deiyo keamu ngeboda, Yeuel kuramu. Atep Yeueldi deipupa, dadeipdanen yai neng peda, sun apu boda, Zerah kuramu. Ayala nesala sun dengeda, enam ratus sembilan puluh (690) nesala yana, Yerusalem mutu kurami.

7 Benjamindi deiamupa, er yala nengdi deipipa, dadeipdanen yakaramidi kurami nengda, ton ngebo er si Salu. Salu er nai boda, Mesulam kuramu. Mesulam er nai boda, Hodawya kuramu. Hodawya er nai boda, Hasenua kuramu. 8 Tonda, Yeroham er mi Yibnia cap, Uzi er mi Ela cap, tonda Ela er apu boda, Mikri cap, Yibnia er mi Rehuel cap, Rehuel er mi Sefaca cap, Sefaca er mi Mesulam cap, sun yuma peda tamupra, Yerusalem mutu neitamai yaidi dakurami. 9 Yerusalem mutu tamupra yai nesala, sun dengeda, sembilan ratus lima puluh enam (956) neng yana kurami. Sun aneng yumadi deiyo kepra, sun yala nesala taleamidi upu perami.

Imam-imam neng, Babel mutu di tamupra yaidi, Yerusalem mutu yana kurami neng tep, pepu upu

10 – 11 – 12 Allah er si eremna ati pumbon pel dona neng, sun imam-imam tamupra Yerusalem mutu yaidi kurami neng, sun sida ake. Ada, Yedaya cap, Yoyarib cap, Yakhin cap, tonda Hilkia er mi Azarya cap kurami. Aneng sun apu yapu sida ake. Ada, Hilkia er nai boda, Mesulam kuramu. Mesulam er nai boda, Zadok kuramu. Zadok er nai boda, Merayot kuramu. Merayot er nai boda, Ahitub kuramu. (Ahitubda, Allah er si eremna ati kalengna pel tep talepra dorami neng, yuma sun deiyo ngebo kuramu). Aneng yumada, Babel mutu di tapra, Yehuda tara tamupra yaidi, Yerusalempu yana dakurami.

Tonda, yuk imam-iman neng sun sida ake. Ada, Yorehamdi deipu mida Adaya cap, Yoreham er nai bo Pashur cap, Pashur er nai bo Malkhia cap, Adiel er nai bo Yahzera cap, Yahzera er nai bo Mesulam cap, Mesulam er nai bo Mesilemit cap, Mesilemit er nai bo Imer cap, sun aneng yuma peda, Babel mutu di tapra, Yehuda tara tamupra yaidi, Yerusalem mutupu, ati arum yana dopra dakurami. 13 Sun imam-imam pel dona nengda, sundi deiamipa, dadeipdanen yakaramidi kurami nesala, sun nyapsilip cap, sun yala nesala yuma cap tep, nimi deiyo kepra, gonga kemna neng kurami. Sun dengeda, pio weik, seribu tujuh ratus enam puluh (1.760.000) nesala kurami. Sun aneng yumada, Allah er si eremna ati neitamai pel dona deiyo neng kuramya cadi, sun peda Yerusalem mutu tamupra yaidi, sun dakurami.

Lewi yala neng, Babel mutu di tamupra yaidi, Yerusalem mutu yana kurami nesala tep, pepu upu

14 Lewi yala nesaladi deipipa, dadeipdanen yakarami neng, sundi tamupra Yehuda mutu dinin, Yerusalem ati arum yana kurami nesala, sun sida ake. Ada, Hasubdi deipupa, dadeipdanen yai ngebo, er si Semaya cap, Azrikamdi deipu ngebo Hasub cap, Hasabyadi deipu ngebo er si Azrikam cap, tonda, Lewi er sirik taru deipu mi, er si Merari cap, tonda erdi deipu ngebo Hasabya cap, tamupra aneng yumada, sun apu bo, Lewi kuramngaipu yai. 15 Tonda, Lewi yala nesaladi deipipa, dadeipdanen yakarami neng ton, sun si ake. Ada, Bakmakar cap, Heres cap, Galal cap, tonda Matanya cap, tamupra yai. Matanyada, Mikha er mi kuramu. Tonda, Zikri erdi deipu ngebo Mikha cap, tonda Asafdi deipu ngebo er si Zikri, erda Asaf er nai bo kuramu. 16 Tonda, Semayadi deipu ngebo Obaja cap, Galaldi deipu ngebo Semaya cap, Yedutundi deipu ngebo Galal cap, Asadi deipu ngebo Berekya cap, Elkanadi deipu ngebo Asa cap, tamupra Yehuda mutu yai. Asa er yala nengda, Netofa mutu kurami nesala, sundi kurami mutupu, Asa er yala neng peda acapu kurami.

17 Uda, Allah Yahweh er si eremna ati buplan bisi wengbana damai kalengna tep nengda, sun yuma tamupra Yehuda tara men yai dinin, sun neitamai di bokra, ton nengda, Babel mutu di tamupra yanamidi, Yehuda tara dinin, Yerusalem ati arum neitamaipu yana kurami. Aneng sun sida ake. Ada, Akub cap, Talmon cap, Ahiman cap, Salum cap, tamupra yai. 18 Tonda, anengda menop taru, Allah er si eremna ati wengna tep ban bisi dinin, keteng yakan tara potokra deiamyaida, ila nimi deiyo ngebo Raja wengamu bisi buplan damai kalengna neng kurami. Aneng yumada, Israel nesala ila katuai mutu neitamai kurami taruda, sun Lewi nesala yumadi, opkal bol di deiami tenda ati kuramyai, kalengna deiyo neng kurami. 19 Salum, er nai boda, Kore kuramu. Kore er nai boda, Ebyasaf. Ebyasaf er nai boda, Korah kuramu. Korah er cap, er nai bodi deiamupa, dadeipdanen yakarami tara nesala cap, sun nyapsilip yuma tep, pel kareami ngeda, Allah Yahweh er si eremna tep, dodina ati ngeda, akati buplan bisi damai kalengna pel kareamipa, aneng dipapu talepra kurami. Pumun taru, sun nai yapu peda, sun pe mutu neitamai kurami taruda, ‘Allah Yahweh er si eremna ati wengban bisi buplan damai kalengna pelpu donkameng’ tenen, kareamipa, apelpu talepra dorami.

20 Tonda, pumun taru neitamaida, Elieser er mi Pinehasda, Allah si eremna tep dodina tenda ati buplan damai kalengna neng, sun deiyo ngeboda, Pinehas kuramu. Ukuramupa, Allah Yahwehdi tupa er tep melimamu. 21 Meselemya er mi Zakaria peda, Allah cap, nimi cap, antamna tep, opkal bol di dodina tenda ati, Allah er si eremna tep ati, buplan damaipu kalengna ngebo kuramu. 22 Allah ap, ninye ap elana ati, dolin tenda aik, er si eremna ati wengban bisi buplan damai kalengna tep wepra deiami neng yumada, dua ratus dua belas neng (212) kuramidi kalengami. Sun anengda, sun pe mutu kurami taruda, sun nyapsilip cap, sun yala neng cap, yuk-yuk dakuramitopu, nabi Samuel cap, Raja Daud capdi, ‘Tek sisi ayala nengdi, telep kupra akati bisi buplan kalengkamenge. Sunda, tek sisa dumsisi kunkamenga cadi, sun tep teka tenenume’ tenen, sundi si sekra deipreidi, apel karepreipa, dorami.

23 Ange tep nengeda, sun aneng cap, sundi deipipa, dadeipdanen yakarami neng yuma capda, Allah Yahweh cap, nimi cap antamna ati, Allah er si eremna tep, dodin tenda ati keteneiami ngeda, akati wengban bisi buplan damai kalengna pelpu pio talepra dorami. (Ataruda, Allah er si eremna atida, gel di dorami ngeda, kapul men domi taru tepa). 24 Ada, akati er bisi buplanda, dumbari di putokra deiami. Tenpu ngeda, keteng yakan tara potokeiami. Ton tenpu ngeda, keteng wengban tara potokra deiami. Ton ngeda, utara dapu tara potokeiami. Ton ngeda, itara iknapi tara potokra dopidi deiami.

25 Ukuamya tep, ton taruda, ayala neng sun nyapsilip neitamai dadi, yuk neng ton punupidi, yana kalekmananen tamupra, sun pe kuramnaipu yana, yambul-yambul ati arum dadopra kuramyai. Sun aneng bendopnopda, sun yala nesala dinin, ton nengdi yana punupra kalengami. Ada, aneng yaiyopda, tenpu minggu neitamaida, atumi-atumi yuma kalengami. Utopu, tenpu minggu ton konum kupnopda, aneng sun kayapu nengdi, yana punupra kalengamidi ukupra kudarami.

26 Dinino, abuplan wengban bisi kalengna neng yuma tep, sun deiyo keami dumbari nengda, ton tamupra benmananen, yanmananen men kemami. Apelpu talepra kurami. Sun adumbari deiyo nengda, pio tep akatipu kuramidi, Allah Yahweh ap, ninye ap, eldana ati aik, er si eremna ati pumbon deiami telep keca yuma cap, tonda akati neitamai derirami bung keca yuma cap, akati neitamai wilipra domi yambul ati-ati yumada, kalekra melimna neng kurami. 27 Sun anengda, Allah cap, nimi cap antamna tep ati, er si eremna ati damaipu kurami. Ada, sun aneng dipapu, Allah er si eremna atida, kalengna tep kurami. Tonda, Allah si eremna tep, ipna taru yuma, imam neng men yanapne taruda, sundi akati buplan pangdina tep, aceipu kurami.

Lewi yala nesalapu, ton tara neng bokra, yuk pel talepra doraminge tep, pepu upu

28 Lewi yala nesalapu bukra ton tara nengda, Allah si eremna ati pumbon kwamu keca, akati derin keca yala-yala yuma tep, ketenemdina cap, telep kupra me kuna cap, apel dona neng kurami. Sun aneng dipapu, akati neitamai kun keca deiami ngeda, nukra dopropmananen, Allah er si eremna pel donmana, konum gawal daknedi, bena deipkun taru peda, sun dipapu akeca yuma nukra derirbarami. 29 Lewi yala nengpu dinin, wilipra ton tara nengda, Allah er si eremna ati neitamai deiami bungna keca, meja cap, siltong keca uku dongonai tep, uku sengna keca cap, akeca-keca yuma, Allah si eremna pel dona keca yala-yala yuma cap, tonda Allah karena cap, gandum tepung cap, anggur me mokon cap, minyak zaitun me cap, nintong telep keca kemenyan cap, tonda uku dongona tep nintong telep-telep pen keca yuma cap tep, ketenemdina cap, telep kupra derina cap pel don neng kurami.

30 Dinino, nintong telep-telep pen keca yala-yala yuma tapakra dodina cap, tapakra ketenepra derina cap pel don nengda, sun imam-imam neng dipapu derirami nyapsilip, sun dipapu apel talepra dodirami. 31 Lewi yala nengdi deiamipa, dadeipdanen yakarami nengdi deipu ngebo, er si Syalum, erdi menmena deiamu ngeboda Matica, angebodi Allah er karena tep derirami rotida, er dipapu aroti daramudi kareramupa, ‘Allahdi, nun mali kun keca daepkamser’ tenen, mesba deiki derirami. Syalum, er apu yapuda, Korah yala neng kurami. 32 Allah er si eremna ati neitamai dinin, Allah tep dapra ketenepnedi, deirbarami roti weik tara ngeda, tali pel dona gum dipapu, Allah si eremna tumi, Sabat tumida, roti men di dapra, deipman ngeda, atumi ukupunge di punupra, dapra derirami. Ada, Allah si eremna ati pumbon deiami meja deiki derirami. Apelda, Kehatdi deiamupa, dadeipdanen yakarami nengdi deiami neng, sun dipapu aroti jen keca dapra derirami.

33 Tonda, Lewi yala nengpu wiliprapnedi, ton tara nengda, Allah er si eremna ati neitamai di, yambul-yambul ati wilipra domi ngeda, anengdi akati marami. Deiyoda ake. Ada, anengda, Allah si eremna tep, Allah upu mut pena deiyo neng wepra deiamipa, ayala nengdi mut perami. Ada keteng komuni cap, lukunda cap, ataru-ataru yumada, sun aneng dipapu gonga kepra, mut perami. Sun aneng yumada, Allah er si eremna ati neitamai, ila lyom ati doramya pum bonaipu kurami. Aneng tep nengeda, yuk pel ton men kareami. Sunda komuni, lukunda yumada, akati bo neitamaipu kuramidi, mutpu perami. 34 Adeiki tara si sekmap neng yumada, Lewi yala ngebodi deiamupa, sundi deipipa, dadeipdanen yakarami nesala, sun yala cap, sun nyapsilip cap yuma tep, deiyo kepra, gonga kemna neng kurami. Sun yumada, Lewi yala nesalapu kurami. Sun yumada, Babel mutu di tapipa, tamupra Yehuda tara dinin, Yerusalem mutu ila ati arum neitamaipu yana, kurami.

Raja Saul er apu yapu neng cap, Sauldi deipupa, dadeipdanen yakaramidi kurami nesala tep, pepu upu

35 Benjamin yala nengdi deipipa, dadeipdanen yakarami nesaladi, tenpu ngebo ton, er si Yeiel deiami. Angebo Yeieldi gonga kepra, Gibeon mutu ati arum dopudi, deiyo keprapudi, amutu talepra kuramu. Yeiel er ner sida, Maahka kuramu. 36 – 37 Ukuamreidi, sun sal nyapuda, morokyo di dutara, (10) sepuluh deiamrei. Anyapu sun sida ake. Ada, Abdon, erda menmena weni ngebo deiamrei. Abdon er amutara ngeboda, Zur deiamrei. Adingeda, Kish cap, Bahal cap, Ner cap, Nadab cap, Gedor cap, Ahyo cap, Zakaria cap, Miklot cap deiamreipa, dakurami.

38 Ton ngeboda, er si Miklot, erdi tenpu sal mi er sida, Simea deipu. Yeiel cap, erdi deipupa, dadeipdanen yakarami neng, er yala neng cap, sun nyapsilip capda, Yerusalem mutu damai kurami. Ada, sun tara nesala cap kikiman kurami dinin, ton nyapsilipdi deiami nesala cap, sun dipapu deiami nyapsilip cap, sun yumada, amutu damaipu kurami. 39 Raja Saul, er nai boda, Kish kuramu. Kish er nai boda, Nar kuramnga cadi, Saul er apu boda, Nar ^{▼▼Nar – Angebo er sida, ‘Nar’ sekmupu dinin, tek sisi Ibrani upu deiki di er si tep, ‘Ner’ perami. Dinino, ‘Nun ataru kunup nesaladi, wang-wang pepserepa, betapra men tenenup’ tenen, angebo er sida, ‘Nar’ sekmepu.} kuramu. Saulda, sal nyapu dumbari deiamu. Aneng sun sida, ake. Ada, Yonatan cap, Malkisua cap, Aminadab cap, tonda Esybaal cap deiamu.

40 Saul er menmena taru deipu weni ngebo Yonatanda, erdi sal mi tenpu ton deiamu. Er sida, Meribaal pemu. Meribaal dingeda, Mikha deiamu. 41 Mikhada, sal nyapu dumbari deiamu. Aneng sun sida ake. Ada, Piton cap, Melekh cap, Tarea cap, tonda Ahas cap deiamu. 42 – 43 Ahasdi sal mi tenpu deiamu. Angebo er sida, Yoada pemu. Yoada dingeda, sal nyapuda weneri deiamu. Aneng sun sida, Alemet cap, Azmawet cap, tonda Zimri cap deiamu. Zimri erdi deiamu ngeboda, Mosa kuramu. Mosadi deipu ngeboda, Bina kuramu. Binadi deipu ngeboda, Rafa kuramu. Rafadi deipu ngeboda, Elasa kuramu. Elasadi deipu ngeboda, Azel kuramu. 44 Azel dingeda, sal nyapu ngantan bari deiamu. Aneng sun sida ake. Ada, Azrikam cap, Bokheru cap, Ismael cap, Searya cap, Obaja cap, tonda Hanan cap deiamu.