1Cor 12 | XteSC | STEP | Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Allahdi nun teka tenena nesala tep, ‘Telepe pel donkamneng’ tenen, mesum dipu karesere pel dona deiyo keca tep asipetepneruma cadi, yuk upu ton pepkusene. Ada, ‘Sun walwal men kunkamrum’ tenen, pepkusene.

1 Corinthians 12

Allah er kange dipapu, ‘Mambul pel donkamneng’ tenen, er Lek Sambala puto deiki di, pel dona deiyo keca yuk-yuk kareserenge tep, pepu upu

1 Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Allahdi nun teka tenena nesala tep, ‘Telepe pel donkamneng’ tenen, mesum dipu karesere pel dona deiyo keca tep asipetepneruma cadi, yuk upu ton pepkusene. Ada, ‘Sun walwal men kunkamrum’ tenen, pepkusene. 2 Sun yuma kaele. Allah kapul teka men teneamrum taruda, wareto nesala kuramrum do? Yuk nesaladi peteremamseiya deiki di, tek sisi telep kuna gum dinin, yuk mali bisi dopra dubenamseipa, sundi tali keca tep, isok si erepra kuramrume. Sun pe buru di petupra deiamrum keca tep, ‘Nun nai,’ pepra, akeca si eremamrum dinin, akeca yumada, upu tenpu peda men pepmanto kuramu.

3 Ukupra kuramruma cadi, nedi aupu pepsene. Sundi, ‘Akecada Allahdi yakanmaser do, gum do?’ tenen, piripeteprumpa, kael kepkamtum ngeda ake. Ada, ware nesala do yuma, Allah er Lek Sambala, er puto di anesala talepra melimrea deiki di, sundi, “Yesusda tali ngebo kurura tep, Allah wenepredi, uku jen ban dokotepkamtue,” pepra, Yesus tep mali upu pepra, pio men yaniptenge. Ange utopu, ware nesala do yuma, tali nengdi, “Yesusda, tek sisi nun Ila Nimi Deiyo Ngebo kuserure,” pepra, tek sisinge men peptenge. Angeda, Allah er Lek Sambala er puto deiki melimrea deiki dipu, aupu tek sisinge peptenge.

4 Uda, Allah er puto deiki di kareserur pel dona deiyo keca tep yuk upu pepkusene. Apel dona deiyo kecada, yala yuk-yuk kurure. Dinino, Allah er Lek Sambala tenpu, er deiki dipapu akeca tali kareserure. 5 Ange utopu, yuk nesala bicau tenepra, melipra pel donupada, yala yuk-yuk akwapmar dinino, nun Ila Deiyo Ngebo Yesus, er tenpu dipu taleserepa, apel donupe. 6 Aupu pepmasentopu, Allah er pel dona tep, pel yala-yala weik akapmar dinino, nimi ban-ban yuma tep, apel dona deiyo keca kareseredi, nun dipru neitam melipra pel dosere ngeboda, Allah er tenpu kurure. Yuk ngebodi ton apel dona deiyo keca men kareserure.

7 Uda, Allah er Lek Sambaladi teneseretopu, Allah er pel dona deiyo keca yuk-yuk bokra kareserure. Er pel dona deiyo kecada, yala yuk-yuk dopra, nimi yuk-yuk tep bokra kareserur dinino, deiyoda, ‘Akeca deiki di, sun teka tenenge nesala yuma, kikiman melipdangedi, telep kudidankameng’ tenen, kareserure. 8 Allah er Lek Sambaladi, tenpu ngebo tep, Allah er kure keca cap, er kai telep upu deiyo neitamainge cap lap pena deiyo keca karerepa, angeboda ila kael ngebo kurure. Yuk ngebo tep nengeda, Allah er Lek Sambala meliprepa, Allah er upu gekepre dingeda, “Aupu nong neitamai ngeda, ake. Atep ukupra kunkamepe,” pepra, pedina deiyo ngebo kuserure.

9 Allah er Lek Sambala dipu, yuk ngebo tep, ‘Allah tep ikin men kuptue. Akeca-keca yuma Allahdi kupsetue’ tenen, ila teka tenena deiyo keca karerepa, ila di teka tenepra kurure. Ange utopu, Allah er Lek Sambala dipapu yuk ngebo tep, nimi kwetena deiyo keca karerepa, akarepre ngebodi Allah moroprepa, adipapu sun pu jeramre nesala ka di bungdongonunge.

10 Yuk ngebo tep, Allah er puto karerepa, nimi men kupmanto keca, ila puto keca pel dorure. Yuk ngeboda, amenda kupkamre keca kapul men kwamre taru di, lap pena deiyo keca karerepa, lap peserure. Allah er Lek Sambaladi, yuk ngebo tep, Allah er telep pel dona deiyo keca kareprepa, tenepredi, uperure. “Apelda, Allah er puto deiki di dorure. Dinin, apelda, isok-isok puto deiki di dorure,” tenepra wepredi, lap peserure. Ada ‘Mok keca ake, tek sisinge ake’ tenen, wepra ketenem dina deiyo keca dororedi, kurure. Yuk ngebo tep, erdi men kael keamu upu dinin, Allah er Lek Sambaladi aupu pena deiyo keca kareprepa, dopropredi, yuk mutu nesaladi penung upu, adipapu telep kupra perure.

Ton ngeboda, yuk nengdi Allah er Lek Sambala, er puto deiki yuk mutu upu gekena deiyo keca kareprepa, yuk nengdi, yuk mutu upu deiki di pengepa, angebo gekepredi, “Aupu deiyo ake-ake. Aupu deikida, Allahdi upeserure,” pepra upu wilimdirure. 11 Allah er puto di, er pel dona deiyo keca karesere kecada, yala yuk-yuk kurur dinino, ayumada, Allah er Lek Sambala dipapu kareserure. Tonda, teka tenena nesala yuma ton tamna gum sun yuma tep, er kange dipapu teneseretopu bokra yuk-yuk kareserure.

Paulusdi, “Allah er teka tenena nesala yuma, yuk-yuk kunup dinin, nong tenpu utopu kunupe,” pepu upu

12 Uda, ne kayapu, yuk upu ton pepkusene. Nun nongda, giso, buru, yane, akeca-keca yuma weike akapmarepa, yuk-yuk kuserur dinino, nun nong tenpu dukdongopra kunupe. Ange utopu, nun Kristus tep teka tenenup nesala cap, er cap dipru dukdongopra kunupa deiki di, nong tenpu kunupe. 13 Nun yumada, Yahudi yala neng pe, Yahudi yala gum neng pe, uda, co bo deiki kunumenge nesala pe, nun kange dipapu tali pel dopra kunup neng peda, nun yuma tep nengeda, Allah er Lek Sambala tenpupu karepseupa, nun dipruai wekseue. Tonda, Allah er Lek Sambala tenpu, nun dipruai wekseua deiki di, nong tenpu kupra deipseudi dukdongopseue.

14 Uda, sun kaele. Nimi nong deiki kapseu kecada, tenpu kecapu men kuserure. Gume, giso cap, buru cap, yane cap, asuru cap yala weike akurure. 15 Atep, ukupmanto upu pepkusene. Nun yanpu dingeda, “Gume, neda buru men kununa cadi, ‘Anong dukdongopra mambule men kunune’ tenen, nong bulukra tapnedi, ne yane utopupu yuk kunkamne,” peptua peda, ange deiki di, yuk men kuptue. Er nong deiki pio akapu keca cadi men kupmanto.

16 Ange utopu nun amulpu dingeda, “Gume, neda asuru men kununa cadi, ‘Anong dukdongopra mambul men kunune’ tenen, nong bulukra tapnedi, ne amulpu yuk kunkamne,” peptua peda, aupu deiki di, yuk men kuptue. Er nong deiki pio akapu keca cadi, men kupmanto. 17 Uda, nun nongda, tenpu kecapu, asuru yopu kupsetuopda, ware keca deiki di upu gekeptepe do? Ange utopu, nun nongda, tenpu kecapu, amul yopu kupsetuopda, ware keca deiki di nintong telep keca gekeptepe do? Gume, ue men kapsetu teptoda, nintong keca men gekeptepe.

18 Gume. Allahdi ketekeipseu taruda, tenpu kecapu ketekeiamseupa, ukutaru peda men derisenunge. Ange gum dinin, Allahdi, ‘Akeca di apel donkamenge, akeca di apel donkamenge,’ teneamseutopu, giso, buru, yane, akeca-keca yuma ketekeiamseupa, ukutaru peda nong tenpu kupra derisenunge. 19 Giso do, buru do, yan do, tenpu kecapu kupsetu teptoda, ware kuprap di nun nong tenpu kupra kutepe do? Angeda men kupmanto.

20 Allahdi ketekeiamseupa, derisenungada, akeca-keca yuk-yuk kuserur dinin, ayuma dukdongopra, nong tenpu derisenunge. Ange utopu, er nyapu tep nengeda, ‘Ne pel yuk-yuk donkameng’ tenen, er puto di pel dona deiyo keca yala yuk-yuk kareserur dinin, Allah cap dipru dukdongopra kunupa deiki di, nong tenpu dukdongopra kikiman kunupe. 21 Nun nongda, dukdongopra tenpu kunupa cadi, nun asuru di, nun buru tep, “Kan pel dorum ngeda, men putanerure. Kanda tali dakuyo,” men peptue. Tonda, nun giso di, nun yane tep, “Sun pel dorerum ngeda, men putanerure. Sunda, dakwapye,” men peptue.

22 Angeda pio gum dinino, nun nong neitamaida, puto boun kuserenge peda, men kupsetu teptoda, pio kange mun kupsetue. Akeca-keca yuma putaserura tepa. 23 Tonda, nun nong neitamaida, ‘Uo, angeda urasin malinge,’ tenepmepe kecada, ‘Urasin telep kupkamre’ tenen, adeikida, kwerya keca kemnupe. Tonda, nun nong neitamaida, ‘Akecada, katuai kupserepa, yuk nengdi epsengepa ali dangnupe,’ tenepe kecada, telep kupra, moupmepedi inimna tep, balape cap, lye cap kemnupe.

24 Ukunup dinino, nun nong neitamaida mambul gum ngeda buru do, yan do, ‘Angeda mambul gum cadi, yuk nengdi epsenga peda, dakwapye,’ tenenup keca tep nengeda, tali kange doupra, nong banangapu kunupe. Ukunupada, deiyo akwapmare. Ada, Allah er dipapu nun nong ketekeipseu taruda, nong neitamai kusere keca yuk-yuk akwamu dinin, ayuma dukdongopra nong tenpu kupra deipseue. Dinino, nun nong neitamai, ton tara tep nengeda, yuk nesaladi ange epsengepa, ali kuserur cadi, Allahdi, nun nong neitamai dine atara tep nengeda, ‘Mambul tenepmengedi, kange moupkameng’ tenen, ketekeipseue.

25 Ukupseua deiyoda, sun nong yuma tep nengeda, ‘Angeda pio telepe, angeda malinge,’ men tenepmengedi, ‘Ayumada, ila mambule’ tenen, sun nong yuma tep, ‘Kange moupra kunkameng’ tenen, ketekeipseue. 26 Ukupra ketekeipseua cadi, nun nong neitamai kwapseu keca tenpunge ton pu jepserepa do, popserepa do, ukupseryopda, nun nong yuma pu jeserepa dounupe. Angetopu, nun nong neitamai dine, yuk tarange tep, “Uo, angeda urasin pio telepe,” pepsengopda, nun nong yuma tep, kange deipra kunupe.

27 Uda, aupu yuma pepmasentopu, aupu er deiyo neitamainge ton tapakra pepkusene. Sun teka tenerum nesala yumada, Kristus er nong tenpu utopu kurume. Sun yuk-yuk gung weik kurum dinino, sun yumada, er cap dipru dukdongopseua deiki di, er nong tenpu kurume. Atep sun yumada kikiman utopu mambul nesala kurume.

28 Allah tep teka tenepmupudi, er nyapu kunupa neitamaida, Allahdi nun yuma tep, ‘Pel yuk-yuk donkameng’ tenen, wepra deiamseudi, pel dona deiyo keca yuk-yuk bokra kareserure. Ada, menmena ila mambul ngeda, ‘Ne upu dopra peterembana tep gonga kemna deiyo neng kunkameng’ tenen, nun Rasul neng wepra deiamseue.

Butene ngeda, er pere upu lap pena cap, amenda kunkamre keca kapul men kupmare taru, lap pena cap tep, ‘Nabi ^{▼▼Nabi – Allah er upu lap pena nengda, Allahdi, ‘Nimi gekepkameng’ tenen, erdi wepra deiamu neng tep, er tek sisi upu cap, amenda taru kupkamunge cap, lap pepu pangeda, aneng gekeramidi, yuk nesala yuma tep lap perbarami. Anengda ‘nabi neng’ penupe. Nabi neng, sun lap pena upuda, nomor 25 dirume.} neng donge pel dopra kunkamenge’ tenen, yuk neng wepra deiamu. Weneri ngeda, er upu yuma peteremna tep deiyo neng wepra deiamseue. Yuk neng tep nengeda, nimi men kupmanto keca, kunupsek pen pel donge nesala cap wepra deiamu. Tonda, Allah er Lek Sambaladi puto karerepa, nimi kwetena nesala ton wepra deiamu. Ton ngeda, ‘Yuk neng tep bicau tenepmengedi, sun putan keca tep melimna neng kunkamenge’ tenen, wepra deiamu.

Tonda, ‘Pele yuma telep kupra donkameng’ tenen, “Ukunkamepe, ukunkamepe,” pepra, pel dona deiyo keca moupra tenepmengedi, pel lap pena neng, administrasi peramenge cap, wepra deiamu. Tonda, sun men kael keami dinin, Allah er Lek Sambala puto deiki di, yuk mutu nesala penge upu, anesala kareprepa, aupu dopra, penge neng ton wepra deiamu.

29 Uda, Allahdi, ‘Apel, apel yuk-yuk donkameng’ tenen, pel dona deiyo keca kareserura cadi, sun ton tenipetepso. Sun kan-kan neitamaida, sun yuma Allah upu peterembana tep gonga kemna deiyo neng kurum do? Tonda, sun yuma Allahdi pere upu gekepra lap pena cap, amenda kupkamre keca tenepra lap pena tep, nabi pel dona nesala kurum do? Sun yumada, Allah upu sekinge peteremna deiyo neng kurum do? Sun yuma nimi men kupmanto keca kunupsek pen pel dona neng kurum do? 30 Sun yuma Allah er puto karerepa, nimi kwetena neng kurum do? Sun yuma Allah er Lek Sambala, er puto deiki di yuk mutu nesala penge upu dopra tali lupra perum do? Sun yumada, Allah er Lek Sambaladi, yuk mutu nesala upu penge ngeda, kareserepa, “Aupu deiyoda ake-ake,” pepra lap perum neng kurum do?

31 Gume, sun Korintus mutu teka tenerum nesalada, sun yumadi, apel yala yuk-yuk yuma, kikiman utopu men dorume. Gume, Allahdi bokra yuk-yuk kareamseutopu pel yuk-yuk dopra kurume.

Dinino, ‘Allahdi er pel dona deiyo keca, ila mambulnge karepsetupa, apel doptepe’ tenen, pio putaserepa, kange deipra kunkamrume. Ange yuma peda akapseupane, ukutaru pio ila telepnge karepsetupa, ange doupra kunkamrum ngeda, pepkusene. Atep moupra gekenkurume.