1 Corinthians 4

“Nimidi, yuk neng tep, ‘Angebo telepe, angebo mali,’ pepra, upu bongdidana meme,” pepu upu

1Uda, nimi yumadi, nun Allah upu peteremna deiyo neng tep, tenenkamserum kecada, pepkusene. Ada, ‘Anengda, Kristus er pel melimna neng kungedi, Allah iniamu upu dinin, ukutaru jenek pesere upu talepra peteremna deiyo neng kusenunge,’ tenenkamserume. 2Uda, ‘Ila mambul keca talepra, deiyo neng kunkameng’ tenen, pel dona deiyo keca karepmengepa, apel deiyo nengdi, ila mambul kange doupra kunkameng kecada, pepkusene.

Ada, mali kuna cap, pel tamna cap gum dipapu, pio teka tenepmanto nesalapu kunkamenge. Sundi, ‘Ukunkamepe,’ pengetopu, ange tamna gum di, tek sisi kunkamenge. Sun pel don taru yumada, ila mambul kange tenepra kunkamengada, ne Paulusdi konum pepmasene.

3Ange pepmasen dinino, ne Paulus tep nengeda, sun Korintus mutu nesaladi do, uda, yuk upu lepsisikra bongdina deiyo nesaladi do yuma, ‘E, Paulusda, telep kure. Tonda, Paulusda mali kurure,’ pepra upu lepsisikra bokeipnetuma peda, nedi, ‘Uo, angeda, mambule,’ men tenenune. ‘Uo, upu lepsisikra bokeipkamneng do?’ tenen, mambul kange men dounune. Angepu gum. Tonda, ne pedi, ne pe tep, ‘Ange telep, ange mali,’ tenepra, upu lepsisikra men bongdidanune.

4Ne kune keca yuma tep nengeda, konum tenipterepnedi, ‘Ange yuma telepe pua’ tenen, ne kange dipru ikin men kunerure. ‘Mali keca men kwapnerya deiki di, teleppu kunune,’ tenen, ikin kange men dounune. Dinino, ne tenenuna deiki dipapu, ‘Ne Paulusda, pio telep ngebo’ tenen, men pepdatene. Nedi gume, Yesus nun Deiyo Ngebo dipapu, “Ange telepe, angeda mali,” pepra upu lepsisikra bokeipkamnere. Upu lepsisikra bongdina deiyo ngeboda, er pua. 5Ange tep nengeda, nun yuma tep upepsene. Allahdi, ‘Yesus tamupra tuai kwerepkamra tep, ataru ake’ tenen, wepra deipu tumi kapul men kupmare taru yuma neitamai di, ware kun keca do yuma tep, “Ange telepe, ange mali,” pepra, upu lepsisikra men bokeipkamrume. Ange yuma dakwapmarepane, ‘Nun Deiyo Ngebo Yesus dan taru yankamre do?’ tenen, dinapu kunkamrume. Er yaryopda, er dipu upu bokeipkamsere.

Yesus tamupra yaryopda, akeca-keca yuma tep, upu lepsisikra bokeipkamsere. Ware keca do yuma, kunungnai inimamenge keca yumada, dirinai deipra jenek kupra deipkamre. Nimi sun dipru neitamai di, ‘Ukupkune, ukupkune’ tenen, deiyo keca inimameng keca yumada, katuai kupra deipkamsere. Tenpunge peda men inipmanto. Ayuma katuai kupkamre. Ukupra konum katuai kupra deipsere pangeda, ataru dipapu, Allahdi nimi yuma tep, sun kuramenge keca akwapretopu, upu lepsisikra bokeipkamsere. Telep kun keca tep nengeda, “Telepe,” pepkamsere. Mali kun keca tep nengeda, “Mali,” pepra wenepkamsere.

6Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Ukupu pepmasen upu yumada, ‘Sun Korintus mutu nesala kael kepkamrum’ tenen, asurat neitamai di, ‘Ne Paulus cap, Apolos cap tep, ukupmanto neng kunume,’ pepra sekeipmasene. Ada, nun peteremnuma deiki di, ‘Allah upu deiki peserenge upuda, deiyo ake,’ tenepra kael kepkurume. Nun mutu nengdi pepnup upuda ake.
‘Allah er upu deiki di peseretopu kunkamrume. Sun tenena deiki dipapu, yuk upu cap dukdongopra tapangdona gume.’

Aupu peseretopu kurum dingeda, yuk neng tep, “E, angebo ila mambul dinino, angeboda tali ngebo,” pepra ton ngebo ereprap, ton ngebo kwerepra men kemkamrume. 7“Nimi si men eremdinkamrume,” pepmasenada, tali tep men pepsene. Deiyo akwapmare ngeda pepkusene.

Uda, nimi yuma pio utotopu men kunung dinino, pel dona deiyo keca yuk-yuk kareprepa, ‘Sun kanam dipu pel donkamengada, yala yuk-yuk kunkamre’ tenen, ketekeipseu ngeboda, ware ngebodi do? Sun pedipapu gume. Ange utopu, sun talerum keca yumada, erdi men karepseupa, sun pedipapu doproprum do? Sun deiki dipapu akeca yuma kwapseu do? Sun talerum keca yuma cap, sun kumum keca yuma cap, Allah er deiki dipapu karepseupa, dopropruma cadi, ‘Nun deiki dipu kuserure,’ tenemumdi, gemena cap, sal nong-nong kuna cap kumum ngeda, warya tep do?

8Uda sundi, sun pe tep tenedarum keca pepkusene. Sundi, ‘Gume, nunda pio telep nesala konum kunupe. Allah er kure keca kael kemna tep, nun putapsetu keca yumada, konum akwapmasera tep, nunda ila kael nesala konum kunupe. Sun Paulus cap, Apolos cap, tali nengpu kurerunge,’ teneserume. Sundi sun pe tep, ‘Nunpuda, ila nimi deiyo neng Raja neng utopu konum kunupa cadi, sun Rasul nengda dakwapye,’ tenerumdi, dipru eremdarume.

Ukupra sun kange erepra tenedarum dinino, tek sisi sundi tenedarumtopu men kurume. Uo, sunda, tek sisi Allah er talenkamserai neitamai di, ila nimi deiyo neng kutumpa, ‘Nun cap, sun cap, akeca-keca yuma talepra kutepe’ tenen, putanerure. Dinino, angeda kapula.

9Ne kangeda, Allahdi, ‘Ne upu dopra peterembana tep, gonga kemna neng kunkameng’ tenen, wepra deiamseu neng, nun Rasul neng tep kupseu ngeda pepkusene. Ada, nimi podaramenge taru, ton tara nengdi, yuk mutu neng tep popbisipmengedi, bisbisa kamengepane, popra si amenge nengdi, popbisiamenge neng ton dopra, bisi neitamai bongopra, kael supra auturamengtopu, Allahdi nun peteremna deiyo neng tep, angetopu kupra deipseue. Ada amenda, tali poptapkameng nesala cadi, ‘Anengda tali neng, sunda mambul pio gume,’ teneramengtopu, Allahdi nun Rasul neng tep benbenepseupa, tali teka tenena gum nengdi yanitamnapu mali tenesenunge. Akeca-keca yuma kusere keca yumada, nimi tuai nesala cap, Allah er im deiki melimna neng malaikat cap, sun yumadi nun tep disengedi, ‘Anengda mambul gume’ tenen, kaukemsenunge. Nunda, yuk nengdi auturameng nesala utopu kunupe.

10Nun Allah upu peteremna deiyo nengdi, Kristus er pel dopepa, yuk neng yumadi nun tep, ‘Sunda tali walwal nengpu kununge,’ tenesenung. Ukupra tenesenung dinino, sun Korintus mutu nesala pedi sun pe tep, ‘Nunda Kristus er nyapu kunupa cadi, nunda ila kael nesala kunupe,’ tenen, sun kange eremdarume. Yuk nesaladi nun peteremna deiyo neng tep, ‘Sunda, puto boun neng, deiyo gum neng kununge,’ tenesenung dinino, sun pedi sun pe tep, ‘Nunda ila puto nesala kunupe,’ tenedarume. Yuk nengdi nun tep, “Anengda mali neng, nun songe,” pesenung dinin, sun Korintus mutu nesala tenedarum ngeda, ‘Nunda mambul nesala kunupa cadi, yuk nengdi gispal dosengedi, nun si eremkamsenge,’ tenedarume.

11Nun Allah upu peteremna deiyo nengda, pumun taru dadi, ukutaru peda, jen cap, me cap putanapu kuserepa, mesumpu kunupe. Nun gwelertamne opkalpu kenengnupe. Yuk nesaladi nun tep yu kuprepa, ikin keca nun nong deiki derisenunge. Nun pe ati men kwapsera cadi, nimi bo neng utopu kunupe. Ukunupa cadi, ke tarupu akati-akati amapna ormapna kemnupe.

12Nun pe buru deiki dipu, ikin pel dopra kupepane, beipye taserepa puto bounpu kunupe. Yuk nesaladi, nun tep, mali upu pepra, ikin keca nun nong deiki deipsengopda, nundi tamupra anesala tep, telep upupu bouna di penupe. Allah er pel domepya tep nengeda, yuk nesaladi, ‘Anengda nun song,’ tenepra, ikin keca weik nun nong deiki derisenung dinin, nundi tamupra kwang dangna gum dipapu, tali dimpeprappu, kunkamepe. Tupa pel donupe.

13Yuk nesaladi, nun Rasul neng tep utenenunge. ‘Nimi yumadi sun Rasul nengda, mali neng tenepkameng’ tenen, nun tep mok upu deiki di luludisenga peda, nundi sun tep tamupra, bouna di telep upupu penupe. Sun tep tamupra yu di men penupe. Pumun taru dadi, ukutaru peda, yuk nesaladi nun tep, “Gume, sun Allah upu peteremna nengda, mambul pio gume. Sunda, nun jen keca bambama cap, jen keca sirik cap, dokotemnupa utopu kununge. Sunda taliyapu kununge,” pepra yanitamsenunge.

14Uda, ne kayapu, sunda bicau tenesenedi, ne nyapu utopu tenesenuna cadi, aupu pepra sekeipmasenada, ‘Sun Korintus mutu nesala ali kunkameng’ tenen, men seksene. Ange gum dinin, aupu gekeprumdi, ‘Mali kunup do?’ tenen, kange moupkamruma tep, aupu sekeipmasene. 15Gume, ne kayapu, Kristus cap dipru dukdongopra kunkamrum taru neitamaida, sun peteremna deiyo neng denge pio weik sepuluh ribu (10.000) neng kuptenge dinin, nedi Allah er kai telep upu dopra, gonga kepra, peteremamsisipa, teka teneamruma cadi, Yesus Kristus teka tenepra kikiman kunupa neitamai di, ne tenpupuda sun nai bo utopu konum kunune. Ne peterepsisa deiki di teka tenepruma tep pepne. 16Ange tep nengeda, “Ne kunetopu, sun peda utopu kunkamrume. Yuk ton gume,” puto di pepra deipsene. Ne Paulusdi pepsene.

17‘Ne kunetopu sun peda utopu kunkamrume,’ tenenuna tep nengeda, nedi Timotius dopra, sun damai dokotepkusene. Timotiusda, pio kange deipra bicau tenenuna tep, er tep, ne mi utopu tenenune. Nun Deiyo Ngebo Yesus er pel dona tep nengeda, pio tamna gum dipapu, nimi men kupmanto keca, kunupsek pen pel dore ngebo kurure. ‘Lumdongona gum, angepu kunkameng’ tenen, Timotiusdi sun tep peteremyankamsere. Ada, ne Paulus cap, Yesus Kristus cap, dipru dukdongopra pio dumsisipu kune keca yumada, ka di tamupra ton cap peteremserepa, kael kemkamrume. Ne kune keca cap, nedi ban-ban yuma teka tenepra kunge nesala tep peteremne upu capda, amsepu kurure. Timotiusdi, sun damai yaryopda, aupupu peteremkamsere.

18Uda, sun Korintus mutu nesala kan-kan dinin, ton neng dingeda, ‘Paulusda, nun damai men diryankamsere’ tenen, ila kange erepra gemenunge. 19Ukunung dinino, nun Deiyo Ngebo Yesusdi, ‘Telepe dabetue,’ tenepnetuopda, tek sisi sun damai menmena diryankamsene. Sun damai yatenyopda, sun gemenge nesala penge upu kael kepkamne. Angepu gum dinin, ‘Anengda, Allah er Lek Sambaladi puto karepupa, puto nesala kunung do, tali nesalapu kunung do?’ tenen, dipetepnedi, kael kepkamne.

20Ange pepmasenada, mesum tep gume. Deiyoda, Allahdi lyepseredi, taleserepa, er cap kikiman kunupa neitamaida, tali upu deiki di pertamamenge keca tep, ‘Uo, angeda mambule,’ men tenenupe. Ange gum dinin, ‘Allah er Lek Sambaladi, er puto kareserepa, er puto di kuramepe kecada, angepuda mambule,’ tenenupe. 21Ange tep nengeda, sun putapsere ngeda, dan nge do? Yu kupnerepa, wenepsenedi, balana dopra poryankamsen do? Agum dingeda, bicau tenepsenedi, kange deipra bouna dipu yankamsen do? Sundi, ‘Telepnge dan do?’ tenen, wepkamrume. Ne Paulusdi pepsene.