1Cor 2 | XteSC | STEP | Ne kayapu, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Nedi sun damai yasidi, Allah er kai telep upu, nimi lyemna upu dopra peteremamsisi taruda, ila lyom upu cap, ila kael kemna upu cap deiki di, men peteremamsisi. Nesala yuma gekepmanto upu deiki dipu peteremamsi. Ukuramsada, deiyo akapmare.

1 Corinthians 2

Paulusdi, Allah er Lek Sambala puto deiki di peteremamunge tep, pepu upu

1 Ne kayapu, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Nedi sun damai yasidi, Allah er kai telep upu, nimi lyemna upu dopra peteremamsisi taruda, ila lyom upu cap, ila kael kemna upu cap deiki di, men peteremamsisi. Nesala yuma gekepmanto upu deiki dipu peteremamsi. Ukuramsada, deiyo akapmare. 2 Ada, ne teneamsi kecada, ake. ‘Gume, Korintus mutu peteremne taru yumada, yuk keca kael keamsinge tenena gum di, tenpu ila mambul kecapu tenepra, peteremkamne,’ tenepsi. Ada, ‘Yesus Kristusdi nun lyemna tep, sengdin co deiki depseu upu, angepu, peteremkamne,’ tenepsi. Utenepsidi, aupupu peteremamsisi. 3 Sun damai yasi taruda, ila kael neng kurameng utopu gum dinin, kware kupneupa, ne puto bouna di kuna cap, kware kuna tep, moropsemna cap kuramneupa, peteremamsisi.

4 Nedi peteremamsi deiyo upu cap, peteremna taru lap peramsi upu capda, pio telep kupra puto di peterepnepa, ‘Ne pio telep upu pepne deiki di, sun adipapu teka tenenkameng’ tenen, peteremamsisi. Ada, sundi tamupra men pepmanto upu cap, ila kael kemna upu cap deiki di, men peteremamsisi. Ange gum dinin, ne peteremamsi taru neitamai di, nimi yuma gekepmanto upu peteremamsisi dinin, Allah er Lek Sambaladi, er puto deiki di, sun dipru neitamai pel doramseupa, sun moupra kael keamrume.

5 Ne peteremamsi taru neitamai di, jenek kupra peteremamsisipa, Allah er Lek Sambala, er puto deiki di pel dopseuada, deiyo akapmare. Ada, ‘Korintus mutu nesala teka tenenkamenge ngeda, nedi ila kael kemna upu deiki peterepnepa, adeiki dipu teka tenepnung’ tenen, kuramsi. Ange gum dinino, telep ngeda, ‘Allah erda, ila puto weik ngebo’ tenen, kael kepmengedi, ‘Er deiki dipapu teka tenenkameng’ tenen, nimi yuma kanam dipu gekepmanto upu deiki di peteremamsisi.

“Tek sisi ila kael kemna deiyo kecada, Allah er Lek Sambala dipu kareserure,” pepu upu

6 Uda, nun Allah upu peteremna deiyo nengdi, tek sisi ila kael kemna deiyo upu peteremnup dinino, ada sun dipru konum wisiprap, tek sisi Allah er bisipu embanung nesala gekemenge tarupu, ato upu deiki di peteremnupe. “Ila kael kemna deiyo upu,” pepmanada, ataru neitamai tali-tali kunge nesala cap, ataru neitamai akeca-keca yuma talepra, ila nimi deiyo nesala capdi, ‘E, aupuda, ila kael kemna upu,’ tenenung upu utopunge tep men pepsene. Ukutaruda, anesala ila neng kunung dinin, amenda taruda, Allahdi ato nesala yuma wenemna tep, bisbisa kapredi, sun penge upu cap, sun kunge keca cap, gum kupra deipkamre. Sun pe, sun tenenge keca peda nong men kupkamre. Allahdi sun yuma gum kupra deipredi gawal dakamre ja.

7 Gume, nundi ila kael kemna upu penupada, Allah pumun taru di iniamunge tep pepsene. Allahdi akeca-keca yuma kapul men ketekeiamu taru di, nun tep uteneamseu. ‘Aila kael kemna keca deiki di, ne cap, ne nyapu cap, dipru dukdongopra kuramepepane, ne pio telep kunetopu, sun peda utopu telep kupra deipnedi, ne cap kikiman kunkamenge. Ukupnyopda, anesala ereipkamne,’ Allahdi ange teneramseue.

8 Akunup taru neitamai, tuai mutu ila nimi deiyo nesala yumada, Allah er ila kael kemna deiyo upu moupra men gekenunge. Tonda, sunda moupra gekeramtenge teptoda, nun Deiyo Ngebo Yesus dopra, sengdin co deiki di men popmatenge. Yesusda, Allah er pio telep ila mambul ngebo kuretopu, katuai kemdiserur ngebo Yesus kure dinin, ataru nimi deiyo nengdi Yesus popya cadi, nun kaele. Anengdi, Allah er ila kael kemna deiyo upu moupra men gekeramidi, men kael keami.

9 Sun moupra men kael keami dinino, Allah er upu lap peramu ngebo, nabi Yesayadi sekeiamu upuda uperure.
‘Allahdi upeipu. “Ne tep sun kange ne deiki derinenge nesala tep, ‘Pio telep keca karenkamne’ tenen, konum keteneipsi kecada, sun men teneptenge. Akecada ware nesala do yuma, sun asuru di men dirami. Akeca tep yuk neng men lap peramipa, sun amul di men gekerami. Tonda, sun pe kange tenena deiki di men tenipmanto keca cadi, men tenerami,” Allahdi peipu.’ Ange yumada nedi ketenepra deipsipa, nabi Yesayadi pepu. (Yesaya 64:4)

10 Yesayadi aupu sekamu dinino, ukutaruda, Allahdi peipupa, Allah er Lek Sambaladi, nun dipruai pel doserya deiki di, katuai kemdiserure. Ware keca do yuma, uda, Allah erdi pumun taru inimau keca pe, er pedipapu tenere keca peda, Allah er Lek Sambaladi, akeca yuma tenepra kael kemrurdi, peteremserure. 11 Ware ngebodi, yuk ngebo tep, angebo er kange dipru neitamai tenerur keca kael keptu do? Gume, ange men kupmanto. Akeca tenere ngebo, erpuda er kange dipru neitamai tenere keca kael kemrure. Ange utopu, Allah er Lek Sambala dipu, Allah er tenere keca kael kemrure. Nimi yumadi men kael keptepe.

12 Sun teka tenena gum di, tali-tali kunge nesala tenenge kecada, nun teka tenenup nesaladi, men talenupe. Sun pe kange dipru deiki tenepmengedi, talepra kunge ngeda, pio yuke. Ada, Allahdi nun tep, bicau tenepseudi, er Lek Sambala karepseupa, dopropmupke. Ange peda mesum tep gume. Ada, Allahdi tali kareserur keca, pio telep keca yuma, ‘Betapra kael kemkameng’ tenen, er Lek Sambala karepseue.

13 Allahdi nun tep, tali kareserur keca yuma tep, lap pepra peteremnup taru yumada, tali nimidi ila kael kemna upu peteremenge nge deiki di men penupe. Ange gum dinin, Allah er Lek Sambaladi, er upu peteremserepa, nun kange dipru neitamai gekepmepedi, aupu deiki dipapu, Allah er Lek Sambala konum dopropi nesala tep, lap pepra peteremnupe. 14 Ware ngebo do yuma, teka tenena gum di, Allah er Lek Sambala kapul men dopropu ngebodi, Allah er Lek Sambaladi pesere upu yuma tep, ‘Aupuda tali upu. Nong men kupkamre upu,’ tenepredi, aupu moupra men gekeptue.

Ange tep nengeda, aupu gekepra men talerure. Aupuda, Allah er Lek Sambaladi, nun dipru pel doserya deiki dipapu moupra gekenupa cadi, Allah er Lek Sambala kapul men dopropu ngeboda, Allah er Lek Sambaladi pesere upu men gekeptue. Ange tep nengeda, Allah er Lek Sambaladi pesere upu yumada, men gekepredi, men dororure.

15 Ware ngebo do yuma, teka tenepupa, Allah er Lek Sambaladi konum talerur ngeboda, angebodi akeca-keca yuma tep, tenipetepredi, ‘Telepnge ake, malinge ake’ tenen, upu bokra deiptue. Ato ngebodi ukuptu dinino, yuk nesalada, sun teka tenena gum, yuk tali kunge nesalada, akeca yuma tep nengeda, moupra men teneptengedi, upu men bokra deiptenge. Tonda moupra men kael keptenge. Deiyoda, Allah er Lek Sambaladi sun dipru men talerura tep, nundi peteremnup upu, moupra men kael keptenge pepsene. 16 Angeda, mesum tep men pepsene. Nabi Yesayadi sekeiamu upu neitamai deiyo akapmare. Aupuda ake.
‘Ware ngebodi, Allah er kange dipru neitamai tenerur kecada, konum kael keamtudi, Allah tep, “Ange ukupkurum, angeda men kupkurum,” peptu do? Gume, Angeda men kupmanto.’ (Yesaya 40:13)

Ange tep nengeda, teka tenena gum di, tali kunge nesalada, Allah er Lek Sambaladi peteremserur upu, men kael keptenge dinin, nun teka tenepmepupa, Allah er Lek Sambaladi nun kange dipru taleserur nesalada, akeca moupra kael keptepe. Deiyoda, nun Allah upu peteremna nengda, Allah er Lek Sambaladi nun dipruai pel doserya deiki di, Kristus tenere kecada, nun peda utopu tenenupe. Paulusdi pepu.