1Cor 10 | XteSC | STEP | Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. ‘Mali kupmepepa, amenda taru menenga keca men dopropnup’ tenen, pepmasen upu teka teneamumdi, ‘Betapra kange moupkamrum’ tenen, nun apu yapu Israel nesala Mesir mutu tapra, bisi barami taru mali kuramipa, Allahdi wenepunge ton pepkusene. ‘Walwal neng utopu men kunkamrum,’ tenena tep pepsene. Allahdi ila dua kan-kan neitamai kuramudi, sun deiki baramupa, nun apu yapu yuma diramidi, ‘E, abisipu benkupe’ tenen, dombarami. Tonda, bisi baramyanen, ila Bi Mokon pirman yaidi, ‘Uo, ila mokon deipudi, bisi sekroseua cadi, benmanto men kupsere’ tenen, mali kange doupi dinino, Allahdi amokon dana-dana bokropupa, nun apu yapu yuma aneitamai tu kalamau bisipu bei.

1 Corinthians 10

“Israel yala nesala mali kuramipa, Allah wenepka deiki di kael keptepe,” pepu upu

1 Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. ‘Mali kupmepepa, amenda taru menenga keca men dopropnup’ tenen, pepmasen upu teka teneamumdi, ‘Betapra kange moupkamrum’ tenen, nun apu yapu ^{▼▼Yahudi yala neng, sun apu yapu lap pena upu nomor 20 dirume.} Israel nesala Mesir mutu tapra, bisi barami taru mali kuramipa, Allahdi wenepunge ton pepkusene. ‘Walwal neng utopu men kunkamrum,’ tenena tep pepsene. Allahdi ila dua kan-kan neitamai kuramudi, sun deiki baramupa, nun apu yapu yuma diramidi, ‘E, abisipu benkupe’ tenen, dombarami. ^{▼▼dombarami – Aupu yuma kael kemna tep, buku Keluaran pasal 13 cap, 14 cap neitamai dinkurume.} Tonda, bisi baramyanen, ila Bi Mokon pirman yaidi, ‘Uo, ila mokon deipudi, bisi sekroseua cadi, benmanto men kupsere’ tenen, mali kange doupi dinino, Allahdi amokon dana-dana bokropupa, nun apu yapu yuma aneitamai tu kalamau bisipu bei.

2 Musa mepra baramupa, nun apu yapu yumadi, Allah dua kankan kuramudi, adua menepra baramupa, sun yumadi adua amngai baraminge cap, ila mokon dana-dana bokropupa, tu kalkal pepu bisi beinge cap deiki kael kemamidi, “Musada nun deiyo ngebo kurure,” pepra kuramidi, Musa er upu gekerami. Ukurami ngeda, ukupmantonge ton pepkusene. Ada, teka tenepmepedi, yuk nesala yuma nun tep, ‘Angeboda, Yesus er mi konum kurure kael kepkamsenga’ tenen, me dongoramsengtopu, nun apu yapuda, Musa er amutara kuramidi, er tep dombarami.

3 Ange utopu, jen putapupa, Allah im deiki di dokotemamupa, im deiki roti utopu jen keca, er sida mana bupra, sun yuma kikiman jerami. ^{▼▼mana – Aupu kael kemna tep, buku Keluaran pasal 16:31-35 neitamai dinkurume.} 4 Tonda, me pio men kwamu mutu baramipa, me putapu pangeda, Allahdi nimi men kupmanto keca, kunupsek pen pel dopka deiki di, ila mutu yangne gel neitamai di, me pakra embaramupa, nun apu yapu yumadi ame gwepra kikiman jerami. ^{▼▼yangne gel – Aupu kael kemna tep, buku Keluaran pasal 17 neitamai dinkurume.} Akeca mana jeramidi, agel neitamai di me pakra baramupa, gwepra jeramya deiki di men depi. Ange yuma kuramutopu, ange deiki di ukupmantonge ton kael keptepe.

Mutu yangne gel neitamai di me embaramupa me gwepra jeramitopu, tek sisi ngeda, Kristus menepra embaramudi, er pel doramnga deiki di nun apu yapu tep meliamupane, sun men deami. ^{▼▼men deami – Tonda, ukutaru peda Kristusdi gam kuna deiyo keca kareserepa, pio gam kunkamepe.} 5 Apepmasen keca yumada, nun apu yapu, Israel nesala gung weik kuramidi, nimi men kupmanto kecada, Allahdi pel doramupa, sun yuma kikiman dirami dinino, tupa mali kurami pangeda, Allahdi anesala tep yu kuramu. Yu kupupa, anesala bokra, gung weiknge tep, mali kange doupra wenepupa, amutu neitamai, me men kwamu mutu dana-dana, weika di poramu. Poramua cadi, sun deamiya di anesala gawal dangamu. Sun deami nesalada, weike deamipa, sun kayapu nengdi tu palirbarami.

6 Uda, ne kayapu, moupra tenenkamrume. Akeca-keca yuma pumun taru kuramu ngeda, nun kael kemna tep, ukupmanto keca kuserure. Pumun taru nun apu yapudi, mali keca putaramupa, sun kange dipru, mali keca deikipu deiamidi, mali-mali kuramipane, Allahdi anesala wenepra poramupa, derami. Angetopu, ‘Nun peda tupa mali kupepa, Allahdi nun tep utopu wenepra popseredi, gawal dakserur’ tenen, kange moupkamnupe.

7 Tonda, nun apu yapu Israel nesala kan-kan di bokra, ton nengda, ‘Nun petupra deipmap kecada, nun nai bo utopu kupkamsere’ tenen, petupra deipnedi, tali keca si eremamya deiki di, Allah er si yanirami. Ukuramitopu, sun ukutaru kurumu nesaladi ange ton men kunkamrume. Allah upu deikida, aupu ton sekami. Aupuda ake.
‘Anesaladi ila kailya kalepra jenmaiyanen, kalemna keca konum jepra sengpepidi, mut semai taru neitamai di, tali-tali nyangdanmai. Sunda Allah tep dombarami nesala dinin, sun ukunmaiyada, Allah pio teka tenena gum nesala kuramengtopu kurami.’ (Keluaran 32:1-19)

8 Tonda, nun apu yapu kan-kan di bokra ton nengdi, tali-tali nyangdaramitopu men kunkamepe. Sun weika di upula nyangdarami pangeda, Allahdi anesala wenepra poptapupa, tenpu tumi deikida, denge weik dua puluh tiga ribu (23,000) nesala depi. ^{▼▼nesala – Aupu kael kemna tep, buku Bilangan pasal 25, ayat 1-9 neitamai dinkurume.} 9 Tonda, nun apu yapudi, “Allah tek sisi telep kupra men makupsetue. Er warya tep amali mutu neitamai duyanmaserdi tamserur do?” pepra, Allah tep mali upu pepra gompeteramidi, Allah tep kurpeterami. Ada, uperamya deiki di, ‘Allahdi nun tep bicau tenepra bouna di tenesere ada, tek do, telel do?’ tenen, Allah tep pio kurpeterami. Nun apu yapudi Allah tep, gompeteramitopu men kunkamepe. Gompeterami atep, Allahdi sun wenemna tep, sun damai yu bal deipupa, weika di yana toramupa, nesala weik derami. ^{▼▼yu bal – Aupu kael kemna tep, buku Bilangan pasal 21 neitamai dinkurume.}

10 Tonda, nun apu yapudi Allah tep, mali kange doupra, “Erdi kupmaser kecada nun songe. Erda ware keca deiyo tep ikin keca kareserur do?” pepra, Allah tep wenepra deremamidi, er tep kurpeteramitopu, nunda men kunkamepe. Sundi Allah tep wenepra kurpeteramipa, Allahdi yu kupupa, er im deiki melimna ngebo malaikat tenpu, er sida Nimi Pona Deiyo Malaikat, angebo dopra sun kankan dokotepupa, nesala denge weik poptapu. ^{▼▼nesala denge weik poptapu – Aupu kael kemna tep, buku Bilangan pasal 16, ayat 41-49 neitamai dinkurume.}

11 Nun apu yapu mali kuramipa, Allahdi anesala wenepu ngeda, ‘Yuk nesala yuma kael kepkameng’ tenen, ukupmanto keca konum kupsere. Nun ukutaru kunup nesalada, sirya gawal dangne taru konum damai yakanmasera cadi, aupu pumun taru sekaminge deiyoda, ‘Sun sirya taru kunkameng nesala mankau di mali kupnung’ tenen, upu sengdongona tep, aupu sekra deiamsei. Atep ange yuma tenipetepmumdi, kange moupkamrume, pepsene. 12 Nun ukutaru kunup nesalada, upu sengdongona tep, aupu sekra kareamsei. Atep nengeda, sundi, ‘Gume, nunda, konum dumsisipu kupedi, kange darapdongopra dimpeprappu kunmape,’ teneprum nesalada, ‘Mankau di mali kuprumpa, Allahdi wenepserur’ tenen, kange pio moupkamrume pepsene.

13 Uda, ‘Akeca ukupkune’ tenen, putapya deiki di, dipru gidorosere keca yumada, nesala ban-ban yuma akeca dipu, nun dipru yuma gidoroserure. Dinino, Allahdi nun tep, “Uda, ‘Ne nyapu mali kupnung’ tenen, kalekra melimkamsene,” pediramseutopu, pio men tamserure. Erdi pediseretopu tek sisi kuseredi, melimnapu kuserure. Erdi kalekra melimsere pangeda, nun dipru gidorosere keca, men bisipmantonge ton men yankamsere. Allah melimserya deiki di, akeca yumada bisipnapu kutepe. Atep, mali kun keca tenepmepedi, ‘Ange kupkun’ tenen, kange teniptopmepepa, dipru gidorosere taru yumada, Allahdi nun tep, ‘Amali kun keca taptengedi, dumsisipu kunkameng’ tenen, loptapra kwirye ban bisipu katuai kupra deipkamsere. Dipru gidosere keca akapserya peda, Allahdi keteneipsere bisipu bepyopda, kange darapdongopra dimpeprap teleppu kunkamepe.

Paulusdi, “Isok cap, Allah cap, dipru dukdongopra kikiman kunada men kupmanto,” pepu upu

14 Ne kayapu, bicau tenesenune. Sun yuk nengdi, ‘Akecada nun nai kunkamser’ tenen, tali keca si eremamengtopu, pio men kunkamrume. Isok si eremna tep, pio moupra mepropkamrume. Yuk nesaladi tali keca tep, isok si eremengepa, epmumyopda, aca tapra, sepdaro yukai bendopkamrume. 15 Uda, sunda kange douna nesala kuruma cadi, apepmasen upuda, ‘Tek do, telel do?’ tenen, sun pedipapu tenipetepso. 16 Nun Deiyo Ngebo Yesus er yapi deiki kunupseuada, ‘Pio tenenkamep’ tenen, me mau dopra, Allah tep, “Telepe,” pepra, kikiman jenupa deiki di, Kristus er yapi deiki di lyepseu ngeda, dopropmepyopda, er cap dipru dukdongopra kikiman kunup do, gum do?

Ange utopu, Yesus er nongda, sengdin co deiki popipa depseuada, ‘Pio tenenkamep’ tenen, tenpu kwaneng dopra, bokmepedi kikiman jenupa deiki di, Kristus er nong karepseua deiki di lyepseu ngeda, dopropmepyopda, er cap dipru dukdongopra kikiman kunup do, gum do? 17 Gume, nunda gung weik nimi yuk-yuk kunup dinino, kwaneng tenpu dopra, bokmepedi, nun yuma akwaneng tenpu kikiman jenupa cadi, nun yuma nong tenpu utopu kunupe.

18 Tonda, Israel yala nesala kunge keca ton tenipetepso. Ada, ‘Allah er si erepra gispal dopkamep’ tenen, gam keca popra galepmengedi, ton tara bokra, Allah karena tep, ketenepra deipmengedi, uku dongoramenge. Dinin, ton tarada sun pe deiyo nengdi jenunge. Akeca dopra Allah tep karenung neng cap, sun pe jena tep, akeca bokra doronung neng capda, sun anengpu tep sun tenpu kununge. 19 Aupu pepmasen dinino, adeiki di, ‘E Paulusda, teka tenena gum nengdi isok tep karemenge kecada, mambul keca pepsere. Tonda, tali keca si eremenge ngeda, isok peda mambul keca pepser adano,’ tenena gume. Aupuda ne tep men penkamnerume. Gume, isok pe, isok si eremna tep karerameng keca peda, tali kecapu kurure. Mambul keca gume, pepsene.

20 Akecada, mambul gum dinino, sun Allah tep teka men tenenung nesaladi, ‘Isok si erepkup’ tenen, karenung kecada, isok-isok si eremna tep karenunge. Sundi, ‘Allah er si erepra, er teppu gispal donkamep’ tenen, men kununge. Isok talepra kununga cadi, sun Korintus mutu nesaladi, sun yuk nesala isok si eremna tep, kareramenge keca kikiman jeramumyopda, ‘Mankau di, isok cap kikiman kuprum’ tenen, pepsene. Angeda, ne songe. 21 Gume, ‘Nun Deiyo Ngebo Yesus cap kikiman kunkamep’ tenen, er gispal dona tep, me jerum taruda, Kristus cap, Kain Jen Ngebo er cap tep, sun kikiman tapakra gispal men donkamrume. Ada men kupmanto. Er si eremna tep, jenup kwanengda, ada Yesus er si eremna tep kunupe.

Atep, Kain Jen Ngebo cap tenepra, er gispal dona tep, yuk kwaneng cap tapakra men jenkamrume. Ada Yesus cap, isok cap, nun cap, dipru dukdongopra men kupmanto tep pepsene. 22 Sun tuai nesalapu kurum dinin, ‘Nun puto pio weik dinin, Allah er puto yambulpu kurure,’ tenemumdi kurum do? Tonda, Yuk keca si erepra dukdongopra kupepa, Allah epseredi, ‘Uo, ne sipuda ereipnetenge. Warya tep do?’ tenepredi, ‘Derepsetue’ tenen, kunkamep do? Angeda pio gume.

Paulusda, yuk nengdi, ‘Tali keca si erepkup’ tenen, karenung jen keca kunupra jena tep, pepu upu

23 Ton nesaladi upenunge, “Ware kun keca do yuma, nun kange dipu tenepe keca yumada, tali lupra kutepe,” penung dinino, ne Paulusdi upepsene. Akun keca yala-yala yumada, tali lupra kutepya peda, ange yuma men makunkamsere. Telep kupra men deipkamsere. Tonda nimidi kutenge keca yumada, dipru dukdongopra kikiman kunkamepa tep nengeda, telep men kudiserure, pepsene. 24 Ware nesala do yuma, ‘Angeda telep kupra deipnetue’ tenen, ‘Ne putapnere kecapu tenepra kunkamne. Nepu telep-telep kupra bankamne dinin, yuk neng dangeda, dakwapye,’ tenepra men kunkamrume. Ange gum dinin, ‘Uo ne kayapu neng tep, ne ware kuptenepa, sun telep kunkameng do? Tonda, ne kayapu neng tep, telep kupra deiptu keca cap, sun dipru kwa dimna ngeda, ake,’ tenepmumdi makudankamrume. Nun kunkamep taru yumada, aupu deiyoda pio tenenapu kunkamepe.

25 – 26 Ange tep nengeda, isok si eremna tep gam keca popmengedi, ton galepra karenung dinin, ton tara galepmengedi, ‘Yuk neng jenkameng’ tenen, dopra kunumnung kecada, ‘Jena telep do, mali do?’ tenena tep, aupu pepkusene. Sun kunumna deiyo nengdi gam kure keca, yala-yala yuma popra tu dopropnedi, kunumamnai deipmenge pangeda, ‘Ange jepnedi mali kupkun do, gum do?’ tenen, “Akecada dan cei di duyanmarum do?” pepra, asimpetena gum dipapu, tali lupra kunupmumdi, jenkamrume. Aupu pepmasena deiyoda, ake. Allah upu deiki seki upuda ake.
‘Tuai mutu ban-ban yuma cap, amutu neitamai akwapre keca yuma cap, Allah er kecapu kurure. Akeca yumada er dipu talerura cadi, ange yumada ernge pua.’ (Mazmur 24:1)

27 Teka tenena gum nesaladi, sun Yesus tep teka tenerum nesala tep, “Ne kabo, jen kikiman jepkupa tep, nun damai yarume,” pepra moropsengopda, sundi, ‘Uo, ne mali keca jepkun do? Karepkuneng kecada, dan cei di kunupra duyanmang do?’ tenena gum dipapu, teka tenena gum nengdi jen keca karepsenge ngeda, tali lupra jenkamrume. Asimpetena gume.

28 Ukunkamrum dinino, kapul men jeapmum taruda, ton ngebodi, “Ajepkup domba tuda, yuk nengdi ‘Isok si erepkup’ tenen, karepmangunge galepra deipmape,” pepra lap peprepa, gekepmum dingeda, atu keca men jepkurume. Ada, sundi tali lupra jeptum dinin, arup lap pepmasere ngebo tenena tep nengeda, ‘Mali kupra deipmemenup’ tenen, isok tep kareapmangu kecada men jepkamrume. Tonda, ‘Uo, ange jepnyopda, aupu pepmaneu ngeboda, epneredi mali kange douprur,’ tenena tep, isok tep kareapmangu tu kecada, men jenkamrume pepsene.

29 Yesusdi konum lyepseua cadi, akeca yuma tali lupra jeptepe. Ange tep nengeda, yuk ngebodi pepnetue. Yuk ngebodi, ‘Angeda mali keca darape, men jeptepe,’ tenepre pangeda, warya tep er teneprea deiki dipu, ne tep mali kupra deipnetu do? Gume. Ange tep nengeda, ‘Uo, ange jepnyopda, aupu pepmaneu ngebo tep, mali kupra deipmemenun’ tenen, dipru ikin kure ngeboda, er tep men pepsene. Dinin, “Adomba tuda, isok tep karepmangunge cadi, ange jepmepyopda, mali kupnup darape,” pepra, lap pepre ngebo tep pepsene. Ada angeboda, ‘Mali do tenen, ikin kange douprur,’ tenena tep, akeca men jepkurume, pepsene.

30 Sun teka tenena gum nesaladi, jen keca yala-yala yuma karepsengepa, nun nai bo Allah tep, “Telepe,” pepmepyopda, yuk nesala ware keca deiyo tep, “Sunda, mali keca jepmarume,” pepra, mali upu nun nong deiki deipsetenge do? Gume, ange utopu pepsetenga peda, mali men kunupe. Mali men kunup dinin, ‘Yuk nesala sun kange ikin kuprur’ tenen, sun tenenge keca ton moupra tenenkamepe.

31 Ange tep nengeda, sun jen keca cap, me cap, jemum taru pe, uda yuk kun keca yuma kunkamrum taru peda, ‘Nun nai bo Allah er sipu erepra, er tep gispal dopkup’ tenen, kunkamrume. 32 Sun kunkamrum keca yuma deiki di, Yahudi yala nesala cap, Yunani yala nesala cap, yuk yala nesala yuma cap, uda, Allah tep teka tenena nesala yuma cap tep, ‘Ne kun keca epnengedi, sun ikin kange doupra amenda mali kupnung’ tenen, kange moupmumdi, dumsisipu kunkamrume. Sun teka tenerum nesaladi, tali lupra kumum keca deiki di, ‘Yuk nesala tep, mankau di mali men kudidankamrume’ tenen, pepsene.

33 Ada, nedi yuk nesala yuma tep, ‘Ne kune keca epnengedi, Paulusda teleppu kurure, tenepkamneng’ tenen, kunetopu, sun Korintus mutu nesala peda, ange utopu tenepra kunkamrume. Ukununada, tali tep gume.

Deiyoda, ne putapnere kecapu tenepnedi, ‘Ne pe tep telep kupra deipdankamne,’ men tenenun dinin, yuk nesala sun putan keca ton tenepnedi, ‘Sun ton, mali kange douna gum di, telep kunkameng’ tenen, kange moupnedi, kunune. Tonda ange tenenune. ‘Telep kupra, dumsisipu kupne pangeda, nimi weika di Yesus tep, teka teneptengepa, Yesusdi anesala lyepkamre’ tenen, kunune. Ne Paulusdi pepsene.