1 Corinthians 14

Paulusdi, “Allah teka tenenge nesalada, sun yuma dipru kwa diprap melidankamrume,” pepu upu

1Ne kayapu, sun kunkamrum keca yuma neitamai di, bicau tenepra melimdanapu kunkamrume. Tonda, Allah er pel dona tep, er Lek Sambala puto deiki di, ‘Pel dona deiyo keca karepsetue’ tenen, putaserepa kange deipra kunkamrume. Apel dona deiyo keca yala yuma putana telep dinin, ‘Ila mambule’ tenen, pio putankamsere ngeda, ada Allahdi perepa, er upu lap pepra peteremna deiyo keca tep, pio putankamsere pepsene.

2Ange pepmansena deiyo ake. Ada, ware neng do yuma, sun men kael keamidi, men peramenge upu dinin, Allah er Lek Sambala puto deiki di sun dipruai dongoprepa, yuk mutu upu deiki pere ngeboda, angebodi yuk nesala sun moupra gekena tep men perure. Lek Sambaladi karesere upu pere ngeboda, Allah er gekena tep perure. Aupuda tek sisi pepmasene. Allah er Lek Sambaladi, angebo er dipruai pedirepa, yuk mutu upu deiki pere ngebodi aupu pepre pangeda, yuk nesala yuma amul deikipu gekertamnung dinin, ‘Deiyo ake,’ tenepra, moupra men kael keptenge. Ada, Allah er Lek Sambala puto deiki di, aupu dopra, angebo tep karerepa, angebodi inimna upu, nimi men gekepmanto upupu perura tep pepsene.

Ange tep nengeda, ila di putarepa, ‘Uo, Allahdi karepsetue,’ tenenkamrum ngeda, ‘Yuk nesala ton gekeptenge’ tenen, Allahdi perepa, ‘Er upu katuai di lap pepra, peteremna deiyo keca karepsetupa, petereptepe,’ tenen, putarepa, ‘Allah tep moronkamruma’ tenena tep pepsene.

3Allah er Lek Sambala puto deiki di, yuk mutu upu penge nengda, Allah er gekena teppu penunge. Dinino, Allahdi peprepa, er upu jenek kupra, lap pepra peteremna deiyo ngebodi, er upu perepa, yuk nesala yuma, sun dipru kwa dimna cap, puto kemdina cap tep, ‘Melipkun’ tenen, perure. Ada sun teka tenenange puto kemdina cap, sun dipru kwa dimna cap, dipru wisiserenge kemdina cap, sun kange mun kuserenge, ‘Kanam kupkamre’ tenena cap tep, telep upu katuai di perepa, nesala yumadi, telep kupra, gekenunge. 4Allah er Lek Sambala puto deiki di kareprepa, yuk mutu upu deiki di perur ngeboda, er pedi er pe tep pedaredi, dipru kwa dipra puto kemdidarur dinino, Allahdi perepa, er upu katuai di lap pepra peteremna deiyo ngebodi, Allah teka tenenge nesala yuma moupra gekepmengepa, sun dipru kwa dipra puto kemdirure. Er pe teppu men perure.

5Sun Korintus mutu nesala yumada, Allah er Lek Sambala puto deiki di karepsetupa, yuk mutu upu peptumopda, ne kange yambul deipsetene dinin, ila mambul ngeda, sun yumadi, Allah pesere upu, katuai di lap pepra peteremna neng kutumopda, ange tep, ila di kange deipsetene. Allah upu lap pepra peteremre ngeboda, ila mambul pel dorur dinin, Lek Sambaladi deiyo keca kareprepa, yuk mutu upu deiki di perur ngeboda, yambul mambul pelpu dorure.

Deiyoda, Allah upu jenek kupra peteremna ngebodi er upu perepa, Allah teka tenenge nesala yuma gekenunga deiki di, sun dipru kwa dipra, puto kemdirura tep pepsene. Yuk mutu upu deiki pere ngebodi, “Deiyo ake-ake,” pepra lap peptupa, sun geken nesala yuma moupra kael keptenge teptoda, ange peda telepe peptene. Aupu deiyonge moupra men teneptengedi, men kael keptengopda, angeda telep gume. Ne Paulusdi pepsene.

6Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Sun ton tenipetepso. Sun damai yatenedi, Allah er Lek Sambala puto deiki di, yuk mutu upu deiki pepsetenya peda, aupu tali peptaptenya deiki di melipsetene do? Gume. Dinino, Allahdi iniamu keca jenek kupra lap pena upu do, ila kael kemna upu do, Allahdi peprepa, lap pepra peteremna upu do, tonda, dumsisi kuna tep, “Ukunkamrum, ukunkamrum,” pepra peteremna upu do, aupu yuma utopu upu pepsetenetoda, adeiki dipu melipsetene. Sun moupra men gekeptum upu pepsetenya peda, angedi men melipsetene.

7Uda, nun gam kunup nesala tep, tonda gam men kure keca tep nengeda, apepmasen upu tek sisipu kurure. Atep gam men kure keca, bung-bung pena er sida seruling cap, yuk ngeda, er sida kecapi cap tep pepkusene. Bung-bung pena dopra pere ngebodi, tenpu upu mut peretopu, telep kupra men pepyopda, yuk nesala gekepmengedi, ware kupra moupra kael keptenge do? Ada, bung-bung pena di mali pepyopda, anengdi, ‘Er pere mut adano,’ tenepra kael keptenge do? Gume, ange men kael keptenge.

8Ange utopu, sun jen talen nengdi bung-bung pena, er sida terompet deiki di, tenpu mut pengepa, gekepmengedi, adipapu, ‘Uda, amut gekepmapa cadi, mali neng porbenkupe’ tenen, kael kemnunge. Dinino, aterompet pere ngebodi, telep kupra men pere pangeda, lelim tali gekepkameng dinin, ware kuprap moupra teneptenge do? Men gekepmantonge peprepa, sundi, ‘E, ukuda porbenkupe’ tenen, kael keptenge do? Gume, tali lelimpu gekepkameng dinin, lelim mali peprepa, moupra tenena gum tep, jen talen nengdi, ketenemna gum di, tali kange doupra kunkamenge.

9Aupu ukupmantonge pepmasentopu, sun Korintus nesala peda utopu kurume. Allah er Lek Sambala, er puto deiki di, yuk mutu nesala penge upu kareserepa, aupu deiki di, sundi, yuk nesala yuma gekepmanto upu, telep kupra jenek men peprum pangeda, ware kuprap, yuk neng yuma aupu gekeptengedi, ‘E, sun pepmaseng upuda, deiyo ake’ tenen, moupra kael keptenge do? Gume, men kael keptenge. Atep nengeda, sundi yuk mutu upu deiki dipu, sun pe mutu neng tep perumyopda, upu tali pertamnapu kunkamrume. Atep, akecada pio men kunkamrume pepsene.

10Ne kayapu. ‘Tek do, telel do?’ tenen, kange men boktopsetue. Tuai mutu neitamaida, nesala yuk-yuk penge upuda, yala pio weik akapmar dinino, aupu yumada, deiyo ton akapmare. Sun pe nengdi sun pe upu pengepa, sun aupu penge neng gekepmengopda, adipapu, ‘E, aupu deiyoda ake’ tenen, moupra gekenunge. 11Aupu yumada deiyo akwapmara cadi, sundi yuk mutu upu deiki pepmengepa, gekeptene dinin, deiyo men teniptene teptoda, anengdi ne tep, ‘Angeboda, yuk mutu ngebo cadi, erda nimi bo ngebo utopu kurure. Nun upu men gekeptue,’ tenepkamnenge. Ange utopu nedi sun yuk mutu upu penge neng tep, ‘Sunda yuk mutu upu penge nesala kununge. Ne tara neng gume,’ tenepkamne.

12Apepmasena utopu, sundi sun cap kikiman kurum nesala tep, Allah er Sambala puto deiki di, yuk mutu upu pepmum pangeda, sundi sun pe neng tep, “Sunda, yuk mutu nesala utopu kununge,” pedankamrume. Sun Korintus mutu nesaladi, ‘Uo, Allah er pel dona tep, er puto deiki di pel dona deiyo keca yala-yala yuma karepsetue’ tenen, putaserepa, kuruma cadi, aupu pepsene. Allah teka tenenge nesala yuma, sun dipru kwa dimna cap, puto kemdina cap tep, moupra kael keptenge kecapu, ‘Allahdi apel dona deiyo kecapu karepsetupa, nun kikiman kupe nesala tep melimdatepi’ tenen, pio putaserepa, kunkamrume. Yuk nesala tep men melipmanto ngeda, putana gume.

13Allah teka tenenge nesala, “Sun dipru kwa dipra puto kemdinada, angepu mambule,” pepmasena tep nengeda, aupu ton pepkusene. Angebodi men kael keamu dinin, Allah er Sambala puto deiki kareprepa, yuk mutu nesala penge upu deiki di peptu ngeboda, ‘Uo, Allahdi melipnetupa, aupu moupra gekepnedi, jenek kupra lap peptenepa, ne kayapu neng yuma moupra telep kupra kael keptenge’ tenen, Allah moronkamre.

14Angeda, mesum tep men pepsene. Gume, yuk mutu upu deiki di, Allah moropne taruda, Allah er Lek Sambala melipnerepa, ne sambaladi Allah moronun dinino, ne kange tenenange deiki di, moupra men gekeptenya cadi, ‘Deiyo ake’ tenen, men kael keptene.

15Ange tep nengeda, ware kunkamne do? Uda, ange ton pepkusene. Allah morona taru pe, Allah er si eremna tep, mut penkamne taru peda, Allah er Lek Sambala puto deiki melipnerepa, ne sambaladi yuk mutu upu deiki Allah moronkamne taru yumada, ne kange tenenange deiki di, moronkamne. Tonda, ne tara neng nun penup upu deiki di gekepmanto upu ton tapakra Allah moronkamne. Ada, Allah er Lek Sambala melimnerya deiki di, upu penkamne dinin, nimi gekepmanto upu deiki dipu peptene teptoda, angepuda telepe. Yuk nesaladi men gekeptenge upuda, tali pertamna gume.

16Allah er Lek Sambala, er puto deiki di yuk mutu upu kareserepa, sun sambaladi yuk mutu upu deiki, Allah er si erepra er tep, “Telepe,” pemum pangeda, sun yuk nesala men gekepmatenga neitamai di, tenpu ngebo ton moupra men gekeptudi, men kael keptuopda, angebodi ware kupra, “E, nedi ton, tek sisi moupra tenepmana tep, ‘Apenmangtopu kupkamre’ tenen, Amin pepne,” teneptudi, peptu do? Yuk mutu upu deiki di Allah tep, “Telepe,” peptuma peda, sun perum upuda, amutu ngebodi moupra men gekeptua cadi, “Ne ton gekenmane,” men peptue. 17Uda, Allah er Sambaladi, yuk mutu upu kareprepa, sun aupu deiki di Allah tep, “Telepe,” pepra er si telep kupra ereptuma peda, angebodi moupra gekeptudi, men kael keptua cadi, aupu peruma deiki di er dipru puto men kemdirume. Er moupra gekena gum tep, ada men kupmanto.

18Uda, ne kayapu, sun Korintus mutu nesalada, Allah er Lek Sambala puto deiki di yuk mutu upu yambul perum dinino, ne kangeda, Allah melimnerepa, er Sambala puto karenerya deiki di, yuk yala upu pio weika di penune. Ange tep nengeda, nedi Allah tep, “Telepe,” penune. 19Akeca karenerya cadi, Allah tep, “Telepe,” penun dinino, ne kangeda, Allah teka tenenge nesaladi, ‘Allah si ereipkup’ tenen, bulumenge taruda, ‘Nesala yuma moupra gekeptengedi, kael keptenge’ tenen, sun gekepmanto upu pamu baripu peptenepa gekeptengopda, ‘Angeda pio telepe,’ tenenune. Dinino, sun men gekeptengedi, moupra men kael keptenge upu, Allah Sambaladi karepnerepa, yuk mutu upu deiki di 10 ribu upu peptenya peda, ‘Angeda mambule gume, dakwapye,’ tenenune. Deiyoda, sun yuk nesala men gekeptenge upu deiki di pepnyopda, sun dipru kwa dipra puto kupra men deiptenya tep pepmasene.

20Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Metek nyapu teneramengtopu tenerumnyada, yapkurume. Uda, mali keca putarepa, mali kuna tep nengeda, pio metek alen bo kin nyapudi, akeca-keca men tenengedi, mali men kuramengtopu, sun adipapu teleppu kunkamrume.

Dinino, sun kange tenenange neitamai yumada, telep neng, wisi konum deipi nesaladi, kange doupra dumsisi kecapu tenengetopu, sun Korintus kurum nesala peda adipapu tenenkamrume. Mali kuna tep nengeda, milo nyapu utopu kunkamrume. Telep kuna tep nengeda, du nesala utopu tenerumdi, teleppu kunkamrume. 21Allahdi peipupa, pumun taru kuramu nabi ngebo Yesayadi Allah upu buku neitamai sekeiamu. Allah upu jenek kepra sekamu ngebo Yesayadi sekeiamu upuda ake.
Allahdi pepu. “Anesalada, ne tenemsi nesala tep, ‘Ne upu gekepkamneng’ tenen, upu kai pena neng sun damai dopra deipkamne. Ada, yuk mutu nesala dopra, ne tenemsi neng, sun damai doproipnepa, ne upu dinin, yuk mutu nesala penge upu deiki di lap penkamenge.
Ukunkameng dinin, aneng dopra deipnepa, ne upu penkamtenga peda, ne wepra deiamsi nengdi ne upu men gekepkamnenge. Ne upu men dorongedi, dabal tep tamkamnenge. Ne Allahdi pepne,” pepu. (Yesaya 28:11-12)

Aupu pepu ngeda, Yesayadi sekeiamseupa, ne Paulusdi aupu dopra pepsene.

22Aupu akapseua deiki di kael kemnupe. Allahdi utenerure. Sun men kael keami neng dinin, Allah er Lek Sambala puto deiki, yuk mutu penge upu kareprepa, pepmengepane, teka tenena gum nesala gekepmengedi, sunda, ‘Uo, angeda tek sisi Allah er puto deiki dipapu pepmasenge,’ tenepmengedi, ‘Teka tenepkameng’ tenen, Allahdi akeca kareserure. Atep, ‘Teka tenena nesaladi gekenkameng’ tenen, Allah er Sambala puto deiki di aupu men kareserure. Ada, teka tenena nengdi, ‘E, Allah er puto deiki kunge keca adano, tenepkameng’ tenen, men kareserure. Dinino, Allah er upu sengaminge cap, peserenge cap, lap pepra peteremna deiyo keca kareprepa, er puto deiki di peteremsenungada, angeda teka tenena nesala sun melimna tep kareserepa, peteremsenunge. Angeda, sun teka tenena gum nesala tep, kareserur keca gume.

23Ange tep nengeda, sun teka tenemum nesala yumadi, ‘Allah er si erepkup’ tenen, bulumrumu taruda, sun yuma Allah er Lek Sambala puto deiki di yuk mutu penge upu kareserepa, aupu deiki di pemum pangeda, yuk tali neng gekepmengyopda ware tenenkameng do? Ada, sun yuk neng aupu men gekeptengedi, moupra men kael keptenge nesala cap, uda teka men tenenung nesala cap, sun Korintus mutu kurum nesala sun Allah upu geken ati wekrapsengedi, men gekepmanto upu gekepmengyopda, “Gume, akati nesala yumada, tali mutana nesala kunung adano,” pepra men tenepkamseng do, gum do? Ne kangeda, angepu tenepkamsenge.

24Teka angepu tenesenung dinin, sun teka tenerum nesala yumadi, Allah pesere upu cap, men di konum sekeiamsei upu cap, lap pepra peteremrum taru neitamai, sun teka tenena gum neng cap, ‘Aupuda tek do, gum do?’ tenen, kange tenimtona neng, sun Korintus mutu Allah upu geken ati wekmengedi, sun penkamrum upu moupra gekepsetengopda, teleppu kunkamenge. Ada, sun perum upu gekepmenge deiki di, ‘Uo, nunda tek sisi mali kun nesala kunupa cadi, Allahdi upu lepsisikra bokeipseredi, wenepra popkamser ngeda, nun konuma,’ tenepmengedi, mali kange doupkamenge. Angeda telepe pua.

25Sundi Allah upu jenek kupra peteremum pangeda, teka tenena gum nesala, aupu gekepmenga deiki di, sun dipru neitamai mali kuramidi, inimami ngeda, katuai kuprepa, giso talepdongopra mali kange doupmengedi, “Uo, Allahda anesala sun dipru neitamai tek sisi kurure. Dinino, nunpuda, mali nesala tupa kunupe,” pepra, Allah tep, teka tenepmengedi, er si eremkamenge. Ne Paulusdi pepsene.

Paulusdi, “Ne kayapu, ‘Allah upu gekepkup’ tenen, Allah upu ati bulupra wengkamrum taru kunkamrum keca ake,” pepu upu

26Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Apepmasen upu yuma tep nengeda, Allah upu geken ati wekra, er si tep eremkamrum taruda, “Telep kun keca,” ake, pepra kael kemna tep nengeda, ‘Ware peptepe do?’ tenena gume. Angeda pepkusene.

Sun bulupra Allah upu gekenkamrum taru yumada, sun yuma yuk-yuk dinin, ton ngeboda, Allahdi er tep karepu mut pepkamsere. Ton ngebodi, “Dumsisi kuna tep, ukupra kunkamepe,” pepra peterepkamsere. Ton ngebodi, Allah er upu iniamu dinin, angebo tep jenek pepupa, kael kepu ngeda, sun gekena tep Allah iniamu upu nong neitamai ngeda, jenek kupra peterepkamsere. Ton ngebodi, er men kael keamu dinin, Allah er Lek Sambaladi kareprepa, yuk mutu upu deiki upu pepkamsere.

Dinino, erdi pepsere pangeda, ton ngeboda, Allah er Sambaladi, “Aupu deiyo neitamai nongda ake,” lap pepra melipre pangeda, aupu gekepra kael kepre ngebodi, “Aupu deiyo ake,” pepra, aupu jenek kupra lape pepkamsere. Ange yumada, deiyo tenpupu akapkamre. Ada, Allah teka tenena nesala gekepmenga deiki di, ‘Sun dipru kwa dipra puto kemdinkamep’ tenen, kunkamrume. Yuk ton gume. Ne Paulusdi pepsene.

27Allah er Lek Sambaladi er tenemre neng tep, yuk mutu penge upu kareprepa, ‘Pepkusepe,’ tenepmengopda, tenputo, buteneto pepretenge dinin, pio weik ngeda weneri nengdi pepsetenge. Ange pepsetenge dinino, tenpu taru dipapu, kikiman tali wisipra men penkamenge. Ange gum dinin, tenpu-tenpudi yuk-yuk jenek pepkamenge. Yuma tapakra tali lupra pena gume. Tonda, konum yuk-yuk tenpu-tenpudi, yuk mutu upu deiki di pepsengopda, adipapu ton ngebodi, “Aupuda deiyoda, ake,” pepra lap pepkamsere. Gum dingeda, yuk mutu upu men peptapsetenge. Ada, aupu deiyonge men lap pepsetenge teptoda, anengdi yuk mutu upu deiki di pena gume, pepsene.

28Ton nengdi, ‘Yuk mutu upu deiki pepkup,’ tenepmengedi, keteneptengepane, aupu gekeptudi, lap pepmanto ngebo men kuryopda, ato upuda men peptenge. Men lap pepmanto dingeda, yuk mutu upu pepmanto nengdi, sun teka tenerum neng bulupra, Allah upu geken ati neitamaida, upu pena gum dipapu, tali dimpeprappu bungkamenge. Aupu tali lupra men peptenge. Sun pedi, sun pe tep sun dipru neitamai dipu pepdatenge. Tonda, sundi Allah er gekena tep, sun dipru neitamai dipu tenepra peptenge. Yuk nesaladi amul deikipu tali gekertamna tep, tali lupra pena gume.

29Uda, ange utopu, Allah er pesere upu cap, men di sengami upu cap peteremna deiyo neng cap, tonda amenda kupkamre keca lap pena deiyo neng cap, sun Allah upu geken ati kungopda, anengda, buteneto, wenerito pepsetenge dinin, yuk-yuk penkamsenge. Sundi peterepsenge pangeda, aupu gekepmenge nesala yumadi, ‘Aupu deiyo ake. Tek penmaseng do, gum do?’ tenen, moupra tenenkamenge. Tonda, gekepmengedi, ‘Upepsera cadi, ukunkamepe, ukunkamepe’ tenen, kange moupra gekenkamenge.

30Sun yuma gekenmamumpane, sun tupa bukmang nesala kankan, Allahdi iniamu upu dopra tenpu ngebo tep, “Aupu pepkurum,” peprepa, angebo er dipru neitamai pepyopda, angebo gekepredi, ‘Ne ton pepkune,’ tenepyopda, menmena peteremare deiyo ngebodi upu pena gum di, dimpepra bukyopda, ‘Ne ton pepkune,’ tenepre ngebodi, amenda pepkamre. Wisipra tenpu taru dipapu pena gume. 31Ukupra tenpu-tenpu pepbankamruma deiyoda, sun Allah upu peteremna neng yuma pepbangepa, sun bulumrum nesala yuma moupra gekepmumyopda, sun yumadi moupra kael kemkamrume. Tonda, sun dumsisi kuna tep, “Ukupkurum, ukupkurum,” pepra melipra pepmengepa, gekepmumyopda, sun dipru kwa dipra puto kemdinkamsenge. Ange tep aupu pepsene.

32– 33Uda, nun nai bo Allah lyepra taleseredi, melimsere pangeda, er pel doserya deiki di, kange deipra dumsisingepu kunupe. Allah pel doserya deiki di, tali-tali upu pepra, koudana utopu men kunupe. Amali kun keca pel men dorura tep nengeda, sun Allah upu peteremna cap, amenda kupkamre keca lap pena cap kunge nesalada, sun pe sambala cap, nong cap kalengdangedi, telep kuprappu penunge. Sun pedipapu, sun pe tep, lepsisikdangedi, telep upupu penkamenge. Tali-tali gwalipra kunada men kunkamnunge. Ukunada, meme, ne Paulusdi pepsene.

34Ukuda, yuk upu ton pepkusene. Sun Allah upu gekenkamrum taru yumada, nerapuda upu pena gum dipapu, tali dimpepra bukmengedi, gekenapu kunkamenge. Allahdi peipupa, Musa sekeiamu upu neitamai peseretopu, nerapuda, Allah upu geken ati bulupmum taruda, upu men peptenge. Ange gum dinin, sun peteremna deiyo nesala amngai bukra, bouna dipu kunkamenge. Mutu ban-ban yuma, Allah tep teka tenenung nesala yumadi ange utopu kununga tep, ‘Sun Korintus mutu nesala peda gekenkamrum’ tenen, aupu pepsene.

35Nerapudi, ‘E apepmaser upuda, deiyo ware upu pepmaser do?’ tenen, ‘Asipeteptepe’ tenen, putapyopda, Allah upu pakra, sun pe ati ka tamupra bangedi, sun pe domenge neng tepapu asimterenkamenge. ‘Allah upu gekepkup’ tenen, Allah upu ati bulupra wengrum taru yumada, nerapu upu katuai di pepmengopda, adeiki di mali kupmengedi, Allah si yaninunga cadi, Allah upu geken taruda, nerapudi upu katuai di men penkamenge. Ukuna meme, ne Paulusdi pepsene.

36Nedi apepmasen upu tep, sun Korintus mutu nesaladi, ‘E, er pepsere upuda talipu pepsere,’ tenepkamnerum do? Ukupra tenepnemumyopda, nedi sun tep asipetepkusene. Allah er upuda, sun Korintus mutu kurum nesaladi, sun tenena deiki dipu gonga kepra teneamrumdi, peteremamserumpa, nun amenda kael keamepu do? E, agum dingeda, yuk nengdi sun tep peteremamseipa, sunpu gekepra kael keamrumpa, nun yuk nesala yumada, men kael keamupu do, gum do? Allah teka tenenge nesala mutu-mutu yuma akonum lap pepmasentopu kununga cadi, sun Korintus mutu nesala peda utopu kunkamrume.

37Tonda aupu ton pepsene. Ware ngebo do yuma, ‘Gume. Allahdi pesere upu lap pepra peteremna cap, amenda kupkamre keca lap pena cap tep, deiyo keca konum karepneua cadi, akeca lap pena ngebo nabi kunune’ tenen, pere ngebo cap, uda, ‘Neda, Allah er Lek Sambaladi, er pel dona tep, pel dona deiyo puto weika di karepneupa, er pel donune’ tenen, pere ngebo cap tep, sun gekenkurume. Nedi pepmasen upu tep nengeda, aupu pepsene. Ne Paulusdi sekeipsene upuda, tali upu gume. Nun Deiyo Ngebo Yesusdi pesere upupu peteremsenune. Ne kange dipapu aupu men penune. Atep, angepu tenepmumdi kunkamrume. 38Apepmasen upu tep, ‘Tali pepsere’ tenen, kaukemre ngeboda, sun cap, nun yuma capdi, angebo tep, kaukepmepedi, ‘Erda tali ngebo’ tenen, er tep tapmepedi, er upu pio men gekenkamnupe.

39Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Moupra gekenkurume. Arup pepmasen upu yuma tep nengeda, ukunkamrume. ‘Angeda ila mambule’ tenen, ila di putaserepa, ‘Allahdi apel deiyo keca karepsetue’ tenen, kange deipra kunkamrum ngeda, ada Allah pesere upu tep, deiyo neitamainge lap pepra peteremna kumumdi, ‘Angepu ila mambule,’ tenenkamrume. Tonda, Allah er Lek Sambaladi er puto deiki kareserepa, sun yuk mutu upu deiki di penge upuda, “Angeda pio men pepsetenge,” pepra upu men sengkamrume. 40Upu men sengkamrum dinino, sun kunkamrum keca yuma neitamai di, tali kange doupra koudana gum dipapu, telep-telep kupra, ne konum lap pepmasentopu kunkamrume. Ne Paulusdi pepsene.