1Cor 5 | XteSC | STEP | Ukuda yuk upu ton pepkusene. Uo, ne kayapu, sun yuk nengdi pepneipa, gekepsi ngeda, pio mali upu pepnei. Ada, “Gume, sun Korintus mutu teka tenepi nesala kan-kan dinin, tenpu ngebodi ner tali nyaku ngeda, sun teka men tenenung nesala peda ange utopu men kununge. Angebodi, er nai sisa di domu ner upula nyaku,” pepneipa, gekepsi.

1 Corinthians 5

“Ner tali nyangre ngeboda, sun cap kikiman kuna gume. Sun mepropmumdi, angebo dopra, sun kan-kan neitamai di enepra dokoteprume,” pepu upu

1 Ukuda yuk upu ton pepkusene. Uo, ne kayapu, sun yuk nengdi pepneipa, gekepsi ngeda, pio mali upu pepnei. Ada, “Gume, sun Korintus mutu teka tenepi nesala kan-kan dinin, tenpu ngebodi ner tali nyaku ngeda, sun teka men tenenung nesala peda ange utopu men kununge. Angebodi, er nai sisa di domu ner upula nyaku,” pepneipa, gekepsi. 2 Uo, angeda, akapmar dinino, sunda ila kange erepra gemenapu kurume. Sun ton moupra men tenerum do? Telep ngeda, sundi, ‘Uo’ tenepra, dipru engepra, er nai sisa domu ner tali nyaku ngebo dopra, sun kan-kan neitamai di bura dokoteptumtoda, angepu telepe. Ange men kupmumyopda, tupa mali kurume.

3 Uda, ne nongda, sun cap tek sisi kikiman men kunmap dinino, ne kangeda, ne sambala cap, ne kange tenenange capda, sun cap kikiman kunupe. Sun yuma ne cap kikiman buktepedi, “Angebodi kunmarada, pio mali,” peprap, upu lepsisikra bokeiptenetopu, konum pepsene. Erda, pio mali kupke, pepsene. 4 Mali kupka tep, amendada, nun Deiyo Ngebo Yesus Kristus er si cap, er puto cap deiki buluprumdi, ne cap kikiman buktepedi, nedi pepsetenetopu, angebo dopra, ‘Kain Jen Ngebodi wenepkamre’ tenen, karepkurume. 5 Ada, ‘Kain Jen Ngebodi angebo talepra, er nong deiki pio ikin keca deiamrepane, er nong cap, er mali kure keca yuma cap, kulapra poptapkamre dinin, nun Deiyo Ngebo Yesus tamupra yankamre taru di, er sambalapuda, lyepra dopropkamre’ tenen, angebo dopra, Kain Jen Ngebo karepkurume, pepsene. Ne Paulusdi pepsene.

6 Amali kupu ngebo cap, sun cap kikiman tupa kurum taruda, sundi, ‘Nunda, Allah er nyapu kunupe’ tenen, kange erepra gemerum ngeda, mali kurume. Uda, domona upu pepkusene. Sun roti jen keca dapmenge nengdi, ‘Roti kwaneng dapkup’ tenen, roti kwaneng nena deiyo keca meteka dipu, roti bun dongonung dinin, roti bun neitamai yuma embaredi, aroti kwaneng yuma ila di nerure. Ange utopu, sun teka tenerum nesala kan-kan di, tenpu mali kurur ngebo tupa akuramrepane, sun yumadi, “Jo dakwapye,” peprum pangeda, amendada, er mali kuramre keca deiki di, yuk neng yuma tep, mali kudinkamsere. Angebo cap, sun cap kikimanpu kuprumpane, er mali kurura deiki di, sun telep kurum neng peda, utopu mali kudinkamsere. Ukupseryopda, sun peda mali kunkamrume.

7 Pumun taru sun Yahudi yala nesaladi, ‘Kaplemne Kalemna jepkamep’ tenen, pumun keteneipmai roti kwaneng nena deiyo keca yuma bura dokotepidi, nena gum roti ukupunge dapra jepitopu, kunkamrume. Aupu er nong neitamai ngeda, sun teka teneprum nesala neitamai di, mali kun keca yuma wepra dokoteprumdi, dumsisi nesalapu kumumyopda, Yesus cap dipru dukdongopra teleppu kunkamrume.

Ukupra kunkamruma deiyoda ake. Ada, sun Yahudi yala nesala, ‘Nun mali keca, Allahdi gum kupra deipkamser’ tenen, Kaplemne Kalemna tep, domba poramidi, Allah kareramitopu, nun Kaplemne Kalemna domba utopu ngebo, Yesus Kristus konum popipa, nun yo pununa tep depka deiki di, nun mali kun keca konum gum kupra deipseue. Erdi konum telep kupra deipseua tep, sunda, nena gum roti, ukupu roti utopu, dumsisi nesala kumum ngeda, men tenepmarum dinin, Allah er kangeda, ‘Konum dumsisi kununge,’ pepra deipseudi, telepe teneserure.

8 Ange tep nengeda, pumun taru sun Yahudi yala nesala Kaplemne Kalemna taru di, nena deiyo keca kwamu roti dokotepitopu, nunda yu kuna cap, mali kun keca yala yuma cap tamkamepe. Tonda, sun pumun Yahudi yala nesaladi, nena deiyo keca men kwamu roti, nena gum roti, ukupungepu dapra jeramitopu, nun ukutaruda, mawa kuna pio gum dipapu, dumsisipu kupedi, Kristus pel dopseunge tep nengeda, kange deipra kunkamepe. Ne Paulusdi pepsene.

“Tali nyangdaramenge tep, wenepkamrume,” pepu upu

9 Uda, yuk upu ton pepkusene. Ada yuk taru sekeipsisi surat neitamai di aupu pepsisi. “Sun tali-tali nyangdarameng nesala cap, kikiman jen jepra, kikiman bukrap, upu talepra men kunkamrume,” pepsisi. 10 Aupu pepsisi ngeda, ‘Teka tenena gum nesala, mali-mali kuramenge nesala cap, kikiman pio men kunkamrum’ tenen, men pepsisi. Uda, angeda ware ka di kuptum do? Gume. “Teka tenena gum di, tali nyangdarameng nesala cap, tonda, ‘Bunga weika di doproptepe,’ tenenge nesala cap, mawa di tali peptapra, upula donge nesala cap, tonda, ‘Akecada nun nai bo Allah’ tenen, tali keca si eremenge nesala cap, pio tep, kikiman men kutume,” pepsetene teptoda, sun adipapu atuai mutu neitamai yuma men kutume. “Mali kunge nesala cap kikiman kuna meme,” pepsetene pangeda, dan mutu bena kutuma tep, peptene do? Gume, tuai mutu yuma mali kun nesala kununga cadi, ange tep men pepsisi.

11 Dinino, ukutaru pepmasen upuda, ake. Ada ware ngebo do, ware ner do, sundi, “Nunda, Yesus konum teka tenepmupke, Allah er nyapu kunupe,” pertamnung dinino, tek sisi ngeda, tali nyangdana cap, ‘Bunga weik doproptene,’ tenena cap, tali keca si eremna cap, yuk nesala tep luludina cap, mawa di peptapra, upula dorona cap, yu me kange yawaramne me jena cap, kunge nesalada, anesala cap kikiman men kunkamrume. Aneng cap kikiman bukra jen jena peda gume. Aneng tapra, pio mepronkamrume. Sun cap kikiman kuna gume. Deiyoda, ‘Nunda Yesus tep teka tenenupe’ pertamnung dinin, sun kunge kecada mali tupa kununga tep pepsene.

12 – 13 Uda, kapul teka men tenepmengepa, Allah er nyapu men kunge nesalada, ne warya deiyo deiki di, sun aneng tep upu lepsisikra bokeiptene do? Gume. Aneng tep nengeda, Allah teka men tenenge nesalada, sunda bura tarato kunge nesala cadi, Allah er dipapu sun tep, upu lepsisikra bokeipredi, wenepkamre. Ukupkamre dinin, sun ati neitamai utopu nesalada, Yesus teka tenepipa, Allah er nyapu kunung dinin, mali tupa kunge nesala tep nengeda, sundi upu lepsisikra bokeipmumdi wenemkamrume. Atep, Allah upu neitamai peseretopu kunkamrume. Aupuda ake.
‘Tupa-tupa mali kurur ngeboda, sun kan-kan di bura tara dokotepso.’ (Ulangan 17:7)