1Cor 11 | XteSC | STEP | Ne kayapu, nedi Kristus kuramutopu, ‘Angepu talepra kunkamne’ tenen, dumsisi kunetopu, sun peda, ne kune keca epra, angepu talepra dumsisipu kunkamrume.

1 Corinthians 11

Paulusdi, “Ne kayapu, ‘Allah si erepra gispal dopkup’ tenen, bulupmum taru di ukunkamrume,” pepu upu

1 Ne kayapu, nedi Kristus kuramutopu, ‘Angepu talepra kunkamne’ tenen, dumsisi kunetopu, sun peda, ne kune keca epra, angepu talepra dumsisipu kunkamrume. 2 Ne kayapu, ne kuramsi keca cap, sun tep peteremamsisipa, gekeramrumdi, ne peteremamsisitopu tupa teneprumdi, angepu talepra dombaruma tep, nedi, “Telepe, sun telep kurume,” pepsene.

3 Ukutaruda, ‘Yuk upu ton moupra teneprumdi, kael kepkurum’ tenen, pepkusene. Ada, ware ngebo do yuma, nimi yuma, sun Deiyo Ngeboda, Yesus Kristus er pua. Ange utopu, nerapu yumada, sun deiki tara kungedi, deiyo nengda, sun dodarami neng kununge. Ange utopu, Kristus er deiki tara kure deiyo ngeboda, Allah erpu kurure. 4 Tonda, ware ngebo do yuma, yuk nesala bulupra gekemengai di, nimidi Allah tep mororamenge taru cap, Allah upu tep, peteremenge taru cap, ukupkunge taru yuma, sun giso deiki galuna keca tupa kenekmengopda, mali kununge. Deiyoda, giso deiki galuna kenekmenga di, sun deiyo ngebo Kristus tep, mali kupra derinunga tep pepsene.

5 Dinino, ware nerapu do yuma, nesala bulupra gekemangai di, Allah tep mororamenge taru cap, Allah upu peteremenge taru cap, nerapu yuma sun giso galuna keca men kenekmengopda, sun deiki tara kunge neng, sun dopdarami neng yapu tep, mali kupra derinunge. Opkal bol dopra giso deiki men deipmengedi, men galupmengopda, ada sun giso potong yuma bupra tamamenga utopu kununge. Nun yuma konum kaele, nerapu tep nengeda, giso potong yuma bupra taptengopda, ada ‘Ila mali kuna tepa,’ tenenupe.

6 Nerapudi, ‘Giso deiki opkal bol galunada, nun songe,’ tenepmengedi, men galupmengopda, ada pio mali kun keca dinin, ware ner do, ‘Ne giso men galupkune,’ tenepyopda, konuma, er giso potong yuma toupra buptue. Dinino, nun kaele, nerapu giso potong yuma toupra bumtamnada, pio mali kun keca cadi, telep ngeda, Allah morona taru cap, Allah upu peteremna taru cap, ataruda opkal bol dopra, sun giso deiki galunkamenge. 7 Nimi yumada, Allah men dinup dinin, Allahdi, ‘Ne urasin utopu ketekeipkune,’ tenepudi, er urasin utopu dinin, yambul yuk tamupra ketekeipseue. Tonda, Allah er pio telep cap, mambul weik cap kuretopu, Allahdi nun nimi tep, yambul utopu tamupra ketekeipseue.

Nimida ukununga cadi, Allah morona taru cap, Allah upu peteremna taru cap, atarupu sun giso deiki galunada pio men kunkamenge. Nimida giso galunada, dakwapye. Atep, sun giso deiki men galupmengopda, yuk nesala epmengedi, sun Deiyo Ngebo Allah tep, er sipu eremkamenge. Dinino, nerapuda, nimi amutara kununga cadi, sun giso deiki galuna galupmengopda, yuk nesala epmengedi, ‘Anerapu sun neng yapuda, telep kunung neng,’ tenepkamenge. Deiyoda, nimi sun deiki tara kure deiyo ngeboda, Allah kurure. Nerapu sun deiki tara kure deiyo ngeboda, sun dopdarami neng kununge. Ukutaruda, nun Yahudi yala nesalada ukupra kunupa cadi, aupu yuma pepsene.

8 “Nerapuda, giso deiki galupkamenge,” pepmasenada, deiyo ton akwapmarada, ake. Ada menmena kuramu ngeboda, nerapudi men deipi dinin, Allah er kange dipapu tali ketekepra deipu. Dinino, menmena ketekeipu nerda, Allahdi nimi ik yo doprapudi, ner ketekeipu. Atep nerapuda nimi sun amutara utopu kungedi, sun apu yapudi penge upu tep, gekepmengedi gispal donkamenge.

9 Angepu gume. Allahdi ner tenpu konum ketekeipudi, ‘Aner melimna tep, nimi tenpu ketekeipkune,’ men tenepu. Ange gum dinin, nimi tenpu konum ketekeipudi, amendada, ‘Angebo er melimna tep, ner tenpu ketekepra deipkune,’ tenepudi aner tenpu ketekepra deipu. 10 Ange tep nengeda, nerapu yumada, nesala bulupmengedi, ‘Allah morona cap, er si eremna cap kupkupe’ tenen, kumenge taruda, Allah morona cap, Allah upu peteremna taru cap, opkal bol dopra sun giso deiki galunkamenge. Ukunkamenga deiyonge ton ake. Ada, sun im deiki melimna neng, malaikatdi tuai nerapu kunge kecada dinunga tep, nerapu sun giso deiki galunkamenge.

11 Aupu yuma pepmasen dinino, nun Deiyo Ngebo Yesus cap dipru dukdongopra kunupa neitamaida, nimi yumadi sun nerapu yuma tep, “Sun dakwapye, nunpuda mambule,” men peptenge. Angetopu nerapudi, nimi tep, “Sun dakwapye, nunpuda mambul kunupe,” men peptenge. Nun yuma wisipra telep kupra kikiman kunkamepe. Nimi pe, nerapu peda mambul kunupa tep pepsene. 12 Upu deiyo ton akwapmare. Uda, menop taruda, Allahdi nimi nong neitamai ik yo doprapudi, ner ketekeipu. Tonda, ukutaruda, nerapudi nimi derisenunge. Dinino, ware keca do yumada, Allah er dipapu kareserepa kuserura cadi, “Angeda mambule, angeda mambul gume,” men peptepe. Ayumada, mambul pua.

13 Sun pedipapu, nun ataru kunup kecada tenipetepso. Nesala wekmangai di Allah moropkungopda, nerapudi opkal bol giso deiki men galupmengopda, tali lupra Allah moropmengopda telep do, mali do? 14 Ange utopu, Allahdi akure keca yuma ketekeipra deiamupa, akuretopu dinupa deiki di, men kael keptum do? Nimida sun giso potong lyom weik kupre pangeda, angeda telep do, mali do? Angeda mali cadi, ange tep nengeda ali men dangdankameng do? 15 Dinino, Allahdi nerapu tep, sun giso galuna utopu keca, giso potong lyom ngeda konum kareamseua tep, ada sun giso potong lyom kupreyopda, ada sun urasin telep kuna tepa tenenupe.

16 Uda, yuk nengdi, ‘Angeda gume, giso galuna pepmaser upuda, nun songe. Erdi tali pepsere’ tenen, dabal kuprepa, upu yuk-yuk peptengopda, aupu ton pepsene. Allah teka tenenung nesala, ban-ban yuma cap, nun peteremna deiyo neng cap, yuk-yuk men penupe. Apepmasentopu, tenpu kange doupra utotopu tenepra, apepmasentopu kunupe. Yuk ton gume.

Sun Korintus mutu nesaladi, ‘Yesus er yapi deiki di lyepseu ngeda, pio tenenkamepe’ tenen, kwaneng jen taru mali kuraminge tep, pepu upu

17 Ukuda, yuk upu pepkusena deiki di, “Sun telep kupra kurume,” men pepsetene. Mali kuruma tep wenepkusen upuda ake. Tek sisi, ‘Yesus lyepseue’ tenen, bulumumdi kwaneng jemum taruda, mali keca weika di kurume. Telep kumum ngeda yambul pua. 18 Menmena pepkusen upuda, sun yuk nengdi pepneipa, gekepsi ngeda pepkune. Ada, “Sun Korintus mutu nesalada, ‘Allah upu gekepra, er si erepkung’ tenen, bulumenge taruda, sun kange tenpu tenepra, amsepu men kununge. Sunda, kange yuk-yuk tenepra, dipru wilimdangedi, yuk-yuk kemdongonunge,” pepneipa, gekepsi.

Aupu gekepsi ngeda, yambula dipu teka tenesenune. Ton pepnei ngeda, ‘Telel do, tek do?’ tenenune. 19 Nimi yuk-yuk kununga neitamai di, Allahdi ton nesala wepra, ‘Aneng penge upu cap, kunge keca cap tek kununge,’ teneseredi, kange deriserure. Ton neng kunge keca cap, tenenge keca cap tep, kange men deriserure. Allahdi, ‘Nimi kunga neitamai, Allah kange derirur nesalada adano, kael kepkameng’ tenen, yuk-yuk kunupa deiki di katuai kemdiserepa, kael kemnupe. Ange tep, kange yuk-yuk tenena cap, yuk-yuk kuruma capda, tek sisi akapkamre.

20 – 21 Apepmasen dinino, Yesusdi lyepseunge tep, ‘Pio tenenkamep’ tenen, kwaneng jeryakamum taruda, sun yumadi, ‘Ne kayapu neng yangepa, kikiman jepkupe,’ tenena gum dipapu, tali lupra menmena jepra gawal dangrume. Ukuprum pangeda, ton nengdi anggur me weika di jengepa, sun kange yawaramrure. Ton nengdi jen jepropmengepa, yuk neng yana walang bupredi, tamupra banunge. Ukuruma tep nengeda, ‘Yesus lyepseue’ tenen, gispal dona tep, kwaneng cap, me cap jenup ngeda, sunda tek sisinge men jerume. Sunda, tali jen sisa jeramengtopu talipu jerume.

22 Ange kurumada, ware keca deiyo tep kurum do? Sun ati men kwapmaserpa, sun pe ati pum di tali jen cap, me cap men jeptum do? Agum dingeda, ati akamrepane, Allah teka tenena tep bulumenge nesalada, ‘Angeda mambule gume’ tenen, talya tenerumdi kurum do? Tonda, sun akeca-keca yuma men kwapre nesala, tali kankan kunge nesala tep, men jengepa, ‘Dakwapye,’ teneruma deiki di, ‘Kankan nesala sun nong deiki, ali dangne keca deipmepepa, ali dakunge,’ tenemumdi kurum do? Ne kayapu, ware upu ton pepsetene do? Sun amali keca kumumnge tep, nedi sun tep, “Mesumo, angeda dakwapye. Sunda telep nesala kurume,” tali peptapkusen do? Gumde, angeda men pepsetene.

Yesus lyepseunge tenepedi, jenkamep keca tep, pepu upu

23 Paulusdi pepu. Nun deiyo ngebo Yesusdi peipneupa, sun kael kemna tep peterepsisi upuda akwapmara cadi, sun kumum ngeda, “Mali kurume,” pepra tali men pepsene. Dinino, Yesusdi peipneupa, peterep dongopsisi ngeda, ton cap pepkusene.

Yesusdi kupu ngeda, ake. ‘Mali nengdi popkung’ tenen, Yudas Iskariotdi nimi upu kai perbeu lukundapu, Yesusdi roti jen keca erepra doupu. 24 Erepra doupudi, er nai Allah tep, “Telepe,” konum pepu dingeda, aroti kwaneng jen keca boku. Bokudi aupu pepu. “Aroti kwanengda, ne nong utopu kurure. Ne nongda, ‘Sun yo punupsenedi, sun lyepkamsene’ tenen, karepsene. Ukutaru akwaneng jepmaptopu, amenda peda akwaneng jenkamrum taru yumada, ne nong tep pio tenenkamnerume.” Yesusdi pepu.

25 Tonda, ange ukuputopu, sun jen yuma konum jepi dingeda, Yesusdi tenpu anggur me mau douprap, aupu pepu. “Ameda, ne yapi utopu kurure. Pumun taruda, Musa sekeiamu upu yuma moupra gekeramya deiki, Allahdi Israel nesala, sun mali kurami keca kaukemamu dinino, ukutaruda, Allahdi pedisere upu yuke. Ada, ‘Ne yapi deiki di, nimi mali kun keca, Allahdi gum kupra deipredi lyepkamsere,’ pepsene. Atep, ame jenmaptopu, amenda taru peda ame jenkamrum taru yumada, ne yapi tep tenepnemumdi, pio jenkamrume.” Yesusdi pepu.

26 Upepu dingeda, aupu ton pepu. “Ukuprappu kunkamrume, pepmasenada, tali tep men pepsene. Deiyoda, aroti kwaneng jen keca cap, ame cap jenkamrum taru yumada, akeca jeruma deiki di, ‘Nun Deiyo Ngebo Yesusdi, nimi lyemna tep, yo punupseudi depseue,’ pepra, lap pena utopu, kunkamruma tep pepsene. Apio ukupra kumumpane, amendada, ne tamupra doryankamsene,” Yesusdi pepu. Yesusdi upepseua tep, ne Paulusdi aupu kange di ton cap pepsene.

“Dipru neitamai mali keca akapmarepapu, ‘Yesus depseunge,’ tenena tep jenup ngeda, men jenkamrume,” pepu upu

27 Paulusdi pepu. Ada tali jena tep gume. Ame cap, aroti kwaneng jen keca capda, Yesus depudi lyepseunge tep tenepra jenkamruma cadi, ware ngebo do, ware ner do, ‘Ne mali kun keca konum tapsi do, mali tupa kunun do?’ tenen, moupra men tenepdangedi, kange moupra tenena gum, tali lupra jere ngebo cap, tali jere ner capda, pio mali weik kunkamenge. Pio mali kun kecada ake. Ada, sun moupra tenena gum di, tali lupra jeruma deiki di, nun Deiyo Ngebo Yesus er nong cap, er yapi cap tep, yanipmumdi pio mali kuprume.

28 Atep nengeda, ware ngebo do yuma, ‘Ame cap, ajen keca roti cap, jepkun’ tenen, ketenepkure taruda, ‘Ne dipruaida, mali kun keca tupa akwapmaner do, gum do?’ tenen, moupra tenipetepredi, ataru dipapu mali kun keca yuma konum tapre dingeda, amenda jenkamre. Tali lupra jena meme. Sun dipruai mali keca tupa akapmarepapu, tali lupra jeprumyopda, Allahdi sun tep wenepkamsere.

29 Aupuda mesum tep men pepsene, ne kayapu. ‘Yesus er nong karepseua deiki di, lyepseua tep, angeda mambule’ tenen, kange moupra tenena gum dipapu, er dipruai mali keca akapmarepapu, ajen keca cap, me cap, tali lupra jere ngeboda, ukurya tep nengeda, Allah ila di wenepra poptapkamre. Amali kure ngebo popkamra deiyoda, angebo er pe deikipu kunkamre. 30 Aupu pepmasentopu, sun moupra tenena gum di, tali kange doupra, amambul me cap, roti jen keca cap, jeruma deiki di, sun kayapu neng weika di, puto boun kuprepa, bol mali dona cap, pu jena cap, kununge. Tonda ukurumnya deiki di, pu jerepa, sun kan-kan di, nimi weika di denunge. Deiyoda, sun moupra tenena gum dipapu, sun dipruai mali keca tupa akapmaserpapu, Yesus er kwaneng cap, me cap, tali lupra jeruma deiki di aikin keca kuserure.

31 Sun kan-kan di derorum dinino, nun pedi nun pe tep, moupra kalekdatepedi, mali kun keca tep, “Angeda mali,” pepra taptepe pangeda, amenda taru Allahdi akeca tep wenepra men popkamsere. Dinino, nun pedipapu nun mali keca men tapmepyopda, erdi tek sisi akeca tep wenepkamsere. 32 Yesusdi, “Sun mali keca ake,” pepra upu bokeipseredi, nun nong deiki ikin keca deriseryada, ‘Ne nyapu tep, ukutaru upu lepsisiskra bokeipnedi, wenepnyopda, amenda taruda Allahdi, tali kungedi teka men tenenge nesala yuma tep, upu lepsisiskra bokra wenepredi, poptapkamre taruda, ne nyapu cap tapakra, Allahdi men poptapkamre’ tenen, ukutaru Yesus bouna di wenemserure.

33 Aupu yuma tep nengeda, aupu kange di ton cap pepsene. Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Arup pepmasentopu, ‘Nun kikiman jepkup’ tenen, bulumum taru yumada, sun yumadi, sun yuk nesala yuma tep, ‘Nun kayapu yangepane, telep kupra kikimanpu jepkupe,’ tenenkamrume. 34 Ware ngebo do yuma, jen putapyopda, er pe ati pumbonpu jen konum jepredi amenda yankamrure. Ada, ‘Nun kikiman bulupmepedi, kupe keca deiki di, mali kupmepyopda, amenda taru Allahdi wenepserur’ tenen, pepmasene. Tonda, ne Paulusdi sun damai yanyopda, “Ukunkamrum, ukunkamrum,” pepra, upu ton cap tapakra penkamsene.