1 Corinthians 6

Nimi pangdangepa, upu bongdina cap, lepsisikra derina cap tep, pepu upu

1Ukuda yuk upu ton pepkusene. Ton ngebodi yuk ngebo tep, ‘Er mali kupnere’ tenen, yu kuprepa, upu deiki di pangdanmange taruda, ‘Anengda upu lepsisikra bokeipkamseng’ tenen, teka tenena gum nesala kori, kai perbarum ngeda, warya tep do? Telep ngeda, nun Allah teka tenenup nesala, nun dipapu, ‘Upu talepra lepsisikmepedi, upu bokeipkamape’ tenen, sun dipapu, sun kankan kunge nesala tep, upu talepra bokeiptumtoda, angeda telepe pua. Teka tenena gum nesala sun damai dubana meme. 2Sirya taruda, Allah tep teka tenenung nesaladi, nesala ban-ban yuma tep upu talepmengedi, “Anengda telep, anengda mali,” pepra, upu melipra bongdinkamenge ngeda, sun ton men gekeprumudi, men kael keprum do? Uda, sirya taru di gonga kepra, doryankamre taru yumada, Allah teka tenena nesaladi, melipra upu bongdina deiyo neng kunkamepe. Ukunkamnupa cadi, ukutaruda sun warya tep yambul mambulnge peda, upu talepmumdi, lepsikra men bongdidarum do?

3Tonda, ange utopu, nun teka tenenup nesaladi, im deiki pel melimna neng, malaikat sun mali kunge keca peda, nundi melipra upu lepsisikra bokeipkamep ngeda, men kael keprum do? Sirya taruda, nun yumadi ila mambul keca tep, upu lepsisikra bongna deiyo neng kunkamepa cadi, warya tep, atuai kupe taru neitamaida, tali yambulnge peda, upu talepra lepsisikra men bongdidarum do?

4Upu lepsisikra bongdina deiyo neng kunkamepa tep nengeda, sun kan-kan di, ton nengdi, ton neng tep, “Mali kupmasenge,” pepra pangdange pangeda, sun kan-kan di teka tenena nengpu wepra deipmumpa, upu talepra lepsikamenge. ‘Anengda nimi deiyo neng gum cadi, sun ila mambul gume,’ teneprum neng peda, eremna telepe. Sunda teka tenena neng kununga tep pepne. Dinino, sun pakdamum taruda, aupu lepsisingna tep nengeda, Allah tep, teka tenena gum nesaladi, ‘Upu lepsisikra bokeipkamseng’ tenen, sun damai bana gume.

5“Teka tenena neng dinin, ila mambul gum neng peda, eremna telepe,” pepmasenada, ‘Gekepmumdi, ali dakamrum’ tenen, pepmasene. Teka tenena neng butene di, mali kange doupra, pakdarenge pangeda, sun kan-kan di, tenpu kael keamu ngebo, aupu talepra lepsisikmanto ngebo, tenpu pe ton tek sisi men kurur do? Angeda men kupmanto tenepne. 6Upepmasen dinino, sun neitamai di ton teka tenenge nengdi, yuk teka tenenge neng tep, dopra bangedi, ‘Anengdi upu lepsisikra bokeipkuseng’ tenen, upu lepsisikra bongdina deiyo neng dinin, teka tenena gum nesala damai dubanunge. Ange kurum ngeda, pio mali kurume, pepsene.

7Uda, konum jenek kupsere. Ton nengdi, yuk neng tep, “E, sundi mali kupmasenge,” pepra, yu kuprepa, upu deiki pangdangedi, upu lepsisikra bongdina deiyo neng damai dubarumnge deiki di, konum kael kepsene. Allahdi, ‘Ne nyapu telep kupra kunkamenge,’ teneamseu ngeda, konum tapra, tali-talipu kurume. Ukurumnya di, mali kurume. Telep ngeda, yuk nengdi sun tep mali kupsenge pangeda, tali dimpeprappu, bouna di kunkamrume. Sun keca upula dopropsengopda, tali kange doupra, ‘Dadoprapmang ngeda, dakwapye’ tenen, dimpeprappu kunkamrume. 8Telep ngeda, angepu kutum dinino, ukuna gum di, sundi, sun weit yapu utopu kuprap, kikiman teka tenenge nesala tep, mali kuna cap, upula dorona cap, mali kudarume. Sunda Yesus teka konum teneamrum nesala kuruma cadi, angeda pio mali kurume, ne kayapu. Ne Paulusdi pepsene.

9Ne kayapu, apepkusen upu men kael keprum do? Gume, sun tupa-tupa mali kunge nesalada, Allah lyepseredi talenkamser ngeda, anengda, men doproptenge. Lyepseredi akeca-keca yuma pio talenkamser taruda, er cap pio telep kunkamep dinino, sun akunge nengpuda gume. Mok upu peipdamumdi, tali teka men tenenkamrume. Pio tek sisingepu pepsene.

Sun tali-tali nyangdange nesala cap, yuk tali keca si eremenge nesala cap, ner konum doami dinin, yuk nerapu tali nyangmenge nesala cap, ‘Co bo karepkamseng’ tenen, nimidi nimipu nyangdange nesala cap, uda nimidi nimipu tep, tonda, nerapudi nerapupu tep, nyangdange nesala capda, Allah lyepseredi, talenkamserai men wektenge.

10Uda, upula donge nesala cap, ‘Bung weik doproptepe’ tenen, pio putare nesala cap, yu me kange yawaramne me jen nesala cap, yuk neng tep mok upu pepra luludin nesala cap, ‘Co bo weik dopropkup’ tenen, mawa di tali upu peptapra, kuramenge nesala cap, aneng yumada, Allah lyepredi men talenkamre. Sun akunge nesalada wenepra tapkamre.

11Amali kun keca yuma pepmasenada, pumun taru sun Korintus mutu nesala, sun peda akeca utopu kuramrum dinino, nun Deiyo Ngebo Yesus Kristus er si deiki cap, Allah er Lek Sambala pel dopseua cap deiki di, Allah konum telep kupra deipseue. Ada, mali keca talepmengedi, me kuramengtopu, Allahdi nun mali kun keca yuma gum kupra deipseudi, ‘Ne mawa nesala, ne nyapu kunkameng’ tenen, anupra wepseudi, telep kupra deipseue. Ukupseua deiki di, Allah er kangeda, ‘Anesalada, konum dumsisipu kununge. Sunda, telep nesala kununge,’ pepra deipseudi, ukutaruda, kange deipra teneserure.

“Sun nongda, Allah er ati utopu kurura tep, dumsisipu kunkamrume,” pepu upu

12Ton nesaladi upenunge. “Ware kun keca do yuma, nun kange dipu tenenup keca yumada, tali lupra kutepe,” penung dinino, ne Paulusdi upepsene. “Nimi kurameng keca yala-yala yumada, tali kupnepa, telep men kweipneredi, men melimkamnere.”

Ange utopu yuk nengdi upenunge. “Nun tenepmepe keca yumada, ware nengdi, ‘Meme,’ pepsetengepa, tali lupra men kuptepe do? Nun tenepetopu tali lupra kutepe,” penunge. “Ayumada, tali kuna pua,” penunge. Upenung dinino, nedi upepsene. “Ware keca do yuma, pio weika di kuramnepane, amendada, akuramne keca di, ‘Ateng koupnerepa, men lopdanun’ tenen, pio kalengdanune. Amali kun keca yumada, men makunkamser,” pepsene. 13Ton nengdi perameng upuda ake. “Allahdi, ‘Jen keca yala-yala yumada, nimidi jenkameng’ tenen, ketekepra deipseue. Tonda, nimi munduda, ada ‘Jen keca yala-yala yuma jenkameng’ tenen, nun mundu ketekeipseue,” penunge.

Upenung dinino, amenda taruda, Allahdi jen keca yala yuma pe, nimi mundu peda, gum kupra deipkamre. Allahdi nun nong ketekeipseua deiyoda, ‘Sun yumadi tali nyangdankameng’ tenen, men ketekeipseue. Ange gum dinin, nun nong ketekeipseua deiyoda, ‘Ne sipu erepra, ne nyapu kungedi, dumsisipu kunkameng’ tenen, ketekeipseue. Ange utopu, Allahdi nun nong tep tenesere ada, ‘Ne lyepnedi, pio talenkamne. Tonda, dipru dukdongopra kikiman kunkamepe,’ teneserure. Atep, tali nyangdana meme, pepsene.

14Nun Deiyo Ngebo Yesus depupa, Allah er ila puto deiki di gam bukra deipu. Tonda, nun depmepyopda, sirya taru di nun peda gam bukra deipkamsere. 15Sun teka tenerum nesala yumada, Yesus Kristus er nong utopu konum kumum ngeda, men kael keprum do? Ukunupa cadi, Kristus er nong utopu kunup dinin, ton tara bokra dopropnedi, tali-tali nyangamenge ner cap dukdongopkaman do? Gume, ne kayapu, angeda, pio mali cadi, angeda men kuptepe keca pepsene.

16Angeda pio men kuptepe keca dinino, ware ngebo do yuma, tali nyangamenge ner dopra nyakyopda, akuprea deiki di, sun nong tenpu kemdidarunge. Allahdi er kangeda, tenpu nong utopu konum kurerunge. Allah upu deiki di, aupu sekeipsei.
‘Sun butene yuk-yuk kurerung dinin, nong tenpu kunkamrenge.’ (Kejadian 2:24)

Aupuda akwapmara cadi, ‘Sun nyakdarengepa, nong tenpu kurerunge,’ pepmasenada, tali men pepsene. 17Dinino, ware nesala do yuma, nun Deiyo Ngebo Yesus tep, teka tenepmengedi, sun kange er deikipu deipmengopda, er cap, sun cap, sun kange dipru tenpu kununge.

18Ange tep nengeda, tali nyangdange keca yumada, pio men kunkamrume. Yuk mali keca kuramenge ngeda, sun nong bura tara utopu kunung dinino, tali nyangdangedi mali kunge kecada, sun pedi sun pe nong neitamaipu, mali kudidanunge. 19Ne kayapu, sun moupra men kael keprum do? Sun nongda, ada Allah er Lek Sambaladi wekra kuserura cadi, er ati utopu kurume. Allahdi er Lek Sambala karepseupa, nun dipruai wekra kuserura tep, sunda, er ati utopu kurume pepsene. Ange tep nengeda, sun nongda, sun kange dipapu tenerum keca, ‘Tali lupra kuptepe’ tenen, men kunkamrume. Allahdi sun nong taleserya cadi, sun nongda, sun pengepu gume. Allah erngepu kurume.

20Allah er ila mambul keca deiki di kunupseua tep, er mawa nesala konum kurume. Ange tep nengeda, sun nong cap, sun nong deiki di kunkamrum keca yuma cap, ayuma deiki di, ‘Allah er sipu erepra, er teppu gispal donkamepe’ tenen, dumsisipu kunkamrume. Ne Paulusdi pepsene.