1 Corinthians 16

Yuk mutu teka tenepi nesala dinin, sun makuna tep, co bo bupra derina tep, pepu upu

1Ukuda, yuk upu ton pepkusene. Sundi ne tep, “Allah teka tenepi nesala, tali kankan kunge nesala kunge neng, sun makuna tep, co bo bupra deipmepu ngeda, ware kunkamep do?” pepra, asipetepnerumnge tep, pepkusene. Sun Galatia mutu kunge nesala, Allah teka tenenung nesala tep, ‘Ukupkamrume,’ pepra lap pepsitopu, sun Korintus mutu nesala peda, ange utopu kunkamrume. 2Ukupra ukunkamrume. Minggu-minggu yuma, sun Allah upu gekena tep bulupra wengmum tumi deiki di, sun yuk-yuk dinin, sun yumadi co bo akapseretopu, neitamai di bokra, ‘Yuk mutu teka tenepi nesala tep makupra karenkamep’ tenen, derinkamrume. Weika di dorore ngeboda, weika di karenkamre. Meteka dipu dorore ngeboda, meteka dipu karenkamre. Sun co bo akapseretopu bokra karenkamrum dinin, pio karenapu kunkamrume.

Ada, ne Paulusdi sun damai yanyopda, sundi, ‘Uo, Paulus yanmara cadi, nun adipapu co bo ware kupra bupkup do?’ tenen, ‘Kange mun kupserur,’ tenena tep pepsene. 3Co bo bulupra konum deiamumpane, ne amenda yanyopda, sundi wepra deipkamrum neng tep, aco bo dopra karerbana tep, lap pen surat seknedi, karepnyopda, anengdi sun bulupmarumu co bo cap, asurat cap dopra, Yerusalem mutu teka tenepidi, tali kankan kunge nesala tep, sun damai bengedi, karepkamenge.

4Amenda ne yanepa, upu talepmepedi, ‘E telep ngeda, Paulus cap, aneng capda, Yerusalem mutu kikiman karerbetenge,’ tenepmepyopda, sundi wepkamrum neng cap, ne cap, kikimanpu Yerusalem mutu benkamepe.

Paulusdi, Korintus mutu nesala tep, moropu upu

5Ne kayapu, yuk upu ton pepkusene. ‘Makedonia tara mutu peterep embenkamne,’ tenepsa tep, amutu neitamai yuma peterepra embanmanyanen, konum benyopda, amenda taru, sun damai Korintus mutu ton tamupra yankamne. 6Kapul men tenepsi dinin, sun damai konum yanyopda, ‘Nun kikiman mapkamep do, adipapu yuk mutu benkamne do?’ tenenkamne. Tonda, ware mutu do, ne amenda taru benkamne mutu bana tep, ‘Sun Korintus mutu nesaladi melipkameng’ tenen, ‘Bul ware yuma sun cap kikiman mapkamep do, gum do?’ tenen, tupa tenenune. 7Adipapu sun damai yatene dinin, ‘Aneng cap antapmepedi, adipapu kirikra yuk mutu benkamne’ tenen, men putanerure. Ange gume. ‘Sun cap, ne cap kikiman mapra, jen jepra, upu talepra weika di kunkamepe’ tenen, putanerure. Dinino, ange peda, nun Deiyo Ngebo Yesusdi, ‘Ange telepe,’ tenepnetuopda, ukunkamne. Gum dingeda gume. Er kange ja.

8Ukutaru Efesus mutu kununa cadi, apio kunmanyanen, Kaplemne Kalemna taru, er sida Pentakosta taru konum kupyopda, amutu tapra yuk mutu benkamne. Kapul men benkamnenge deiyoda pepkune. 9Ada, ne pene upu cap, ne kune keca cap tep, ‘Angeda nun songe’ tenen, yanipnengedi bisbisa kamterenenung nesala weik amutu kunung dinino, Allah upu peteremna tep, pel dona taru go ila telepnge, amutu tupa kwapmanera cadi, acapu ton cap weikanun mapkamne. Ada, ‘Peterepnepa, nesala weika di teka tenenkameng do?’ tenen, kunkamna tep pepsene.

10Nedi nun Deiyo Ngebo Yesus, er amutara kunedi, er pel dopra kuramnetopu, nun kabo Timotius peda utopu pel dopra kurura cadi, erdi sun kori, Korintus mutu yaryopda, sun cap kikiman kunkamrum taru yuma, telep kupra kikiman kunkamrume. Ada, ‘Er kwar kuprur’ tenen, sundi er tep buru karepra, “Telepe,” pepra, melipra kunkamrume.

11Atep, ware neng do yuma, ‘Angebo Timotiusda, nun song cadi, buru karepmepedi men napropkamepe’ tenen, tamna yaprume. Ada, ‘Er kwar dangna gum di, kange deiprap kunkamre’ tenen, pepsene. Sun cap kikiman kumumpane, er benkuredi, ketenepyopda, ‘Tamupra Paulus damai melipra betue’ tenen, sundi Timotius tep, “Telepe Paulus damai daberume,” pepra, bouna di melipmumdi, ne damai dokotepkamnerume. Yuk neng teka tenepipa, nun weit yapu utopu nesala, yuk neng cap, er Timotius cap, ne damai yankamnenga cadi, ‘Dan taru yankung do?’ tenen, ne dinapu kunune.

12Ukuda, nun kabo Apolos tep pepkusene. ‘Er cap, sun yuk neng, teka tenepi neng cap, sun Korintus mutu kikiman betenge’ tenen, ne puto di er Apolos tep pepsi dinino, ukutaru tep nengeda, erdi, “Gume, ne ukutaru men benkamne,” pepneu. Atep, amenda go kapre tarupu, erdi sun damai yankamsere. 13‘Mali kupnup’ tenen, kange moupra pio kalengdanapu kunkamrume. Allah tep teka tenerum keca cap, Allah er upu cap tep, ‘Tek do, telel do?’ tenena gum dipapu, pio dimpeprappu talepra kunkamrume. ‘Uo, ware kupkamseng do?’ tenen, kwar-kwar kuna gume. Balila deipra, puto dipu kunkamrume. 14Sun kunkamrum keca yuma neitamai di, yuk nesala tep bicau tenepra, ‘Makunkamepe’ tenena deiki dipu kunkamrume.

15Uda, ne kayapu, sunda Yesus tep teka tenepmumpa weite-du utopu kunupe. Sun kaele, sun Akaya tara kunge nesala kan-kan, Stefanus cap, er ati kunge nesala cap, Allah upu peterepmepupa, sun menmena di teka tenepye. Sun yuk neng yumada, amenda tarapu teka tenepi. Yuk neng dinin, Allah tep konum teka tenepipa, Allahdi, ‘Ne mawa’ tenen, wepra deipu nesala yuma tep, Stefanus cap, er ati kikiman kunge nesala capdi, ‘Anesala melimkamepe’ tenen, apelpu dopra kununge.

16Ukununga cadi, ne kayapu sun Korintus nesalao, puto di aupu ton pepsene. Stefanus cap, er ati kunge neng cap, uda, sun dumsisi kurameng utopu kunge nesaladi, ‘Yesus tep teka tenepi nesala makunkamep’ tenen, pel donge nesala yumada, sun amutara bukra, sun penge upu bouna di gekepra kunkamrume. Sun anengdi, ‘Allah er pelpu donkamepe’ tenen, tapakmengedi, nun cap pel puto di donupa tep, aupu pepmasene.

17Uda, Stefanus cap, Fortunatus cap, Akaikus cap ne damai yaipa, kikiman kuramepu taru yumada, ne kange deipra kunune. Ada, sun Korintus mutu nesala ne damai men yana kutumdi, men melipnetum dinin, sun cap, ne cap kikiman men kuramepu taruda, asi pepmasen nengdi, ne putaramneu keca tep karepra meliamneiya cadi, ne kange deiprap kunune. 18Anengdi ne tep, ne kange dipru tupa kwa dimamneipa, kange deipra kuramsi. Ange utopu, sun apepman nengpu, sundi sun Korintus nesala tep, utopu kuramsei. Aneng utopu neng yumada, pio telep neng cadi, gispal donkamrume.

Paulusdi asurat gawal dangna tep, pepu upu

19Uda, Asia tara teka tenepra kunge nesala yumadi, sun Korintus mutu kurum nesala tep, “Nun kayapu, telepe,” pedisenunge. Ange utopu, Akwila cap, er ner Piskila cap, nun yuma cap, Yesus cap dipru dukdongopra kikiman kunupa cadi, sundi, sun Korintus mutu kurum nesala tep kange deipra, “Telepe,” pedisererunge. Tonda, sun ati pum wekra Allah upu gekenge nesaladi, sun tep, “Telepe,” pedisenunge.

20Ne kunmanai Efesus mutu teka tenengedi, nun weit yapu utopu nesala, nimi pe, nerapu peda, sun yumadi, sun Korintus mutu kurum nesala tep, “Telepe,” pedisenunge. Nun teka tenenup nesala yumadi, yuk teka tenenge nesala tep antapmepedi, ‘Ne kabo sisa’ tenen, dipru karerserepa, gispal dopra muturamnuptopu, sun Korintus mutu kurum nesala peda, yuk teka tenenge nesala yuma tep ange utopu kunkamrume.

21Neda Paulus, ne buru dipu asurat gawal dangne upu, “Telepe,” pen upuda sekmasene. Yuk ngebodi gume. 22Ware neng do yuma, sundi nun Deiyo Ngebo Yesus tep, ‘Erda tali ngebo’ tenen, er deiki sun kange men derinung nesala tep nengeda, ne kangeda, ‘Allahdi sun wenepredi, uku jen ban dokoteptue’ tenen, pepsene. “Uo, ne deiyo ngebo Yesus, adipapu tamupra yarume,” pepne. 23Nun Deiyo Ngebo Yesus, bicau teneseredi, er kange dipapu melimsere keca, ‘Weika di karenkamser’ tenen, Allah morosenune.

24Sun cap, ne capdi, Yesus Kristus tep teka tenepmepupa, er cap, dipru dukdongopra kikiman kunupa neitamai di, sun tep, ne kange deipnedi, bicau tenesenune.

Acapu deipne. Ne Paulusdi akonum pepsene.