1Cor 15 | XteSC | STEP | Ne Paulusdi pepsene. Ukuda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Nedi Allah er kai telep upu peteremamsipa, gekepra teka teneamrume. ‘Aupu deiki dipu Allah lyepkamsere’ tenen, teka teneprumdi, pio moupra talepra tupa kumum ngeda, ‘Kange di ton cap tenenkamrum’ tenen, pepkusene.

1 Corinthians 15

“Yesus depmaupanen, Allahdi Yesus gam bukra deipu pangeda, Yesusda gam pio kunkamre,” pepu upu

1 Ne Paulusdi pepsene. Ukuda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Nedi Allah er kai telep upu peteremamsipa, gekepra teka teneamrume. ‘Aupu deiki dipu Allah lyepkamsere’ tenen, teka teneprumdi, pio moupra talepra tupa kumum ngeda, ‘Kange di ton cap tenenkamrum’ tenen, pepkusene. 2 Nedi aupu dopra peteremamsisipa, gekeprum ngeda, kange tenimtona gum di, pio pe deipra taleprumyopda, Allahdi lyepkamsere. Ada, apeterepsisi upu, nimi lyemna tep, Yesus er kai telep upuda, teka teneprumnya deiki di, Allahdi lyepkamsere. Aupu yumada, pio pe deipra men taleprumdi, ‘Dakwapye’ tenen, tapmumyopda, men di teka tenepmumnge peda, gum kupropseredi, nong men kupkamsere.

3 Atep nengeda, Allah er kai telep upu ila mambul deiyo ngeda, erdi peipneupa, sun gekena tep peterepsisitopu, ton cap pepkusene. Menop taru Allah er upu lap perami nengdi sekeiamseitopu, Yesus Kristusdi, nun tep, ‘Sun mali kuna cap, tenena cap tep, gum kupra deipnedi lyepkamsene’ tenen, nun yo pununa tep depu. 4 Nun wenemna tep Allahdi adipapu poptapsetu dinin, nun yo pununa tep, Yesus popipa, depu pangeda, er peina tep, er nong dopra gel imir pumbon dongopi. Dongopipane, ue weneri tumi dakunmauanen, tumi weneri konum kupkopda, Allah upu neitamai sekeiamseitopu, Allahdi Yesus gam bukra deipupa, gam kuramudi, tupa kurure. 5 Gam bukeipupa, amendada, ‘Peterus ^{▼▼Peterus – Angebo er sida butene. Ton Allah upu buku neitamaida, er si tep Kefas sengnunge. Er si butene cadi, ton taruda Kefas perami dinin, ton taruda, Peterus perami. Dinino, angebo er nong tenpua.} epkuner’ tenen, katuai belepra tekupa, Peterusdi Yesus epu. Katuai belepupa, Peterus eputopu, amenda taru kange di ton cap er nyapu, sun 12 neng kunmaiyai neitamai di belepra tekupa, sun yumadi, Yesus epi.

6 Ange konum kupu dingeda, amendada, er tep teka teneami nesala, nimi pe, nerapu peda, gung weik 500 nesala bulupra kunmaiyai belepra tekupa, sun tenpu taru dipu Yesus epi. (Ataru epi nengda, weik tarada, tupa gam kunung dinin, ton nengda, konum depi.) 7 Agung weika di 500 nesaladi Yesus epipa, amendada, Yakobus kunmauai bena belepra tekupa, Yakobusdi Yesus epu. Epu pangeda, amenda taruda, Yesusdi, ‘Ne upu dopra peterembana tep, gonga kemna deiyo neng kunkameng’ tenen, wepra deiamu neng, sun damai belepra tengyaupa, aneng 12 nengdi Yesus epi.

8 Aneng pel dopra kuramengtopu, Yesusdi ne tep, ‘Angebodi ne pel donkamner’ tenen, wepra deipneupa, apelpu donune. Dinino, ukupra dakuramnyanen, neda amenda sirik tarato weipneu ngebo cadi, nerapu sika di, mundu douamenganen, mi derirameng utopu ngebo kunune. Ne tali dakuramsipanen, amenda tarupuda, ne damai ton belepra tekupa, ne asuru di Yesus epsi.

9 “Neda, sika di derirameng nyapu utopu kunune,” pepmasenada deiyo ake. Ada, nedi Yesus teka tenepipa, Allah er nyapu keipu nesala yuma tep nengeda, menop taru nedi, ‘Anesala cap, sun teka tenenge keca yuma capda, ange yuma gum kuptue’ tenen, sun nong deiki ikin keca weika di deriramsidi, ton neng tep upu peipsipa, portamami. Ukupbaramsa tep nengeda, Allahdi, ‘Ne upu peterep embana tep, gonga kemna deiyo neng kunkamenge’ tenen, wepra deiamu neng yumada, ne deiki tarato kununge. Sunda ila mambule dinin, ne teka kapul men tenepsi taruda, pio mali kuramsa cadi, sun amutarapu kunedi, yambul mambul ngebo kunune. Mali kuramsa cadi, yuk nesaladi, ne tep, “Erda, Allah upu peterembana tep gonga kemna deiyo ngebo, Rasul ngebo kurure,” men pepnetenge dinin, upenenunge.

10 Mali kuramsa tep nengeda, aupu men pepnetenge dinino, Allahdi ne tep, bicau tenepneudi, er kange dipapu melipra lyepneua deiki di, er upu peterembana tep gonga kemna deiyo ngebo kuna tep, wepra deipneue. Bicau tenepneudi, er kange dipapu melipra lyepneua nongda, gum men kupu. Mesumpu men kuramsi. Angeda pio gume. Allah er upu peteremna deiyo neng yumada, pel yambul puto di er pel dorami dinino, nepuda ila puto di Allah er pel doramsi. Pele weik doramsi pepmasen dinino, tek sisi ne puto deiki dipapu pel men doramsi. Gume. Allah bicau tenepneudi, er kange dipapu meliamneudi, er puto kareamneua deiki dipapu, er pel doramsi.

11 Ange tep nengeda, “Allah er kai telep upu, nimi lyemna upu deiyo ngeda, ake,” pepra, asurat neitamai pepmasenuada, nedi peteremamsisipa, teka teneprum do? Sun yuk peteremna deiyo nengdi peteremamseipa, teka teneprum do? Ayuma utoto pua. Deiyoda, tenpua. Nun yumadi Yesus er kai telep upu, nimi lyemna upupu peteremnupe. Aupupu gekeramrumdi, teka teneprume. Yuk upu deiki di gume.

“Konum denung nesalada, Allahdi gam bukra deipkamre,” pepu upu

12 Uda, ne kayapu. Nun yumadi aupupu peteremnupe, pepmasena cadi, aupu deiki di, “Kristus depupa, Allahdi gam bukra deipu,” pepra peteremnupa tep, sun kan-kan dinin, ton neng dingeda, “Gume, deami nesalada, Allahdi gam men bukeipkamre. Ada men kupkamre,” pepra peteremnungada, ware kupra kael keamtengedi, aupu peptenge do? Apenge nengda, sun ware deiyo keca tep aupu penung do? Sunda mokpu penunge, tek sisi men penunge. 13 Uda, sun moupra tenipetepso. Allahdi deami nesala yuma tep men ereipkamtu teptoda, adeiki di, aupu peptepe. “Gume. Ange tep, Kristus peda, men gam bukra deipu. Allahdi denung nesala men gam bungrure,” peptepe. 14 Tonda, tek sisi Kristus men gam bukra deiptu teptoda, nundi peteremnup upu cap, peteremepepa, teka tenerum keca cap, yumada talipu kuptue. Allahdi Kristus men gam bukra deiptu teptoda, nun teka tenenup keca yuma, nong kuna gum, tali kuptue.

15 Angepu gum dinin, nundi Allah er kupu keca tep, “Kristus popipa, depu dinin, Allahdi gam bukra deipu,” pepra peteremnupa cadi, tek sisi Allahdi Kristus tep men gam bukra deiptu teptoda, nundi Allah kupunge tep nengeda, mok upupu penupe. Nundi, “Tek sisi Allahdi Kristus gam bukra deipu,” pepra peteremnupa cadi, ange men kuptu teptoda, mok pen nengpu kunupe. Allahdi konum deami nesala tep, gam men bukeipkamtu teptoda, ange deiki di, ‘Kristus peda gam men bukeipu,’ teneptepe. 16 Nundi, “Tek sisi ukupke,” pepra peteremnup dinino, Allahdi konum denung nesala tep gam men bukeipkamtu teptoda, ange deiki di, ‘Kristus peda gam men bukeipu,’ teneptepe.

17 Tonda, Kristus depupane, Allahdi men gam bukra deiamtu teptoda, sundi teka teneprum ngeda, tali keca teka tenepruma tep, “Nong men kupkamre,” peptepe. Allahdi Kristus men gam bukra deiamtu teptoda, nun tep men lyepsetue. Tenipetepso, Kristus men gam bukra deiamtu teptoda, sunda, sun mali kurumu keca cap, tenerum keca cap deiki di, dipru ateng kouramseupa, mali kuramrumtopu tupa kurume. 18 Tonda, Allahdi Yesus tep men gam bukra deiamtu teptoda, sun Yesus tep teka tenepi dinin, amenda taru konum deami nesalada, men lyepmanto kununge. Uku jen banpu benkamenge.

19 Uo, ne kayapu, tuai mutu kupe taru neitamaipu, Kristus lyepseredi, makunkamser dinin, amenda sirya taru tep nengeda, ‘Melipra men lyepkamsere,’ tenepra teka teneptepe teptoda, ila kange mun kupsetue. Arup pepmasen upuda, tek sisi men kurur dinin, Kristusdi amenda kupkamre taru tep men lyepsetu teptoda, nesala ban-ban yumadi, nun teka tenenup nesala tep bicau tenepsetenge. Ada, yuk nesala tep, yambula di bicau teneptenge dinino, nun teka tenenup nesala tep weika di bicau tenepsetenge. Deiyoda, ake. Yesusdi sirya taru men lyepkamsetu teptoda, yuk neng yumadi nun tep, ‘Uo, sunda tali kecapu teka tenenunga cadi, tali-talipu kununge. Atep sun bicaue,’ tenepsetenge. Dinino, Allahdi tek sisi Yesus gam bukra deipka cadi, yuk nengdi nun tep, ‘Tali neng’ tenen, bicau men tenepsetenge. Kristus tek sisi lyemserura tep pepsene.

20 Dinino, ne kayapu, moupra tenipso. Arup pepmasen upuda, ada Allahdi Kristus tep, gam men bukeiptuopda, ila kange mun kange douptepe, pepmasen dinino, ange men kunkamepe. Tek sisi ngeda, pepkusene. Ada, Kristus depupane, Allahdi gam bukra deipupa, ukutaruda tek sisi pio gam kurure. Uda, wa pepra kouamengepane, wisipyopda, weni kwaneng menmena yupra kipmengedi, jerameng utopu, Allahdi menmena gam bukra deipu ngeboda, Yesus akurure. Weni kwaneng menmena kipropmengedi, bun kwaneng amenda kiramengtopu, teka tenenung neng konum denung dinin, amendada, Allahdi gam bukra deipkamre.

21 Aupuda tali men pepsene. Nimi dena deiyo kecada, menop taru tenpu ngebo Adamdi dopropu. Adamdi mali kupupa, dena deiyo keca dopropka cadi, er depupa, dadepdanen yakaramyanen, ukutaru kunup nesala peda tupa denupe. Nimi tupa deramengtopu, gam kuna peda utopu kurure. Ada menmenada tenpu ngebo Yesusdi gonga kepra depupa, Allah er puto deiki di angebo tamupra gam bukra deipka deiki di, pio gam kuna deiyo keca peda, tupa kareserepa doronupe. Teka tenepmepyopda, pio gam kuna deiyo keca kareserure.

22 Depmepepa, gam bukra deipkamsera deiyo kecada, “Tenpu ngebo deiki di yakankamsere,” pepmasenada tali tep men pepsene. Gume, Adam mali kupka deiki di, nun tuai nesala yuma tupa denupe. Ange utopu, Kristus tep teka tenepmepepa, Kristus er nong tenpu dukdongopseua deiki di, gam bukra deriserepa, pio gam kunkamepe.

23 Gam bukra deipkamser dinino, Allahdi, ‘Angeda menmena, angeda amenda,’ teneamseutopu angepu kunkamepe. Ada, Kristusda, wa pepra kouamengepane, wisipyopda, weni kwaneng menmena yongopra kipmengedi, jeramengtopu, Kristus menmena gam bukra deipu. Ukupka cadi, Kristus sirya taru di, tuai mutu tamupra yaryopda, erdi talere nesalada, er mawa nesala cadi, amenda Allahdi gam bukra deipserepa, pio gam kunkamepe. 24 Allahdi teneamu taru konum kupre pangeda, tuai ban-ban yuma neitamai, nimi deiyo neng malinge cap, im deiki ila nimi deiyo nesala malinge yuma cap, akeca-keca talerya mali deiyo keca yuma cap, puto yala-yala yuma malinge capda, Yesus Kristusdi ange yuma sikke buktapredi, gum kupra deipkamre. Ayumada, ‘Allah tep, nun song’ tenen, yaninung nesala yuma tep pepne. Aputo kure keca yuma cap, nimi deiyo keca yuma cap, Yesusdi konum gum kupra deipre dingeda, erdi akeca-keca yuma, er talere keca yumada, dopropredi, er nai bo Allah tep, tamupra karepkamre.

25 Uda, Kristusdi akeca-keca yuma deiki tara kuredi, akeca-keca yuma talepra dakuramreanen, sundi, ‘Yesusda nun songe’ tenen, er tep yaninung keca cap, yaninung nesala yuma capda, popbisipredi bisbisa kapkamre. Bisbisa kapre dingeda, mali deiyo neng yuma gum kupra deipyopda, Allahdi akeca yuma dopra, Yesus er amutara deiprepa, Yesusdi akeca yuma yanipkamre. Ange yuma konum kuprea deiki di, Yesus er talere keca yuma dopra, er nai bo Allah tep karepkamre. Akeca yumada, er nai Allah tep karepkamra cadi, menmena apel yuma donkamre.

26 Yesus er bisbisa kamna tep, yanirpeterur keca, nimi dena deiyo kecada, Yesusdi sirya dakra poptapredi, nimi dena deiyo keca gum kupra deipkamre. Sirya gawal dangna tep, nimi dena deiyo keca peda, gum kupra deipkamre. 27 Puto mali keca tenpunge peda men tapkamre. ‘Yuma popbisipkamre,’ pepmasenada, tali tep men pepsene. Gume, Allah upu sekami upu neitamai aupu ton akurure. Aupuda ake.
‘Allahdi akeca-keca yuma dopra, Yesus amutara deipyopda, Yesusdi akeca-keca yuma deiki tara kunkamre. Akeca yuma yanipkamre.’ (Mazmur 110:1)

Uda, aupu deikida, “Allahdi akeca-keca yuma dopra, Yesus amutara deiprepa, yanipkamre,” perur upu akapmar dinino, Allahdi er pe tep, Yesus amutara men deipdankamre. Angeda gume. ‘Yesus Kristusdi akeca-keca yuma talepkamre’ tenen, akeca yuma dopra, Yesus amutara deipkamre ngeboda, Allah er pedipapu apel dopkamra tepa.

28 Allahdi akeca-keca yuma Kristus amutara konum deipyopda, Allah er Mi Sisa Yesus peda, Allah er amutara bukamre. Ada, Allah er pedipapu akeca-keca yuma deiki tara kuredi, ‘Akeca yuma talepra, ila Deiyo Ngebo pio kunkamre’ tenen, Yesusdi Allah er amutara bukredi kunkamre.

Allahdi gam bukra deipkamserenge tep, Paulusdi tapakra pepu upu

29 Ton nesalada, sun kayapu neng konum deiami nesala dinin, ‘Melipkupe’ tenen, sun kayapu neng melimna tep, moropmengepa, me dongonunge. Uda, sun tenipetepso. Allahdi er nyapu tep, men gam bukra deipkamsetu teptoda, anesalada ware kupkameng do? Deami nesala men gam bukra deiptu teptoda, apel donge nengda, ware deiyo keca tep me dongordanung do? Angeda tali kununga.

30 Uda tonda, nun Allah upu peteremna deiyo neng kunup keca ton tenipetepso. Tumi-tumi yuma, aketeng-aketeng neitamai yumada, nun Allah upu peteremepepa, mali neng gekepsengedi, tulum kuprepa, popmanto kusenunge. Allahdi teka tenena nesala men gam bukra deipkamsetu teptoda, apelda mesumpu doramtepe. 31 Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Ne tali men pepsene. Tumi-tumi yuma Allah upu peteremnuna tep, yu nengdi yu kuprepa, ne tep popmanto kunenunge. Uo, ne kayapu, sun Korintus mutu kumumdi, Yesus tep teka teneprumpa, nun cap, sun cap, Yesus Kristus cap, dipru dukdongopra kupya neitamai di, ne kange derisenune. Aupu tek sisi kuretopu, arup pepmasen upu ton, tek kurure.

32 Ne kayapu, Efesus mutu neitamai kune taruda, Allah upu peteremnepa, pio yu weik nengdi, popmanto kunenung dinino, apel donunada, ne tali kange dipu tenepra, tali kuramtenetoda, amendada ware telep keca kunkamner do? Gume, Allah er nyapu konum deami nesala, men gam bukra deipkamsetu teptoda, ‘Apelda tali mesumpu donune,’ teneptene. Apelda nong men kupkamtu teptoda, tek sisi men kuptuopda, ‘Dakwapye,’ teneptepe. Ada, pumun taru Yahudi yala nesala kuramidi peramitopu kutepe. Sundi peramipa, Yesayadi sekeiamu upuda ake.
‘Sundi uperami, “Nun gam kunkamep taruda, yambulanunpu gam kunmapyanen, menmena di tali denupa cadi, tali kange deipra jen cap, kange yawaramne me cap, tali lupra jenkamepe,” perami.’ (Yesaya 22:13)

33 Gume, ne kayapu. Mok keca teka tenedana gume. Tek sisi upu pepkusene. Telep nesala kuramenge dinin, mali kun nesala cap, tapakra kunga deiki di, benepmengepa, amendada telep kuramenge nesala pe, mali kun kecapu dopropmengedi, mali kupbankamenge. 34 Anengo, sun kan-kan di, ton nesalada, Allah er kure keca cap, er upu cap tep, moupra kapul men kael keamidi, walwal nesalapu tupa kununge. Ange tep, sun Korintus mutu nesalada, sun kange yawarapseupa, tali-tali kecapu tenepbanmarumdi, mali weik kurum dinin, pio telep ngeda, sun adipapu ange yuma tapra, kange di tamupra kange moupra kunkamrume. Sun mali kurum keca yuma tapra dumsisipu kunkamrume. Aupu pepmasena yumada, ‘Gekepmenge dingeda, uo tenen, ali dakameng’ tenen, ne Paulusdi pepsene.

Allahdi gam bukra deipseredi, ukupu nong karepkamserenge tep, pepu upu

35 Uda, Allahdi gam bukra deipkamser upu ton pepkusene. Ton nengdi, ‘Gam bungdinada, tek do, telel do?’ tenen, aupu tep asimpetenunge. “Gume, konum denung nesalada, Allahdi ware kuprap di gam bukra deipkamsere do? Konum gam bukra deipsere taruda, wareto nong karepserepa gam bukra kunkamepe do?” pepra asimpetenunge. 36 Asimpetenung dinino, angeda pio walwal di penunge. Ukupmanto upuda, pepkusene. Uda, sun wa neitam kouramrum keca ton, ukupmantonge ton pepsenyopda, tenipetepkurume. Yal keca bolongamrum ngeda, menmena bol deikinge men lyupyopda, amenda taru nong men bolongrure. 37 Yal keca du ngeda, jagung do, pinas do, yuk keca do, yal keca bolongamrum ngeda, amenda nong kupkamre ngeda men bolongrume.

Ange gum dinin, pio yambul keca er dungepu bolokmumpane, amenda taruda er nong bongorure. Yal keca du ngeda er urasin yuk, amenda nong bongorur ngeda er urasin yuk dinin, sun deiyo tenpua. 38 Yal keca dungepu bolongrum dinin, konum bolokmumpane, Allahdi, “Ayal keca yala yuma er nong cap, urasin capda ukupra, ukupra kunkamre,” teneamutopu Allahdi kareprepa, amendada bongopredi, nong yuk-yuk kurure. Jagungda, er nong yuk, pinas yuk, sumnye yuk, ware keca do yumada, Allahdi nong yuk-yuk kareretopu bongorure.

39 Ange utopu, gam kure keca yala-yala yuma peda, nong cap, urasin cap yuk-yuk kurure. Nimi nongda, sun urasin yuk kurure. Nimi gum dinin, yanedi tuai yanipra embaramre keca yumada, yan bal do, bisam do, kambing do, yuk yala keca do, sun nong cap, urasin cap, tu cap peda yuk-yuk kurure. Ukupmantoda ma yala kecada, sun tu yuk, mokon pumbon kure kecada, sun tu yuk kurure. 40 Aupu pepmasentopu, im deiki kure kecada, sun nong urasin yuk kurure. Tonda, tuai mutu deiki gam kure kecada, nong yuk kurure. Im deikinge yuk, tuainge urasin yuk kurure. Sun urasin telep kure ngeda yala yuk-yuk kurure. Kikiman utopu gume. 41 Ange utopu, ketengda, er urasin pio telep kuryada yuke. Warda, er urasin pio telep kuryada yuke. Kuru yumada, keteng cap, ware cap utopu gum dinin, sun urasin telep kuryada yuk-yuk kurure. Tonda, kuru weik akapmara cadi, sun kan-kan dinin, sun urasin telep kuryada, yuk-yuk kurure. Utotopu gume.

42 Uda, ange pepmasentopu, Allahdi gam bukra deipserepa, nun ukupu nong karepkamsere ngeda, pio urasin yuk kupra deipkamsere. Nimi tuai neng depmepepa, nun nong tu palisenungada, urasin yuk lyunangepu kurure. Dinino, deamepepane, amenda taru Allah gam bukra deipseredi, karepkamser nongda, pio men lyupmantongepu karepserepa, pio gam kunkamepe. 43 Depmepepa, nong tu palisenungada, lyurur keca cadi, mali kange doupra urasin malingepu palisenunge. Dinino, Allahdi gam bukra deipkamser taruda, nun nongda pio urasin telepngepu karepkamsere. Nun nong tu palisenungada, puto gum cadi, pu jeserepa, puto boun kure nongpu palisenunge. Dinino, Allahdi gam bukra deipseredi, ukupu karepkamser nongda, puto weiknge karepkamsere.

44 Nun nong tu palisenungada, tali tuai lyun bolpu palisenung dinino, Allahdi gam bukra deipseredi, karepkamser nongda, im deikingepu karepkamsere. Uda, tuai mutu kunup taruda, tali nimi nong, akwapser bol kunupe. Angetopu amenda taruda, gam bukeipkamser taruda, tek sisi im deiki nongpu karepserepa, gam kunkamepe.

45 Aupu pepmasenada, tali men pepsene. Gume, deiyoda ake. Allah upu sekaminge neitamaida, aupu ton akapmare. Ada,
‘Allahdi menmena ketekeipu ngebo Adamda, nimi ketekeipupa, gam kuramu.’ (Kejadian 2:7)

Dinino, amenda sirya taru Adam utopu dinin, butenenge doproipseu ngeboda, gam kuna deiyo keca kareserur ngebo Yesusda, im deiki ngebo kurure, tali tuai ngebo gume. 46 Ange deiki di kael kemnupe. Im deiki ngeda menmena men yaue. Tuai nimi nong kupu ngeda menmena ketekeipu. Nimi nong tali tuainge konum kuramu pangeda, amenda taruda, im deikinge dopra deipseupa, nun damai yaue. 47 Menmena Adam ketekeipu ngeboda, tuai mutu deiki kupu keca, tu bute dopra adeiki di, er nong ketekeipu. Amenda taru doproipseu ngebo, Adam utopu ngebo Yesusda, tuai keca di men ketekepra deipu dinin, erda im deiki konum gam kuramua di, nun damai yau.

48 Ange tep nengeda, tuai ban-ban yuma kunge nesala yumada, menmena ketekeipu ngebo Adam kuramutopu, tuai nengpu kununge. Dinino, im deiki di doproipseu ngebo kuretopu, sun im deiki kunge nesalada, er kuretopu kununge. 49 Ange utopu, Adamdi deipupa, dadeipdanen, yakaramyanen, nun nai yapudi deipseipa kupe neng peda, Adam kuramu nong cap, er urasin cap kuramutopu, nun peda ange utopu kunupe. Ange tep nengeda, im deiki di yau ngeboda, im deiki nong cap, urasin cap kupra kuretopu, amenda taru nun peda, er kure im deiki nong cap, er im deiki kure urasin cap yambulanun utopu kupra deipserepa, gam pio kunkamepe.

50 Atep, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Pio tek sisi upu pepkusene. Ada, Allah gam bukra deipseredi, akeca-keca yuma talepra, er cap kikiman kunkamep taru, im deiki keca karenkamserenge yumada, nun ukutaru tuai kuramep nong deiki dipu, tek sisi men doproptepe. Tonda, deprepa lyuramre keca di, lyuna gum, gam pio kunkamre kecada men doproptue. Atep, men lyupmanto nong cap, pio gam kuna deiyo keca cap karepseryopda, ange deiki dipapu im deiki welepmepedi, Allah cap kikiman gam pio kunkamepe.

51 Uda, sun moupra gekepso, ne kayapu. Allahdi pumun taru iniamu keca dinin, ukutaru konum katuai lap pepneupa, gekepsi upu ton pepkusene. Nun konum teka tenepmepu nesala kan-kan di, nun yuma men depkamepe. Dinino, nun teka tenenup nesala yumada, Allahdi nun urasin cap, nong cap, gam kunup keca yuma capda, urasin pio yuk kupra deipkamsere. 52 Urasin cap, nong cap yuknge kupra deipkamsere ngeda, perenglang pena pio menmena perenglang peramretopu, tonda asuru puplam perameptopu, sirik taru Allah er bung-bung pena, er sida terompet, lelim pepyopda, akeca pepre taru dipapu, nong yuknge kupra deipkamsere. Sika di gume, menmena adipapu urasin yuk kupra deipkamsere.

“Ukupkamsere,” pepmasenada, tali gume. Sirya taru terompet lelim ila di pepre pangeda, teka tenepi dinin, konum deami nesalada, Allahdi gam bukra deipredi, men lyupmanto nong, ukupunge karepkamre. Ukupre dingeda, nun teka tenepra, gam tupa kupe nesalada, ataru dipapu urasin cap, nong cap, kamo pio yuk, telepnge karepkamsere. 53 Deprepa, lyuramre kecada, adipapu depredi men lyupmantonge ketenepra karepserepa gam pio kunkamepe. Ukutaru depmanto keca yumada, amenda taru men depmantonge pio gam kunkamrengepu karepserepa, gam pio kunkamepe.

Ange tep nengeda, “Nun urasin cap, nong cap, kamo yuknge ketenepra karepkamsere,” pepsene. Angeda tali tep men pepsene. Tek upupu pepne. 54 Ayumada, nun teka tenenup nesala tep pepsene. Tuai kupe taruda, dena cap, lyuna cap kure nong kepman kunup dinin, amenda taruda, Allahdi dena cap, lyuna cap, men kupmantonge karepserepa, pio telep gam kunkamrenge dopropkamepe. Ange kupkamser taruda, depmanto keca yuma, men depmanto keca, gam pio kunkamrenge konum dopropmepe pangeda, ataruda, sun menop taru Allah upu neitam sekami upuda, nong kupkamre. Allah upu neitamai amenda taru kupkamrenge tep, sekami ngeda ake.
‘Allahdi dena deiyo kecada, konum gum kupra deipmare. Allahdi dena deiyo keca yumada, konum bisbisa kapra gawal dakmare.’ (Yesaya 25:8)
55 ‘Dena deiyo keca deiki di nun tep, kange di ton cap men bisbisa kapsetue. Ukuda dena deiyo keca deiki di men popsetue. Tonda, dena deiyo keca di, ton cap kange mun men keipsetue.’ (Hosea 13:14)

56 Nimi ban-ban yumadi, ‘Uo, amenda taru depkamepe’ tenen, kware weik kuprepa, kange mun kange doununge. Kange mun kange doupra kununga deiyoda, sun mali kuramenge keca tep, ‘Allah wenepseredi, popkamsere,’ tenena tep kware kununge. Ange utopu, sun mali kunge keca tep, depkunge taru kware weik kurura deiyoda, Allahdi, ‘Ukunkamrume, angeda men kunkamrume,’ pepra Allah upu neitamai sekami keca yuma tapra, yanitamnapu kunupa cadi, ‘Amem upu deiki di, upu lepsisikra bokeipkamsere’ tenen, kware weik kuserure.

57 Tali kunge nesaladi ukunung dinino, nun Allah tep teka tenenup nesala yumadi, Allah tep, “Telepe,” penupe. Deiyoda, Allah er Mi Sisa Yesus Kristusdi, nun yo pununa tep depu. Depka deiki di, nun tep lyepseudi, ateng kouamseu keca neitamai di loptapseue. Atep nengeda, nun Deiyo Ngebo apel dopseua deiki di, konum telep kupra deipseue. Nun malinge yuma, konum bisbisa kaipseudi, amalinge gum kupra deipseue. Ukupseua tep, kware men kuserur dinin, nun nai bo Allah tep, “Telepe,” pepra, er si eremnupe.

58 Ange tep nengeda, ne bicau tenesenedi, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Sun Korintus mutu nesala, kange bongtona pio gum dipapu, dimpeprappu kunkamrume. Ware keca do yuma, ikin kupserya deiki di, ‘Allah er upu tapmepepa, mali keca di, yuk bisi dubeserur’ tenen, tenimtona gum, pio kalekdana kunkamrume. Allah erpu moupra talepmumdi, kunkamrume. Sun kaele, nun deiyo ngebo Yesus cap dipru dukdongopra kupedi, er tep ikin pel donupa yumada, tek sisi nong kupkamre. Mesumpu men pel donupe. Angeda, konum kael kepruma cadi, ‘Ne nong cap, kange dipru tenenange cap yuma, Yesus deikipu deipnedi, Yesus er pelpu donkamne’ tenen, kange bongtona gum dipapu, pio pe deiprap kunkamrume. Ne Paulusdi pepmasene.