1Cor 13 | XteSC | STEP | Ware ngebo do yuma, yuk neng tep bicau tenepra men makuramre ngeboda, yuk mutu nesala perameng upu cap, Allah er im deiki pel melimna neng, malaikat sun upu cap deiki di, mambul upu peptua peda, Allah er kangeda, ‘Angebo mambul gum tep dakwapye,’ tenerure. Er kure kecada, nong men kupkamra tep, er pelda mambul weik gume. Ukupmantoda, besi keca popmengepa, ila lelim tali peramre utopu, kurure. Ada angebodi, mambul upu cap, gekena telep upu cap perur dinin, yuk neng tep, bicau tenepra men melimrura tep, ato ngeboda tek sisi ila mambul gume pepsene.

1 Corinthians 13

Paulusdi, “Yuk neng tep, bicau tenepra makudana ngeda, ila mambule,” pepu upu

1 Ware ngebo do yuma, yuk neng tep bicau tenepra men makuramre ngeboda, yuk mutu nesala perameng upu cap, Allah er im deiki pel melimna neng, malaikat sun upu cap deiki di, mambul upu peptua peda, Allah er kangeda, ‘Angebo mambul gum tep dakwapye,’ tenerure. Er kure kecada, nong men kupkamra tep, er pelda mambul weik gume. Ukupmantoda, besi keca popmengepa, ila lelim tali peramre utopu, kurure. Ada angebodi, mambul upu cap, gekena telep upu cap perur dinin, yuk neng tep, bicau tenepra men melimrura tep, ato ngeboda tek sisi ila mambul gume pepsene.

2 Ware nesala do yuma, sundi yuk nesala tep, bicau tenepra men melimnung nesalada, talipu kununge. Allah er kangeda, sunda mambul gume. Ange utopu, Allah er Lek Sambaladi, amenda kupkamre keca cap, akeca-keca yuma cap tep, lap pena pel dona deiyo keca kareptupa, Allahdi iniamu keca yuma cap, ila kael kemna keca yuma cap, moupra teneptudi, lape pepsetua peda, angebodi yuk neng tep bicau tenepra men makure ngeboda, Allah er kangeda, ‘Angeboda mambul gum tep, dakwapye,’ tenerure.

Tonda, Allahdi ton ngebo tep, ‘Allahda, ikine men kuptue. Akeca-keca yuma kanam dipu kuptue, tenenkamner’ tenen, ila teka tenena deiyo keca kareptupa, angebodi er pio teka tenerura deiki di, ila mutu tep, “Gopra beo,” peptupa, gopra betua peda, angebodi yuk nesala tep bicau tenepra men makurur ngeboda, talipu kurure. Allah er kangeda, ‘Angeboda, tek sisi mambul gum tep, dakwapye,’ tenerure.

3 Ange utopu, ton ngebodi er talere keca yuma dopra, pio kankan kunge nesala tep mesum dipu karepredi, ‘Mali nengdi ne tep, “Angebo teka tenepre ngebo cadi, nun songe,” pepra, ne dopropnengedi, uku neitamai dongopnetenge,’ teneptudi, er pe nong cap kareptua peda, angebodi yuk neng tep bicau tenepra, men makurur ngebo kuryopda, er peda talipu kurure. Akurya deiki di kunumna tep, menenga keca, im deiki bena men dopropkamre. Allah er kangeda, ‘Angeboda tek sisi mambul gume, dakwapye,’ tenerure. Deiyoda, erdi yuk nesala tep bicau men tenerura tep pepsene.

4 Yuk nesala tep, pio bicaue tenepra makuramenge nesalada, sun kunge keca ton lape pepkusene. Ada, yuk neng tep, ‘E, sun ware keca deiyo tep sika dipu kunmang do?’ tenen, menmena di yu kuprepa men deremnunge. Yuk neng tep bicau tenenge nengdi, yuk neng tep, ‘Ware kupra meliptene do?’ tenen, pio bouna dipu melimnunge. Yuk neng tep, bicau tenenge nesaladi, yuk nesala talenge keca cap, sun kunge keca cap tep, ‘Uo, nedipu taleptenedi kutene,’ men tenenunge. Tonda, sundi sun pe tep, “Nunda ila mambul neng kunupe,” pepra, kange erepra ila upu pena cap, gemena cap men kununge. Yuk nesala tep bicau tenepmengedi, dipru kareprepa, kunung nesalada, dipru boun nesalapu kununge.

5 Yuk nesala tep, bicau tenepra makurameng nengda, yuk neng tep bouna dipu kununge. Sunda, ‘Ne kapdi, uo tenepra, mali kange doupkuner do?’ tenena gum dipapu, yu kuprepa, mali upu pepra, yuk neng tep men yaninunge. Tonda, sun pedi, sun pe tep, ‘Ne putapnere kecapu ila mambul dinin, yuk nesala putapre ngeda, dakwapye,’ men tenenunge. Yuk nesala putapre keca ton tenepra melimnunge. Tonda, yuk nengdi mali kupmengepa, sun berbera tulum kuprepa, derepmengedi, men wenemnunge. Tali kange doupra bouna dipu kununge. Ange utopu, yuk nesaladi sun tep, mali kupmenge ngeda, lumdongona gum di, pio tupa tenenapu kuramengedi, “Mali kupnei ngeda, ake-ake,” tenepra, nukmengedi, giso deiki men derinunge. Yuk nengdi sun tep mali kupmenge keca tep nengeda, ‘Dakwapye’ tenen, kaukemengedi, kange di ton cap tupa men tenenunge.

6 Yuk nesala tep bicau tenepra makurameng nengda, yuk nesaladi sun mali kunge keca cap, mali tenenge keca cap tep, kange deipra men kununge. Dinino, pio dumsisi telep kun keca tep, sundi kange deipra kununge. 7 Yuk nesala tep bicau tenepra makuramenge nengdi, kange mun keca akapmarya peda, tamna gum dipapu, ‘Nun kayapu tep, kalengnapu kunkamepe’ tenen, pio bicau tenepra melimnunge. Sun anengda, yuk nengdi sun kayapu neng tep, mali penge upuda, gekepmengedi, adipapu tali lupra menmena teka men tenenunge.

Tonda, sundi yuk neng tep, ‘Gume, mali kupmar dinin, ukutaru dakwapmarepnen, amendada telep kupkamre ja’ tenen, dinapu kununge. Kange mun keca kupre taru yumada, sundi, ‘Adipapu tapkupe,’ men tenenunge. Ange gum dinin, tamna gum pio dimpeprappu tupa teleppu kununge. Tonda, yuk neng tep bicau tenenge nengda, sun pe tenenange akapmarya peda, yuk neng tep, tupa bicau tenepra makunapu kununge.

8 Uda, Allahdi nun tep, ‘Yuk nesala bicau tenepra makunkameng’ tenen, bicau tenena tep kareserur deiyo kecada, men gum kupkamre. Pio akunkamre. Dinino, dan mutu do yuma, amenda taruda, amenda kupkamre keca lap peramenge ngeda, gum kupkamre. Sun men kael keami dinin, Allah er Lek Sambala puto deiki di, yuk mutu nesala penge upu, tali lupra penge upuda, ange peda gum kupkamre. Allahdi karerepa, ila kael keamenge kecada, amenda gum kupkamre.

9 Deiyoda, ake. Ukutaruda, ton tara kecada, kael kemnupe. Ton tara ngeda, men kael kemnupe. Ange utopu, amenda kupkamre keca, ton tara ngeda, lap penupe. Ton tarange yumada, men lap penupe. Ange yumada, ukutaru men kael keptepe. Akeca yuma peda gum kupkamre.

10 Upepmasen dinino, amenda taruda, akeca-keca men sungtaleredi, nimi men kupmanto keca, pio kunupsek pen pel dore ngeboda, Kristus tamupra yaryopda, ukutaru suktalesere keca yumada, gum kupkamre. Ukupredi, kunupsek pen kecapu, men suktalepmantonge kareserepa, angeda pio akunkamre. Angeda men gum kuptue.

11 Ne milo mi kuramsi taruda, sun metek nyapudi, upu pena cap, kamet pepra tali-tali kange douna cap, ‘Deiyo ake-ake,’ men tenengedi, tali-tali kuramengtopu kuramsi dinino, nepbaramsanen, konum wisi deipbasidi, nimi du neng konum kupneuopda, metek nyapu kuramenge keca yumada konum tapsi. 12 Aupu pepmasenada deiyo ake. Mokon pumbon dipterepmengedi, sun meneng urasinpu yarepa, kuki epmengedi, yambul telep kupra diramengtopu, ukutaruda, akeca-keca yuma yambulanun kuki utopu dinupe.

Dinino, nimi antapra meneng damai epdangedi, pio telep kupra urasin katuai diramengtopu, amenda sirya taruda, akeca-keca yuma katuai dipu epmepedi, telep kupra nong neitamainge moupra kael kemkamepe. Ukutaruda, yambulanunpu kael keamsi, ton ngeda men kael keamsi dinino, Allahdi ne tep, ne kune keca cap, tenenun keca yuma cap, telep kupra kael kemneretopu, amenda sirya taruda, ne peda akeca-keca yuma, moupra kael kepra kunkamne.

13 Ukutaruda, tuai mutu kunkamep taruda, mambul keca ton weneri pio kunkamre. Ada, teka tenena cap, ‘Amenda taru Yesusdi doryankamser’ tenen, tamna gum dipapu, pio dinapu kuna cap, yuk neng tep bicau tenepra melimna capda, aweneri keca pio akunkamre. Aweneri akapmar dinino, ila-ila mambul ngeda, ada yuk neng tep bicau tenepra makuna kurure. Ne Paulusdi pepsene.