1 Corinthians 3

Paulusdi Korintus mutu teka tenerami nesalada, dipru wilipra bongdidaraminge tep, pepu upu

1Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Sun mutu peteremamsisi taru neitamaida, ‘Allah er Lek Sambala konum taleamupa, dipru konum wisiramu nesala kununge’ tenen, men peteremamsetene. Ataruda, tali tuai kecapu tenepra talenung nesala utopu kuramruma tep, nong neitamai ngeda men gekepmanto nesala kuramrume. Sunda, Kristus konum teka teneamrum dinino, milo nyapu tenenge utopu tenepra kuramrume. Atep, ne cap kuramepu taru neitamaida, ikin upuda, men peteremamsetene. 2Ukupmantoda, sun nin yapudi, sun nyapu tu yala keca kapul men jepmanto taru, moum teyungpu kareamengtopu, ataruda, pio neitamai upu gum dinin, yambul kanam upu, deiki-deiki ngepu peteremamsisi. Pumun tarupu gume, ukutaru peda, sun dipru kapul wisipseua tep, neitamai upu kapul men gekeptume.

3Angeda mesum tep men pepsene. Deiyoda, sunda, teka tenena gum, tali tuai kecapu tenenge nesala utopu tupa kurume. Sun kan-kan di, yu kuprepa, upu deiki pangdana cap, uda, ‘Nun pe tara nesalada telepe, sun ortara nesalada, mali’ tenen, dipru wilimdana cap, tupa kudidarume. Ukuruma cadi, tali teka tenena gum nesala utopu kurum do, gum do, pepsene. Ukumum taruda, teka tenena gum, tali-tali kunge nesala kuramengtopu kurum do, gum do?

4Gume, sun kan-kan dinin, bon ton di, “Neda Paulus, er upupu gekepra dombanuna cadi, neda telep ngebo,” peprepa, yuk ngebodi, “Ukurum dinino, nepuda, Apolos er upupu gekepra dombanuna tep, tek sisi nepuda telep ngebo kunune,” perure. Ukuruma cadi, tenipetepso. Ukupra tenepra pedarum taruda, tali teka tenena gum nesala utopu kurum do, gum do?

5Aupu utopu pepra, pangdamum dinino, Apolosda, wareto ila mambul ngebo kuredi, mambul upu perepa, utenepra perum do? Tonda, ne Paulusda, wareto ila mambul ngebo kunepa, utenepra perum do? Gume. Nun buteneda, tali pel melimna nengpu, Allah er amutara pel don nengpu kunume. Allahdi, nun butene tep, ‘Ukupra pel donkamrenge,’ teneamseu utopu, nun butene yuk-yuk dinin, peteremsenumupa, teka teneramrume. 6‘Yal keca bongopkamre’ tenen, bolongamengtopu, nedi menmena Allah upu gonga kepra peteremamsisi. Ukuramsi pangeda, wa deiyo nesaladi, ‘Yal keca pakredi nepkamre’ tenen, bolongameng keca damai me gwepra dingdongoramengtopu, Apolosdi amenda dukdongopra, Allah upu peteremamseu. Ukupra pel doramnemu dinino, Allah er puto deiki dipapu, abolongamnumu keca pakra bongopudi nepke. Bolongamnumu keca nepudi, du moupra wisipu. Akeca yuma deiyo ngeboda, Allah er pua, nun butene gume.

7Ange tep nengeda, yal keca bolongamre ngebo pe, me gwepra dingdongoramre ngebo peda, sun tep, “Angeboda, ila mambul ngebo. Er pel dore ngeda, ila mambule,” pepra sun si men ereptepe. Tek sisi ila mambul ngeboda, ‘Akeca-keca yuma pakredi, nepkamre’ tenen, puto kemdirur ngebo, Allah er tenpua. Yuk neng ton gume. 8Yal keca bolongamre ngebo cap, me gwepra dingdongoramre ngebo cap, sundi, ‘Nong kupkamre’ tenen, pel dona deiyoda tenpungepu tenererunge. Tonda, sun butene yuk-yuk pel dorenge pangeda, sun pel yuk-yuk dorengetopu, Allahdi sun menenga keca yuk-yuk bokra kareprepa, dopropkamrenge.

9Sun Korintus mutu nesalada, Allah er wa bun utopu kurume. Tonda, sunda Allah er ati utopu kurume. Sun Korintus mutu kurum nesala ne, nenge men kurume. Angetopu Apolos, ernge men kurume. Ne cap, Apolos capda, Allah er amutara pel melimna nengpu kunume. Atep, ne cap, Apolos cap, kikiman pel melipra donume.

10Uda, ukupmanto upu deiki di, ati dona utopunge ton pepkusene. Allahdi ne tep, ‘Ne pel donkamner’ tenen, pel dona deiyo keca, er puto tali karepneua deiki di, ati dona ila kael nengdi, ati ayumna co pio telepnge ingamengtopu, Allah upu peteremna gonga kemna tep, Allah upu peteremamsisi. ‘Sun teka tenepkamrum’ tenen, ati ayumna ingamenga utopunge, pel doramsipane, amendada, adeiki di yuk ngebo ton, ati nong doramenga utopu, ukutaru pel doredi, peteremserure. Dinino, apel-apel dona neng yumada, ‘Mankau kange di, mali pel dopnup’ tenen, sun pedi sun pe tep, adipapu pio moupra didankamenge. Ada tali tep men pepsene.

11Deiyoda, Allahdi peipupa, ati ayumna co utopunge konum iksa cadi, yuk nesala yumadi, yuk ayumna co men iktenge. Ukupmanto upu deiki ayumna co pepman upu nongda, Allahdi tek sisinge keteneipu ngeda, ayumna co utopu ngeda, tenpupu kurure, ada Yesus Kristus er pua. 12Ati nong domenge taruda, ton nengdi, pio kunkamre keca, gat keca emas do, perak do, urasin pio telep gel do, kunumna weik keca di telep ati donunge. Ton neng dingeda, menmena gum kupkamre keca, co do, mutmuta do, mesa bo do, ayambul keca di donunge.

13Ukutaruda, “Angeda telepe. Angeda mali,” tenengetopu pel donung dinin, ukutaruda, ‘Angeda nong kupkamre, angeda tali keca pua,’ tenen, adipapu men peptepe. Dinino, Yesus tamupra yaredi, nesala yuma tep, upu bokeipkamre taruda, akeca-keca yuma tep, jenek keipkamsere. Dirin di, kunukmaryai katuai kemamretopu, Allahdi upu bokra kupeteseredi, “Malinge ake, telepnge ake,” pepra, jenek keipkamsere. Nimi yumadi doramenge pel nong tep, ‘Telepnge dan do, malinge dan do?’ tenen, Allah er uku bu deiki di kurpetenkamsere.

14Allah er uku bu deiki di, nimi yuma sun doramenge pel kupeteprepane, uku bu deiki di apel nong jepredi, gawal dangna gum, tupa telep kupyopda, Allahdi aneng tep sun menenga keca kareprepa, dopropkamenge. 15Allah er uku bu deiki di, sun pel doramenge keca kupeteprepa, uku bu di apel nong keca jepropredi, gawal dakrepa gum kupyopda, sun menenga keca gum kupkamre. Dinino, apel don neng sun nongpuda, Allahdi lyepkamre.

Lyepkamre dinin, ukupmantoda, uku bu di nimi ati jerepane, ‘Uku jepserur’ tenen, ati pum di sepdaro uku bu neitamai di wengepra, bura tara baramengtopu, mali pel donge nesala amenda taru angetopu kunkamenge.

16Ne kayapu, yuk upu ton pepkusene. Sun moupra men tenipmarumdi, men kael kepmarum do? Allah er Lek Sambalada, sun dipru neitam kurura cadi, sunda Allah er telep lek ati utopu kurume. 17Ware ngebodi do yuma, er nong sisa dinin, ada Allah er ati tep, mali kudirepa, er nong mali kupyopda, Allahdi angebo tep, wenepra poptapkamre. Ada tali tep gume. Deiyoda, sun nongda, Allah er ati utopu kurura cadi, sun nongda, pio mambule. Allahdi nun tep, ‘Ne mawa’ tenen, konum wepra deiamseu. Ukupmanto upu deiki di, “Nunda Allah er ati kunupe,” pepmasenada, tek sisi aupu er nongda, sun teka tenerum nesala, sun kange dipru cap, sun nong cap tep pepsene. Ange tep nengeda, sun mali kudidana yapso. Kange moupkamrume.

18– 19Ukutaru tali nimidi, ‘Uo aupuda, ila kael upu. Ila mambul upu,’ tenenge kecada, Allah er kangeda, ‘Akeca yumada, tali keca pua,’ tenerure. Ne kayapu, sun pe kurum keca tep, mok upu pepdamumdi, teka men tenenkamrume. Ware ngebo do yuma, ukutaru teka tenena gum, ila kael nesaladi kael keamenge keca tep nengeda, akeca kael keprumdi, ‘Neda ila kael ngebo konum kunune,’ tenepra kurum ngeboda, kange moupkurume. Ataruda, teka tenena gum nesaladi, ‘Uo, angeda ila mambule. Akecada, ila kael kemna kecada ake,’ tenengedi, eremenge keca yumada, Allah er kangeda, ‘Akeca yumada, tali keca pua. Akeca yumada, nong men kupredi, gum kupkamre,’ tenerure.

Atep nengeda, ware ngebo do yuma, sun teka tenena gum, tali nesaladi, ‘Akecada ila mambule,’ tenenge keca tep taprepa, tali nengdi er tep, ‘Angeboda walwal ngebo,’ tenepmengedi, pepmenga peda, ada mambul gume. Allahdi, tali tuai keca tamre ngebo tep, ‘Ne kangeda, erda ila kael ngebo,’ tenerure. Allahdi angebo tep, ‘Telepe,’ tenepyopda, ada ila mambule.

Ange utopu, Allah upu neitamai di aupu ton seki.
‘Teka tenena gum nesala, akeca-keca yuma kael keamenge nesalada, ‘Nunda, ila kael neng,’ tenedanung dinin, teneramenga neitamai di, kapang mankau di pena pumbon wekrepa youramretopu, Allahdi aneng tep wenepkamre. Ada, sun ila kael keami keca deiki di, mawa di kuramenge keca tep, wenepkamre.’ (Ayub 5:13)

20Tonda, Allah upu neitamai di aupu ton sekami.
‘Allah er kaele. Teka tenena gum nesaladi, sun ila kael kemna deiki di, tenenge kecada, tek sisi tali keca pua. Nong men kupredi, gum kupkamre.’ (Mazmur 94:11)

21Ange tep nengeda, ne Paulusdi, sun Korintus mutu nesala tep upepsene. Nimi deiyo neng si erepra men gemenkamrume. Tonda, nimidi kael kemengedi, pel doramenge keca cap tep, ton cap men gemenkamrume. Ware yala keca do yuma, akeca-keca yumada, Allahdi nun makuna tep, kareserure. Ayumada, sun keca pua. 22Uda, ne Paulus do, Apolos do, Peterus do, tuai mutu neitamai kure keca do, gam kuna deiyo keca do, dena do, uda, ukutaru kusere keca yuma cap, amenda taru kunkamre keca yuma cap, Allahdi sun melimna tep tali kareserure. Ayumada, sun keca pua.

23“Akeca-keca yumada, sun nge pua,” pepmasenada, mesum men pepsene. Deiyoda, sunda Yesus Kristus cap, dipru dukdongopra kurumupa, erdi sun tep taleserure. Yesus Kristusda, Allahdi talerure. Allahda akeca-keca yuma deiki tara kuredi, talerure. Erda sun ila deiyo ngebo kuredi taleserura cadi, “Akeca-keca yumada, sun keca pua,” pepmasene.