1Cor 7 | XteSC | STEP | Ukuda, sun surat sekeipneruma deiki di asipetepnemum upuda pepkusene. Tenpu ngeda ake. Ne kangeda, nimidi ner men doptengedi, kaberpu pio kutengopda, pio telepe, tenepne.

1 Corinthians 7

Paulusdi ner dona tep, pepu upu

1 Ukuda, sun surat sekeipneruma deiki di asipetepnemum upuda pepkusene. Tenpu ngeda ake. Ne kangeda, nimidi ner men doptengedi, kaberpu pio kutengopda, pio telepe, tenepne. 2 Ukupra tek sisi tenenun dinino, ukutaruda, nesala ban-ban yumadi, tali-tali nyangdana pio weika di kununge. Ukununga cadi, ‘Weika di ton cap ukupnung’ tenen, ne kange tamupnedi, yuk upu pepkusene. Telep ngeda, nimi yuma cap, nerapu yuma cap, tenpu-tenpu dinin, adipapu dopdangedi, kikiman kunkamenge.

3 Ner dopu ngebodi, er pe ner tep, ‘Nyaktene,’ tenepre taruda, er dopu nerdi adipapu, “Telepe,” pepmemetue. Ange utopu, nimi dopu nerdi er apu bo tep, ‘Nyaknetue’ tenen, putapre taruda, er dopu ngebodi adipapu, “Telepe,” pepmemetue. Telep ngeda ange pua. 4 Nimi dopu ner, er nongda, er tenpu dipapu men talerure, er nengedi ton er ner talerure. Ange utopu ton, nerdi er dopu ngeboda, er nongda, er tenpu dipapu men talerure, er nerdi ton er apu bo talerure.

5 Ner dopu ngebodi do, nimi dopu nerdi do, utotopu, akeca putarepa, moropmengopda, “Gume, ne songe, men kupkune,” pepra men tapdaretenge. Angeda men kunkamrume. Dinino, tenpu deiyo tep nengeda, ange pepdaretenge. Ada, sun kikiman upu talepdarengedi, “Gume, ukutaruda, yuk keca yuma tenena gum dipapu, Allah tep moronapu kunkamna cadi, akeca dakwapmarepnen, ke taru tep, mesumpu kuna telepe,” pepdaretenge. Dinino, Allah mororamumyanen, konum kupmum dingeda, kange di tamupra kikiman kunkamrume.

Angeda tali tep men pepsene. Ada, sun aneng butene di tapdarengepane, tumi denge weik konum kupyopda, akeca pio tenepra putapsere taruda, Kain Jen Ngebodi dipru gidoserepa, akeca tep dipru engepseryopda, yuk nesala cap tali upula nyakdarumdi, mali kupruma tep pepsene. Atep sika di yuk-yuk kuna gume. 6 Ayuma pepmasenada, “Tek sisi sun yuma adipapu kunkamrume. Yuk gume,” pepra, mem upu utopu sun deiki men pepsene. Sun namna cap, makuna cap tep, aupu pepmasene.

7 “Ner donada, telepe pua,” pepmasen dinino, ne kangeda, Allah er puto karepneua deiki di, ner men dopsi dinin, puto kupra dumsisipu tupa kunetopu, ‘Nimi yuma utopu kuptengetoda telepe,’ tenenune. Utenenun dinin, Allahdi yuk nimi yuma tep, ‘Kaber nengpu pio kunkameng’ tenen, er puto ne karepneua utopu men karerure. Ton neng tep nengeda, aputo kareserure. Yuk neng tep nengeda, ‘Yuk pel donkamneng’ tenen, yuk puto deiyo keca karerure.

8 Uda, sun ner men domenge neng cap, nimi men domenge nerapu cap, tonda solu nerapu cap tep, aupu pepkusene. “Ne kaber ngebopu kunetopu, sun peda, kaber nesala utopu kutumdi, Allah er pelpu dotumopda, ange telepe,” penune. Ne Paulusdi pepsene. 9 Upenun dinino, anesalada, ‘Uo, nun dipru kalengdanada, puto men kunupe. Mesumpu kuramepepane, akeca pio putapsere taruda, telep kupra puto di men kalekdatepe. Ne mali kupnun’ tenen, mali kange doupmenge dingeda, kaber nesalapu men kunkamenge. Ato nesalada, ner dona telepe. Akeca pio putapre nesalada, ‘Mali kupnung’ tenena tep, ner dona telepe pua.

10 Uda, sun nerapu konum domenge neng cap, sun nimi konum domenge nerapu cap tep, aupu pepsene. Tek sisada, nedipu gume, nun Deiyo Ngebo Yesusdi upeserure. Ware nerapu do yuma, sun konum nimi domenge nerapuda, sun neng yapu tamna meme. 11 Nerapu konum nimi doami dinin, tamenge nerapuda, yuk neng ton pio men doptenge. ‘Pio kaberpu men kunkamne,’ tenepredi, er men di konum domu nenge bo cap, upu taleprengedi, sun tulum kwamrenge jenek pepra loptaprenge dingeda, tamupra er men di domu nengepu dona telepe. Ange pepmasentopu, nimidi sun doamenge nerapu tamna meme.

12 Uda, yuk nerapu cap, nimi cap tep aupu pepsene. (Ada nedi, “Yesusdi peipseu upu ake,” pepra men pepsene.) Ware teka tenepu ngebo do yuma, er teka men tenemu taru di domu nerda, teka tenena gum ner dinin, anerdi, “Nun kikiman kuna telepe,” pepra kange deipra kuryopda, angebodi aner men tapkamre. 13 Ange utopu ware ner do yuma, er teka tenemu taru di domu ngeboda, teka tenena gum ngebo dinin, angebodi, “Telepe, nun kikiman kunada telepe,” pepra kange deipra kuryopda, anerdi angebo men tapkamre.

14 Apepmasenada, tali tep gume. Deiyo ake. Allah er kangeda, ‘Anerapuda, pumun teka men tenemi taru di, teka tenena gum neng domi dinin, ukutaruda anerapu teka tenepneia cadi, sun neng yapu peda, ne mawa keca kunkamenge. Sun kikiman kunungada mali gume,’ teneserure.

Ange utopu, anengda pumun teka men tenemi taru di, teka tenena gum nerapu domi dinin, ukutaru Allah tep teka tenepya tep nengeda, sundi domi nerapu peda, Allah er mawa keca kunkamenge. Sun kikiman kunungada mali gume. Allahdi ukupra teneserure. Allahdi ange men teneptu teptoda, tali nyangtamne nerapu cadi, sun derinung nyapuda, mali nyapu kutenge. Dinino, ukutaru Allah tep teka tenepya tep nengeda, Allahdi ange teneserura cadi, Allah er kangeda, ‘Anesala sundi derinung nyapu peda, telepe pua,’ teneserure.

15 Nimi do, nerapu do, teka men tenenung dinin, sun teka tenerum nesala men di konum doamrumpa, “Nun kikiman kunada, telepe,” peptengopda, telepe pua. Tamna meme. Dinino, sun teka men tenenge nerapu do, nimi do, sundi, “Nun gume, sun tapra yuk bendopkamepe,” pepra tapsengopda, sun teka tenerum nesaladi, “Telepe dabeso,” penkamrume. Pio palepra men donkamrume. Allahdi nun tep, ‘Yu kupra pangdana gum dipapu, kange deipra teleppu kunkamenge,’ tenepseue. Atep, autopu nengdi bengopda, ton cap palepra dombenkurum do, gum do men pepsene. Sun kange dia. 16 “Sun teka men tenenung nimi cap, nerapu cap, men tapkamrume,” pepmasena deiyoda, sun walwal dinin, sun teka tenerum nesaladi, dumsisipu kumumya deiki di, anesala disengedi, amenda teka tenenkameng do, gum do? Angeda men teniptepe cadi, konum dopdanamum nesalada, tamdana gume pepsene.

Paulusdi, “Malinge gum dinin, men di domsi pel tapra, yuk pel dopra kunkamne do, tenena gume,” pepu upu

17 Arup pepmasen upu akwapmarepane, yuknge ton pepkusene. Ada, sundi asipetepnerum ngeda pepkusene. Yesus kapul teka men teneprum taru, mali kuna gum dinin, pel dopra kuramrumdi, teka konum teneprumyopda, ‘Men di domsi pel tapra, yuk pel dopra kunkamne do?’ tenena gume. Allahdi, ‘Akun keca cap, apel cap donkamenge’ tenen, wepra deiamseutopu, angepu talepra kunkamrume pepsene.

Ange pepmasentopu, ban-ban yuma Allah tep teka tenenung nesala yuma tep, “Ukunkamrume,” pepra aupupu peterepnepa, gekepra dombanunge.

18 Ukupmantonge ton pepkusene. Tenpu Yahudi yala ngeboda, Yesus kapul men teka tenepre taruda, Yahudi yala nesala kuramengtopu, er den bam bol konum sekyopda, amenda Allahdi er tep upuprepa, teka tenepyopda, erdi, ‘Uo, den bam bol deiki tarange sekneiya dilada, ware kuprap di gum kupnetu do?’ tenen, mali kange douna gume. Ange utopu, yuk ngeboda, teka men tenepre taruda, er den bam bol men sekya tep, konum teka tenepyopda, ‘Uo, ne den bam bol deiki tarange seknetenge,’ tenena gume. 19 Den bam bol deiki tara sengmenge nge pe, sengna gumnge peda mambule gume. Allahdi, “Ukunkamrume,” pepra, er upu kareseredi peseretopu, aupupu gekepra dombanapuda, angeda ila mambule. Yuk keca yumada, mambule gume.

20 Ware nesala do yuma, Allahdi ‘Angebo teka tenepkuner’ tenen, upupserepa, mali kuna gum dinin, teka tenepmenge taru, pel dopra kuramengtopu, angepu talepra pel donkamenge. 21 Ukupmantonge pepkusene. Sunda, co bo deiki kunupmengedi, ^{▼▼Pumun taru, co bo deiki kunumami nesalada, isomka nengdi, pio kankan kurami nesala tep, co bo deiki di kunumamipa, akankan kurami nesaladi, sun isomka nesala tep, sun pel talipu pel dorami. Tonda, lap pena upuda, nomor 36 dirume.} “Pel dopseo,” pepra pel mesum dipapu dorameng nesala kuramrumpa, Allahdi, ‘Teka tenepkameng’ tenen, upupseupa, teka teneprum do? Pel dorum dinin, kunumna keca men dororum nesala kurum dingeda, sundi, ‘Uo, nunda, co bo deiki kunupsei neng kunupa cadi, ware kupkup do?’ tenena gume. Mambul kange men doupkurume. Kunupsei nengdi tapsetengepa, tali nesala kutumopda telepe, dinino, men tapsengepa tali kange doupra men kutuma peda telepe pua. Angeda, mambule gume.

22 Aupuda tali men pepsene. Deiyo ake. Co bo deiki kunupmengepa, pel mesum dipu donung dinino, Allahdi upuprepa, teka tenepmengopda, adeiki di nun Deiyo Ngebo Yesus lortamserepa, sun dipru neitamaida, tali lupra embarameng nesala utopu kununge. Ange utopu, ton nengda, tali lupra embarameng dinin, Allahdi upuprepa, teka tenepmengopda, adeiki di Kristus er pel melimna neng kungepa, erdi pere upupu gekepra, er pelpu donunge. Tali men kununge. 23 Allahdi ila mambul kunumna weik keca deiki di kunupseua tep, yuk tali nesala amutara bukrap, sun pepsengetopu, ‘Aupupu gekepra, sun pelpu donkamepe’ tenen, men kunkamrume. Allah er dipu taleserure. Nimidi gume.

24 Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Nun yuma kuramepepane, amenda taru Allahdi nun yuma tep, asipseredi lepsisikra upu bokeipkamsera cadi, Allahdi sun tep, ‘Teka tenepkamneng’ tenen, upupseu taru mali kuna gum dinin, pel dopra kuramrumnge utopu, apelpu doprumdi, Allah cap dipru dukdongopra kunkamrume.

Nimi cap, nerapu cap kapul men dopdanamenge nesala tep, pepu upu

25 Uda, sundi, “Nimi cap, nerapu cap, kapul men dopdanami nesalada, ware kunkameng do?” pepra, asipetepnerum ngeda, ne Paulusdi pepkusene. Anesala tep nengeda, nun Deiyo Ngebo Yesusdi, “Ukupkurum, ukupkurum,” men pepneu dinin, Allahdi bicaue tenepneudi, meliamneupa, adeiki di teka tenepmanto ngebo kununa cadi, ne kange dipu tenepsi ngeda, pepkusene. 26 Uda, ne kangeda, sirya taru ikin weik kupkamsere ngeda, konum damai kupmasera tep, ikine kunupe. Ange tep nengeda, sun ukutaru kumumnya utopu, ukuprap pu kunkamrume. Utenesenune. 27 Atep, ner konum doprum nimi cap, nimi konum doprum nerapu cap, ‘Nun nerapu tapkup do? Nun nenge yape tapkup do?’ tenena gume. Sun nerapu kapul men doprum nimida, ‘Dan ner dopkaman do?’ tenen, mororbana gume. Ataru konum kurumtopu, apu kunkamrume.

28 Ukupra pepmasen dinin, sun nimidi amendada ner doprumyopda, mali men kupkamrume. Tonda, kaber nerapudi, amendada nimi doprumyopda, mali men kupkamrume. Mali men kuprum dinino, tuai mutu kunkamep taru neitamai di, nimi cap, nerapu cap dodaramenge nesalada, amenda taru kange mun keca weik kunkamra tep, ‘Amenda taru ikin keca weik kupserur’ tenen, pepsene. ‘Kanampu tupa kutumpa, ikin men kunkamser’ tenen, pepsene.

29 Ne pepmasen upu dukdongopra jenek kupra lap pepkusene. Deiyo ake. Ada Yesus teka tenepruma tep, nun weite-du utopu kurum nesalao, sun nimi pe, nerapu peda, sun yuma tep pepsene. Yesus tamupra doryankamser taru sirya taruda, konum damai kupmasera cadi, ‘Tuai mutu kunkamep taruda, konum gawal dakbanmape,’ tenepmana tep, upepsene. Ukutaru di dipra, doryankamser taru neitamai yumada, ner konum domi nengdi, sun nerapu putarur kecapu tep, ‘Ware kupkun do?’ tenepra, pio tenenapu men kunkamrume. Sun kanam neng tenerameng utopu, yambul utopu tenenkamrume. Deiyoda, Yesus yankamre ngeda, ila mambule. Yuk tuai mutu neitamai kure keca yumada, yambul mambule atep pepsene.

30 Ange utopu, sun ikin kange doupra engemum nesalada, engena gum di, kange deipra kunkamrume. Sun kange deipra pingpinga kurum nesalada, ange yapra, mesumpu tali kange doupra kunkamrume. Sun bunga kunupra doramum nesalada, ‘Akunupmanu kecada, ke tarupu dopropmane’ tenen, kunkamrume.

31 Aupu yuma pepmasenada deiyo ake. Ada, ukutaru dipepa, atuai mutu kure keca yumada, ataru kuretopu, pio weikanun ton cap men kunkamre. Akeca yuma, konum gum kupbanmara tep, aupu pepmasene. Ange tep nengeda, ware yala keca do yuma, tuai akwapre keca yuma talepra, pel doramenge nesala yumada, akeca cap, apel cap, angepu tenepra men kunkamrume. ‘Akeca-keca yumada, ke keca pua,’ tenepra kunkamrume.

32 Uda, nimidi ner dodana upu tep ton cap pepkusene. Sirya taru konum dam yakanmasera cadi, sundi akeca-keca yuma tep, ‘Uo ware kupkun do?’ tenen, ‘Mambul kange doupra men kunkameng’ tenen, putanerepa, pepmasene. Ner kapul men dopmenge nengda, Yesus er pelpu tenepra, er keca teppu pio moupra tenenapu kununge. Ada sunda, ‘Uo, ware telep pel doptenepa, Allahdi kange deipkamner do?’ tenenapu kununge.

33 Kaber nengdi ukunung dinino, ner konum domi nengda, tuai mutu kure keca, akeca-keca tep, mambul kange doupra kununge. Ada, ‘Uo ware pel dopkun do? Ware keca karepnepa, ne nerdi kange deipkamner do?’ tenenunge.

34 Ukupra tenenunga deiki di, ‘Mambul weik kecada ake’ tenen, tenepetepmenge pangeda, sun kange butenemrure. Kange bongtonapu kununge. Ange utopu gum dinin, sun nimi men domi nerapu cap, kaber nerapu capda, nun Deiyo Ngebo Yesus, er pelpu tenepra, er keca teppu pio tenenapu kununge. Sun kangeda, ‘Gume, nun nong cap, nun kange dipru cap yuma, Allah er pelpu dopkamep’ tenen, ‘Sun kange er deikipu derinkamepe,’ tenenunge. Utenengedi ukununge. Sun kanam nerapuda, ukunung dinino, nimi konum domi nerapuda, tuai mutu kure keca tep, mambul kange doupra kununge. Ada, ‘Uo ware pel dopnepa, ne nengedi kange deipkamner do?’ tenenapu kununge.

35 Uda, ne kayapu, nedi, ‘Gume, sun putapsere kecapu kupmum’ tenen, nedi, ‘Upu sekune’ tenen, men pepmasene. Ange gum dinino, ikine kunkamser taru neitamai di, kange bongtona gum dipapu, ‘Allah er pelpu donkamepe. Er mambul kecapu tenepra kunkamepe,’ tenepra, dumsisipu kupmengedi, ‘Sun keca yuma teleppu kunkameng’ tenen, pepmasene. Arup pepmasen upu deiyoda, ange pua, yuk ton gume.

36 Aupu pepmasen dinino, ange ton pepkusene. Ware ngebo do yuma erdi, ‘Aner doptene’ tenen, mun perur ner tep, ‘Uo konum doptene’ tenen, ‘Pio putapnerepa, mali kupnun,’ tenepyopda tonda, ‘Ne mun pene nerda, konum wisi deipbanmara cadi, konum doptene,’ tenepyopda, angeda mali gume. Aner konum doptue. Adeiki di mali men kupkamre.

37 Dinino, yuk ngebodi, ‘Gume, anerda mun pene dinino, Allah er kecapu tenepra pel donkamne,’ tenepre ngeboda, yuk nengdi er tep, “Nundi ukupkurum pepetopu adipapu kupkurume,” pepra puto di men pepmenge panenda, ner putaramrea peda, ‘Ner tali nyaknun’ tenen, er pedipapu er pe tep, kalekdanmanto ngeboda, angebodi ner men doptua peda, telep dipu kunkamre. Ange deiki di, mali men kupkamre. 38 Ange tep nengeda, ne kangeda ake. Kaber ner dopre ngeboda, mali men kurure. Telep kupkamre. Dinino, ner pio men dopre ngeboda, ne kangeda, erdi ila telep kupkamre.

39 Ware nerapu do yuma, sun domi nimi konum depmengopda, konuma. Konum depmara cadi, aner er tenepre ngebopu doptue. Yuk ngebo doptu dinino, tali kure ngebo, teka men tenere ngebo gume. Allah konum teka tenepu ngebopu dona telepe. 40 Ne kangeda, er nenge depyopda, telep ngeda, solu nerpu pio kutue. Solu nerpu kutuopda, pio kange deipra kunkamre. Nimi ton doptuopda, yambul kange ikin capdi kunkamre. Tonda, ne kangeda, aupu pepmasentopu, Allah er Lek Sambaladi ange utopu tenerure, tenepne.